Jã 7

Jejuu õkũu bɩnɔsɔɔkɛ na‐n pɩɛnɩ haaraˈ

1A gele pɩ Jeju n kɔɔ kpaarɛ Galile; aa kɔɔ ƴaal a kpaar Judeaˈ, gɩdonɩ Juifisɔ n ƴaalɛ hʋɛ wɩ kʋʋ. 2Mɔ̃kɛ Juifisɔɔ fɛtɩɩkɛ wɩ‐n wenɩ Wa#7:2 Wa fɛtɩ: Fɛtɩ gɩɩkɛ n pʋɔrɛnɩ dɩɩ dana wire makõther, kɛ n cʋɛnɩ Ɩjɩrayɛldara dɩ wa‐n jɩna yɛna kpalanyɔɔkɛ wɩ kɔɔ cʋʋnɩ bəənnə. fɛtɩ n danɩ,#Lev 23:34; Dət 16:13 3Jejuu õkũu bɩnɔsɔ sʋʋraarɛ aa: Thɛ kɩɛr a jala Jude, dɩ mɛ̃ afɩ kpãkpãadara na yɩ dakha thɔmaakɛ fɩ‐n cʋʋnɩ. 4Ado tibil ƴaal wɩ jɩɛnɛɛ, aa‐n ker gɩrɛɛkɛ a‐n cʋʋnaˈ. Ado fɩ‐n cʋʋrɛ thɔmaakɛ gel, cʋɛ tɩbɩla fɛʋ n yɩ fɩ. 5Gɩdonɩ ɔɔ õkũu bɩnɔsɔ dakharakɛ na‐n pɩɛ haaraˈ. 6Dɩ Jeju so war: Ɩ̃ bɔ na dã paˈ, sɩ ne wer, anɩ bɔ n daan bɔɔ fɛʋ. 7Tɩbɩla thɩɩra na puno na laar naˈ, sɩ mɛr wɩ‐n laar gɩdonɩ casɩ mer n mɩɩ dɩ ɩ̃ yɩ, awɩ thɔ̃ puurore ka. 8Nɩ jala fɛtɩraale anɩ ha. Me wer ma jal ga fɛtɩraalaˈ, gɩdonɩ ɩ̃ bɔ na jɩɩ dã paˈ. 9Ɔbɔɔkɛ a so warnɩ gele pɩ, a toore Galile.

Jeju har Jerujalɛm Wa fɛtɩ bɔɔ

10Ɔbɔɔkɛ Jejuu õkũu bɩnɔsɔ kɔɔ jalnɩ fɛtɩraale pɩ, a kpaanɛ dakha, sɩ a wolone gɩdonɩ aa ƴaal tɩbɩla n jaˈ. 11Dɩ Juifisɔ na‐n ƴaalʋʋ le fɛtɩraalera dɩ wa‐n so: Ka kuunna ba ha ya fɛ? 12Dɩ tibil jɔɔle n hũhuune kha ɔɔdara dɩ wɛ n yɩ: Tɩɩ bʋɔ gɩ; wɛ n yɩ: Kpei, a‐n fɩɩlɛ tɩbɩla. 13Sɩ tɩbɩla na‐n cã dɩ wɩ mɩɩ ɔɔda ga, gɩdonɩ maar n fɔ wɩ Juifisɔra.

