Ioane 11

Ko te Oti o Lahalo

1 # Luk 10.38-39 Nae i ei he tamāloa e igoa ki a Lahalo nae nofo i Petania, na tauale. Ko Petania ko te kakai ia nae nonofo ai ia Malia ma tona uho ko Mafa. 2#Ioa 12.3(Ko Malia tēnei na ia liligia nā lolo manogi ki nā vae o te Aliki ma holo ai i tona laulu, he tuagane e o ia ia Lahalo, tēia e tauale.) 3Kua kave te faifekau e te uho tēnei ki a Iehu e vē, “Te Aliki, ko tau uō e alofa koe ki ei, e tauale.”

4Kae i te lagonaga e Iehu o te mea tēnei, oi lea vē ai, “Ko te ikuga mulimuli o te tauale o Lahalo e hē ko te oti; ko te mea tēnei kua tupu ke fakaalia ai te mana o te Atua, ma ke vīkia ai te Ataliki o te Atua.”

5Ko Iehu nae alofa ki a Mafa ma tona uho, ma Lahalo. 6Kae i te ia lagonaga ko Lahalo e tauale, na nofo lava i te mea nae i ei ai, mo ni iētahi aho e lua. 7Oi vāgana atu ai ia Iehu ki nā hoko o ia, “Tātou toe olo ki Iutea.”

8Kua lea mai ona hoko ki a te ia, “Te Faiakoga, ko koe nei e hakili e nā tino Iutaia ke fetogi i ni fatu, kae ko koe e toe fia fano ki ei?”

9Kua tali atu ia Iehu, “E hē luahefulu fa nei ia itūlā o te aho? Ko nā tino e havavali i te ao e hē tūhigahiga, auā e ki lātou kitea te mālamalama o te lalolagi tēnei. 10Kae ko nā tino e havavali i te pō e tūhigahiga, auā ko te mālamalama e hē i loto o ki lātou.” 11Kua uma te lea atu vēnei o Iehu, oi toe lea atu ai, “Ko te tātou uō ko Lahalo e moe, kae ko au ka fano oi fafagu.”

12Kua tali mai ona hoko, “Te Aliki, kāfai ia Lahalo e moe, e toe mālohi.”

13Kae ko te uiga o te kupu a Iehu, ko Lahalo kua oti, kae e vēake ki lātou, na lea ake ko Lahalo e moe. 14Oi fakamanino ai e Iehu ki te ki lātou, kua lea vē atu, “Ko Lahalo kua oti; 15ma ko au e fiafia ko au nae hē i ei ma ia, kae ke mafai ai koutou ke talitonu mai ki a te au. Keina tātou olo loa ki a Lahalo.”

16Kua lea atu ia Toma (tēia e fakaigoa ko te Māhaga) ki iētahi o te kau hoko, “Tātou olo uma fakatahi ma te Faiakoga, kae ke oti fakatahi ki tātou ma ia.”

Ko Iehu te Toetū ma te Ola

17I te taunuku atuga o Iehu, na ia iloa ai kua kātoa te fa o aho, talu te tuku o te tino o Lahalo ki te tugamau. 18Ko Petania e tai lua maila te mamao ma Ieluhalema, 19ma e tokalahi nā tino Iutaia na ōmamai oi fakamāfanafana ki a Mafa ma Malia, ona ko te oti o to lā tuagane.

20I te lagonaga e Mafa ko Iehu kua hau, oi fano ai oi fakafetaui ki ei, kae ko Malia kua nofo i te fale. 21Kua lea atu ia Mafa ki a Iehu, “Te Aliki, anei ake koe nae i kinei, ko toku tuagane e hēki oti! 22Kae e pa foki lava nei, e iloa e au ka fōki atu e te Atua ki a te koe, ho he mea lava e gogō atu ai koe ki te ia.”

23Kua lea mai ia Iehu ki ei, “Ko tō tuagane ka toe fakatū ki te ola.”

24Kua tali atu ia Mafa “E iloa e au ka toe fakatū ki te ola, i te aho mulimuli”#11.24 aho mulimuli: Kāfai e fakamahino e te Atua ia tagata uma.

25Kua vāgana atu ia Iehu, “Ko au ko te toetū ma te ola. Ko nā tino e talitonu mai ki a te au ka ola, e ui lava e oti; 26ma ko nā tino e ola ma talitonu mai ki a te au, ka hē oti lele. E talitonu koe ki te mea tēnei?”

27Kua tali mai ia Mafa, “Io, te Aliki. Ko au e talitonu ko koe ko te Mehia, te Ataliki o te Atua, na tuku e hau ki te lalolagi.”

Kua Tagi ia Iehu

28Kua uma te lea vēnā o Mafa, oi toe liliu ai ki tona uho ko Malia, ma lea mālie atu ki ei, “Ko te Faiakoga kua i kinei, ma e fia kikila ki a te koe.” 29I te lagona atuga e Malia o te mea tēnei, oi tū vave ai loa ki luga kua fano oi fakafetaui ia Iehu. ( 30Ko Iehu ko hēki pa ki te kakai, kae koi i ei lava i te mea na fakafetaui ai e Mafa.) 31Ko nā tino Iutaia nae fakamāfanafana ki a Malia i loto o te fale, kua mulimuli ki a Malia i te taimi na ki lātou kitea atu ai kua tū ki luga ma fano vave ki fafo. Na vēakē, ko Malia e fano ki te tugamau oi tagi ai.

32Kua pa atu ia Malia ki te mea e i ei ia Iehu, ma i te ia kitea atuga o Iehu, oi fakapakū ai ki lalo ki tafa o ona vae ma lea vē atu, “Te Aliki, anei ake koe nae i kinei, ko toku tuagane e hēki oti.”

