Mataio 16
16
Ko te Fakatagi mo he Fakailoga Ofoofogia
(Maleko 8.11-13; Luka 12.54-56)
1 #
Mat 12.38; Luk 11.16 Ko iētahi o te kau Falehaio ma te kau Hatukaio kua ōmamai ke tofotofo ia Iehu, oi na lea ai ki ei ke fai he fakailoga ofoofogia mo ki lātou, ke iloa ai pe kua ia te ia moni te pule mai te Atua. 2Kae kua tali mai ia Iehu ki a te ki lātou, “Kāfai te la e goto, e lea koutou, ‘e laofie te tau, auā te lagi e kukula.’ 3I te taeaopōpō e lea koutou, ‘E ua ma matagi te aho auā te lagi e kukula ma fakauli.’ E koutou mafaia oi fakamatala te tau kāfai koutou e kikila ki te lagi, kae e hē koutou mafaia oi fakamatala nā fakailoga o nā mea e tutupu i te taimi nei!#16.3: Ko iētahi tuhituhiga e hē i loto ai nā kupu a Iehu i nā fuaikupu 2-3. 4#Mat 12.39; Luk 11.29Kai te kino ma te hē talitonu ki te Atua o tagata o nā aho nei. Ko koutou e lea mai ke fai he fakailoga ofoofogia? Hēai! Oioti lava te fakailoga e fai mo koutou ko te fakailoga ofoofogia na fai ki a Iona.”
Oi fano kehe ai loa mai kinā.
Ko te Mea Fakafefete a te Kau Falehaio ma te Kau Hatukaio
(Maleko 8.14-21)
5Kua taunuku atu te kau hoko ki tētahi itū o te vaitūloto, ka kua puli ke kave ni a lātou falaoa. 6#Luk 12.1Kua vāgana atu ia Iehu ki a te ki lātou, “Koutou ke mataala ma fakaeteete lele i te mea fakafefete a te kau Falehaio ma te kau Hatukaio.”
7Oi kāmata ai kua fakataufai te kau hoko nā ko ki lātou ma lea vē tētahi ki tētahi, “E lea mai vēnei auā e hēki kaumaia ni a tātou falaoa.”
8Kua iloa e Iehu nā mea e fakataufai ai ki lātou, oi lea vē atu ai ki ei, “Kai te taigole ātili lele o te koutou fakatuatua! He ā te fakataufai ai koutou ki te hēai o ni falaoa? 9#Mat 14.17-21Ko hēki koutou hāfia moni nei lava? E hē koutou manatua nā falaoa e lima na kō tavaevaea mo nā tino e lima afe? E fia ia polapola na fakatūtumu e koutou? 10#Mat 15.34-38Kae a nā falaoa e fitu mo te fa afe o tagata? E fia ia polapola na fakatūtumu e koutou? 11E vēhea ona hē mālamalama koutou ko au nae hē tautala atu ki a te koutou e uiga ki ni falaoa? Koutou ke fakaeteete lelei i te fefete a te kau Falehaio ma te kau Hatukaio.”
12Oi na fātoā mālamalama ai te kau hoko e hē ko te fefete e fakafefete ai te falaoa tēia e lea ake ai ia Iehu ke fakaeteete ai, ka ko nā akoakoga a te kau Falehaio ma te kau Hatukaio.
Ko te Takutinoga a Petelu e uiga ki a Iehu
(Maleko 8.27-30; Luka 9.18-21)
13Kua fano ia Iehu ki te kogāfenua e pili ki te kakai e igoa ki a Kaihaleia Filipi, ma i kinā na lea atu ai ki ona hoko, “Ko ai te lea nā tino ko te Ataliki o te Tagata?”
14 #
Mat 14.1-2; Mlk 6.14-15; Luk 9.7-8 Kua tali mai te kau hoko, “Ko iētahi tino e lea ko koe ko Ioane te Papatiho, ko iētahi e lea ko koe ko Elia, ma iētahi e lea ko koe ko Ielemia pe ko hētahi o te kau pelofeta.”
