Jã 11

Lajaarɩ khi

1Kũu bɩɛl gɩ dɩ ga‐n khʋʋ. Ɔɔ i n dʋɔn Lajaar; Betanɩ a the Marɩ na ɔɔ õkhɛr Martɩɩ dɩra.#Lu 10:38–39 2Marɩɩkɛra dʋɔn ʋrɛɛkɛ kɔɔ thirəni Kɔ̃tɩn latɩkolo, agɩpɩ dɩ pɩɩnʋʋ nɛɛ na ɔɔ yʋsũ. Ɔɔ õkuun ha Lajaarɩkɛra gɩ‐n khonɩ.#Jã 12:3 3Dɩ Lajaarɩ õkhɛrsɔ thɔ̃ a so Jejura ayɩ: Kɔ̃tɩn, ʋrɛɛkɛra fɩ nanɩ gɩ‐n khʋʋrɛ. 4Ɔbɔɔkɛ Jeju nɩɛnɩ ga thɩmɩɩle pɩ a sor: Khoole na do kho kʋnanaˈ, sɩ Thãgbaa i ga dʋbɩ, gɩ cʋʋ dakha wɩ dʋbɩ mɛr Thãgbaa Bikuun.

5Sɩ Jeju kɔɔ nar Martɩ, na ɔɔ õkhɛr Marɩ, na awɩ õkuun Lajaar. 6Ɔbɔɔkɛ Jeju nɩɛnɩ dɩ wɩ yɩ gɩ‐n khor Lajaar, a toore a cʋʋ wire yenyɔ wo kãkɛra a hanɩ. 7Agɩpɩ dɩ so ɔɔ kpãkpãadarara ayɩ: Sɩ birə jala Jude dɩɩra. 8Dɩ kpãkpãadara sʋʋraa: Dɩɩrdaar, nɛnɛ̃ nɛnɛ̃ Juifisɔ kɔɔ ƴaal wɩ dʋʋrna fɩ bokana sɩ dɩ fa‐n bir le woo? 9Dɩ Jeju bule wi: Wi bɩɛl na hana lɩɛr yʋɔr yenyɔaa? Ado tibil na kpaar dɩwɩlʋla, aa‐n be nɔaˈ gɩdonɩ a‐n yɩrɛ thɩɩkɛɛ dahɩrɛ. 10Sɩ ado tibil na kpaar dɩtɩnɔ, a‐n ber nɔɔ gɩdonɩ dahɩrɛɛ na haaraa ga. 11Ado a mɩɩ wɩ gele pɩ a so warɛ: Asɩ kuun Lajaar daarɛ, sɩ mɩ‐n jaal a na jagʋʋ. 12Dɩ ɔɔ kpãkpãadara bulee: Kɔ̃tɩn, ado a daarɛ a na ɩɩrɛ. 13Sɩ Lajaarɩ khi Jeju kɔɔ mɩɩ wɩ. Sɩ wɛr, wɩ kpɩɛrɛ dɩ dã bʋɔɔkɛ tibil n daarnɩ gɛr Jeju kɔɔ mɩɩ. 14Dɩ Jeju so war dɩphã casɩ: Lajaar khire. 15Sɩ anɩdara daʋ fʋ mɩ gɩrɛraakɛ ma kɔɔ hanɩlaˈ, gɩdonɩ ga cʋʋ nɛr dɩ na pɛr haar. Gɛr gɩ sɩ jala ɔɔ pa. 16Dɩ Tomasɩɩkɛ wɩ‐n wenɩ Didim so wɩ̃ kpãkpãadarara ayɩ: Nɩ ɩna sɩ jal sɩ khiir kha dakha na Jeju.

Mɔ̃ Jeju donɩ khi ɩɩrdaar na yi ˈlaadaar

17Dɩ ɔbɔɔkɛ Jeju n danɩ, a yɩɛrɛ dɩɩ do wɩ ˈlire dʋrɛ Lajaar dɩ cɔ we yenã kaʋ. 18Sɩ mɔ̃kɛ Betanɩ wɔrɔnanɩ Jerujalɛm dɩɩ thɔɔ kilə yẽthersɔ, 19Juifi jɔjʋɔsɔ kɔɔ pɔr Martɩ na Marɩɩ pa wɩ cʋʋ wɩ wɩ faa haar awɩ õkuunidara.

