Luka 1
1
Kitabu min sɛvɛ kun Luka bolo
1Ǹ diyananmɔɔ Teyofile, ko minu timinnin mɔ wotɛ jan, i k'a lɔn mɔɔ siyama v'i lɔja ka wo taliku sɛvɛ, 2iwo mɔɔlu n'a ɲafɔla mɔ yɛ teme, minu na ko wolu yena ai ɲa la ka ta a damina ma, ani minu kelayanin tɛɛ Ala kumakan lasenko lɔ. 3Komi m̀'ɛ ko wolu bɛ ɲaɲinin kobɛn ka ta a damina ma, wo lɔ, ǹ n'a yena kobɛlɛ le ǹ'a bɛ sɛvɛ iwo kolu timinnin teme k'a lataa i ma, 4fɔsa i y'a lɔn ko i kalannin ko minu la, wolu yi tuɲa gbugbu le le.
Mɛlɛka ka Yaya sɔlɔnko fɔ teme
5Helodi tɛɛ Jude koovi masaya la waate min nɔ, salakalaseba dɔ tɛɛ je, ai tɛɛ a fɔla min ma Zakaliya, min tɛɛ Abiya ya salakalase jama lɔ. A moso tɛɛ Nabi Haluna bɔzɔn dɔ le le, min tɔɔ tɛɛ ko Elizabɛti. 6Ai mɔɔ fila tɛɛ telenmande le le Ala ɲakɔlɔ, ai vɛ mɔ Tii ya seliya ni aa jamalilu bɛ lataamana kobɛn. 7Wo bɛ n'a kɛ, den tɛɛ tɛ ai bolo, kamasɔlɔn Elizabɛti tɛɛ moso malɔnin ne le, ado ai mɔɔ fila tɛɛ vɛ kɔlɔya bubale.
8Lon dɔ, Zakaliya tɛɛ aa salakalase baale la Ala ɲakɔlɔ, kamasɔlɔn aa salakalase jama ta waate tɛɛ vɛ se. 9Ka bɛn aiya laana ma, ai ka kalabila kɛ. Kala ka Zakaliya mina fɔsa a yi don mɔ Tii ya lɔhɔlɔmabonba kɔnɔ ka wusulan ɲɛnin salakagbalan kɔkan. 10A tɛɛ wusulan ɲɛninna waate min nɔ, jama ba tɛɛ Ala dalila kɛnɛma.
11Ado mɔ Tii ya mɛlɛka dɔ ka bɔ a yɛ gbɛ la, k'i lɔ wusulan salakagbalan bolokini fannɔ. 12Zakaliya ka mɛlɛka ye mingɛ, a kɔnɔlɔ ka fili. A do ka siyan bubale. 13Kɛɛ mɛlɛka vɛɛ a yɛ: «Zakaliya, i kà siyan. Ala v'iya madailikan mɛn. I moso Elizabɛti kɛtɔ denkɛ sɔlɔnna i yɛ. I y'a tɔɔla ko Yaya. 14A kɛtɔ i kɔnɔlɔdiyala k'i lasawa bubale, ado mɔɔ siyama kɛtɔ sawala a sɔlɔnko lɔ, 15kamasɔlɔn a kɛtɔ mɔɔba le le mɔ Tii ɲakɔlɔ. A do kà lɛzɛnji min feu, niwotɛ gbɛ suu suu. A josokun lafatɔ Nii Sɛnɛyanin ne hali a ba kɔnɔ. 16A do kɛtɔ sabu le, Bani Isilanka siyama kɛtɔ ai fannɔseila ai Tii Ala ma. 17A kɛtɔ taamana mɔ Tii ɲakɔlɔ hangilimaya ni fangamaya boloma iwo Nabi Iliya tɛɛ teme. A kɛtɔ dennu ni ai fanu wotɛ lɔbɛnna, ka telenmandeya hangili di mɔɔ kolobalilu ma, ani ka mɔ Tii ya mɔɔlu lɔbɛn a yɛ.»
