Lókas 4

Sátan ɛ́ ɛ́ ɓúɛl Yésus

(Mat 4.1-11; Mák 1.12-13)

1Ɗɛ Yésus ā ɓɛ́, ɛ mú lwóndlā nɛ Áchāāchǎnj Sisímb ékɛ́, Ɛ ɓúzī ɓúlǎ ɓɛ̌ mwɔ̄ŋ Yuuɗɛ̂n. Áchāāchǎnj Sisímb ɛ ɓúkā tɔ́ nɛ nɛ̄ ɓɛ̌ sɔ̄sā sī. 2Í pyaāŋ ɛ́ mú tí ɛkɛ̄ thaŋgɛl mɛ́lú mɛkām mɛ̄ná ta ɗɛ íɗóó nɛ mɛɗyūū twóó mɛphūɛ́l mí Sátan ê. Phúla mɛlú mɛkām mɛ̄ná, ɛ ɓúzī gwók zâ. 3Sátan nɛ nɛ̄ nāá: «Í ɓɛ̄ nāá, u Mwán mí Zɛɛ̄mb nâk, linj ɛ́kɔ̄k lík iɗóó.» 4Yésus ɛ ɓúzī ɓɛ́s nɛ nɛ̄ nāá: «Í tilā tí Mɛkanā mɛ̄ Zɛ́mb nāá: “Mot a á dā cyǔk tɔɔ̄p ɛ́ɗēē lɛ́ nɛ lɛ̂.”»

5Sátan ɛ ɓúzī ɓākā nwɔŋ ɛ́ náǎŋ, ɛ tɔ́ nɛ nɛ̄ ɓɛ pák kó. Títɛɛ̄l ŋgwát ɛ́, ɛ lyākɛ̄l ɛ́ idə́ə́ ɓɛ̄ íɓwaās ɓyɛ̂ɛsa. 6Nyɛ nɛ nɛ̄ nāá: «Wā ā ɓɛ́ɛ́ ɛ́, idə́ə́ ɓīnɛ́ɛ̌ŋ ɓyɛ̂ɛsa, myam ɗí nɛ ɓyɛ̂. Mi nɛ də́ə́ ɛ́jüe mót mí kám ɔ̂. 7Ú wā kút mɛ́ mɛɓɔ̄ŋ nâk, má á jüe ɔ́ idə́ə́ ī ték ɓyɛ̂ɛsa, nɛ mɛnwɔŋ mɛtêk.» 8Yésus nɛ nɛ̄ nāá: «Ɛkɛ́l ɛ̄ mí Zɛɛ̄mb lí lɛ̄ɛ̄ nāá: “Dā ɗúɛl Ɗá Zɛ̌mb wɔ̄ nyɛɛmɛ̄t.”»

9Ɛ ɓúzī ɓākā nwɔŋ Yésus ɛ́, ɛ tɔ̄ nɛ nɛ̄ ɓɛ̌ Yotósalɛm. Ɛ tɛ̄l ɛ́ tí pyaāt ákóókónj njāā Zɛ́mb nyɛ nɛ nɛ̄ nāá: «Í ɓɛ̄ nāá u Mwán mí Zɛɛ̄mb nâk, ɓyēt nôl nyɔɔ̄ pyǎŋ ɓɛ̄ ɛ́kó, u zí tyáá ɓɛ sī. 10Tí ɛsú ɛ̄ nāá, í tilā tí Mɛkanā mɛ̄ Zɛ́mb nāá: “Zɛɛ̄mb á á thes ɓééŋgeles ɓɛ̄ tí ɛzī ɓakɛl ɔ̂.” 11“Ɓɛ̄ khɛ̄ɛ̄ ɔ́ tí mɛɓɔ̂ kámb nāá, koō wɔ́ wá a ɓwɔ̂ɔ tîndla tí ɛkɔ̄k.”» 12Yésus nɛ nɛ̄ nāá: «Í tilā tí ɛkɛ́l ɛ̄ mí Zɛɛ̄mb nāá: “Wa a ɓúɛl Ɗá Zɛ̌mb wɔ̂.”» 13Ɗɛ Sátan ā ɓɛɛ nāá, ɛ́ ɛ́ ɓúɛl Yésus mimbi myɛ̂ɛs ta ɓánda ékɛ́, ɛ ɓúzī tɔ́ ɛ́cetaceta, tí nāá, á á kā ɓwónd tel ɓīl ítɛ̂m.