33I te kitea atuga e Iehu ko Malia e tagi, ma ko nā tino Iutaia foki nae i ei ma ia e faitatagi, oi tīgā lahi ai tona loto, ma kua maua i te fakanoanoa lahi. 34Kua fehili atu ia Iehu, “Ko fea te kua tanu ai e koutou ia Lahalo?”

Kua tali mai ki lātou, “Te Aliki, hau oi kikila.”

35Oi tagi ai ia Iehu. 36Kua lea vē nā tino Iutaia, “Kikila ki te lahi lele o te alofa o Iehu ki a Lahalo!”

37Kae ko iētahi tino kua lea vē, “Na fakapupula e ia nā mata o te tāuaho. He ā la te hēki ia mafaia ai oi puipuia ia Lahalo ke nahe oti?”

Kua toe Fakatū ia Lahalo ki te Ola

38Na toe lagona e Iehu te loto tīgā lahi, oi fano ai ki te tugamau; ko te tugamau ko he ana, ma e i ei he fatu e tapuni ai te faitotoka. 39Kua lea atu ia Iehu ki nā tino, “Kave kehe te fatu!”

Kae kua tali mai ia Mafa, te tuafafine o te tamāloa kua oti, “Te Aliki, kua kātoa nei te fa o aho talu te tanu, ma kua manogi kino.”

40Kua lea atu ia Iehu ki a Mafa, “E hēki lea atu au e mafai ke kitea e koe te mana o te Atua, kāfai koe e talitonu?” 41Oi kave kehe ai e ki lātou te fatu. Kua kikila ake ia Iehu ki te lagi ma vē ake, “Te Tamana, ko au e fakafetai atu ki a te koe, auā kua kē lagona mai au. 42E iloa e au e kē lagona mai au i taimi uma. Kae ko au kua lea vēnei atu mo nā tino iēnei i kinei, ke mafai ai ki lātou ke talitonu, ko au na kē uga maia.” 43Kua lea vēnā atu ia, oi kalaga leo lahi ai vē, “Lahalo, hau ki fafo!” 44Kua hau ki fafo ia Lahalo, ko ona vae ma ona lima e fuhi i ni fuhi, ma nā mata e pulupulu i he kie. Oi lea atu ai ia Iehu ki a te ki lātou “Tatala kehe nā fuhi, oi tuku ai ke fano.”

Kua Lama ia Iehu ke Tāmate

(Mataio 26.1-5; Maleko 14.1-2; Luka 22.1-2)

45E tokalahi nā tino Iutaia na ōmamai oi āhi ia Malia, na ki lātou kitea te mea na fai e Iehu, ma na talitonu ai ki a te ia. 46Kae ko iētahi o ki lātou na olo ki te kau Falehaio, oi taku ki ei te mea na fai e Iehu. 47Oi na fono ai te kau Falehaio ma nā ohitāulaga hili fakatahi ma te Taupulega, ma kua lea vē ki atu lātou, “He ā ta ki tātou ka fai? Kikila ki te lahi o nā fakailoga kua fai e te tagata tēnei! 48Kāfai ka fakataga e ki tātou te tagata tēnei ke fai pea ana mea iēnei, ko nā tino uma lele ka talitonu ki a te ia, ma ka fakahaga mai ai te mālō o Loma oi fakakino te tātou Mālumalu, vēnā ma te tātou mālō!”

49Ko tētahi o ki lātou, ko Kaiafa tona igoa, ko ia te nae Ulu Ohitāulaga i te tauhaga tēnā, kua lea vēia, “Kai koutou te vālelea ātili! 50E hē koutou iloa e hili lele atu mo koutou te oti o he tino e fokotahi mo nā tino uma, i lo te fakakino o te mālō kātoa?” 51Ko te mea moni, e hē mai ia te ia lava nā kupu iēnei; kae ona ko ia ko te Ulu Ohitāulaga i te tauhaga tēnā, na vavalo ai e ia, ko Iehu e oti mo nā tino Iutaia, 52ma e hē nā mo nā tino Iutaia oioti, kae ka vēnā foki ona fakamāopoopo e ia nā tino uma o te Atua e takape i atunuku kehekehe, ke kavea e vē ko he tino e tahi.

53Na kāmata mai i te aho tēnā, oi lama ia Iehu e nā takitaki o Iutaia ke tāmate. 54Ko te mea ia na hēki toe feoaki ai ia Iehu i nā mea e kitea ai ia e nā tino Iutaia, kae kua fano ki he mea e pili ki te togāvao, ki te kakai e igoa ki a Efalaima, ma na nonofo ai i kinā ma ona hoko.

55Kua tafapili ki te taimi o te Kaiga Fakamanatu o te Pāheka, ma e tokalahi nā tino na oatu mai nā nuku i tua ki Ieluhalema, ke fakataunuku nā mea e tatau ke fai ke mamā ai ki lātou i nā mea tau tāpuakiga, ka ko hēki kāmata te Pāheka. 56Nae ki lātou hakilia ia Iehu, ma i te maopoopoga o ki lātou i te Mālumalu, oi taufai fehili atu ai tētahi ki tētahi, “He ā tō manatu? E i nā ka hē hau nei ki te Pāheka?” 57Oi fai ai te fakatonuga a nā ohitāulaga hili ma te kau Falehaio, ho he tino e ia iloa te mea e i ei ia Iehu, e tatau ke fakailoa ake, kae ke mafai ai e ki lātou oi puke.

Currently Selected:

Ioane 11: TNT

Highlight

Copy