Matiyu 24

Lɔhɔlɔmabonba teko

Malɛkɛ 13.1-2; Luka 21.5-6

1Isa bɔtɔla lɔhɔlɔmabonba luu kɔnɔ, a kɔbiladennu k'i madon a la k'a fɔ a yɛ ko a yi lɔhɔlɔmabonba jiinkɔnɔ bonnu lasaa. 2Isa k'ai javi, a vɛɛ: «Jalasa ài ɲa yi fen minu bɛ la yi ne, kɛlɛ? Ǹ'i tuɲa fɔ ài yɛ, lon dɔ wolu bɛ tetɔle tɛtɛ, hali kawakulun fila gbu tɛnala tola i ɲɔɔ kɔkan.»

Dunuɲa laban tɔɔmaselu

Malɛkɛ 13.3-13; Luka 21.7-19

3Isa siinin ka to Zeituna tini kɔkan, a kɔbiladennu ka na a ma ai ta fan k'a maɲininga, ai vɛɛ: «A fɔ mɔ yɛ, ko wolu kɛtɔ waate mindɛ? Tɔɔmase mindɛ kɛtɔ i na waate jiyala, ani dunuɲa laban waate?»

4Isa k'ai javi, a vɛɛ: «Ài y'ài jando ài jɛlɛ lɔ fɔsa mɔɔ suu suu kana ài lafili. 5Kamasɔlɔn mɔɔ siyama kɛtɔ nala ǹ tɔɔ lɔ k'a fɔ ko: ‹Ǹe le Masa Tɔɔmasenin ne.› Ai kɛtɔ mɔɔ siyama lafilila wo lɔ. 6Ài vɛ kɛlɛkolu mɛnna, ani kɛlɛ mangan, ài hangili kà ɲaami, kamasɔlɔn wolu ka kan ka kɛ, kɛɛ wo tɛ dunuɲa laban ne.» 7Sibolomalu wulitɔ i ɲɔɔ kanma. Jamanalu fana wulitɔ i ɲɔɔ kanma. Kɔɔn fitina ni duukolojaajaa kɛtɔ dingila siyama lɔ. 8Wo bɛ kɛtɔ tɔlɔya damina le le, iwo tinkɔnɔdimin.

9 # Matiyu 10.22. «Wo timinnin kɔ, mɔɔlu kɛtɔ ài donna mɔɔlu bolo, fɔsa ai y'ài jangata k'ài faa. Ài gbeyatɔ dunuɲa siboloma bɛ yɛ ka bɛn ǹa ko ma. 10Mɔɔ siyama kɛtɔ limaniya siya bilala, k'i ɲɔɔ don mɔɔlu bolo, ani k'i ɲɔɔ lagbeyaɲɛ. 11Faɲafɔ kela siyama wulitɔ ka mɔɔ siyama lafili. 12Ado ka bɛn koyon wala jate ma, mɔɔ siyama ya kanundeya dɔɔyatɔ. 13#Matiyu 10.22.Kɛɛ ni mɔɔ min ka gbeleya mina a ma ka sii tɔlɔya laban na, wo tii yi kisile. 14Samakan Kein min ka bɛn haijɛnɛ masaya ma, wo lasentɔ dunuɲa fan bɛ lɔ ka kɛ seleya le siboloma bɛ yɛ. Wo vɛ kɛla, dunuɲa laban yi sene vɛ.

Tiɲalikɛba kɔsɔnin

Malɛkɛ 13.14-23; Luka 21.20-24

15«Kela Daniyɛli na tiɲalikɛba kɔsɔnin min ya ko fɔla, ài vɛ wo yena lɔnin lɔhɔlɔma dingila lɔ (sɛvɛ min kalanba y'a lɔja ka min ɲaye), 16wo vɛ kɛla, mɔɔ minu yi Jude koovi lɔ, wolu yi bɔli ka taa tinima dingilalu lɔ. 17#Luka 17.31.Ni waate wo ka mɔɔ min talan bon kɔkan, wo tii kà jii bon kɔnɔ a bolofennu tako lɔ. 18Ni wo do ka mɔɔ min talan sɛnɛ lɔ, wo tii kà seikɔ aa faaniba tako lɔ. 19Wo lonnu vɛ sena, gbalo kɛtɔ kɔnɔma ni dematiikulalu yɛ. 20Ài yi Ala dali ko àiya bɔli waate kana bɛn nɛnɛbɔ waate ma, niwotɛ Nɔningɛlon. 21#Ko Lankɛnɛmayanin 7.14.Kamasɔlɔn wo waate tɔlɔya gbeleyatɔle bubale. Wo ɲɔɔzii ma kɛ ba bene ka ta dunuɲa dan waate ma haan fɔɔ ka na sii bi la, ado tɔlɔya wo ɲɔɔzii tɛnala kɛla butu tuun. 22Ni Ala tɛɛ ma wo tɔlɔya waate lɔsulunya, adamaden foi tɛɛ tɛnala kisila. Kɛɛ ka bɛn Ala ya mɔɔ taninnu ma, a kɛtɔ a dɔ bɔla tele wolu la.

23«Wo waate, ni mɔɔ dɔ k'a fɔ ài yɛ, a vɛɛ: ‹A ye, Masa Tɔɔmasenin yi jan ne!›, niwotɛ: ‹A yi jan ve!›, ài kà la wo foi la. 24Kamasɔlɔn faɲafɔ kelalu wulitɔ, ani mɔɔ minu y'a fɔla ko ailu le Masa Tɔɔmasenin ne. Ai kɛtɔ tɔɔmase ba ni kawanankolu kɛla fɔsa Ala ya mɔɔ taninnu la yi fili, ni wo ka se kɛla. 25M̀'ɛ wo bɛ fɔ ài yɛ jani a waate yi se.

26 # Luka 17.23, 24. «Wo le y'a kɛla, ni mɔɔlu k'a fɔ ài yɛ ko Masa Tɔɔmasenin yi fuwa lɔ, ài kà taa je. Ni ai k'a fɔ ài yɛ ko a yi dingila madoonnin dɔ lɔ, ài kà la wo la. 27Kamasɔlɔn Mɔɔnivin Tanin nalon kɛtɔle iwo sanmɛnɛn yi bɔla teme telebɔ fannɔ ka se teleben fannɔ. 28#Luka 17.37.Ni soo su ka kɛ tɛɛ o tɛɛ lɔ, duwalu y'ai ladɛnna wo le ja.»

Mɔɔnivin Tanin nalon

Malɛkɛ 13.24-27; Luka 21.25-28

29 # Ko Lankɛnɛmayanin 6.12; Ko Lankɛnɛmayanin 6.13. «Wo waate tɔlɔya vɛ timinna feeya, tele fintɔ, ani kalo tɛnala gbɛla butu. Lolonilu benbentɔ ka bɔ sangbolo lɔ, ado sangbololɔ fangatiilu lamaamaatɔ. 30#Ko Lankɛnɛmayanin 1.7.Wo vɛ kɛla, Mɔɔnivin Tanin ya tɔɔmase kɛtɔ bɔla gbɛ la sangbolo lɔ. Ado dunuɲa siboloma bɛ kɛtɔ ai josomakasila, ai vɛ Mɔɔnivin Tanin natɔla yena sanbiliya lɔ seetiiya ni magbiliyali ba boloma. 31Wo kɔ, a kɛtɔ aa mɛlɛkalu lataala dunuɲa tongun naani bɛ la buulufɛkan ba le. Ka damina dunuɲa kun ma ka taa sii a juu la, aa mɛlɛkalu kɛtɔ aa mɔɔ taninnu ladɛnna.»

Toloju misali

Malɛkɛ 13.28-31; Luka 21.29-33

32«Ài yi hangili sɔlɔn ka bɛn toloju misali ma. Ài v'a bolo kula ni a bulu nɛlennu yena, ài y'a lɔn ko telema ma vɛ sulunya. 33Wo boloɲa kelen ma, ni ài ka ko wolu bɛ ye kɛla, ài y'a lɔn ko ǹ na waate ma vɛ sulunya, a do vɛ to dɔni, a yi se. 34Ǹ'i tuɲa fɔ ài yɛ, bi mɔɔlu bɛ tɛnala banna sala, fɔ ko wolu bɛ vɛ kɛla ka dafa. 35Sangbolo ni duukolo tununtɔle, kɛɛ ǹ kumakannu tɛnala tununna tuun!»

Mɔɔ ma dunuɲa laban waate lɔn

Malɛkɛ 13.32-37; Luka 17.26-30, 34-36

36«Ko minu kɛtɔ lon min na ani waate min nɔ, mɔɔ suu suu ma wo lɔn, hali mɛlɛkalu gbu minu yi haijɛnɛ. Hali Denkɛ gbu m'a lɔn, mafɔ mɔ Fa Ala kelenpesa. 37Mɔɔnivin Tanin nalon kɛtɔle iwo kolu ka kɛ teme Sedina Nuho tele lɔ. 38Kamasɔlɔn wo lonnu lɔ, jani ji ba tɛɛ na, mɔɔlu tɛɛ dɔnni kɛla k'i min, ani ka fulusili ni kɔɲɛmalɔ kɛ. Ai ka to wo bɛ la haan fɔɔ Sedina Nuho ka don kulunba kɔnɔ lon min na. 39Ai do ma sovi foi la haan fɔɔ ji ba ka na k'ai bɛ latunun. Mɔɔnivin Tanin nalon fana kɛtɔ ten ne. 40Wo lon, kɛ́ fila kɛtɔ sɛnɛ lɔ, a kelen minatɔ k'a dɔ to je. 41Moso fila kɛtɔ kɛla malo tuula, a kelen minatɔ k'a dɔ to je. 42Wo le y'a kɛla, fɔ ài yi to ài ɲana, kamasɔlɔn ài Tii natɔ lon min na, ài m'a lɔn. 43#Luka 12.39, 40.Ài yi ko min ɲaye: Ni bontii tɛɛ v'a lɔnna ko son natɔ waate min nɔ, a tɛɛ tole a ɲana. A tɛɛ tɛ diɲa son yi don aa bon na. 44Wo lɔ, àilu fana lɔbɛnnin yi to, kamasɔlɔn Mɔɔnivin Tanin natɔ waate dɔ lɔ, ài jii tɛ waate min ma.

45«Jene yi bɔiden sɔvɛ le ani hangilima, aa kuntii kɛtɔ min lasiila bɔiden tɔlu kunna, fɔsa a yi balo di ai ma a waate bɛlɛ lɔ? 46Ni bɔiden wo ya kuntii ka na ka a talan baale la, a kɛtɔ duwawuden ne le. 47Ǹ'i tuɲa fɔ ài yɛ, aa kuntii kɛtɔ ale le kɛla a bolofennu bɛ kunnasiiba le. 48Kɛɛ do, ni wo tii vɛ kɛla mɔɔ yon ne, tumadɔ a kɛtɔ a milila, a vɛɛ: ‹Ǹ kuntii vɛ mɛn, a tɛ nala jona.› 49Wo lɔ, a v'a bɔidenɲɔɔlu gbasila, ka taa a jɛlɛ dadiyabɔ gbɛtɔlu fɛ. 50Kɛɛ bɔiden wo ya kuntii natɔ lon dɔ, a t'i milila lon min ma, a do jii tɛ waate min ma. 51Wo do kɛtɔ a lɔtɛɛtɛɛla k'a kafon filangafolu kɔkan, a kasitɔ k'a ɲii sii i ɲɔɔ na dimin bolo je.»

Currently Selected:

Matiyu 24: MBT2023

Highlight

Copy