20Ɔbɔɔkɛ Martɩ nɩɛnɩ dɩ wɩ yɩ Jeju har hʋɛra, a ɩɩrɛ da‐n caanʋʋ sɩ Marɩ wer toore cʋɔrɔ. 21Dɩ Martɩ so Jejura ayɩ: Kɔ̃tɩn, ado kɛ fɩ kɔɔ ha ɩ̃ õkuun na kɔɔ khəˈ. 22Sɩ nɛnɛ̃kɛrakɛ mɩ jɩrɛ dɩ thɩ̃ɛ wo thɩ̃ɛɛkɛ fa bɩɛlnɩ Thãgbara, Thãgba na ha fɛr. 23Dɩ Jeju sʋʋraa: Afɩ õkuun na ɩɩrɛ na the khirera. 24Dɩ Martɩ birsee: Mɩ jɩrɛ wer dɩ a na ɩɩrɛ na the khirera pɩpɩɩ wirera. 25Dɩ Jeju sʋʋraa: Mɛr dʋɔn khi ɩɩrɛ na yire. Ʋrɛɛkɛ n pɛ mɩnɩ haar, ado a khirerakɛ sɩ a na hananɛ yire. 26Dɩ tibil wo tibilikɛ hananɩ yire sa pɛ mɩ haar, a na khi yuuəˈ. Fɩ pɛ gelela haar bɛ? 27Dɩ birsee: Ɔɔ Kɔ̃tɩn, mɩ pɛrɛ haar dɩ fɛr dʋɔn Kirisiti Thãgbaa Bikuun, kɛ ɩnanɩ thɩɩra.

Jeju khɩɩrɛ

28A Martɩ mɩɩ gelela pɩ, a gbaar jal a we ɔɔ õkhɛr Marɩ a sʋʋraa dɩbara aa: Dɩɩrdaar hakɛ da‐n bule fi. 29Ɔbɔɔkɛ Marɩ nɩɛnɩ, a ɩɩrɛ birbir da‐n jal Jejura, 30gɩdonɩ Jeju na kɔɔ lõ dɩ bɩnɔ paˈ, sɩ kãkɛ Martɩ kɔɔ caanʋʋnɩ a ha. 31Dɩ Juifisɔɔkɛ kɔɔ hanɩ kha na Marɩ cɔ bɩnɔ wɩ cʋgʋʋ a faa haar, ɔbɔɔkɛ wɩ yɩɩnɩ dɩ ɩɩr birbir da‐n the, wɩ kpɩɛrɛ kaara a‐n jal a bɩ wo a ɩɩr wa‐n kpaaraa.

32Ɔbɔɔkɛ Marɩ danɩ kãkɛ Jeju hanɩ a yɩɩ, a jire ɔɔ ƴɛra sa sʋʋraa: Kɔ̃tɩn, ado kɛ fɩ kɔɔ ha ɩ̃ õkuun na kɔɔ khəˈ. 33Mɔ̃ Jeju yɩɩnɩ da‐n khɩɩ nakha Juifisɔɔkɛ a kɔɔ hananɩ kha, haar kʋɛsʋʋrɛ dɩ ɔɔ kpɩɛr nyanyãa. 34Dɩ Jeju bule: Kana nɩ dʋʋ? Dɩ wɩ birsee: Kɔ̃tɩn, ɩna hɩnɛ. 35Dɩ Jeju na‐n khɩɩ. 36Dɩ Juifisɔ na‐n so: Nɩ hɩnɛ mɔ̃ a thʋnɩ na Lajaar ɓoɓo. 37Sɩ ʋkhasɔ wɛrra na‐n so: Ɔrkɛ khɛranɩ yaarʋ yinə, aa kɔɔ puno dakha a cʋʋ kuunikɛ dɩ a na khəə gaa?

Lajaarɩ khi ɩɩr

38Dɩ haar kʋɛ Jeju wo dɩ gbana da‐n jalna kaara. Sɩ gɔ̃gɔ̃ kaar gɩ kɔɔ do dɩ wɩ khaanna bokaar. 39Dɩ Jeju so: Nɩ te bokaar. Dɩ Martɩɩkɛ dɔnɩ khiree õkhɛr sʋʋraa: Kɔ̃tɩn a ˈlini phɔɔrɛ pɩrakɛɛ, gɩdonɩ wire yenã a cɔ kaʋ. 40Dɩ Jeju sʋʋraa: Ma kɔɔ so far, ado fɩ pɛr haar fa yɩrɛ Thãgbaa puno hana gaa? 41Dɩ wɩ ti bokaar. Agɩpɩ Jeju gba ƴɩɛ ƴũ sa so: Thɩrɛ, mɩ‐n fʋɔr fɛr gɩrɛraakɛ fɩ kɔɔ tuni ɩ̃ bɩɛl. 42Me wer, mɩ jɩrɛrakɛ dɩ fɩ‐n ture ɩ̃ bɩɛl wire fɛʋ, sɩ tɩbɩlaakɛ jɩlɛnɩ gɩrɛ dɔ nɔɔ dɩ ma‐n mɩɩ, wɩ pɛr haar dɩ fɛr kɔɔ thɔna mɩ. 43Dɩ ɔbɔɔkɛ a mɩɩnɩ gele pɩ, a hulene nɔ kheu: Lajaar, thɛ. 44Dɩ khire the mɔna wɩ kɔɔ paarʋʋnɩ na kẽkẽ gborõbe nyɛ̃ɛ na nɛɛ, sa paarʋʋ ƴɩɛ na khi dʋ kɩ̃kɩɩn. Dɩ Jeju so war: Nɩ thʋbaa a faa a jal.

