Yohana 4

Isa ni Samaliyaka moso

1Isa ka kɛ a kalama mingɛ ko Falisilu v'a mɛn ko ale tɛɛ kɔbiladen siyama sɔlɔnna ka timin Yaya la k'ai mako kɔɔ kɔlɔ 2(k'a talan ale gbu tɛɛ tɛ mɔɔlu makola, mafɔ a kɔbiladennu), 3wo le k'a kɛ, a ka bɔ Jude koovi lɔ ka seikɔ Galile.

4Kɛɛ jani a tɛɛ se Galile, fɔ a tɛɛ Samaliya duu le lɔtimin. 5Wo ma, a ka se Samaliyakalu ya so dɔ la, ai y'a fɔla min ma ko Sikali. Sedina Janguba ka gbɛkɛnɛ min di a den Jusufu ma, so wo tɛɛ woja dafɛ le. 6Sedina Janguba ya kɔlɔn tɛɛ je le. Wo lɔ, Isa k'i sii kɔlɔn wo dafɛ, kamasɔlɔn a tɛɛ vɛ sɛyɛ taama bolo. Telelatelen waate le tɛɛ.

7Ado Samaliyaka moso dɔ ka na jitaya lɔ je. Isa vɛɛ a yɛ: «Ǹ sɔ ji la, ǹ'i m̀ min.» 8(Wo k'a talan a kɔbiladennu tɛɛ vɛ taa dɔnnifen sanya lɔ so kɔnɔ.)

9Moso ka Isa javi, a vɛɛ: «Ile min yi Jahudiya le, mindɛ kɛnin i yi ǹ dalila minji la, k'a talan Samaliyaka moso le ǹ ne?» (Kamasɔlɔn Jahudiyalu tɛɛ tɛ sena Samaliyakalu ma ko suu suu lɔ.)

10Isa do k'a javi, a vɛɛ: «Ni i tɛɛ vɛ Ala ya sɔli lɔnna ani mɔɔ min i dalila minji la, fɔ ile tɛɛ ale dali ji la, a do tɛɛ i sɔle niimaya ji la.»

11Moso vɛɛ: «Ǹ Kuntii, jitafen t'i bolo, kɔlɔn do lɔjiinin. I kɛtɔ niimaya ji wo sɔlɔnna mineja? 12Mɔ bema Janguba le na kɔlɔn min senna k'a to mɔ bolo. Ale ni a dennu ni aa kolofennu tɛɛ ji wo le minna. Jalasa i fisayayine mɔ bema Janguba le?»

13Isa ka moso javi, a vɛɛ: «Ni mɔɔ mɔɔ ka ji min dɔ min, minkɛlɔɔ kɛtɔ wo tii minala kɔtunun. 14Kɛɛ ǹ'i ji min dila, mɔɔ mɔɔ vɛ wo dɔ minna, minkɛlɔɔ tɛnala wo tii minala butu tuun. Wo kɛtɔle a kɔnɔlɔ iwo kɔɔkun min yi woyola ka niimaya banbali di a ma.»

15Moso do vɛɛ: «Ǹ Kuntii, i yi ǹ sɔ ji wo dɔ la, fɔsa minkɛlɔɔ kana m̀ mina butu, ani ǹ kana to nala jan jitaya lɔ.»

16Wo fɔ, Isa vɛɛ a yɛ: «Taa, i yi kɛ́ kili, ài yi na jan.»

17Moso do k'a javi, a vɛɛ: «Kɛ́ tɛ m̀ bolo.»

Isa do vɛɛ: «I tuɲa k'a fɔ ko kɛ́ t'i bolo, 18kamasɔlɔn i v'i sii kɛ́ loolu le kun, ado i yi min bolo yi ne, wo t'i fulukɛ le. Wo lɔ, i na tuɲa le fɔla.»

