Mattĕo 25

Aphôthèmo Abwèsci Agèlè

1“B́ĕnu Mò̄kho Ahtĭage gî̄ ḿîkò̆ acab́ô̆ aphôthè abwèsci, htè aphî hwă ahmîŭd́ŏ, alescĭ amikhŏ agî̄ phîcu dèbwè aklè akhò̆pha nu. 2Kîd́ò̆ cè klè̆ agudu ògè jè̄bwè, kî abla ògè jè̄bwè. 3Ḿî agudu jè̄bwè phî hwă ahmîŭd́ŏ d́ō, cî dî phîd́ògè cătho ńò. 4Barasă abla jè̄bwè phîd́ògè cătho zè dèbudègî̄ abu ploplo kî hmîŭd́ŏ. 5Kîd́ò̆ aphîcu amikhŏ dèbwè do do plă ńò d́ō, zò sòḿĭkhĕ hwă zò sòḿĭni lōgè tòcò.

6“Kîd́ò̆ b́ĕ klăḿè̆lumu nu, bija kèwohta alē thègè dèdè̆ ad́ò, ‘Tcabò̄, amikhŏ aphîcu do htŏ. Le scĭbò̄ cè klè dakha.’ 7B́ĕnu aphôthè anu tòcò lŏcăcè wè̄hto, praègè ahmîŭd́ŏ. 8Kîd́ò̆ agudu tòcò d́ò abla tòcò, ‘Ibò̄ wa thĭ cătho tîkî, manè̄ kò̄ d́òdo dō, wî hmîŭd́ŏ labî̄ lōgè.’ 9Abla tòcò d́òge cè alī gōjo, ‘B́èkhè̆ agô̄ dô sô̆ wi nikhĭ ńò ńò, thĭ nikhĭ ńò ńò hnò̆nu, lebò̄ d́ŏ asè̆i tòcò ò, kî bwîbò̄ thĭ è̆ dòkhò̆.’ 10Ḿî b́ĕ ze lebwî thebĕ nu, amikhŏ aphîcu dèbwè dogè, kî aòdòlò tòcò lenīkôgè ca kă dèphîcu apwè̆ kî khaglè̄ glè̄b́igè.

11“Agudulă aphôthè alewe tòcò dogegè gè kî cò d́ò, ‘B́ĭcè, B́ĭcè, b́ăhtanibò̄ wa khaglè̄ tîkî.’ 12Barasă cò d́òge lōwa tòcò gōjo, ‘Jò d́ò̆sa thĭ adî̄ahma, jî dî thîhè̆ thĭ ńò.’

13“Dè mè ane gōnu d́ō, dôibò̄, manè̄ kòd́odo d́ō, thĭ di thîhè̆ aniathè̆ ńò ńò, anare ńò ńò.”

Zôpho Thŏbwè Agèlè

(Lŭka 19.11-27)

14“Manè̄ kòd́odo d́ō, mè acab́ô̆ bija dèbwè gē le d́ŏ htĭge aòjî nu d́ō, zo jo zô zôpho tòcò kî zè lè̄lani lōwa ŭcalèkhjă nu. 15Kîd́ò̆ dèbwè ci ihô̆ jè̄ talè̆nta, alewe dèbwè ci i gī talè̆nta, alewe dèbwè be da talè̆nta, acab́ô̆ dèbwè dèbwè mèi kèhta nu, kîd́ò̆ zè hèhtagè. 16Mègōnu bija anib́è jè̄ talè̆nta dèbwè hè kî gwāai aè̆ d́ō, zi nibè òèhtagè jè̄ talè̆nta be. 17Gōnu akhò̆ anib́è gī talè̆nta dèbwè mè òèhta aè̆ gī talè̆nta be be. 18Barasă bija anib́è da talè̆nta dèbwè le khula habu kî b́ŭlăhu tèpwè ab́icè ahô̆.

