Yohana 19

Jamanatii ka Isa lataa a faaya lɔ teme

1Wo kɛ, Pilati ka sɔdasilu lɔ Isa gbasila gbusan ne. 2Wo kɔ, ai ka wonin julu dɔ milinmilin ka wo kɛ masayafula sawula le, k'a bilin a kun na, ani ka masayafaani wulɛn bila a kanna. 3Ai do tɛɛ ai madonna a la k'a fɔ a yɛ, ai vɛɛ: «M'i fola, Jahudiyalu ya masakɛ!» Ai do v'a tolo tela.

4Pilati ka bɔ kɛnɛma kɔtunun k'a fɔ Jahudiyalu yɛ, a vɛɛ: «Ài y'a ye! Ǹ'a lanala ài ma kɛnɛma jan, fɔsa ài y'a lɔn m̀ ma ko ye a la min yi kɛ a latɔn kun ne.» 5Ai do ka bɔ Isa le, wonin fula v'a kunna, ani masayafaani wulɛn v'a kanna. Wo kɛ, Pilati k'a fɔ jama yɛ, a vɛɛ: «Ài yi kɛ́ ye!»

6Salakalase kuntiibalu ni lɔhɔlɔmabonba lakanabalu ka Isa ye mingɛ, ai do vɛ gbanɔla, ai vɛɛ: «A gbaan kɔlɔman ma! A gbaan kɔlɔman ma!»

Pilati do vɛɛ ai yɛ: «Àilu gbu yi taa a le k'a gbaan kɔlɔman ma. Ǹe koni ma latɔn kun ye a la.»

7Jahudiya kuntiilu do k'a javi, ai vɛɛ: «Seliya dɔ yi mɔ bolo, ado ka bɛn seliya wo ma, a ka kan ka faa, kamasɔlɔn a bolo ko Ala Denkɛ le a le.»

8Pilati ka kuma wo mɛn mingɛ, a dɔ ka la aa siyan kɔkan. 9A do ka don bon na kɔtunun ka Isa maɲininga, a vɛɛ: «I bɔnin min?»

Kɛɛ Isa ma a javi. 10Wo lɔ, Pilati do vɛɛ a yɛ: «I bannin ǹ javila? I m'a lɔn ko a see yi ǹ yɛ k'i bila niwotɛ k'i gbaan kɔlɔman ma?»

11Isa k'a javi, a vɛɛ: «See foi tɛ i yɛ ǹ kan, fɔ Ala na min dila i ma. Wo lɔ, mɔɔ min na ǹ donna i bolo, wo ya julumbu buɲanin vɛ i ta le.»

12Ka ta wo waate ma, Pilati tɛɛ Isa bilako ɲaɲininna. Kɛɛ jama ka gbanɔ, ai vɛɛ: «Ni i ka kɛ́ min bila, wo vɛ kɛla, i tɛ Lɔmu masakɛba Sezale tɔva le. Mɔɔ min v'a jɛlɛ kɛla masakɛ le, wo tii yi Sezale juu le le.»

13Pilati ka kuma wo mɛn mingɛ, a ka Isa labɔ kɔtunun, k'i sii kititɛɛ siifen nɔ kawa dingila dɔ lɔ, ai y'a fɔla min ma Hebulukan nɔ Gabata. 14Wo lon tɛɛ Timinkunna Selilon ɲasiilon ne le, ado telelatelen waate le tɛɛ. Wo lɔ, Pilati k'a fɔ Jahudiyalu yɛ, a vɛɛ: «Àiya masakɛ ye.»

15Ai do vɛ gbanɔla, ai vɛɛ: «A faa! A faa! A gbaan kɔlɔman ma!»

Pilati k'ai maɲininga, a vɛɛ: «Ǹ'àiya masakɛ gbaan kɔlɔman ma?»

Salakalase kuntiibalu k'a javi, ai vɛɛ: «Masakɛ gbɛlɛ tɛ mɔ bolo ka bɔ Sezale kɔ.»

