Mattĕo 23

Jezŭ Ithidĭ Bija Agè̄ Hèkô̆ Skrĭbāpho kî Pharizè̆pho tòcò

(Mărko 12.38,39; Lŭka 11.43,46; 20.45,46)

1B́ĕnu akhè̆ Jezŭ jî̄b́èhtî bija aboahò kî Zo bōhmubicè tòcò gōjo, 2“Skrĭbāpho kî Pharizè̆pho tòcò sańăò Mŏzè akătò bu. 3Mègōnu dè arră cò kò d́ò thĭ nu dòni kî mèkôbò̄ akă, barasă mè ḿè acab́ô̆ zè mè tòcò nu ḿè. Manè̄ kòd́òdo dō, cò d́ò, ḿî zè dè mè ńò. 4Manè̄ kòd́òdo dō, cô b́ôd́òglo dèb́i ahto bija ti b́i kèhta ńò nu kî cò d́ò̆hta bija aplĕb́akho, barasă cè dòkhò̆ nu cu cukońŏ dèmè̆ lò hnò̆nu ta b́azo ńò. 5Kîd́ò̆ zè mègè dèphîdèmè lŏcăcè nu, ḿî cab́ô̆htè bija gā tcahtîb́è anikhĭ nu lò; Manè̄ kòd́òdo dō, zè mè do akŏpho htè cè b́è̆nī Cè Tcahtĭ aglapho tòcò abu kî cŏwè̄glo d́ŏ ze mēbòlò, cu cu d́u lò kî zè mèzô zi scid́ŏ akăwī tòcò nu. 6Kîd́ò̆ cè b́èlò̄ alleaklè aŭsu gudu d́ŏ scibupwè̆bu kî kătò agudŭhta d́ŏ sinagŏgā abu nu. 7Kîd́ò̆ cè b́èlò̄ bija hnŭsè cè d́ŏ dèbwîdèsè̆ adaglākho kî bija jo cè Rabbi, Rabbi. 8Ḿî thĭ nu thaèni ḿè bija jo thĭ Rabbi ḿè. Manè̄ kòd́òdo dō, thĭ Sara ò dèbwè lò, kîd́ò̆ thĭ ḿî lŏ thè̆buthè̆we lò. 9Kîd́ò̆ d́ŏ Lākho jo, jo ḿè bija thĭ pa dèbwè̆ ḿè; Manè̄ kòd́òdo dō, thĭ Pa ò dèbwè lò, htè aò d́ŏ Mò̄kho dèbwè nu. 10B́è jo ḿè Sara ḿè ḿè. Manè̄ kòd́òdo dō, thĭ Sara ò dèbwè lò, htè Krĭstu nu. 11Thĭ klè̆ adogudŭ dèbwè gî̄ ḿîkò̆ thĭ zô. 12Kîd́ò̆ bija abè̄htajî ane dèbwèbwè, kè b́èkò̆ dèbè̄b́ôla, kîd́ò̆ bija abè̄b́ôla ane dèbwèbwè, kè b́èkò̆ dèbè̄htajî.

Jezŭ Htèkè̆ Bija Atòpòkho

(Mărko 12.40; Lŭka 11.39-42,44,52; 20.47)

13“Ḿî b́èkî thĭ, Skrĭbāpho kî Pharizè̆pho awî tòpòkho tòcò. Manè̄ kòd́òdo dō, thĭ glè̄b́i thĭwī bija Mò̄kho Ahtĭage akhaglè̄; thĭ thè̆ne thĭ dèlenī ńò kî thĭ ti i bija lenī ńò ńò.

14“B́èkî thĭ, Skrĭbāpho kî Pharizè̆pho awî tòpòkho tòcò. Manè̄ kòd́òdo dō, thĭ d́ò hwă dèthèb́è̆ ahtô̆ d́ō thĭ hjŭnīa tèpwè ahmugèmè tòcò ahiaphă; ajo acè̆ thĭ kèb́è cirrasô d́òkhlŏkò̆.