19Moso do vɛɛ: «Ǹ Kuntii, m̀'ɛ a ɲaye butu ko kela le i le. 20Mɔ bemanu tɛɛ Ala batola tini min ne kɔkan jan, kɛɛ àilu Jahudiyalu vɛɛ ko mɔɔlu ka kan ka Ala bato Jelusalɛmu le.»

21Isa k'a javi, a vɛɛ: «Ile moso, i yi la ǹ na ko lon dɔ natɔ, ài tɛnala mɔ Fa Ala batola tini min kɔkan, niwotɛ Jelusalɛmu. 22Àilu Samaliyakalu m'a lɔn ài yi min batola. Kɛɛ ǹu yi min batola, mɔ ka wo lɔn kamasɔlɔn kisiko ma yi sɔlɔnna ǹu Jahudiyalu le fɛ. 23Waate dɔ sentɔ, a do vɛ se butu, Ala Nii Sɛnɛyanin kɛtɔ mɔɔlu madɛmɛnna ka a bato iwo a yi teme bɛlɛbɛlɛ kɛ, kamasɔlɔn Mɔ Fa Ala yi batokɛba wo suulu le ɲininna. 24Ala yi Nii le le, ado minu y'a batola, fɔ ai y'a bato a Nii Sɛnɛyanin ya dɛmɛli sabu la iwo a yi teme bɛlɛbɛlɛ kɛ.»

25Moso vɛɛ a yɛ: «Ǹ k'a lɔn Alimasihu natɔ, ai y'a fɔla min ma ko Masa Tɔɔmasenin. Wo vɛ nala, a kɛtɔ ko bɛ ɲafɔla mɔ yɛ.»

26Isa k'a javi, a vɛɛ: «Ǹe le wo le, min yi kumala i fɛ yi ne.»

27Wo waate kelen nɔ, a kɔbiladennu ka seikɔ. Ai do ka kawakoya, kamasɔlɔn ai ka Isa ni moso talan balola, kɛɛ ai suu suu ma moso wo maɲininga k'a fɔ: «I yi mindɛ kɔ?», niwotɛ k'a fɔ Isa yɛ ko: «Mindɛ kɛnin i yi balola moso wo fɛ?»

28Wo kɛ, moso k'aa jitafen to je ka taa so kɔnɔ k'a fɔ mɔɔlu yɛ, a vɛɛ: 29«Ài yi na, ài yi kɛ́ dɔ ye min na ǹ kɛkolu bɛ fɔla ǹ yɛ. Jalasa ale le tɛ Masa Tɔɔmasenin ne?» 30Wo fɔ, ai vɛ bɔla so kɔnɔ ka na Isa fɛlɔ.

31Wo waate lɔ, a kɔbiladennu tɛɛ a madiyala, ai vɛɛ: «Kalanmɔɔ, na m'i dɔnni kɛ.» 32A do vɛɛ ai yɛ: «Dɔnnifen yi m̀ bolo k'a dɔn, ài tɛ min kalama.»

33Wo fɔ Isa bolo, a kɔbiladennu v'i ɲɔɔ maɲiningala, ai vɛɛ: «Jalasa mɔɔ dɔ le nanin dɔnnifen ne a fɛ?»

34Isa do vɛɛ ai yɛ: «Ǹ dɔnnifen yi min ne, wo le ka ǹ kelaba sawo kɛ ani ka aa baale dafa. 35Ài y'a fɔla ko: ‹A vɛ to kalo naani, malo kali waate yi se›, kɛlɛ? Kɛɛ ǹ'a fɔ ài yɛ, ài y'ài ɲa lawuli ka sɛnɛlu lasaa. Malo vɛ mɔn, a do kali waate le ne. 36Mɔɔ min yi malo kalila, wo tii y'a sala sɔlɔnna butu. A do yi malo ladɛnna ka bɛn niimaya banbali le ma, fɔsa malo sɛnɛba ni a kaliba yi sawa i ɲɔɔ fɛ. 37Sana min yi tuɲa le le, ko: ‹Dɔ yi malo sɛnɛna, dɔ y'a kalila.› 38Ài ma sɛnɛ min kɛ, m̀'ɛ ài lɔ wo kalila. Mɔɔ dɔgbɛlɛlu le na baalela je, àilu do yi wo tɔnɔ le sɔlɔnna yi ne.»