16Wo kɛ, Pilati ka Isa don sɔdasilu bolo ko ai y'a gbaan kɔlɔman ma.

Ai ka Isa gbaan kɔlɔman ma teme

Matiyu 27.32-44; Malɛkɛ 15.21-32; Luka 23.26-43

17Isa do vɛ bɔla so kɔnɔ, a v'a jɛlɛkanu gbaankɔlɔman tala, ka taa Kunkolo Dingila lɔ, ai y'a fɔla tɛɛminja ma Hebulukan nɔ ko Gɔligota. 18Sɔdasilu ka Isa gbaan kɔlɔman ma je, ani mɔɔ fila gbɛlɛ: a kelen tɛɛ a bolokini fannɔ, a tɔ kelen tɛɛ a bolonunma fannɔ, Isa le tɛɛ ai tɛma.

19Pilati ka mɔɔ dɔ lɔ sɛvɛlila wala ma, ka wo bila Isa gbaankɔlɔman kunna. A sɛvɛnin tɛɛ min ma ko: «Isa Nazalɛtika, Jahudiyalu ya masakɛ.» 20Sɛvɛ wo ka kɛ Hebulukan ni Lɔmukan, ani Gɛlɛkikan ne lɔ. Jahudiya siyama ka sɛvɛ wo kalan, kamasɔlɔn ai ka Isa gbaan kɔlɔman ma so le dafɛ. 21Wo lɔ, salakalase kuntiibalu ka taa Pilati fɛlɔ k'a fɔ a yɛ, ai vɛɛ: «I kà a sɛvɛ ko: ‹Jahudiyalu ya masakɛ,› mafɔ: ‹Kɛ́ min n'a fɔla, a vɛɛ: Ǹe le Jahudiyalu ya masakɛ le.› »

22Pilati do k'ai javi, a vɛɛ: «Ǹ na min sɛvɛla, m̀'ɛ wo sɛvɛ.»

23Sɔdasilu wɔlinin Isa gbaanna kɔlɔman ma, ai ka aa faanilu lɔtala k'a kɛ sii naani ne, sɔdasi kelen a sii kelen. Wo kɔ, ai ka aa faani kɔlɔbila ta, kalalinɔ tɛɛ tɛ min ma. A ladannin tɛɛ jese suu kelen ne le ka damina a kunma haan ka jii. 24Wo lɔ, ai k'a fɔ i ɲɔɔ yɛ, ai vɛɛ: «Mɔ kà a lɔfalafala, kɛɛ ài m'i kalabila kɛ k'a lɔn a kɛtɔ mɔɔ min ta le.» Wo ka kɛ fɔsa kitabu kɔnɔ kuma ma yi fa teme, ko:

«Ai na ǹa faanilu lɔtalala i ɲɔɔ wotɛ,

ka kalabila kɛ ka bɛn ǹ kannafaani ma.»

Sɔdasilu ka wo le kɛ.

25Wo waate lɔ, Isa ba ni a ba kɔlɔmoso lɔnin tɛɛ a gbaankɔlɔman dafɛ, ani Kilopa moso Mɔyamu ni Magidalaka Mɔyamu. 26Isa ka a ba ni a diyanan kɔbiladen lɔnin ye je mingɛ, a do vɛɛ a ba yɛ: «M̀ ba, i den ne ve.»

27A do k'a fɔ a kɔbiladen wo yɛ, a vɛɛ: «I ba le ve.» Ka ta wo lon ma, a kɔbiladen wo k'a jando Isa ba lɔ aa bon na.

Isa ka sa teme

Matiyu 27.45-56; Malɛkɛ 15.33-41; Luka 23.44-49

28Wo kɔ, komi Isa tɛɛ k'a lɔn kolu bɛ da vɛ fa, ani fɔsa kitabu kɔnɔ kumalu ma yi fa teme, wo lɔ, a k'a fɔ, a vɛɛ: «Minkɛlɔɔ yi ǹ na.» 29Daa dɔ siinin tɛɛ je, min lafanin tɛɛ gbɛ kumunnin na. Wo lɔ, ai ka fu dɔ ta k'a sun gbɛ wo lɔ k'a sili hisope kɔlɔman dɔ la, ka wo lataa Isa da ma. 30Isa ka gbɛ kumunnin wo dɔ min mingɛ, a vɛɛ: «Ko bɛ da vɛ fa.»