19“Òjî̄òkja Hwă d́ō, zôpho anu tòcò ab́icè doge kî zô htô cè d́è̆gè lōwa tòcò. 20Kîd́ò̆ anib́è jè̄ talè̆nta dèbwè leige cè hô̆ amubwe, kî apho jè̄ talè̆nta be, kî cò d́ò, ‘B́ĭcè, ni igè jè hô̆ jè̄ talè̆nta. Tcabò̄, jè mè òèhta akho jè̄ talè̆nta be.’ 21Cî B́ĭcè d́ò cè, ‘B́èzî̄b́èzô̄, zôpho aè kî adî̄ahma, nî dî̄ na hmagè dè tîkîpho tòcò akho d́ō, jè lè̄lakò̆ nè dè òèòò akho. Lenībò̄ ni B́ĭcè adèthaganāi abu.’ 22Hwă d́ō anib́è gī talè̆nta dèbwè le d́òkôgè d́o d́o, ‘B́ĭcè, nè lè̄ladani gèjè hô̆ gī talè̆nta. Tcabò̄, jè mè òèhta gī talè̆nta be.’ 23Cî B́ĭcè d́ò cè, ‘B́èzî̄b́èzô̄, zôpho aè kî adî̄ahma, nî dî̄ na hmagè dè tîkîpho tòcò akho d́ō, jè lè̄lakò̆ nè dè òèòò akho. Lenībò̄ ni B́ĭcè adèthaganāi abu.’ 24Barasă anib́è da talè̆nta lò dèbwè le d́ō dò gōjo, ‘B́ĭcè, jî thîhè̆ tèpwè nî ḿî bija aî̆aô̆, nè kèb́u d́ŏ nè dè phwèla ńò alle nu. Nu htuplo dè d́ŏ na da bāla ńò alle nu. 25Kîd́ò̆ ji scisă d́ō, je le b́ŭlăhugè nò hô̆ da talè̆nta d́ŏ halè̄ nu. Ajo ḿî nè è̆, phîgebò̄,’ cò d́ò do. 26Kîd́ò̆ cî b́icè d́òge cè, ‘Zôpho akî̆kkèmèhlò̆ kî akoaklô dèbwè, nî thîhè̆ tèpwè htè jè kèb́u d́ŏ jè dè phwèla ńò alle nu. Jo htuplo dè d́ŏ Ja da bāla ńò alle nu. 27Mègōnu d́ō, ńò mòilagè jô hô̆ bija akŭigwāi tòcò acukhòbu, cab́ô̆htè jo doge nu, ji gī nib́ègebò̄ jè è̆ amubwe kî apho nu. 28Mègōnu d́ō, phîge hô̆ da talè̆nta cò ò kî ila bija aè̆ ò atalè̆nta scidèbwè nu. 29Manè̄ kò̄ d́òdo dō, bija arră adèò dèbwè dè kī i d́òkò̆ cè; kî cè è̆ kò òèòòkò̆. Barasă bija adè tò ò ńò dèbwè nu, dè gî̄ phîthĭwīkò̆ dè htè aḿî cè è̆ nu nu. 30Kîd́ò̆ zôpho ada wanè ńò ajo dèbwè nu, htîphlòḿĭ cè d́ŏ akhlŏ dèkhiklè̆ nu; d́ŏnu dèjodèha kî dè edithô̆edithè̆ kò òkò̆.’