18Wo fɔ mɛlɛka bolo, Zakaliya do k'a maɲininga, a vɛɛ: «Ǹ kɛtɔ a lɔnna di ko a kɛtɔ ten ne? Kamasɔlɔn m̀'ɛ kɔlɔya, ani m̀ moso fana vɛ jaanfa a sidanma lɔ.»
19Mɛlɛka k'a javi, a vɛɛ: «Ǹe le Jibililu le min lɔnin Ala ɲakɔlɔ. Ǹ kelayanin samakan kein min lasenko le lɔ i ma. 20Kɛɛ komi i ma la ǹ kumakannu la minu mafatɔ a waate bɛlɛ lɔ, wo le y'a ma, i totɔ boboya lɔ haan fɔɔ ko minu ma vɛ fala lon min na.»
21Wo yi kɛla waate min nɔ, jama tɛɛ Zakaliya makɔnɔna kɛnɛma. Ai do kɔnɔlɔ ka fili, kamasɔlɔn a tɛɛ vɛ mɛn lɔhɔlɔma dingila lɔ. 22Zakaliya bɔnin kɛnɛma, a ma se kumala ai yɛ. Ai do k'a lɔn wo le lɔ ko, ko dɔ vɛ jiya a la lɔhɔlɔma dingila lɔ. Zakaliya do ka to boboya lɔ, a v'a bolo jatesiila ai yɛ.
23Zakaliya ya baale waate ka ban mingɛ, a ka seikɔ aa bon na. 24A lɔ ma mɛn butu, a moso Elizabɛti ka kɔnɔ ta. A do ka to doon nɔ haan fɔɔ kalo loolu. 25A tɛɛ a fɔla, a vɛɛ: «Ǹ'i bolo min ma yi ne, ǹ Tii ya kokɛnin ne wo le. A vɛ hena ǹ na ka maloya bɔ ǹ na mɔɔlu ɲakɔlɔ.»
Mɛlɛka ka Isa sɔlɔnko fɔ teme
26Elizabɛti kɔnɔ kalo wɔɔlɔna, Ala ka mɛlɛka Jibililu kelaya Galile so dɔ la, min tɔɔ yi ko Nazalɛti. 27#Matiyu 1.18.A ka taa se singbilini dɔ ma, min ma kɛ́ ko lɔn ba, min tɔɔ tɛɛ ko Mɔyamu. A maminanin tɛɛ kɛ́ dɔ bolo, min tɔɔ tɛɛ ko Jusufu, Masakɛ Dawuda bɔzɔn.
28Mɛlɛka ka na a ma, a vɛɛ a yɛ: «Ǹ'i fola, Ala na nɛɛma kɛla ile min yɛ! Mɔ Tii i fɛ.»
29Mɔyamu kɔnɔlɔ ka fili bubale ka bɛn kuma wo ma. A v'i milila ko foli suu wo kɔlɔ yi mindɛ le. 30Mɛlɛka do vɛɛ a yɛ: «Mɔyamu, i kà siyan. Ala vɛ nɛɛma kɛ i yɛ. 31#Matiyu 1.21.A ye, i kɛtɔ kɔnɔ tala ka denkɛ sɔlɔn. I y'a tɔɔla ko Isa. 32A do kɛtɔ mɔɔba le le. Ai kɛtɔ a fɔla a ma ko Masa Taala Denkɛ, ado mɔ Tii Ala kɛtɔ a lasiila a bema Dawuda ya masayasiifen nɔ. 33A siitɔ Janguba bɔzɔnnu kunna kudein. Aa masaya tɛ ban tuun!»
34Wo fɔ mɛlɛka bolo, Mɔyamu k'a maɲininga, a vɛɛ: «Wo yi se kɛla di, kamasɔlɔn m̀ ma kɛ́ ko lɔn?»
