Matiyu 11

Yaya k'a kɔbiladennu lataa Isa ma

Luka 7.18-35

1Isa wɔlinin jamali wolu dila aa keladen mɔɔ tan ni fila (12) ma, a ka bɔ je ka taa aiya solu la ka bɛn mɔɔlu kalanko ma, ani k'ai kawani.

2Makolikɛba Yaya ka to kaso la, a ka Masa Tɔɔmasenin kɛkolu mɛn. Wo kɛ, a k'a kɔbiladen dɔlu lataa Isa fɛlɔ, 3ko ai yi taa a maɲininga, ko: «Jalasa ile le wo tii le min ka kan ka na, niwotɛ m'i mɔɔ gbɛlɛ makɔnɔ?» 4Isa k'ai javi, a vɛɛ: «Ài yi min mɛnna, ani ài yi min yena, ài yi taa wo fɔ Yaya yɛ: 5Ɲagbɛlu ɲa la vɛ ka, namalanilu vɛ taama kobɛn, kunatɔlu la vɛ sɛnɛya, tologbɛlɛnnu tolo la vɛ ka, fulenilu la vɛ wuli ka bɔ saya lɔ, ani Samakan Kein la vɛ se fandannilu ma. 6Ni mɔɔ mɔɔ kunnɔ ma tɛɛ ka bɛn m̀ ma, duwawuden ne wo tii le.»

7Yaya ya keladennu kɔseitɔla, Isa vɛ kumala jama yɛ ka bɛn Yaya ya ko ma, a vɛɛ: «Ài na taala ka mindɛ ye fuwa lɔ? Ài na kaa le yena, fɔɲɛ yi min lamaamaala? Wo tɛ dɛ! 8Ài na taala ka mindɛ ye wo lɔ? Faani kein tii? Mɔɔ minu yi faani keinnu bilala ai kanna, wolu yi yena masakɛlu ya bonnu le la. 9Ài na taala ka mindɛ ye wo lɔ? Jalasa ài ma taa ka kela dɔ ye? Ǹ'a fɔ ài yɛ, kela le a le. A do buɲanin kela le feu! 10Yaya ya ko sɛvɛnin kitabu kɔnɔ, ko:

‹Ǹe Ala vɛɛ ǹ kɛtɔ ǹa keladen lataala i ɲa,

min kɛtɔ siya lɔbɛnna i yɛ.›

11Ǹ'i tuɲa fɔ ài yɛ, mɔɔ tɛ mosolu ya densɔlɔnnin nɔ min buɲanin ka timin Makolikɛba Yaya la. Wo bɛ n'a kɛ, hali mɔɔ bɛ lɔ dɔɔmandani min fɛ yi haijɛnɛ masaya la, wo tii buɲanin vɛ Yaya le. 12#Luka 16.16.Ka damina Yaya ya kawanili ma ka na sii bi la, haijɛnɛ masaya kɛnin fangako le le, ado fangamalu le y'a ɲininna k'a mina. 13Kamasɔlɔn jani Yaya tɛɛ aa kawanili damina, Nabi Musa ya Taulati ani kela dɔgbɛlɛlu ya kitabulu tɛɛ kumala ka bɛn haijɛnɛ masaya waate le ma. 14#Matiyu 17.10-13; Malɛkɛ 9.11-13.Ni ài ka diɲa ka la a la, Yaya yi Nabi Iliya le le, a fɔnin min ma ko a yi nala. 15Tolo yi mɔɔ min kun, wo tii y'a tolomalɔ kuma min ma.

16«Ǹ'i bi mɔɔlu la jene ma? Ai bɔnin dennilu la, minu siinin ɲanatɛɛla bala lɔ, ai v'a fɔla ai tɔvalu yɛ, ai vɛɛ:

17‹Mɔ na tolon kɛla ài yɛ ka fule fɔ,

kɛɛ ài do ma dɔn kɛ.