Mɔ̃ Juifi kɔ̃tɩna gʋʋrnɩ sɩ wɩ kʋ Jeju

(Mat 26:1–5; Mar 14:1–2; Lu 22:1–2)

45Dɩ Juifi jɔjʋɔɔkɛ kɔɔ pʋɔnnɩ Marɩɩ pa, a wɩ yɩ gɩrɛɛkɛ Jeju cʋʋnɩ wɩ pɩɛrɛ haar. 46Sɩ ɩkhasɔ awɩ thɩ̃thɩɩn jaal jɔfʋ bʋ dʋdarasɔɔ pa, a so war gɩrɛɛkɛ Jeju kɔɔ cʋʋnɩ. 47Dɩ bonɩ jidaar kɔ̃tɩna na jɔfʋ bʋ dʋdarasɔ kpar so gʋʋrdara a jɛ sa bule: Anye sa cʋʋ? Gɩdonɩ kũu caakɛ n cʋʋrɛ nɔ kpaa thɩ̃ɛsɔ jɔɔjɔɔ. 48Ado sɩ sɩɩraa da cʋʋ, tɩbɩla fɛʋ na pɩɛrɛ haar, dɩ Rɔmɛ̃sɔ na ɩnɛ na kʋɛ asɩ pa phu na asɩ too. 49Dɩ Kaɩfɩɩkɛ dɔnɩ wɛr bɩɛl, sa do gbõdaar ga yɛraale so warɛ: Na jɩ thɩ̃ɛ kpɩɩrakaˈ. 50Na jɩ dɩɩ do ado tibil bɩɛl khi tɩbɩla fɛʋʋ sora, gɩ baar gɩrɛɛkɛ Juifi caar koo na khiirnəə? 51Sɩ ga do ɔɔ thɛthɛɛ pa gelela a sonɩ thaˈ, sɩ gɩdonɩ ɔr dʋɔn gbõdaar ga yɛɛle, gɛr gɩ dɩ ti Thãgba tukɩrʋ ayɩ: Dɔ Jeju n khi Juifi caarra fɛʋ. 52Sɩ ga do Juifi caar dɩbara dɔ nɔaˈ, sɩ a gbɛbɩ Thãgbaa bɩsãsɔɔkɛ bɩ̃bɩlanɛnɩ paar fɛʋ wɩ do bɩɛl.

53A fʋna ga wiilera wɩ gʋʋrɛ kha mɔ̃ wa kʋnɩ Jeju. 54Gɛr gɩ dɩ Jeju na‐n yɩr Juifisɔɔ thɩ̃thɩɩn gbelẽ gbelẽ bã, sa the le a jal dɩɩraakɛ wɩ‐n wenɩ Efɩraɩm bə̃ khʋra. Dɩ le a too na ɔɔ kpãkpãadara.

55Dɩ Juifisɔɔ Pakɩ n wɔrɔnɛ. Dɩ tibil jɔjʋɔ the dɩɩra dɩɩra dɩ wa‐n jal Jerujalɛm wɩ phʋɔl sɩ fɛtɩ bɔɔ na dã paˈ. 56Dɩ le wɩ‐n ƴaal Jeju, dɩ wa‐n bulena kha bɩɛlbɩɛl Thãgba fʋɔr cɔ kɔ̃tɩɩna aa: Anye nɩ‐n kpɩɛr? A na ɩ̃ fɛtɩra gaa? 57Dɩ bonɩ jidaar kɔ̃tɩna na jɔfʋ bʋ dʋdara kɔɔ sor tɩbɩlala, ado tibil jɩrɛ kãkɛ a hanɩ, a sɔ nar ɩnɩ‐n fʋʋ.

Currently Selected:

Jã 11: LOBIRI

Highlight

Copy