15“B́èkî thĭ, Skrĭbāpho kî Pharizè̆pho awî tòpòkho tòcò. Manè̄ kòd́òdo dō, thĭ hè khwè̆b́a pèllè kî khò̆kho cab́ô̆htè thĭ ge mèni bōhmubicè dèbwè nu; kîd́ò̆ ani Hwă d́ō, thĭ mèphî̆htagè cè Larrā apho azî̄ d́olĭ thĭ gīplabu dòkhò̆.

16“B́èkî thĭ, ad́è̆lî̄ bija klè adikhimē tòcò, htè ad́ò bija gô̄ hôd́ăwè̄ Zarādo alò dèbwèbwè, ḿî dèhôd́ă ḿî ahnahnă; barasă bija ahôd́ăwè̄ Zarādo ahtè̆ alò dèbwèbwè, agò̄ bò tèpwè. 17Thĭ bwètitŏ dikhimē tòcò; adokhlŏ ḿî d́òlè̄ dèdè̆ dè̆? Htè̆ ā? Mî̆dîḿî ńò Zarādo htè amè tcahtĭ htè̆ nu ā? 18Kîd́ò̆ bija dèbwèbwè gô̄ hôd́ăwè̄ dèthèb́è̆kho alò d́ō, dèhôd́ă ḿî ahnahnă. Barasă bija dèbwèbwè gô̄ hôd́ăwè̄ dèhlu, aò dèthèb́è̆kho nu alò d́ō, agò̄ bò tèpwè. 19Thĭ adikhimē; manè̄ kòd́òdo dō, ado d́okhlŏ ḿî d́òlè̄ dèdè̆ dè̆? Dèhlu ā? Ḿî̆dîḿî ńò dèthèb́è̆kho htè amè tcahtĭ dèhlu nu ā? 20Mègōnu bija ahôd́ăbòb́è ane dèthèb́è̆kho alò dèbwè, hôd́ăbòb́è ane dèthèb́è̆kho kî dèlŏcăcè htè aò dèthèb́è̆kho tòcò alò. 21Kîd́ò̆ bija gô̄ hôd́ăbòb́è ane Zarādo alò dèbwèbwè, zô hôd́ăbòb́è ze ne Zarādo kî aòi Zarādo dèbwè alò. 22Kîd́ò̆ bija gô̄ hôd́ăbòb́è ane Mò̄kho alò dèbwè, hôd́ăbòb́è ane Kib́ĭcè ana alò kî bija asańăò ana abu dèbwè alò.

23“B́èkî thĭ, Skrĭbāpho kî Pharizè̆pho awî tòpòkho tòcò; manè̄ kòd́òdo dō, thĭ hlu tèpwè zarahlè, phŭd́uhlè kî scî̆phozehlè athwèsci dèthwè̆, ḿî d́ŏ dèhmèla aklè̆ nu thĭ lè̄ladēdakè̆ ado d́okhlŏ tòcò, htè dèdî̄dèhma, dèkhòwèhmòb́è, kî dè è dè ò̆ tòcò nu. B́èkî thĭ gè̄ mè dè ahlò̆mò̄ tòcò nu nu, kî thĭ gè̄ tè bè̆lădabò̄ alekă tòcò ńò ńò nu. 24Ad́è̆lî̄ klè adikhimē tòcò, htè acî̆lakè̆ phuzohtĭ tèb́è barasă hjŭnīa gòlaŭ nu.

25“B́èkî thĭ, Skrĭbāpho kî Pharizè̆pho awî tòpòkho tòcò; manè̄ kòd́òdo dō, thĭ mèb́ăthab́ă tèpwè phală kî còlò akhlŏathăba, ḿî thĭ thabu ò pĕhtakî dèăwūăthèphlè kî dècîpôcîthŏ. 26Nè, Pharizè̆pho adikhimē, mèb́ă ŭsu phală kî còlò abu, cab́ô̆htè akhlŏ gā b́ă nu.