Yésus ɛ́ ɛ́ nyɛl ísɛ̄ɛ̄ ɓyɛ̄ ɓɛ̌ Galilê

(Mat 4.12-17; Mák 1.14-15)

14Yésus ɛ ɓúzī süís ɓɛ pák ɓwǎs Galilê, lwōndlā nɛ də́ə́ Áchāāchǎnj Sisîmb. Tɔɔ̄p wɛ̄ ū ɓúzī lüiiaa tí pák ɓwaās ték wɛ̂ɛsa. 15Ɛ ɓú titɔ́ tí mɛphānj mɛ̄ míndakla, ɛ līlyākɛ̄l ɓót ɛkɛ́l ɛ̄ mí Zɛɛ̄mb. Ɓot ɓɛ ɓú sisyókɛl ɛ̂.

Ɓot o Nazalɛ́ ɓɛ́ ɛ́ lūm kɔŋ nɛ Yésus

(Mat 13.53-58; Mák 6.1-6)

16Yésus ɛ ɓúzī tɔ́ ɓɛ̌ Nazalɛ́ pyaāt ā ɓa ɓwɔk ê. Tí mwēs Saɓá, ɛ ɓúzī ní twóó phǎnj mindakla. Nɛ dɔ nāá, yā ɓɛ ŋgúma tíka tí ɛsú lɛ̄. Ɛ ɓúzī gbal tí ɛláŋ Ɛ́kɛ́l ɛ̄ mí Zɛɛ̄mb. 17Ɓɛ̄ ɓúzī jüe ɛ́ mɛkanā mí mgbɛ́sel mitɔɔ̄p mí Zɛɛ̄mb Izaî. Ɛ nwɔ́ŋ mɛ́, ɛ gûnj. Ɛ kɛ́ ɓyelǎ pyaāt ɗí tilā nāá:

18«Sisímb mí Zɛɛ̄mb í nɛ naām,

Ɛ tɛ̄l mɛ́ nāá, mi lɛ́ɛ mipwêepweē Tyaa Pɔ̂.

Ɛ thes mɛ́ nāá, mi zí í lɛ́ɛ́ nɛ mimbok nāá, ɓɛ̄ mú mitiā.

Nɛ ɛlɛ́ɛ́ ɓááchīm nāá, ɓɛ̄ ɓákā nyɛl ɛ́ɓɛɛ.

Nɛ ɛzī cis ɓɛ̄l ō ɗí tí mitūŋ ɓâk.

19Ɛ thés mɛ́ thɔ́k nāá, mi zí i lɛ́ɛ́ ɓót nāá, í í kúl mbú Zɛ́mb wā sá ɓɛ́ ɛnwɔŋ ê.»

20Phúla ték ɛ́, Yésus ɛ ɓúzī gwól mɛ́kanā mɛ̄ têk, ɛ nwɔ̂ŋ, ɛ jüē sɛ́l phǎnj mindakla. Ɛ ɓūlɛ̄l nól nyɛ̄, ɛ ɗí sī. Ɓot ɓā ɓɛ náǎŋ ɓák ɛ́, ɓɛ ɓú jijüák ɛ̂. 21Í náǎŋ ɛ́ kā lɛ́ɛ́ nɛ nɔ̄ɔ̄ nāá: «Pyaāt Ɛ́kɛ́l ɛ ɓí gwōk ɗék ékɛ́, í í lwónd mús tí ɛsú ɛ̄ ɓyɔ̂ɔ ɓót o ɗí tí ɛgwókɛl mɛ́ ɓâk.» 22Ɓɛ́ ɓyɛ̂ɛsa ɓā ɓɛ tí ɛlɛ́ɛ́ tɔɔ̄p mí Yésus, nɛ ɛpak mɛ́kɛ́l mɛ̄ lɛ̄m mā gbigbɔ̂m tí nup wɛ̄ mâk. Ɓɛ̄ ɓú lilɛ́ɛ́ nāá: «Syēék yá a ɓɛ̄ mwán mí Yósɛp ɛ?» 23Yésus nɛ nɔ̄ɔ̄ nāá: «Mi tí gú nāá, ɓyá á ku mɛ́ kaān nāá: “Ɗɔ̂kta, jwom nôl nyɔ̌ nɛ khul nyɔɔ̄.” Ɓī ɓākā lɛ́ɛ́ thɔ́k nāá: “Zí í gwók mɛ́pɔ́ mɔ́ tí isá ú sā ɓɛ̌ khandǎ Kapɛtnaúm ê. Í je thɔ́k nāá, u zí í ɓākā sá ɓyɛ́ wák tí khanda yɔ̂.”» 24Phúla ték ɛ́, nyɛ nāá: «Tí oceece, mgbɛ́sel mitɔɔ̄p mí Zɛɛ̄mb ā ā ɗūūlāā tí ɗɛɛ̄l lɛ̄. 25Thɔ́k ɛ́, mí lɛ̄ɛ̄ ɓén twóó oceece nāá, tí tɛ́m mí mgbɛ́sel mitɔɔ̄p mí Zɛɛ̄mb Éli, í i ɓɛ nɛ thūnd míkús mī ɓúá ɓɛ Ízaɛ̂l. Tí tɛ́m ték ɛ́, yā ɓɛ í í sá mímbú mīlɛ́l nɛ pɛ̂s, phī ta nɔ̂. Za nyī ɓúzī nyúŋgla tí kanda ték nyɛ̂ɛsa. 26Tí ɛkā ɓɛɛ nák ɛ́, Zɛɛ̄mb ɛ́ ɛ ɓyét míkús mī ɓúá myɛ̂ɛs myā ɓɛ ɓɛ̌ Ízaɛ́l ê. Ɛ dá kɛnd Éli ɓɛ kús mumá wā ɓɛ ɓɛ̌ Salɛ́pta tí cǐl ɓwaās Siɗɔ́ŋ ê. 27Í i ɓaka ɓɛ thɔ́k nɛ thūnd mízízaām ɓɛ Ízaɛ́l tí tɛ́m Elizé ā ɓɛ mgbɛ́sel mitɔɔ̄p mí Zɛɛ̄mb ê. Tí ɛɓɛɛ nák ɛ́, mot ŋgwát nɛ ŋgwát tí ndɔŋ wɔ̄ɔ̄ a a ɓye ɗom, phúla Nāáman mot Silí nyɛɛmɛ̄t.»