35Mɛlɛka do k'a javi, a vɛɛ: «Nii Sɛnɛyanin jiitɔ i kan, ani Masa Taala ya seetiiya bilintɔ i kunna. Wo le y'a ma, i kɛtɔ lɔhɔlɔma den min sɔlɔnna, mɔɔlu kɛtɔ a fɔla a ma ko Ala Denkɛ. 36I i mili i badenma moso Elizabɛti ma, min fana vɛ denkɛ kɔnɔ ta aa kɔlɔya waate lɔ. Ai tɛɛ a fɔla a ma ko moso malɔnin, kɛɛ a a kɔnɔ kalo wɔɔlɔna le lɔ yi ne. 37Kamasɔlɔn Ala tɛ kaɲala ko ko si la.»
38Wo lɔ, Mɔyamu vɛɛ: «Ǹ'i ǹ Tii ya jɔn ne le. A yi kɛ ǹ yɛ iwo i n'a fɔla teme.» Wo kɔ, mɛlɛka ka bɔ Mɔyamu fɛ ka taa.
Mɔyamu ka taa Elizabɛti fɛlɔ teme
39Wo waate kelen nɔ, Mɔyamu v'i wulila telemanin ka taa ɲagba le Jude so dɔ la tinima dingila lɔ. 40A do ka don Zakaliya ya bon na ka Elizabɛti fo. 41Elizabɛti ka Mɔyamu ya folikan mɛn mingɛ, a den v'i lamaamaala telemanin a kɔnɔlɔ. Nii Sɛnɛyanin ka Elizabɛti josokun lafa, 42a do k'a kan labɔ k'a fɔ Mɔyamu yɛ, a vɛɛ: «Duwawuden ne i le mosolu bɛ tɛma, ani den min y'i kɔnɔlɔ, wo fana yi duwawuden ne le!» 43Elizabɛti vɛɛ kɔtunun: «Ǹ'i mɔɔ mindɛ le k'a fɔ ko ǹ Kuntii woloba yi na m̀ ma? 44Ǹ n'iya folikan mɛnna mingɛ, ǹ den n'i lamaamaala ǹ kɔnɔlɔ sawa boloma. 45Duwawuden ne i le le, kamasɔlɔn kuma min fɔnin i yɛ mɔ Tii bolo, i vɛ limaniya ko wo mafatɔle.»
Mɔyamu ka Ala tanu teme
46Wo kɛ, Mɔyamu vɛɛ:
«Ǹ'i ǹ Tii buɲala ǹ josokun nɔ,
47ado ǹ nii la vɛ sawa ka bɛn ǹ Kisiba Ala ma.
48Kamasɔlɔn a v'a ɲa kaa aa jɔnmoso ya fandanniya lɔ.
Ka ta bi ma, mɔɔlu kɛtɔ a fɔla m̀ ma ko duwawuden,
49kamasɔlɔn Seebɛtii vɛ ko babalu kɛ ǹ yɛ.
A tɔɔ sɛnɛyanin!
50A aa henandeya jiyala a ɲasiyanɲɛbalu le la ani wolu bɔzɔnnu.
51A na kawanankolu kɛla a bolo makawanin ne la,
ka mɔɔ fannɔbalu lɔjɛzɛn ani aiya kojatesiininnu bɛ.
52A na seetiilu gbɛnna k'ai bɔ aiya masayasiifennu kɔkan,
ka ban ka mɔɔ fanmajiininnu dalaya kɔlɔta.
53A na kɔɔntɔlu sɔla dɔnnifen keinnu sɔ fɔɔ k'ai lawasa,
ka ban ka nafolotiilu bolokolongbɛ bila.
54A na aa jɔn Bani Isilankalu madɛmɛnna,
kamasɔlɔn a ma ɲina aa henandeya kɛko lɔ,
55iwo a na lahedi tala teme mɔ bema Ibulahima ni aa bɔzɔn bɛ yɛ kudein!»
56Mɔyamu ka to Elizabɛti fɛlɔ ka kalo sawa jate kɛ je. Wo kɔ, a k'i kɔsei a fɛso.
Yaya sɔlɔnnin teme
57Elizabɛti moilon ka se, a do ɲuma ka jii denkɛ la. 58A siiɲɔɔlu ni a badenmalu k'a mɛn mingɛ ko mɔ Tii Ala vɛ hena a la, ka ko ba wo kɛ a yɛ, ai do vɛ sawala a fɛ.
