Mattĕo 24

Jerŭsalèm Adèlamulapha

(Mărko 13.1,2; Lŭka 21.5,6)

1Kîd́ò̆ Jezŭ hèhta hwă Zarādo abu d́ō, Ze gegè. Zo bōhmubicè tòcò leb́ôhtî Cè cab́ô̆htè cò kò̄ d́è̆lî̄ lōwa Zarādo adèb́òhta tòcò nu. 2Ḿî Cè nu, Cò d́òge lōwa gōjo, “Thĭ tcahtî dè ajo lŏcăcè ā? Jò d́ò̆sa thĭ adî̄ahma, b́ĕjo, lo htè adaladēpha ńò, aò d́ò̆la akhò̆ akho nu, kò tò òkò̆ tod́ŏ be ńò.”

Dèbadèsè̆ kî Dèlômèssègnè̆

(Mărko 13.3-13; Lŭka 21.7-19)

3Kîd́ò̆ b́ĕ Za sańăò Òlĭvo khòlò̆kho nu, Zo bōhmubicè lehtî ladū Cè kî cò d́ò, “Dò̆sabò̄ wa dè ajo tòcò gî̄ phî̆htakò̆ da akhè̆ nè? Nè dèlela Lākho ani kŭdu ahô̆agèlè gî̄ ḿîkò̆ danè̄?” cè d́è̆ lōwa d́o.

4Kîd́ò̆ Jezŭ d́òge cè alī, “Sòiwāibò̄ thĭ ne cab́ô̆htè bija gò̄ dò hlòplèni thĭ dèbwè̆ ńò nu. 5Manè̄ kò̄ d́òdo dō, bija òè̆bwè gē le d́ŏ Ji mi abu kî kò̄ d́òkò̆, ‘Jî ḿî Krĭstu!’ kî gō hlòplèkò̆ bija òè̆bwè. 6Kîd́ò̆ thĭ gī thîhè̆b́èkò̆ dèd́odèphja awîakè̆ kî dèd́odèphja ad́ĕad́ò. Sòiwāibò̄ thĭ ne. Ògoògè̄bò̄ ḿè. Manè̄ kò̄ d́òdo dō, dè ajo tòcò gī phî̆hta lŏb́è; barasă tè b́è tèpwè akŭdu hnî̆ńò. 7Manè̄ kò̄ d́òdo dō, bija dikhwĭ kî dikhwĭ, dege kî dege gè̄ wè̄hto htakhokă hlèkò̆ lōwa, kîd́ò̆ dèsè̆ awe gā lakò̆, dèthaẃilad́ò kò̄ òkò̆, kî dè gō bokò̆ dalā dalā. 8Barasă dè ajo lŏcăcè ḿî dèssègnè̆bòdò akăhtî kòlò̆.

9“B́ĕnu bija ki ila phlòḿî̆kò̆ thĭ cab́ô̆htè thĭ kè̄ b́è mèssègnè̆ nu, kî bija gè̄ mèthĭkò̆ thĭ, kîd́ò̆ Ji mi akhoacè̆ bija akhwĭ lŏcăcè gè̄ dèwè̄dèsè̆kò̆ thĭ ńò. 10Kîd́ò̆ b́ĕnu bija òè̆bwè adèb́u gè̄ hèkè̆ kî zô gô̄ hô̆lăkò̆ lōwa dèbwè kî dèbwè kî zè gè̄ dè wè̄hlèkò̆ lōwa ńò. 11Kîd́ò̆ Prò̆fèt aplè kò̄ òhtakò̆ òè̆bwè̆, kî zò gò̄ hlòplèkò̆ bija pwĕdimi. 12Kîd́ò̆ dèkî̆kkèmèhlò̆ kò òèhta akhoacè̆ bija òè̆bwè adèb́èlò̄ gō colakò̆. 13Barasă bija akhòthad́ò̆ htô̆ akŭdu dèbwè nu, zô̄ hlô̆htagekò̆. 14Kîd́ò̆ Htĭge aVanzĕlo ajo kè̄ b́è d́òŭd́ò̆sakò̆ Lākho thèd́è̆b́è akho, acab́ô̆ bija akhwĭ lŏcăcè anikhĭ thè̆thî nu, kîd́ò̆ b́ĕnu dè akŭdu gō dokò̆.