15Kua lea atu ia Iehu ki a te ki lātou, “Kae e vēhea ake la koutou? E lea koutou ko ai au?”
16 #
Ioa 6.68-69
Kua tali mai ia Himona Petelu, “Ko koe ko te Mehia#16.16 Mehia: Kupu Epelu e tutuha ma te kupu Eleni ‘Keliho’ ko tona uiga ‘Ko tē kua filifilia e te Atua’. Kikila ki te Lihi ona Kupu. , te Ataliki o te Atua tē e ola pea lava.”
17Kua lea atu ia Iehu, “Amutia koe Himona te ataliki o Ioane! Auā ko te mea tēnei e hēki iloa e koe mai he tino ola, kae na fakailoa hako atu ki a te koe e toku Tamana i te lagi. 18Ko au la e lea atu ki a te koe, Petelu; ko koe he papa, i luga o te papa tēnei ka fakatū ai taku Ekalehia, ma e pa lava ki te mālohi o te oti e hē mafai e ia oi fakaumatia. 19#Mat 18.18; Ioa 20.23Ka kō tuku atua ki a te koe nā kī o te Mālō o te lagi; ko nā mea e fakahā e koe i te lalolagi ka fakahā foki i te lagi, ko nā mea e fakataga e koe i te lalolagi ka fakataga foki i te lagi.”
20Oi fakatonu ai e Iehu ona hoko, ke nahe ki lātou takua lele ki he tino ko ia ko te Mehia.
Kua Tautala ia Iehu e uiga ki ona Puapuagā ma tona Mate
(Maleko 8.31—9.1; Luka 9.22-27)
21Mai te taimi tēnā, na kāmata ai oi fakamālamalama e Iehu ki ona hoko te mea ka pa ia ki ei, kua lea vē atu ki a te ki lātou, “Ko au e tatau ke fano ki Ieluhalema ke puapuagā au i lima o toeaina, nā ohitāulaga hili ma faiakoga o te Tūlāfono. Ka ki lātou tāmatea au, kae i tona tolu o aho, ka toe fakatū mai ai au mai i te oti.”
22Oi tataki kehe ai e Petelu ia Iehu, ma kāmata oi tautala mālohi ki ei, kua lea vē atu, “Te Aliki, ke alofa te Atua ke nahe pa lele koe ki he mea vēnā!”
23Kae kua māfuli atu ia Iehu ki ona tua ma lea vē atu ki a Petelu, “Hātani, fano kehe koe ma au! Ko koe kua fai ma fakalavelave ki a te au, auā ko ō manatu e hē mai te Atua, kae ni manatu fakatetagata.”
24 #
Mat 10.38; Luk 14.27 Oi vāgana atu ai ia Iehu ki ona hoko, “Kāfai he tino e fia mulimuli mai ki a te au, e tatau ke tīaki e ia nā mea e fiafia ia ki ei, kae amo tona hātaulo ma mulimuli mai ki a te au. 25#Mat 10.39; Luk 17.33; Ioa 12.25Auā ko ai lava e mānumanu ki tona ola, ka hē ia mauagia; kae ko ai lava e māumau tona ola ona ko au, ka maua e ia. 26He ā nei te aogā kāfai e maua e he tino te lalolagi kātoa kae māumau ai tona ola? Pe he ā foki he mea e mafai e he tino ke fōki kae ke toe ia maua ai tona ola? 27#Mat 25.31; Hal 62.12; Lom 2.6Auā kua tāli hau te Ataliki o te Tagata i te mamalu o tona Tamana ma ana agelu, ka ia kavatua te taui ki tagata tau tokatahi e tuha ai ma a lātou gāluega nae fai. 28E takutino atu e au ki a te koutou, e i ei nā tino ka ki lātou kiteagia te Ataliki o te Tagata kāfai ka hau ko ia ko te Tupu, ka ko hēki feoti ki lātou.”
Currently Selected:
Mataio 16: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