59Den sɔlɔn tele seinna lon, ai bɛ ka na den makɛnɛkɛya lɔ. Ai tɛɛ a fɛ ka den tɔɔla a fa Zakaliya la. 60Kɛɛ a ba k'a fɔ ai yɛ, a vɛɛ: «Ɛnɛn! Fɔ a yi tɔɔla ko Yaya.»
61Kɛɛ ai do vɛɛ a yɛ: «Ài badenmalu lɔ mɔɔ tɔɔ tɛ ten.»
62Wo lɔ, ai k'ai bolo jatesii den fa yɛ, k'a maɲininga den tɔɔ ma. 63Zakaliya k'a bolo jatesii ko ai yi na wala le. A do ka sɛvɛli kɛ a kan, ko: «Den tɔɔ le Yaya.» Ai bɛ ka kawakoya wo lɔ. 64Telemanin, Zakaliya nɛɛ ka fɔlin, a do vɛ kumala ka Ala tanu.
65Ai siiɲɔɔlu bɛ ka siyan bubale, ado ko wolu vɛ jɛzɛnna Jude tinima fan bɛ lɔ. 66Mɔɔ minu k'ai mɛn, wolu tɛɛ ai milila, ai vɛɛ: «Den min kɛtɔ mɔɔ suu mindɛ le?» Kamasɔlɔn a lagbɛnin tɛɛ ko Ala ya foniseleya tɛɛ denni kɔkan.
Zakaliya ka Ala tanu teme
67Yaya fa Zakaliya joso la ka fa Nii Sɛnɛyanin la, a do vɛ kelaya kɛla, a vɛɛ:
68«Tanuli yi mɔ Tii yɛ, Bani Isilankalu Tii Ala,
kamasɔlɔn a nanin aa mɔɔlu madɛmɛnko lɔ k'ai kunmaka.
69A na Lakisilikɛba makawanin lanala mɔ ma,
ka bɔ aa jɔn Masakɛ Dawuda ya bonna lɔ.
70A n'a fɔla aa lɔhɔlɔma kelalu lɔ kɔlɔkɔlɔ le,
71ko wo tii kɛtɔ mɔ lakisila ka mɔ bɔ mɔ juulu bolo,
ani ka mɔ bɔ mɔ lagbeyaɲɛbalu fanga kɔlɔ.
72Wo boloɲa le ma, a aa henandeya jiyala mɔ bemanu la,
k'a hangili to aa lɔhɔlɔma salatikan nɔ,
73a na lahedi min tala mɔ bema Ibulahima yɛ,
74ko a kɛtɔ mɔ bɔla mɔ juulu bolo,
fɔsa m'a bato siyanbaliya boloma,
75ani m'i kɛ mɔɔ sɛnɛyanin ni telenmande le a ɲakɔlɔ maa dunuɲalɔtɛɛ bɛ lɔ.
76Ile ǹ den koni, ai kɛtɔ a fɔla i ma ko Masa Taala ya kela,
kamasɔlɔn i kɛtɔ taala mɔ Tii ɲa, ka aa siya lɔbɛn a yɛ,
77fɔsa i y'aa mɔɔlu lalɔnni kisiko la,
aiya julumbulu lɔkotoko sabu la.
78Ka bɛn mɔ Tii Ala ya henandeya ba ma,
kɛnɛya bɔtɔ mɔ yɛ gbesekele iwo telebɔ,
79fɔsa mɔɔ minu siinin divi lɔ saya duulen kɔlɔ,
kɛnɛya yi bɔ wolu yɛ,
ani mɔ sen yi bila josolajii siya kɔkan.»
80Denni ka to buɲala ka fanga sɔlɔn a josokun nɔ. A ka taa to fuwa lɔ haan fɔɔ a k'a jɛlɛ lankɛnɛmaya Bani Isilankalu yɛ lon min na.
Currently Selected:
Luka 1: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
