Mattĕo 22

Dèphîcu Agèlè

(Lŭka 14.15-24)

1Kîd́ò̆ Jezŭ jî̄b́èhtî cè tòcò dègèlè abu tapla be gōjo, 2“Mò̄kho Ahtĭage mè acab́ô̆ Saphra amèni apho dèphîcu apwè̆ dèbwè nu. 3Kîd́ò̆ za hna zô zôpho tòcò lejo bija ab́èjo pwè̆bu tòcò nu; ḿî za da thaè le tòcò ńò. 4Tapla be za hna zô zôpho alewe tòcò kî cò d́ò, ‘D́ò̆sa ab́èjo tòcò gōjo, “Ja prahnè hwă htŏ dèadèò̆, jo bo kî dèphodèwe ab́ôatho tòcò lakhu htŏ, kîd́ò̆ dè ò prahnè htŏ gŏmimi lò, lebò̄ pwè̆bu dakha.” ’ 5Barasă bija anu tòcò dò sòkhĕńe ńò, kî hèphlòḿĭ tèpwè. Dèbwè le ahuklè̆, dèbwè le gwāadè. 6Kîd́ò̆ alewe tòcò phò hwă lōwa azôpho, zè mèjūlakăkè kî zè mèthĭ tèpwègè lōwa tòcò. 7B́ĕ Saphra thîhè̆b́è awîakè̆ nu, zè thèhtèsôgè; kîd́ò̆ za hnagè zi klĭ zè bwè tòcò le mèkè̆ bija amèthĭdè anu tòcò kî scwigè̄hò lōwa au nu. 8Mèhwă cò d́ò zô zôpho tòcò, ‘Dèphîcu pwè̆ ò prahnè htŏ hŏ, ḿî ab́èjo tòcò da tanigè ńò. 9Mègōnu, lebò̄ d́ŏ klèdisci tòcò abu nu kî thĭ gā pani bija arră lò̆, jobò̄ ze le pwè̆bu.’ 10Kîd́ò̆ zôpho tòcò hèhta klè tòcò abu d́ō za pani bija arră, awî wî, di wî ńò ńò, zo joplo lŏ lōwa kî tîtèḿè̆ pĕhta lōgè pwè̆bu.

11“Kid́ò̆ Saphra leb́anī abu cab́ô̆htè za gā tca bija aò pwè̆bu tòcò nu, kî za tcahtîgè bija tò thò aphîcu apwè̆ ascid́ŏ ńò dèbwè. 12Kîd́ò̆ cò d́ògè lōwa, ‘Athò, ńò dò thò dèphîcu pwè̆ ascid́ŏ ńò, ne lenī pwè̆bu cadè̄?’ Ḿî cò òzògè. 13B́ĕnu Saphra d́ò azôpho, ‘Cŏglo zu cu za kha kî htîphlòḿĭ cè d́ŏ akhlŏ dèkhiklè̆; d́ŏnu dèjodèha dè edithô̆edithè̆ kò̄ òkò̆.’ ”

14“Manè̄ kò̄ d́òdo dō, bija ab́èjo òè̆bwè, barasă bija ab́èrô ò tîkîpho lò.”

Dèd́è̆ B́èkja Dèila Caĕsarè Adèhmŭ

(Mărko 12.13-17; Lŭka 20.20-26)

15B́ĕnu Pharizè̆pho tòcò hèhta dòbò, cò d́òb́è hlè lōwa cab́ô̆htè zô kô̄ phîni lōwa adèkèḿè Zè dèjî̄b́è aklè̆ cadè̄ nu. 16Kîd́ò̆ za hna zò khò̆ bĭsèpho kî Èrŏdè abija tòcò le d́ò cè gōjo, “Sara, wi thîhè̆ tèpwè Ni ḿî ajî̄b́è danā, kî ad́ò̆sa Kib́ĭcè aklèthòò̆ dèdî̄dèhma abu kîd́ò̆ ada tca bija amūkă dèbwè̆ ńò; manè̄ kò̄ d́òdo dō, Ni ḿî bija adî̄ahma dèbwè. 17Mègōnu d́ō, No gomo cadè̄? D́ò̆sabò̄ wa tîkî. Kī ib́è Caĕsarè dèhmŭ ā? Ńò ā?”

18Ḿî Jezŭ thîhè̆ zè kî̆kkèmèhlò̆ d́ō cò d́ò lōwa, “Bija awî tòpòkho tòcò, thĭ b́o ma Ja tha nè? 19D́è̆lî̄ Jè dèhmŭ anikhĭ hô̆ tèb́e.”

Kîd́ò̆ bija lei Cè hô̆ denărio tèb́e. 20Kîd́ò̆ Jezŭ d́òge cè tòcò, “Ajo ḿî bò̄bwè ajò kî amiakhè̆ bwè?”

21“Ḿî Caĕsarè è̆,” bija d́ò Cè d́o.

B́ĕnu Cò d́ò bija gōjo, “Mègōnu Caĕsarè adè nu igebò̄ Caĕsarè; kîd́ò̆ Kib́ĭcè adè nu igebò̄ Kib́ĭcè.”

22Bija thîhè̆b́è dè ajo d́ō, cè tòcò htèdômô̄dahmăgè. Cè tòcò lè̄da cè kî ge thĭwīgè cè.