Dècirra Agudulă

31“Kîd́ò̆ b́ĕ Bija Apho ge lela Zò dò Ze the aklè̆, kî Mò̄khobwèzo lŏcăcè gā lakô Ca kă, b́ĕnu Za gā sańăkò̆ Zò dò Ze the ana bu. 32Kîd́ò̆ bija akhwĭathèlè̆ lŏcăcè kè b́èjoplokò̆ Zò hlò̆mò̄; kîd́ò̆, Cè b́è̆bākò̆ lōwa tòcò, acab́ô̆ atcai thŏ dèbwè gè lè̄bā thŏ kî bègôlè nu. 33Kîd́ò̆ cè kè b́è̆lăkò̆ thŏ d́ŏ zu cudèhtwè dòkhò̆, kî bègôlè nu d́ŏ zu cutîcî dòkhò̆. 34B́ĕnu Saphra kò d́òkò̆ bija aò cu cukhò adèhtwè dòkhò̆ tòcò gōjo, ‘Thĭ, ab́è Ja Pa adèhôwî tòcò, le phîbò̄ htĭge, htè aò prahnègè thĭ nikhĭ hlĕ Lākho òhtagè nu. 35Manè̄ kò̄ d́òdo dō, ja thaẃî d́ō, thĭ iagè jè, ja thaò̆ d́ō, thî iò̆gè jè, jî ḿî tî̆tèmè̆ d́ō, thĭ jogè jè hi. 36Jò ò hlôthô̆ d́ō, thĭ ikô̆ithògè jè, ja da hma ńò d́ō, thĭ le icagè jè; jò ò dèkî̆dî̄ abu d́ō, thĭ lehtîgè jè.’ 37B́ĕnu bija adî̄ahma tòcò kò d́ògekò̆ Cè, ‘B́ĭcè, wa tcahtî Na thaẃi d́ō wi ia Nè hlekadè̄? Na thaò̆ d́ō wa iò̆ Nè hlekadè̄? 38Wa tcahtî Ni ḿî tî̆tèmè̆ d́ō, wo jogè Nè hi ḿî̆dîḿî ńò, Ńò òhlòthô̆ d́ō, wi ikô̆ithògè Nè hlekadè̄? 39Wa tcahtî Na da hma ńò, ḿî̆dîḿî ńò, Ńò ò dèkî̆dî̄ abu d́ō, we le itcagè Nè hlekadè̄?’ 40Kîd́ò̆ Saphra kò d́ògekò̆ cè tòcò gōjo, ‘Jò d́ò̆sa thĭ adî̄ahma, gô̆ apla b́ĕ thĭ mèni Jè thè̆buwe tòcò aklè̆ asciphogudu dèbwè dè dimimi nu, thĭ mèni tèpwè Jè.’”

41“B́ĕnu cò kò d́òkò̆ bija aò cu cukhò atîcî tòcò gōjo, ‘Thĭ ab́èhôkî̆kkè tòcò, sè dòbò Jè d́ŏ hmî aò lahtŭlablo htè dè prahnègè Mod́èlî kî zè Mò̄khobwèzo tòcò anikhĭ abu nu. 42Manè̄ kò̄ d́òdo dō, Ja thaẃi d́ō thĭ ti iagè Jè ńò; Ja thaò̆ d́ō, thĭ ti iò̆gè Jè ńò; 43Jî ḿî tî̆tèḿè̆ d́ō, thĭ do jogè Jè ńò; Jò òhlòthô̆ d́ō, thĭ ti ikô̆ithògè Jè ńò; Ja da hma ńò kî Jò ò dèkî̆dî̄ abu d́ō, thĭ de le itcagè Jè ńò.’ 44B́ĕnu cè tòcò kò d́òscĭgekò̆ gōjo, ‘B́ĭcè, wa tcahtîgè Na thaẃi Na thaò̆, nî ḿî tî̆tèḿè̆, Ńò òhlòthô̆, Na da hma ńò, ḿî̆dîḿî ńò, Ńò ò dèkî̆dî̄ abu d́ō, wè dè mèzogè Nè ńò hlekadè̄?’ 45B́ĕnu, cò kò d́ògekò̆ lōwa gōjo, ‘Jò d́ò̆sa thĭ adî̄ahma, gô̆ apla b́ĕ thĭ dè mèni bija asciphogudu ajo tòcò dèbwè ńò nu, thĭ dè mèni tèpwè Jè ńò ńò.’ 46Kîd́ò̆ bija ajo tòcò gē lenīkò̆ dèssègnè̆ lahtŭlablo abu; barasă bija adî̄ahma tòcò ge lenīkò̆ dèthôḿô̆ lahtŭlablo abu.”

Currently Selected:

Mattĕo 25: GRNT21

Highlight

Copy

Want to have your highlights saved across all your devices? Sign up or sign in

Geba Roman New Testament © Bible Society of Myanmar, 2021.

Learn More About Geba Roman New Testament