27“B́èkî thĭ, Skrĭbāpho kî Pharizè̆pho awî tòpòkho tòcò; manè̄ kòd́òdo dō, thĭ lakî lūkho, htè bija thôphrô b́ôthă tòcò nu, akhlŏ awîamòb́è bija agādŭ hŏ. Barasă abu dòkhò̆ ò pĕhta lū akhwiakhwa kî dè azizòmòthŏ amŏamo nu. 28Acab́ô̆ gōnu, akhlŏahu dòkhò̆ thĭ lî̄hta tèpwè bija ahlò̆mò̄ adî̄ahma, barasă abu dòkhò̆ thĭ ò pĕhta dètòpòkho kî dèkî̆kkèmèhlò̆.

Jezŭ D́òdòlò Cè tòcò Adècirra

(Lŭka 11.47-51)

29“B́èkî thĭ, Skrĭbāpho kî Pharizè̆pho awî tòpòkho; htè ab́òhta Prò̆fèt tòcò alūkho kî arawîramò bija adî̄ahma tòcò ab́ikho kî ad́ò, 30‘Wò kò̄ ògè ma hlĕ wi phĭ wu phŭ azôkhè̆ nu d́ō, tè b́è wè gè̄ mèkô ca kă ahlòla Prò̆fèt tòcò athwiahtĭ ńò,’ ad́ò do tòcò nu. 31Anu ḿî thĭ thè̆ne thĭ kha thè̆thî htè thĭ ḿî bija amèthĭgè Prò̆fèt tòcò aphoali nu. 32Mègōnu, mè htab́abò̄ thĭ phĭ thĭ phŭ aè̆. 33Galapumo akhwĭ, thĭ gè̄ sèhlô̆htakò̆ Larrā adècirra cadè̄? 34Mègōnu tcabò̄, Ja gā hna le thĭ ò Prò̆fèt, bija azaabla kî Skrĭbāpho tòcò; kîd́ò̆ anu tòcò aklè̆ thĭ gè̄ mèthĭ tòcò, thĭ gā htalaglo Krusu alò tòcò, thĭ gî̄ hlî gè̄ plè̆kò̆ d́ŏ thĭ Sinagŏgā abu tòcò, kî thĭ gô̄ lômèssègnè̆kò̆ cè tu u hwă tu u. 35Gōnu acè̆, dècirra ab́èkjakî dèmèthĭ bija adèkèḿè tò ò ńò, cahta d́ŏ dèmèthĭ Abĕlè̄ htô̆ dola dèmèthĭ Barăkia apho Zakarĭa, htè thĭ mèthĭgè Zarādo kî dèthèb́è̆kho aplè dèbwè athwi nu gā ladēbò̄ thĭ kho. 36Jò d́ò̆sa thĭ adî̄ahma, dè ajo lŏcăcè gā ladēkò̆ bija ajo dôzô akho.

Jezŭ Adèb́èlò̄ Jerŭsalèm

(Lŭka 13.34,35)

37“Ŏ Jerŭsalèm, Jerŭsalèm, htè amèthĭ Prò̆fèt tòcò, kî ahwĕthĭ kî lo bija ab́è thodŏle ńò ò tòcò nu, Ja thaè jo plokò̆ no pho acab́ô̆ scî̆mubwe joplo apho ad́elè̄ nu pwedè̄? Ḿî nè tè ègè ńò. 38Tcabò̄, thĭ hi thĭ phă kò òda hnahnăkò̆. 39Jò d́ò thĭ, cahta b́ĕ khŏnujo lò thĭ gā ta tcahtîb́èkò̆ Jè taplă be ńò htô̆ thĭ d́ò, ‘Ab́èhôwî ḿî ale B́ĭcè ami abu dèbwè nu!’”

Currently Selected:

Mattĕo 23: GRNT21

Highlight

Copy

Want to have your highlights saved across all your devices? Sign up or sign in

Geba Roman New Testament © Bible Society of Myanmar, 2021.

Learn More About Geba Roman New Testament