28Ɗakɛ ɓót ō ɓā ɓɛ twóó phǎnj mindakla ɓák ɓā gwôk mɛkɛ́l mīnɛ́ɛ̌ŋ ékɛ́, ɓɛ̄ dá gwók mɛ́ɓūk. 29Ɓɛ̄ gbâl, ɓɛ̄ gbɔ̄m nɛ Yésus tí khanda. Ɓɛ̄ tɔ̄ nɛ nɛ̄ tí khɛl ɛcók ɛ̄ ɓā sum ɗɛɛ̄l ɛ̄ Nazalɛ́ ték ê. Tí nāá, ɓá á sáŋ ɛ́zyóŋgɛl ɛ́ ɓɛ pák ɛ́cók ɗí tí ɗím ê. 30Ɛ dá thaŋ pāká nyɔ̄ɔ̄, ɛ kpâŋ.

Mot tí ithēsā ī ɓyǒlǎ sisîmb

(Mák 1.21-28)

31Yésus ɛ ɓúzī tɔ́ ɓɛ̌ khanda Kapɛtnaúm gūm nɛ Galilé ê. Tí mwēs Saɓá, ɛ līlyākɛ̄l ɓót ɓyɛ̂ɛsa ɛkɛ́l ɛ mí Zɛɛ̄mb. 32Ɓot ɓā ɓɛ ɓɛ́ ɛ́ kám wɛ̄ lyāklā, nɛ dɔ nāá, lyāklā wɛ̄, wā ɓɛ nɛ də́ə́ Zɛ́mb ā jüe ɛ ê. 33Í ɓyela náǎŋ ɛ́, twóó phǎnj mindakla ték ɛ́, í i ɓɛ nɛ ŋgúma mót tí ithēsā ī ɓyǒlǎ sisímb ā ɓɛ nɛ yɛ́ ê. Ɛ ɓúzī ɓó cīm, nyɛ nāá: 34«Úú! Yésus mot Nazalɛ̂, yɔ́ í yɛ̄ nɛ nēs? U ka zyē wák nāá wá á zī samb ɓés ê? Mā ā jōk ɔ̂, wɔ ɗí Áchāāchānj Zɛ́mb ā thes ɔ̂.» 35Yésus ɛ ɓúzī khákɔɔ nɛ ɓyǒlǎ sisímb têk, nyɛ nɛ nɛ̄ nāá: «Ɗyuɛ̌l nup wɔ̂. U gbɔ̄m tí nól mot ɔ́nɔ́ɔ̌ŋ!» Ɓyǒlǎ sisímb ték ī ɓúzī khɛnj ɛ́ sī, sɔ̂kphɔ̌mb mot nyɛ̂ɛs. Ī gbɔ̄m tí nól nyɛ̄ ta sá ɛ́ sínɔŋ. 36Ɓot ɓyɛ̂ɛsa ɓɛ̄ ɓúzī kám sá têk. Ɓɛ̄ jījīīlā pāká nyɔ̄ɔ̄ nāá: «Yúk í wɔ́ɔ́ mbi mɛ́kɛ̂l? Ɓɛɛká mot tí ɛlɛ́ɛ́ nɛ iɓyǒla ɓɛ̄ ísisímb nāá, ɓī gbɔ́m ê, ɓī ɓándā gbɔ́m tí də́ə́ yɛ̄ ɛ!» 37Í ɗyaāŋ ték ɓót ɓā nyɛl ɛlüii tɔɔ̄p mí Yésus tí cǐl ɓwaās ték yɛ̂ɛsa ê.