Dèd́è̆ Ab́èkja Dèhtaboge

(Mărko 12.18-27; Lŭka 20.27-40)

23Anu dini Saducè̆pho htè ad́ò dèhtaboge tò ò ńò tòcò nu, lehtî Cè kî cè d́è̆ lōwa gōjo, 24“Sara, Mŏzè d́ògè gōjo, ‘Bija dèbwè apho tò ò hnî̆ńò, zi gī thĭ d́ō, cè thè̆buwe gî̄ phî d́ò̆è zè hmè̆ kî zè mè lakwă d́ò̆è cè thè̆buwe akhwĭ.’ 25Ḿî d́ŏ cè klè̆ nu athè̆buwe ògè thăthô dèbwè, kîd́ò̆ adobwe dèbwè phî hwă ahmè̆ zi thĭgè; kîd́ò̆ zo pho tò ò ńò d́ō, zè lè̄ladanigè cè thè̆buwe zè hmè̆. 26Kîd́ò̆ dèphî̆htani athè̆buwe gībwè dèbwè, thŏbwè dèbwè kî alewe tòcò htô̆ dola thăthô dèbwè gōnu lò lò. 27Kîd́ò̆ agudulă amihmu ḿî ḿî thĭgè gè. 28Mègōnu d́ō, b́ĕ dèhtaboge ani nu, zi kîḿîkò̆ d́òlè̄ dèbwèbwè ahmè̆ bwè? Manè̄ kò̄ d́òdo dō, zi phîgè lōwa gŏ abwè lò.”

29Kîd́ò̆ Jezŭ d́òge cè tòcò, “Thĭ kèḿègè, thĭ di thîhè̆ Cè Tcahtĭ ńò kî Kib́ĭcè acô̆thèlè̆ ḿî danè̄ ńò acè̆. 30Manè̄ kò̄ d́òdo dō, b́ĕ dèhtaboge ani nu, bija gī dî phîkò̆ ahmè̆ awa ńò, kî bija gî̄ ḿîkò̆ acab́ô̆ Kib́ĭcè Amò̄khobwèzo tòcò nu. 31Kîd́ò̆ ab́èkja athĭ tòcò adèhtaboge nu, thĭ da phab́è dèjî̄b́è htè Kib́ĭcè d́ògè thĭ gōjo ńò ā? 32Cò d́ò, ‘Ji ḿî Abraham Ab́ĭcè, ki Izăko Ab́ĭcè kî Jăkòb Ab́ĭcè,’ nu ńò ā? Zi dî ḿî bija thĭ tòcò Ab́ĭcè ńò, ḿî aòthôḿô̆ tòcò Ab́ĭcè lò.”

33Kîd́ò̆ bija aboahò thîhè̆b́è ajo d́ō, zè htèdômô̄dahmă nigè lōwa adèthôdèthò̆ ale.

Dèhmèlado

(Mărko 12.28-34; Lŭka 10.25-28)

34Ḿî Pharizè̆pho tòcò thîhè̆b́è Saducè̆pho tòcò òdani Jezŭ ale d́ō, za ladēplo lōwa; 35Kîd́ò̆ cè klè̆ dèbwè, htè skrĭbāpho nu, d́è̆ Cè acab́ô̆ co b́o lōwa atha nu, 36“Sara, d́ŏ dèhmèla aklè̆ nu, adogudŭ ḿî d́òlè̄ dôhmô̆hmô̆?”

37Jezŭ d́òge cè, “ ‘Nè b́è b́èlò̄ ni B́ĭcè Dèado lŏ kî na tha, lŏ kî no kho na ă, lŏ kî nè dèthîhè̆.’ 38Ajo ḿî dèhmèla aŭsu kî adogudŭ dôhmô̆ nu. 39Kîd́ò̆ ahlò̆mò̄ dôhmô̆ ḿî acab́ô̆ anu dôhmô̆ nu. ‘Nè b́èlò̄b́è nè thè̆buwe acab́ô̆ ne ne nu.’ 40Mŏzè kî Prò̆fèt tòcò adèhmèla aglobu ḿî ajo gīhmô̆ lò.”

Saphra Dăvid Aphokhŏ

(Mărko 12.35-37; Lŭka 20.41-44)

41Kîd́ò̆ Pharizè̆pho tòcò ladēplo lōwa d́ō, Jezŭ d́è̆ cè tòcò gōjo, 42“Ab́èkja Krĭstu nu thĭ gomo cadè̄? Zi ḿî bò̄bwè apho bwè?”

Cò d́òge lōwa, “Dăvid apho.”

43Jezŭ d́ò cè tòcò, “Mègōnu d́ō, d́ŏ Spirito Tcahtĭ adèi tcahtîgè acè̆, Dăvid jo ma Cè ‘B́ĭcè,’ nè? 44Cò d́ò;

‘B́ĭcè dò jî B́ĭcè,

sańăbò̄ ju cukhò adèhtwè dòkhò̆

htô̆ jè mèphî̆hta Ne d́ĕd́ò tòcò Na khajāla nu.’

45Mègōnu, Dăvid jo cè B́ĭcè d́ō, Zi ḿî d́ò̆ lōwa aphokhŏ cadè̄?”

46Kî bija dèbwè̆ tò d́òge kèhtagè cè dèjî̄b́è dôhmô̆ ńò; kîd́ò̆ b́ĕnu dini phlò̆ ahlò̆mò̄ bija tè d́è̆ b́u be Cè dè dèbwè̆ ńò.

Currently Selected:

Mattĕo 22: GRNT21

Highlight

Copy