Dèmòscisă kî Dècîpôcîthŏ

(Mărko 13.14-23; Lŭka 21.20-24)

15“Prò̆fèt Daniĕlè d́ògè atherĕ, ‘Mègōnu b́ĕ thĭ tcahtî dè akî̆kkè amò zizòmòthŏ dèdè̆ phî̆hta d́ŏ dètcahtĭ alle nu.’ (Apha Cè dèbwè kî thîhè̆ d́ò̆è.) 16“B́ĕnu bija aò dŏ Judĕage tòcò gè̄ sèphlòḿĭ d́ò̆è d́ŏ khò̆mukhòlò̆kho nu. 17Kîd́ò̆ bija aò hibu dèbwè gē de geb́a phî d́ò̆è dè d́ŏ zi hibu nu dimĭ ńò. 18Kîd́ò̆ bija aò lèbu dèbwè gē de geb́a phî d́ò̆è zi scid́ŏ ńò. 19B́ĕ aniathè̆ tòcò nu abu, dèbadèsè̆ adoamu gā lab́èkò̆ amuthèd́ŏ kî aiò̆ apho nu tòcò nu. 20Thèb́è̆htabò̄ cab́ô̆htè thĭ gè̄ dè sè b́è dèhòkhè̆ ḿîwî, Munisòd́è̆ ani ḿîwî ńò nu. 21Manè̄ kò̄ d́òdo dō, b́ĕnu akhî dèssègnè̆bòdò azî̄azô̄ kò̄ òhtakò̆ hlĕ Lākho akăhtî nu htô̆do khŏnujo, atò ògè gōnu taplă ńò; kîd́ò̆ alekă akò̄ tò òkò̆ ńò ńò nu. 22Kîd́ò̆ dè gè̄ dèmèpô̆phola munimuthè̆ anu tòcò ńò d́ō, bija gô̄ dô hlô̆hta za dèbwè̆ ńò; barasă bija ab́èrôhtŏ tòcò akhoacè̆ dè gè̄ mèpô̆pholakò̆ munimuthè̆ anu tòcò nu.

23“B́ĕnu bija kò̄ d́ò̆sa thĭ dèbwèbwè, ‘Tcabò̄, Krĭstu ò b́ĕjo!’ ḿîwî, ‘D́ŏnu!’ ḿîwî, b́ubò̄ ḿè. 24Manè̄ kò̄ d́òdo dō, Krĭstu athô̆blô kî Prò̆fèt aplè kòòhtakò̆ tòcò, kî zè gè̄ mèkò̆ dèbòdèba, kî dècòklîcòhjè̆ ado, pwĕ acab́ô̆ (dè gī phî̆hta za d́ō) zò gò̄ hlòplè bija ab́èrôhtŏ tòcò nu nu. 25Tcabò̄, adî phî̆hta hnî̆ńò, Jò d́ò̆sadòlò htŏ thĭ.

26“Mègōnu d́ō, bija dèbwèbwè kò d́ò thĭ, ‘Tcabò̄, Cò ò d́ŏ hmîlè̄klè̆!’ nu d́ō, hèhta ḿè; tcabò̄, Cò ò hid́obu d́ō, b́u ḿè. 27Manè̄ kò̄ d́òdo dō, acab́ô̆ hlăgolî lumuhta dòkhò̆ hlî̆ dob́a lumula dòkhò̆ nu, Bija Apho adèlela gî̄ ḿîkò̆ gōnu nu.

28“Dè acoabe ò d́òlè̄ arră nu, ladā tòcò gē le òplokò̆ lōwa b́ĕnu.

Bija Aphokhŏ Adèlela

(Mărko 13.24-27; Lŭka 21.25-28)

29“D́ŏ aniathè̆ tòcò adèssègnè̆bòdò gī phî̆hta hwă kîd́ò̆ lumu gī khilakò̆ kî hlè̆ gi di hlĭbekò̆ ńò, kîd́ò̆ sè tòcò gā ladēkò̆ d́ŏ Mò̄kholè̄ nu, kîd́ò̆ Mò̄kholè̄ acô̆thèlè̆ gē gleglākò̆. 30Kîd́ò̆ Bija Aphokhŏ ahô̆ajò gî̄ lî̄htakò̆ d́ŏ Mò̄kho nu, kî b́ĕnu bijakhwĭpho da thara da thara lŏcăcè gō jo gā hakò̆; kî ca gā tcahtîkò̆ Bija Apho khè̆la Mò̄kho adè̄tob́o akho d́ŏ dèphlŭdèthere kî dèdòdèthe abu nu. 31Kîd́ò̆ Za gā hnakò̆ Mò̄khobwèzo tòcò la uhta khaja kî johtakô alē, kî Zè gē gejīplokò̆ lōwa bija ab́èrô tòcò aò Gīlli akrò lwīkhò̆b́è, do d́ŏ mòhtîkă aòjîgudu dòkhò̆b́è htô̆do d́ŏ Mò̄kholè̄ agudulă alewe dòkhò̆b́è nu.