Wo kɛ, a do k'a kun labilin k'a nii lasei.

Ai ka Isa sɔɔ a fulu fɛ teme

31Wo lon ka bɛn Nɔningɛlon ɲasiilon ne ma, ado wo kɛnɛbɔ tɛɛ Nɔningɛlon ba le le. Komi Jahudiya kuntiilu tɛɛ tɛ a fɛ sulu yi to kɔlɔman ma ka Nɔningɛlon se, wo lɔ, ai ka taa Pilati madiya ko a yi diɲa mɔɔ gbaanninu sennu lɔ yi kali, k'ai sulu lajii. 32Wo lɔ, sɔdasilu ka na mɔɔ kunfɔlɔ ma min gbaannin tɛɛ Isa dafɛ, ka wo sennu lɔkali, ka ban ka wo suu kɛ mɔɔ filana la. 33Kɛɛ ai ka se Isa ma mingɛ, ai k'a ye a tɛɛ vɛ sa. Wo ma, ai ma a sennu lɔkali. 34Kɛɛ wo bɛ n'a kɛ, sɔdasi kelen ka Isa sɔɔ a fulu fɛ tama le. Wo lɔ, ji ni jeli vɛ bɔla telemanin. 35Mɔɔ min na ko minu kɛnin yena a ɲa la, wo tii le na seleya min dila fɔsa àilu fana yi limaniya. A do ya seleyakan yi tuɲa le le. A k'a lɔn ne ko a yi tuɲa le fɔla. 36Kamasɔlɔn ko minu kɛyine fɔsa kitabu kɔnɔ kuma ma yi fa teme, ko: «Hali a kolo kelen lɔ tɛnala kalila.» 37#Ko Lankɛnɛmayanin 1.7.A sɛvɛnin dingila gbɛlɛ lɔ fana, ko: «Ai kɛtɔ ai ɲa lɔla mɔɔ min lɔ, ai na min sɔɔla.»

Ai ka Isa sudoon teme

Matiyu 27.57-61; Malɛkɛ 15.42-47; Luka 23.50-56

38Ko wolu timinnin kɔ, Jusufu Alimateka ka taa Pilati madiya ko wo yi diɲa, a yi taa Isa fuleni lajii k'a bɔ kɔlɔman ma. Jusufu tɛɛ Isa kɔbiladen dɔ le le, kɛɛ a ka wo ko lɔdoon, kamasɔlɔn a tɛɛ siyanna Jahudiya kuntiilu ɲa. Pilati do ka diɲa wo ma. Wo kɛ, Jusufu ka taa ka Isa fuleni lajii ka taa a le. 39#Yohana 3.1, 2.Nikodɛmu, min ka taa Isa ma su lɔ, wo fana ka na basi sumadiyanin kilo bisawa (30) jate le, min ɲaaminin tɛɛ milu ni alowe le. 40Wo lɔ, ai mɔɔ fila ka Isa fuleni ta k'a kasange, ka basi sumadiyanin wo kɛ a kan ka bɛn Jahudiyalu ya sudoon laana ma. 41Ai ka Isa gbaan kɔlɔman ma tɛɛminja, gbele dɔ masulunyanin tɛɛ woja la. Ado kawawoo kabulu kula dɔ tɛɛ gbele wo lɔ, fuleni la tɛɛ ma don ba min kɔnɔ bene. 42Komi Jahudiyalu ya Nɔningɛlon ɲasiilon ne tɛɛ, ani kabulu wo masulunyanin tɛɛ woja la, wo le k'a kɛ, ai ka Isa sudoon je.

Currently Selected:

Yohana 19: MBT2023

Highlight

Copy