39Samaliyaka siyama ka limaniya Isa ma so wo kɔnɔ ka bɛn moso wo ya seleyakan ma, a vɛɛ: «A na ǹ kɛkolu bɛ fɔla ǹ yɛ.» 40Wo le k'a kɛ, Samaliyakalu ka na Isa ma, k'a madiya ko a yi to ai fɛlɔ. A do ka tele fila kɛ je.

41Mɔɔ siyama gbɛlɛlu ka limaniya a ma ka bɛn a kumakan ma. 42Ai k'a fɔ moso yɛ, ai vɛɛ: «Tandainɔ yi ne, mɔ ma limaniya ka bɛn i kumakan ma, kɛɛ ǹu gbu v'a kumakan mɛn yi ne, ado mɔ v'a lɔn feu ko ale le dunuɲa bɛ Lakisiba le.»

Isa ka ɲamɔɔ dɔ denkɛ lakɛnɛya teme

Matiyu 8.5-13; Luka 7.1-10

43Tele fila timinnin, Isa ka siya mina ka taa Galile. 44#Matiyu 13.57; Malɛkɛ 6.4; Luka 4.24.(Kamasɔlɔn ale gbu tɛɛ vɛ seleya di ko kela tɛ buɲa sɔlɔnna a fɛso.) 45#Yohana 2.23.A senin Galile, je mɔɔlu k'ai bolo sii a kɔlɔ, kamasɔlɔn ailu fana tɛɛ vɛ taa Timinkunna selibɔya lɔ Jelusalɛmu, ka Isa kɛkolu bɛ ye.

46 # Yohana 2.1-11. Isa k'a kɔsei Kana so kɔnɔ, Galile koovi lɔ, a na ji jɛlɛmana ka kɛ lɛzɛnji le tɛɛminja. Jamana ɲamɔɔ dɔ tɛɛ Kapɛlɛnamu so kɔnɔ min denkɛ tɛɛ man kɛnɛ. 47Ɲamɔɔ wo k'a mɛn mingɛ ko Isa vɛ na Galile ka bɔ Jude, a ka taa a ma k'a madiya ko a yi diɲa ka taa a denkɛ lakɛnɛya, kamasɔlɔn wo tɛɛ sa bolo le ma. 48Isa do vɛɛ a yɛ: «Ni ài ma kawanankolu ni ko babalu ye ài ɲa la, ài tɛnala limaniyala m̀ ma tuun.»

49Ɲamɔɔ k'a javi, a vɛɛ: «Ǹ Kuntii, i jaani, ndaa vɛ ǹ fɛlɔ jani ǹ denkɛ yi sa.»

50Isa do vɛɛ a yɛ: «Taa vɛ. I denkɛ vɛ kisi.»

Ɲamɔɔ wo ka limaniya Isa kumakan ma ka taa. 51A taatɔla aa luu ma, aa bɔidennu k'a labɛn k'a fɔ a yɛ ko a denkɛ vɛ kɛnɛya. 52A do k'ai maɲininga, a vɛɛ: «A na kɛnɛyala waate mindɛ?»

Ai vɛɛ: «A fali na sumala telelatelen waate le lɔ kunun.» 53Den fa k'a lɔn wo le lɔ ko wo waate kelen ne tɛɛ, Isa k'a fɔ a yɛ, a vɛɛ: «I denkɛ vɛ kisi.» Ale ni aa bonnamɔɔlu bɛ ka limaniya Isa ma wo lɔ.

54Isa ya kawananko filana le tɛɛ wo le, a kɔsei mingɛnin Galile ka bɔ Jude koovi lɔ.

Currently Selected:

Yohana 4: MBT2023

Highlight

Copy