Dèmèhlô̆ ni d́ŏ Thodohtĭthè alò

(Mărko 13.28-31; Lŭka 21.29-33)

32“Thîhè̆bò̄ dègèlè d́ŏ thod́ohtĭmu alò nu; b́ĕ aphă htuhta kî ahlè d́òzehta nu, thĭ thîhè̆ tèpwè thathîkhè̆ b́ôhtî htŏ nu. 33Gōnu akhò̆pha, htô̆ḿî thĭ kèhtî dè ajo lŏcăcè nu, thîhè̆bò̄ dèsŏdèkhè̆ òb́ôhtî htŏ, dèò prahnè htŏ agō gohtage akăhtî dòkhò̆. 34Jò d́ò̆sa thĭ adî̄ahma, bija ajo dôzô dò phlòtôlô hnî̆ńò, dè ajo lŏcăcè gī phî̆htakò̆. 35Mò̄kho kî Lākho gè̄ kè̆ nòthò̆ hnò̆nu, Jè dèjî̄b́è kè̄ tè kè̆kò̆ ńò.

Bija Dî Thîhè̆ Muni Dèbwè̆ ńò

(Mărko 13.32-37; Lŭka 17.26-30,34-36)

36“Barasă ḿî anu dini kî anu danare nu, bija di thîhè̆ dèbwè̆ ńò. Mò̄khobwèzo hnò̆nu di thîhè̆ ńò ńò. Athîhè̆ ḿî Apa dèbwè lò. 37Kîd́ò̆ b́ĕ dèmège ane hlĕ Nŏah azôkhè̆ nu, dè gè̄ mèkò̆ ane gōnu b́ĕ Bija Apho lela akhî nu. 38Manè̄ kò̄ d́òdo dō, acab́ô̆ hlĕ htĭhtahala tè b́è hnî̆ńò nu, bija a thebĕ ò̆ thebĕ, phîhlè lōwa acukhò kî isanihlè thebĕ lōwa htô̆ Nŏah khè̆nī thè̆bòbu amu dini nu; 39kîd́ò̆ bija di thîhè̆gè ńò htô̆ htĭdoblîhta kî sèi lŏgè cè tòcò nu. Dè gè̄ mèkò̆ gōnu b́ĕ Bija Apho gē lela akhî nu. 40B́ĕnu bija kò̄ òkò̆ lèbu gībwè; dèbwè kè̄ b́èhèikò̆, dèbwè kò̄ òdakò̆. 41Amihmu gībwè gi wīhmu thebĕkò̆ hŭ, dèbwè kè̄ b́èhèikò̆, dèbwè kò̄ òdakò̆. 42Mègōnu dôibò̄, manè̄ kò̄ d́òdo dō, thĭ B́ĭcè gō dole da akhînare nè nu, thĭ di thîhè̆ ńò. 43Ḿî thîhè̆bò̄ ajo, hib́icè dèbwè gī thîhè̆ ma bija ahudè gē le da anare nè nu d́ō, zô̄ dôi thĕbwe, kî ci ti i tèpwè zi hi gè̄ b́èb́aphlò̆ ńò. 44Mègōnu ò dòlòbò̄, b́ĕ thĭ do gomo ńò anare nu, Bija Apho gē lekò̆.

Zôpho Adî̄ahma kî Adîdî̄dahma ńò

(Lŭka 12.41-48)

45“Mègōnu d́ō, zôpho adî̄ahma kî ablî̄abla ḿî bò̄bwè, htè ci B́ĭcè lè̄la cè ahibu akho, cab́ô̆htè ci i hiphophăpho tòcò dèadèò̆ b́ĕ akhîb́è nu bwè? 46Ab́è dèhôwî ḿî zôpho, htè b́ĕ ab́icè dole akhî, ca pani amè gōnu dèbwè nu. 47Jò d́ò thĭ adî̄ahma, zè gè̄ lè̄lakò̆ lōwa zè dèlŏcăcè akho. 48Barasă zôpho akî̆kkè dèbwè kò d́ò atha bu; Jî B́ĭcè gē le thad́ò̆kò̆è; 49cò d́ò do kî zè wè̄hto mūhta zò khò̆ zôpho tòcò, kî zè hè ahè ò̆kô tèpwè bija aò̆hmuapò tòcò akă d́ō, 50zôpho anu dèbwè ab́icè gō dolekò̆ b́ĕ muni, htè zô do gomo ńò, kîd́ò̆ b́ĕ nare htè zè di thîhè̆ ńò nu. 51Kîd́ò̆ cî b́icè gā klă îklôiklèkò̆ lōwa, kî cè b́è̆plokò̆ lōwa bija awî tòpòkho tòcò. D́ŏnu dèjodèha kî dè edithô̆edithè̆ kò̄ òkò̆.

Currently Selected:

Mattĕo 24: GRNT21

Highlight

Copy

Want to have your highlights saved across all your devices? Sign up or sign in

Geba Roman New Testament © Bible Society of Myanmar, 2021.

Learn More About Geba Roman New Testament