Luka 9
9
Isa ka aa keladen mɔɔ tan ni fila (12) kelaya teme
Matiyu 10.5-15; Malɛkɛ 6.7-13
1Isa ka aa keladen mɔɔ tan ni fila (12) ladɛn mingɛ, a ka fanga ni seetiiya di ai ma, fɔsa ai yi se jinajuulu gbɛnna mɔɔlu lɔ, ani ka jangalotɔlu lakɛnɛya. 2A do k'ai kelaya ko ai yi taa Ala ya masaya ko lase, ani ka mɔɔlu lakɛnɛya. 3A do vɛɛ ai yɛ: «Ài kà fen fen si ta àiya taama min nɔ. Taamabele o, bɔlɔ o, dɔnnifen o, wɔli o, ài kà wo suu suu ta. Ài do kà àiya faanibalu kɛ fila le. 4Ài vɛ jiyala bon suu suu la, ài yi to woja haan fɔɔ ài taa waate yi se. 5#Kɛkolu 13.51.#Luka 10.4-11.Ni do ai k'i ban ài lɔminala tɛɛ o tɛɛ lɔ, ài yi bɔ so wo la ka je gbangban bɔ ài sen ma, ka wo kɛ ai ban tɔɔmase le.»
6Wo fɔ Isa bolo, aa keladennu vɛ siya minala ka taa so ni solu la, ai vɛ Samakan Kein lasena, ani ka jangalotɔlu lakɛnɛya fan bɛ lɔ.
Helodi kɔnɔlɔ ka fili ka bɛn Isa ma
Matiyu 14.1-12; Malɛkɛ 6.14-29
7 #
Matiyu 16.14; Malɛkɛ 8.28; Luka 9.19. Jamanakunnasiiba Helodi ka ko kɛnin minu bɛ mɛn mingɛ, a kɔnɔlɔ ka fili bubale, kamasɔlɔn a dɔlu tɛɛ a fɔla ko Yaya le wulinin ka bɔ saya lɔ. 8A dɔlu tɛɛ a fɔla ko Nabi Iliya la vɛ nkɛnɛmaya kɔtunun. A dɔlu fana tɛɛ a fɔla ko kela kɔlɔkɔlɔ dɔ vɛ seikɔ dunuɲa. 9Kɛɛ Helodi vɛɛ: «Ǹ na Yaya kun tɛɛla a la. Ǹ'i ko minu mɛnna yi ne, jene yi wo tii le?» Wo lɔ, Helodi tɛɛ Isa yenko ɲaɲininna.
Isa ka kɛ́ mɔɔ waa loolu (5 000) balo teme
Matiyu 14.13-21; Malɛkɛ 6.30-44; Yohana 6.1-14
10Isa ya keladennu seikɔnin, ai k'ai kɛkolu bɛ dandɛɛli kɛ a yɛ. Wo kɔ, Isa ka taa ai le ai ta fan so dɔ la, ai y'a fɔla min ma ko Betisaida. 11Jama ka wo mɛn mingɛ, ai k'a salan. Isa do k'ai bɛ lɔmina kobɛn, ka Ala ya masaya ko lase ai ma, ani ka mɔɔlu lakɛnɛya, kɛnɛya lɔɔ tɛɛ minu la.
12Teleben waate, aa keladen mɔɔ tan ni fila (12) ka na a fɔ a yɛ, ai vɛɛ: «Jama labila, fɔsa ai yi taa so ni toodalu la jan laminin nɔ, k'ai jiya ni dɔnnifen ɲinin, kamasɔlɔn m'i fuwa le lɔ jan.»
13Kɛɛ Isa do vɛɛ ai yɛ: «Àilu gbu yi balo di ai ma.»
Ai do vɛɛ a yɛ: «Bulukala loolu ni jɛɛni fila le yi mɔ bolo dein. Niwotɛ, fɔ mɔ ka taa dɔnnifen san jama min bɛ yɛ.» 14Wo k'a talan, kɛ́ mɔɔ waa loolu (5 000) jate le tɛɛ je.
Ado Isa vɛɛ aa keladennu yɛ: «Ài yi jama lasii kpɛkpɛ mɔɔ biloolu loolu (50) le.» 15Keladennu k'a kɛ ten ka jama lasii. 16Wo kɛ, Isa ka bulukala loolu ni jɛɛni fila ta, k'a ɲa lajɛlɛ sanma ka balika bɔ Ala yɛ, ka ban ka wolu lɔkalikali k'a di a kɔbiladennu ma, ko ai y'a lɔtala jama wotɛ. 17Ai bɛ ka dɔnni kɛ k'ai fa kpekpe. Ai wɔlinin, Isa kɔbiladennu ka bulu ni jɛɛ kulunkulun tɔlu ladɛn, ka gbɔlɔ ɲa tan ni fila (12) lafa.
Jene gbu yi Isa le?
Matiyu 16.13-19; Malɛkɛ 8.27-29
18Lon dɔ, Isa kelen tɛɛ Ala dalila, k'a kɔbiladennu to a dafɛ. A do k'ai maɲininga, a vɛɛ: «Mɔɔlu yi ǹ jatela jene le?»
19 #
Matiyu 14.1, 2; Malɛkɛ 6.14, 15; Luka 9.7, 8. Ai k'a javi, ai vɛɛ: «A dɔlu y'a fɔla ko Makolikɛba Yaya le i le. A dɔlu fana y'a fɔla ko Nabi Iliya le i le. A dɔgbɛlɛlu y'a fɔla ko kela kɔlɔkɔlɔ dɔgbɛlɛ v'i wuli ka bɔ saya lɔ.»
20 #
Yohana 6.68, 69. Wo fɔ ai bolo, a k'ai maɲininga, a vɛɛ: «Àilu do? Ài yi ǹ jatela jene le?»
Piyɛli k'a javi, a vɛɛ: «Ile le Alimasihu le, Ala na min kelayala.»
Isa ka aa saya ni a wuliko fɔ
Matiyu 16.20-28; Malɛkɛ 8.30–9.1
21Isa do k'a fɔ ai yɛ k'a magbeleya ko ai kà wo ko fɔ mɔɔ suu suu yɛ. 22A do vɛɛ: «Mɔɔnivin Tanin ka kan ka tɔlɔya siyama masɔlɔn. Kɛmɔbalu ni salakalase kuntiibalu ni seliya kalanmɔɔlu kɛtɔ ai banna a lɔ, k'a faa. Kɛɛ tele fila a sawana, a wulitɔ ka bɔ saya lɔ.»
23 #
Matiyu 10.38; Luka 14.27. Wo kɔ, a k'a fɔ jama bɛ yɛ, a vɛɛ: «Ni mɔɔ min y'a fɛ ka bila ǹ kɔ, fɔ wo tii i ban a jɛlɛ lɔ, k'a gbaankɔlɔman ta lon bɛ ka bila ǹ kɔ. 24#Matiyu 10.39; Luka 17.33; Yohana 12.25.Kamasɔlɔn ni mɔɔ mɔɔ si y'a fɛ ka a nii lakisi, wo tii bɔnɔtɔ a la. Ni do mɔɔ min ka bɔnɔ a nii la ka bɛn ǹe ma, wo tii kɛtɔ a nii lakisila. 25A yi di? Ni mɔɔ ka dunuɲa bɛ sɔlɔn ka bɔnɔ a nii la, nafa mindɛ le wo la a yɛ? 26Wo le kɛtɔ a kɛla, ni mɔɔ min vɛ maloyala ǹe ni ǹ kumakannu le, Mɔɔnivin Tanin yi maloyale wo tii le, a vɛ nala lon min na aa magbiliyali lɔ, ani a Fa aa magbiliyali, ani lɔhɔlɔma mɛlɛkalu ya magbiliyali. 27Ǹ'i tuɲa fɔ ài yɛ, dɔlu y'ài tɛma jan minu tɛnala saya masɔlɔnna, fɔ ai vɛ Ala ya masaya lankɛnɛmayatɔ yena.»
Isa ɲakɔlɔla ka jɛlɛma teme
Matiyu 17.1-8; Malɛkɛ 9.2-8
28Tele sein jate timinnin kɔ, Isa ka Piyɛli ni Yohana ni Janguba ta ka taa ai le Aladaliya lɔ tini kɔkan. 29Isa ka to Ala dalila, a ɲakɔlɔla ka jɛlɛma, ani aa faanilu ka gbɛ pepe. 30-31Kɛ́ fila, minu taanin kɛla Nabi Musa ni Nabi Iliya le, wolu ka bɔ gbɛ la telemanin nɔɔlɔ ba lɔ, ai vɛ kumala Isa fɛ ka bɛn a sako ma, min mafatɔ a bolo Jelusalɛmu. 32Wo k'a talan Piyɛli ni a taamaɲɔɔlu tɛɛ vɛ sunɔɔ. Kɛɛ ai ka kunun ka Isa nɔɔlɔ ye, ani kɛ́ fila minu lɔnin tɛɛ a dafɛ. 33Kɛ́ fila wolu taatɔla, Piyɛli k'a fɔ Isa yɛ, a vɛɛ: «Kalanmɔɔ, a bɛnyine m'i to jan. Diɲa m'i gbaa sawa lɔ: i ta kelen, Nabi Musa ta kelen, ani Nabi Iliya ta kelen.» A do tɛɛ m'a lɔn a tɛɛ min fɔla. 34Piyɛli ka to kumala, sanbiliya ka na ka bilin ai kunna. Sanbiliya jiitɔla ai kunna, ai ka siyan. 35#Matiyu 3.17; 12.18; Malɛkɛ 1.11; Luka 3.22.#2 Piyɛli 1.17, 18.Wo kɛ, kumakan dɔ ka bɔ sanbiliya lɔ, a vɛɛ: «Ǹ diyanan Denkɛ le ne, ani ǹa Mɔɔ Tanin. Ài y'ài tolomalɔ a la.» 36Kumakan wo mɛn kɔ, ai ma mɔɔ ye fɔ Isa kelen. Ai do ka jeden ko wo ma. Ai ka min ye, ai ma wo ɲafɔ mɔɔ yɛ waate wo lɔ.
Isa ka denni jinatɔ dɔ lakɛnɛya teme
Matiyu 17.14-18; Malɛkɛ 9.14-27
37Ai ka jii tini la mingɛ wo dusagbɛlon, jama ba ka na ka Isa labɛn. 38Kɛ́ dɔ ka to jama tɛma k'a kan labɔ, a vɛɛ: «Kalanmɔɔ, i jaani, i ɲa lɔ ǹ denkɛ lɔ, denkɛ kelenpesa min yi m̀ bolo. 39Jina le yi bilala a lɔ. A do vɛ bilala a lɔ kotan, a a lagbanɔla telemanin, k'a lajaajaa, k'a dakaanvu bɔ, ani k'a lajavi bubale. A do bila gbeleyayine a bolo. 40Ǹ n'i kɔbiladennu madiyala ko ai yi jina gbɛn a lɔ, kɛɛ ai do pa ma se.»
41Isa do vɛɛ: «Àilu limaniyabalilu ni mɔɔ filininnu! Ǹ'i to ài tɛma ka àiya ko mina m̀ ma haan fɔɔ waate mindɛ?»
Wo fɔ a bolo, a vɛɛ kɛ́ yɛ: «Na i denkɛ le jan.» 42Denni natɔla Isa ma, jina k'a laben duu ma k'a lajaajaa gbiligbili. Isa do ka jina majaman, ka denni lakɛnɛya, ka ban k'a lasei a fa ma. 43Mɔɔ bɛ ka kawakoya ka bɛn Ala ya foniseleya ma.
Isa ka aa saya ni a wuliko fɔ kɔtunun
Matiyu 17.22-23; Malɛkɛ 9.30-32
Jama kawakoyanin ka bɛn Isa kɛkolu bɛ ma, a vɛɛ a kɔbiladennu yɛ: 44«Ài y'ài tolomalɔ kobɛn ǹ kumakan na. Mɔɔnivin Tanin yi don bolo le ma mɔɔlu bolo.» 45Kɛɛ a kɔbiladennu ma kuma wo ɲaye. A kɔlɔ doonnin tɛɛ ai ma, fɔsa ai kana a ɲaye. Ai bɛ do tɛɛ siyanna a maɲiningako lɔ kuma wo kɔlɔ la.
Jene yi ɲamɔɔ le?
Matiyu 18.1-5; Malɛkɛ 9.33-37
46 #
Luka 22.24. Waate senin, sɔsɔyali dɔ k'i wuli Isa kɔbiladennu tɛma ko jene y'ai bɛ lɔ ɲamɔɔ le. 47Komi Isa tɛɛ k'ai miliya lɔn, a ka denni dɔ ta k'a lalɔ a tɔɔfɛ, 48#Matiyu 10.40; Luka 10.16; Yohana 13.20.k'a fɔ ai yɛ, a vɛɛ: «Ni mɔɔ min k'a bolo sii denni min ɲɔɔzii kɔlɔ ka bɛn ǹa ko ma, wo tii v'a bolo sii ǹe gbu kɔlɔ. Ni mɔɔ min do k'a bolo sii ǹ kɔlɔ, wo tii v'a bolo sii ǹ kelaba fana kɔlɔ. Kamasɔlɔn mɔɔ min v'a jɛlɛ dɔɔyala ài bɛ lɔ, wo tii le buɲanin ài bɛ le.»
Mɔɔ min tɛ ài juu le, ài dɔ le wo le
Malɛkɛ 9.38-40
49Yohana vɛɛ Isa yɛ: «Kalanmɔɔ, mɔ na kɛ́ dɔ yena, a tɛɛ jinalu gbɛnna mɔɔlu lɔ i tɔɔ lɔ. Mɔ k'a fɔ a yɛ a yi nɔningɛ wo ma, kamasɔlɔn a tɛ mɔ dɔ le.»
50Isa do vɛɛ ai yɛ: «Ài kà a dansii wo la. Mɔɔ min tɛ ài juu le, ài dɔ le wo le.»
Samaliyakalu k'i ban Isa lɔ teme
51Isa kɔlɔta waate ka taa haijɛnɛ ma ka sulunya mingɛ, a k'a latɛɛ ko fɔ a taanin Jelusalɛmu. 52Wo lɔ, a ka keladen dɔlu lataa a ɲa, minu ka taa Samaliyakalu ya soni dɔ la ka kolu lɔbɛn a yɛ. 53Kɛɛ so wo mɔɔlu ma diɲa ka Isa jiya, kamasɔlɔn a tɛɛ taala Jelusalɛmu le. 54A kɔbiladen Janguba ni Yohana ka wo ye mingɛ, ai ka Isa maɲininga, ai vɛɛ: «Mɔ Kuntii, jalasa i yi diɲale m'i taa makili ka bɔ sangbolo lɔ ai halakiko lɔ?»
55Isa do k'i ɲa tilimin ai la k'ai makuma. 56Ai ka timin woja la ka taa so gbɛlɛ la.
Isa kɔbiladenya ni aa tɔlɔya
Matiyu 8.19-22
57Ai taatɔla, mɔɔ dɔ k'a fɔ Isa yɛ, a vɛɛ: «I vɛ taala tɛɛ o tɛɛ lɔ, ǹ'i bilale i kɔ.»
58Isa do vɛɛ a yɛ: «Diɲa yi jɛɛkani bolo, ɲaa yi kɔnɔni bolo, kɛɛ dingila tɛ Mɔɔnivin Tanin bolo, a a nɔningɛ tɛɛminja.»
59Isa k'a fɔ kɛ́ gbɛlɛ yɛ, a vɛɛ: «Na, i yi bila ǹ kɔ.»
Wo k'a javi, a vɛɛ: «Ǹ Kuntii, diɲa ǹ'i taa ǹ fa sudoon bene.»
60Isa do vɛɛ a yɛ: «Fulenilu to je, ai y'ai fuleni ɲɔɔlu sudoon. Kɛɛ fɔ ile yi taa Ala ya masaya ko lase.»
61A dɔgbɛlɛ k'a fɔ a yɛ kɔtunun, a vɛɛ: «Ǹ Kuntii, ǹ'i bilale i kɔ, kɛɛ diɲa ǹ'i taa ǹ sala m̀ balamɔɔlu la bene.»
62Isa k'a javi, a vɛɛ: «Mɔɔ min yi buluwali kɛla dawa la, a v'i ɲa kaana a kɔma, wo tii tɛ Ala ya masaya baale manɔ feu.»
Currently Selected:
Luka 9: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