Yésus ɛ́ ɛ́ cǐs thūnd mímbɛ̂l

(Mat 8.14-17; Mák 1.29-34)

38Yésus ā da gbɔ̂m tí phǎnj mindakla ték ɛ́, ɛ kɛ́ ní ɓɛ̌ njāā mí Símɔn. Í ɓyela náǎŋ ɛ́, cǐ mumá mí Símɔn ā ɓɛ tí ɛgwók ɛ́kpay lɛ̄ ɛ́jwôo. Ɓɛ̄ ɓúkā jí nɛ Yésus nāá, ɛ sâ sísīnɔ̄ŋ tí ɛsú lɛ̄. 39Yésus ɛ ɓúzī lyáŋɔɔ tí mbɛ̂l. Ɛ lɛ̄ɛ̄ ɛ́jwóó ɛ́ ték nāá, lī ɗüís ɛ tí nôl. Títɛɛ̄l ŋgwát ɛ́, ɛkpay lɛ̄ ɛ́jwóó lī dá sí sî. Cī mí Símɔn ɛ dá gbǎl gbal ê. Ɛ nyɛ́l ɛ́ɓɛla nɛ nɔ̄ɔ̄.

40Tɛ́m ɗwóó lā ɓɛ lí í ɓíl ékɛ́, ɓot ɓā ɓɛ thɔ́k nɛ myɔ̄ɔ̄ mímbɛ́l mimbi myɛ̂ɛsa ɓák ɛ́, ɓɛ̄ ɓúzī zyě nɛ myɛ́ ɓɛ ɗá mí Yésus. Yésus ɛ ɓúkā nyɛl ɛ́ kɛl ɓɛ́ mɛɓɔ́ tí milô, ɛ jwóm ɓɛ̂. 41Iɓyǒla ɓɛ̄ ísisímb ɓī ɓú gbigbás tí mɛnól mɛ̄ thūnd mímbɛ́l nɛ ɛcicím nāá: «Wɔ ɗí mwán mí Zɛɛ̄mb!» Yésus ɛ ɓú ɗiɗyuu ɓɛ̂. Nyɛ ta ɓyét nāá, ɓɛ̄ lüíí ê. Nɛ dɔ nāá, ɓá ɓɛ tí gú nāá, Yésus ā ɓɛ Kūmāndē Zɛ́mb ā kɛs ɔ̂.

Yésus tí ɛlɛ́ɛ́ Pɔ́ twóó mɛphānj mɛ̄ míndakla

(Mák 1.35-39)

42Ɗɛ mɛ́lyám mā lyâmla ékɛ́, Yésus ɛ ɓúzī kpáŋ ɛ tɔ̄ ɓɛ̄ yīl pyǎt ta ɓɛ nɛ ɓot. Ɓot ɛ́ɓuuɓu ɓɛ̄ ɓúzī nyɛl ɛ́sáŋ ɛ̂. Ɗakɛ ɓā kɛ ɓyela ɛ́ ékɛ́, ɓɛ̄ zí sáŋ ɛ́ɓyee Yésus tí nāá, a a ɓwɔ̂ɔ ɓɛ́sa nɛ nɔ̄ɔ̄. 43Yésus ɛ ɓúkā lɛ́ɛ́ nɛ nɔ̄ɔ̄ nāá: «Mí dalǎ nɛ ɛkɛ̄ lɛ́ɛ́ thɔ́k Tyaa Pɔ́ Də́ə́ mí Zɛ̌mb ɓɛ ɓīl íkhanda. Nɛ dɔ nāá, Zɛɛ̄mb ā thes mɛ tí tɔɔ̄p têk.» 44Ɛ ɓúkā titɔ́ nɛ ɛlilɛ́ɛ́ Pɔ́ ték tí mɛphānj mɛ̄ míndakla mɛ̄ kanda Yuɗê.

Currently Selected:

Lókas 4: MPU

Highlight

Copy