Mɔ na saya dɔɔni lala ài yɛ,

ài do ma kasi.›

18Kamasɔlɔn Yaya ka na mingɛ, a tɛɛ sundonna, a tɛɛ tɛ gbɛ minna. Wo le n'a kɛla, ai y'a fɔla ko jinatɔ le a le. 19Mɔɔnivin Tanin fana vɛ na. A yi dɔnni kɛla k'i min. Wo le y'a kɛla, ai y'a fɔla ko nooma ni gbɛtɔ le a le. Ko a yi niisɔɔnminabalu ni julumbutɔlu le kɛla a tɔva le. Wo bɛ n'a kɛ, mɔɔ min yi taamana Ala ya hangilimaya lɔ, wo tii kɛkolu kɛtɔ a jiyala ko a yi siya bɛlɛ le kɔkan.»

So limaniyabalilu

Luka 10.13-15

20Wo kɔ, Isa tɛɛ vɛ kawananko siyama kɛ so minu la, a vɛ sokɔnɔmɔɔ wolu makumala, kamasɔlɔn ai ma ai dajoo jɛlɛma. Wo lɔ, a vɛɛ: 21«Kolazinkalu, gbalo yi ài yɛ! Betisaidakalu, gbalo yi àilu fana yɛ! Kamasɔlɔn kawananko minu kɛnin ài fɛlɔ, ni wolu tɛɛ ka kɛ Tili ni Sidɔn solu kɔnɔ, je mɔɔlu tɛɛ ai dajoo mafalinne jona. Ai tɛɛ ai siile buuli lɔ ka sayakasifaanilu bila ai kanna, ka wo kɛ ai dajoo mafalin tɔɔmase le. 22Wo le y'a ma, ǹ'a fɔla ài yɛ, kititɛɛlon, Tilika ni Sidɔnkalu ya kiti kɛtɔ nɔyala ka timin ài ta la. 23Kapɛlɛnamukalu, àilu do? Ài y'ài milila ko àiya so jɛlɛtɔle haan ka sii haijɛnɛ la? Wo tɛnala kɛla! Ài jiitɔle haan fɔɔ ka se jahanama! Kamasɔlɔn kawananko minu kɛnin ài fɛlɔ, ni wo suu tɛɛ ka kɛ Sɔdɔmu so kɔnɔ, so wo tɛɛ tole a nɔ lɔ ka sii bi la. 24#Matiyu 10.15; Luka 10.12.Ǹ'a fɔ ài yɛ, kititɛɛlon, Sɔdɔmu mɔɔ yonnu ya kiti kɛtɔ nɔyala ka timin ài ta la.»

Isa ka balika bɔ a Fa Ala yɛ teme

Luka 10.21-22

25Wo waate kelen nɔ, Isa k'a fɔ, a vɛɛ: «Ǹ Fa, sangbolo ni duukolo Tii, ǹ'i balika bɔla i yɛ, kamasɔlɔn i na ko minu doonna hangilima ni lɔnnilalu ma, i vɛ wolu jiya kalanbalilu la. 26Tuɲa le ǹ Fa, min kɛko n'i diya le la.»

27 # Yohana 3.35; Yohana 1.18; 10.15. «Ǹ Fa vɛ ko bɛ don m̀ bolo. Mɔɔ ma Denkɛ lɔn ni a Fa tɛ. Ado mɔɔ ma Fa lɔn ni a Denkɛ tɛ, ani a Denkɛ y'a fɛ ka ale lankɛnɛmaya mɔɔ minu yɛ.»

28«Àilu minu sɛyɛnin àiya doni gbililu kɔlɔ, ài yi na ǹ ma, ǹ'i nɔningɛ di ài ma. 29Ài yi diɲa ǹa kuntiiya ma iwo nisi yi diɲala sɛnɛkɛdawa ma teme, ani ka lɔnni sɔlɔn ǹ fɛ. M̀ mafanin, ǹa ko gbeleyanin tɛ. Ài vɛ nala ǹ ma, ài kɛtɔ nɔningɛ sɔlɔnna. 30Kamasɔlɔn ǹa baalelu nɔyayine, ani ǹa donilu feyayine.»

Currently Selected:

Matiyu 11: MBT2023

Highlight

Copy