14Mɔ̃ wɩ‐n cʋʋnɩ fɛtɩ a ha thɩ̃thɩɩn, gɛr Jeju jaal Thãgba fʋɔr cɔ kɔ̃tɩɩna a ma da‐n dɩɩr tɩbɩla thɩ̃ɛ. 15Dɩ nʋɔ kpaa Juifisɔ dɩ wa‐n so: Mɔ̃ kuunikɛ fʋ sa jɩ Thãgbaa sɛbɛ thakɛ, aa kɔɔ dɩɩrnɩ sɛba? 16Dɩ Jeju birse wi: Dɩɩrɛɛkɛ mɩ‐n dɩɩrnɩ tɩbɩla ga the ɩ̃ thɛthɛɛ pa ga, sɩ Thãgbaakɛ thɔna mɩnɩɩ pa gɩ the. 17Ado tibil ƴaalɛ a cʋʋ Thãgbaa tuur, a na jɩrɛ ado dɩɩrɛɛkɛ mɩ‐n dɩɩrnɩ tɩbɩla Thãgbaa pa gɩ the, agɩbo ɩ̃ thɛthɛɛ pa ɩ̃ thɩmɩɩ the. 18Tibilikɛ n mɩanɩ thɩmɩaakɛ thɛnɩ ɔɔ thɛthɛɛ pa, ɔɔ thɛthɛɛ i a‐n ƴaal, sɩ ʋrɛɛkɛ n ƴaalɛnɩ ʋrɛɛkɛ thɔnaanɩɩ i n dʋbarɔ, sobɔdaar a do, fɩl gõgolõ na haaraa ga. 19Mʋɩjɩ na kɔɔ ha nɩ jɔfʋaa? Sɩ tibil bɩɛl anɩ thɩ̃thɩɩnnakɛ na kɔɔ nɩ gɩrɛ jɔfʋ sonɩ nũəˈ. Mɔ̃gɩdo dɩ na‐n ƴaal hʋɛ nɩ kʋ mɩ? 20Dɩ tibil jɔɔle birsee: Kɔ̃tɛɛbuu ha farɛ. Amɛ n ƴaalɛ fɩ yʋʋ? 21Dɩ Jeju birse wer: Thɩ̃ bɩɛl dɩbara mɩ kɔɔ cʋʋ sɩ dɩ nʋɔ kpaa nɩ fɛʋ. 22Mʋɩjɩ kɔɔ ha nɛr jɔfʋ nɩ kuro bɩsana khʋ̃ʋ, sɩrakɛ ga do Mʋɩjɩɩ thɛthɛɛ pa jɔfʋʋlera thaˈ, sɩ anɩ mama thɩ kɔ̃tɩ̃sɔɔ pa gɩ the, dɩ nɩ‐n kurre tibil khʋ̃ʋ hɩɩr wire.#Jən 17:10; Lev 12:3 23Dɩ mɔ̃ nɩ‐n kurni tibil khʋ̃ʋ hɩɩr wire dɩ Mʋɩjɩɩ jɔfʋ na‐n kʋɛaˈ, mɔ̃gɩdo dɩ nĩkhii n fʋ nɩ mɛrɛra gɩrɛraakɛ mɩ kpɛɛnɩ kũu bɩɛl khoo fɛʋ hɩɩr wire?#Jã 5:9 24Na‐n kɔɔ jɩ gɩ na yinə a ˈlaa na yɩ tibili daˈ, sɩ nɩ dɔ gɩ hana hʋɛ sɩ na‐n so.

Mesɩ Jeju do bɛ?

25Dɩ wɩ̃ Jerujalɛmdara n sor ayɩ: Ga do ɔr dɔ ʋrɛ wɩ‐n kɔɔ ƴaalnɩna wɩ kʋaa? 26Nɩ yɛ mɔ̃ a‐n mɩɩnɩ dɩphã casɩ, sɩ wa‐n cʋgʋʋ thɩ̃aˈ. Asɩ kɔ̃tɩ̃sɔ jɩrɛ gel dɩ ɔr dʋɔn Kirisiti bɛ? 27Sɩ ado Kirisiti na ɩ̃, tibil na jɩ kana a na thenaˈ, sɩ ʋrɛ sɩ jɩrɛ ka a thenɩ. 28Dɩ ɔbɔɔkɛ Jeju n dɩɩrnɩ tɩbɩla Thãgba fʋɔr cɔ kɔ̃tɩɩna, gɛr a huleno ayɩ: Nɩ jɩ mɛr, dɩ nɩ jɩrɛ dakha ka mɩ thenɩ. Sɩ nɩ jɛ, ga do mɛr jɛ gɩ dɩbara a ɩ̃aˈ, sɩ ʋrɛɛkɛ thɔna mɩnɩ sobɔdaar gɩ sɩ na jɩaˈ. 29Sɩ mɛrɛ, mɩ jɩɩrɛ gɩdonɩ ɔɔ pa mɩ the dɩ ɔr thɔna mɩ. 30Dɩ le wɩ kɔɔ ƴaal wɩ fʋʋra, sɩ tibil na thaaraa nyɔ̃aˈ, gɩdonɩ ɔɔ bɔ na kɔɔ dã paˈ. 31Sɩ jɔjʋɔ tibil jɔɔlee thɩ̃thɩɩn kɔɔ pɩɛrɛ haar, sɩ dɩ wa‐n so: Ɔbɔɔkɛ Kirisiti na ɩnɩ, a na cʋʋrɛ nɔ kpaa thɩ̃ɛsɔ na jɔ kuunikɛ woo?

Gardɛsɔɔkɛ wɩ thɔnɩ wɩ fɔ Jeju

32Dɩ jɔfʋ bʋ dʋdarasɔ kɔɔ nɩɛrɛ mɔ̃ tibil jɔ n hũhuunni Jejuu sora. Dɩ bonɩ jidaar kɔ̃tɩna na jɔfʋ bʋ dʋdara kɔɔ thