Wepélisiananu 20
20
Abraam go Géraa tɛrɛ la
(WP 12:10–20; 26:1–11)
1Abraam si ’bɛna yé é go yirinwana bɛyilazia; é nyana Kadɛs valé Suré méléna yé é nyana Géraa sɛ. 2Abraam léé, ’é na Sara a ’é buru nya. Géraa mununwiinzan lé wa laama Abimélɛk, é Sara si. 3Kazambale da Abimélɛk va nyɛ fla é béli yé é lé a lɛ léé: Lezan lé bé si bɛ, i dan ga lɛ alé we ma, naa, a zana a. 4Abimélɛk ’ka tan mane lɛ lezan ’ko ma lo, yé é léé: Mizan, i zamaga dɔa bɛn tegele nwiin? 5Gɔnézan ’ka a fe lɛ an lɛ léé, ’é buru lé, loo? Yé lezan bozen ’ka a fe lɛ léé, ’é bwe lé, loo? An we ’ko kɛlɛ an bli gi fu valé an bɛ ma bɔle nya. 6Kazambale lé a lɛ nyɛ fla léé: Maa a gi dɔɔ léé, i we ’ko kɛlɛ i bli gi fu nya. Maa é ziin, maa ilé wenyané kɛlɛle an ma yi ga. Bɛwemalé maa ’ka zi nɔ lɛ i lɛ léé, i bɛ mane a ma lo. 7Sin, ’i lezan nɔ gɔnézan ’ko lɛ é pai; naa, é a balelayezan nya yé é dan bazoro lɛ i tɔ ma yé i dan béli lɛ. Naa, ’i we ’ko gi dɔɔ ma: dé i ’ka a nɔ lɛ lo, i dan ga lɛ, bii valé ilé munu faa nya.
8Abimélɛk nwa bladi tutu, yé é wuomunu faa laa yé é we ’konu faa zuo fe wo lɛ; yé kana blɛɛn zén munu ’konu gi. 9Abimélɛk Abraam laa é ziin yé é lé a lɛ léé: Mɛ we lé bé kɛlɛ ko lɛ koo? Mɛ we lé maa kɛlɛ i lɛ yé é ’na i ma yé i maa valé anlé munu vɔ ’bɛ zo wenyané blɛn gii? We lé bé kɛlɛ an lɛ bɛ, mi ’ka a kɛla lo. 10Yé Abimélɛk lé Abraam lɛ léé: I gi bɔrɔ kaa yé i ’bɛ zo we kɛlɛɛ? 11Abraam a zi pa léé: Maa lé an bli gi léé, webozen lé, tɛrɛ ’ko la munu ’ka kanaan Bale lee lo, yé wo dan an gyɛ lɛ an na lé we ma. 12’Bɛ ta loru, é a an buru nya webozen nya; é a an ti lé né nya, naa, é ’ka an bu lé né ɛ nya lo; yé é kɛlɛ an na nya. 13Bléyian va lé Kazambale an si an ti lé kɔn ’léé yé an go baa, maa lé Sara lɛ léé, ’é wezin kɛlɛ an lɛ, dé ko go fɛofɛana, ’é a fe an ma léé, ’é bwe lé ke an nya.
14’Blanu koo, dirinu koo, nyanamapamunu valé nyanamapalomu koo, Abimélɛk wo nɔ Abraam lɛ; yé é a na Sara nɔ a lɛ é ziin. 15Abimélɛk léé: Bé ye, anlé tɛrɛ faa a i ’lɛ; dé fɛana sɔ i lɛ ’i nyana ana. 16Yé é lé Sara lɛ léé: Bé ye, maa gɔɔlifu wɔlɛ yɔ soru nɔ i bwe lɛ; ’bɛ é dan kɛlɛ lɛ i ma folifɛ nya i vamunu faa yuɛ gi, yé i dan kɛlɛ lɛ tegele munu faa yuɛ gi.
17-18Abraam na Sara lé we ma Gakelebale Abimélɛk lé kɔn gi lomu faa kɛlɛ sɔnzannu nya turu. Amalé Abraam bazoro Kazambale lɛ yé Kazambale Abimélɛk béli, yee valé é na valé é wuolomu nya, yé wo kɛlɛ néyaazannu nya é ziin.
Currently Selected:
Wepélisiananu 20: GOURU
Highlight
Share
Copy
Want to have your highlights saved across all your devices? Sign up or sign in
Alliance Biblique de Cote d'Ivoire 1979
