Yohana 13
13
Isa k'a kɔbiladennu sen mako teme
1Jani Timinkunna Selilon tɛɛ se, Isa tɛɛ k'a lɔn ko a taa waate ma vɛ sulunya ka bɔ dunuɲa ka taa a Fa fɛlɔ. Aa mɔɔ minu tɛɛ dunuɲa, a tɛɛ wolu le kanula kudein. A do ka to ai kanula haan fɔɔ a laban nɔ.
2Isa ni a kɔbiladennu tɛɛ wulala dɔnna, k'a talan Soitana tɛɛ v'a janva miliya don Simɔn denkɛ Judasi Isekaliyɔti josokun nɔ. 3Isa tɛɛ k'a lɔn ko a Fa vɛ fen bɛ bila a fanga kɔlɔ, ani ko a bɔnin Ala le fɛlɔ, a do kɔseitɔ Ala le fɛlɔ. 4Wo lɔ, a k'i wuli tabali kunna ka aa faaniba bɔ a kanna, k'a tɛ sili faani dɔ le. 5Wo kɛ, a ka ji dɔ kɛ tasa lɔ k'a kɔbiladennu sennu mako damina, k'ai matɛ faani wo la, a tɛ silinin tɛɛ min ne. 6A ka se Simɔn Piyɛli ma mingɛ, wo do vɛɛ a yɛ: «Ǹ Kuntii, ile le kɛtɔ ǹ sen makola?»
7Isa k'a javi, a vɛɛ: «Ǹ'i min na yi ne, i tɛnala wo kɔlɔ lɔnna bi. Kɛɛ i kɛtɔ a lɔnna kɔfɛ.»
8Piyɛli do vɛɛ a yɛ: «Ǹ tɛ diɲa i yi ǹ sen mako feu!»
Wo lɔ, Isa k'a javi, a vɛɛ: «Ni m̀ ma i sen mako, i fɛ tɛnala kɛla ǹ na.»
9Wo fɔ a bolo, Simɔn Piyɛli vɛɛ a yɛ: «Ǹ Kuntii, ni wo le, i kà dan ǹ sen ma dein. I yi m̀ bolo ni ǹ kun fana mako.»
10Isa do k'a fɔ a yɛ, a vɛɛ: «Mɔɔ konin mako tɛ koli gbɛlɛ la butu, fɔ a a sen ne mako dein, kamasɔlɔn a sɛnɛyayine feu. Wo lɔ, ài sɛnɛyayine, kɛɛ ài bɛ tɛ dɛ!» 11(Kamasɔlɔn Isa tɛɛ k'a lɔn mɔɔ min kɛtɔ a janvala, wo le n'a kɛla, a n'a fɔla ko ai bɛ sɛnɛyanin tɛ.)
12 #
Luka 22.27. Isa wɔlinin ai sennu makola, a ka aa faaniba bila a kanna k'i sii a siiya lɔ. A do vɛɛ ai yɛ: «Ǹ na min kɛla ài la yi ne, ài ka wo kɔlɔ lɔn ne? 13Ài y'a fɔla m̀ ma ko Kalanmɔɔ ani Kuntii. Wo bɛnyine, kamasɔlɔn wo le ǹ ne. 14Ni ǹe min y'ài Kuntii ni ài Kalanmɔɔ le, m̀'ɛ ài sen mako, wo lɔ, àilu fana ka kan k'i ɲɔɔ sen mako. 15M̀'ɛ wo misali di ài ma fɔsa ài y'a kɛ iwo ǹ n'a kɛla teme. 16#Matiyu 10.24; Luka 6.40; Yohana 15.20.Ǹ'i tuɲa fɔ ài yɛ, jɔn tɛ buɲa sɔlɔnna ka timin aa jɔnfa la. Keladen fana tɛ buɲa sɔlɔnna ka timin a kelaba la. 17Ni ài ka ko minu lɔn ani k'ai kɛ, ài kɛtɔ duwawuden ne le.
18«Ǹ kan tɛ ài bɛ ma dɛ! Ǹ na mɔɔ minu tala, ǹ ka wolu lɔn. Kɛɛ min sɛvɛnin kitabu kɔnɔ, fɔ wo ma yi fa, ko: ‹Ǹe ni mɔɔ min na dɔnni kɛla tasa kelen nɔ, wo v'a jɛlɛ kɛ ǹ juu le.› 19Ǹ'i ko min fɔla ài yɛ yi ne jani a yi kɛ, fɔsa a vɛ kɛla, ài yi limaniya k'a fɔ ‹ǹe le wo le, Min yi je›. 20#Matiyu 10.40; Malɛkɛ 9.37; Luka 9.48; 10.16.Ǹ'i tuɲa fɔ ài yɛ, ni mɔɔ mɔɔ k'a bolo sii ǹa keladen dɔ kɔlɔ, wo tii v'a bolo sii ǹ kɔlɔ. Ado ni mɔɔ min k'a bolo sii ǹ kɔlɔ, wo tii v'a bolo sii ǹ kelaba fana kɔlɔ.»
Isa ka a janvako fɔ teme
Matiyu 26.20-25; Malɛkɛ 14.17-21; Luka 22.21-23
21Isa wɔlinin wo fɔla, a joso ka tɔlɔya. A do k'a fɔ ai yɛ k'a lagbɛ, a vɛɛ: «Ǹ'i tuɲa fɔ ài yɛ, ài lɔ mɔɔ kelen kɛtɔ ǹ janvala.» 22Wo lɔ, a kɔbiladennu v'i ɲɔɔ lasaala, kɛɛ ai tɛɛ m'a lɔn a kan tɛɛ mɔɔ min ma. 23Ai lɔ mɔɔ kelen, a diyanan kɔbiladen koni, wo siinin tɛɛ a tɔɔfɛ. 24Wo lɔ, Simɔn Piyɛli k'a bolo jatesii wo tii yɛ, fɔsa a yi Isa maɲininga ko a kan yi jene ma.
25A kɔbiladen wo k'i madon Isa la k'a fɔ a yɛ, a vɛɛ: «Ǹ Kuntii, i kan yi jene ma?»
26Isa do k'a javi, a vɛɛ: «M̀'ɛ bulu kulun sunna mafen nɔ k'a di mɔɔ min ma, wo le.»
Wo fɔ Isa bolo, a ka bulu sun mafen nɔ k'a di Judasi ma, Simɔn Isekaliyɔti denkɛ. 27Judasi ka bulu mina mingɛ, Soitana ka don a josokun nɔ telemanin. Isa do vɛɛ a yɛ: «I yi min kɛko lɔ, i yi wo kɛ telemanin.»
28Kɛɛ mɔɔ minu tɛɛ dɔnnikɛya lɔ, ai suu suu m'a ɲaye a na wo fɔla Judasi yɛ dailu min na. 29Komi wɔlibilabɔlɔ tɛɛ Judasi le bolo, a tɛɛ a dɔlu kɔnɔ ko Isa n'a lɔla fen dɔ le sanko lɔ selibɔko lɔ, niwotɛ bolokolonnu sɔko.
30Wo lɔ, Judasi ka bulu kulun wo mina mingɛ feeya, a k'i wuli ka bɔ je. Wo k'a talan, su tɛɛ vɛ ko.
Jamali kula
31Judasi bɔ kɔ, Isa k'a fɔ ai yɛ, a vɛɛ: «Mɔɔnivin Tanin ya magbiliyali la vɛ nkɛnɛmaya butu, ado Ala fana vɛ aa magbiliyali lankɛnɛmaya ale le fɛ. 32Ni do Ala vɛ aa magbiliyali lankɛnɛmaya ale fɛ, wo vɛ kɛla, Ala gbu le kɛtɔ aa magbiliyali lankɛnɛmayala tandainɔ yi ne. 33#Yohana 7.34.Ǹ dennu, ǹ'ài fɛ waateni kɔlɔ bene. M̀'ɛ taala, ài kɛtɔ ǹ ɲininna, kɛɛ iwo ǹ n'a fɔla teme Jahudiya kuntiilu yɛ wo lon, ǹ'i wo suu le fɔla ài yɛ kɔtunun, ǹ ko, ǹ taatɔ tɛɛminja, ài tɛ se taala woja. 34#Yohana 15.12, 17; 1 Yohana 3.23; 2 Yohana 1.5.Ǹ'i jamali kula le dila ài ma yi ne, ǹ ko, ài ɲɔɔ kanu. Ǹ n'ài kanula teme, fɔ àilu fana y'i ɲɔɔ kanu ten ne. 35Ni kanundeya vɛ kɛla ài wotɛ, mɔɔ bɛ kɛtɔ a lɔnna wo le ma k'a fɔ ko ǹ kɔbiladen ne ài le.»
Isa k'a fɔ ko Piyɛli kɛtɔ i banna a lɔ
Matiyu 26.31-35; Malɛkɛ 14.27-31; Luka 22.31-34
36Simɔn Piyɛli do ka Isa maɲininga, a vɛɛ: «Ǹ Kuntii, i taatɔ min ne?»
Isa k'a javi, a vɛɛ: «Ǹ taatɔ tɛɛminja, i tɛ se bilala ǹ kɔ ka taa woja tandainɔ yi ne. Kɛɛ lon dɔ, i kɛtɔ ǹ kɔsalanna.»
37Piyɛli do vɛɛ a yɛ: «Ǹ Kuntii, mindɛ lɔ ǹ tɛ bila i kɔ tandainɔ ka taa? Ǹ lɔbɛnnin hali ka ǹ nii di iya ko lɔ.»
38Isa do k'a javi, a vɛɛ: «I lɔbɛnyine k'i nii di ǹa ko lɔ, kɛlɛ? Ǹ'i tuɲa fɔ i yɛ, donon tɛnala kumunna ni i m'a fɔ siɲa sawa le ko i ma ǹ lɔn.»
Currently Selected:
Yohana 13: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
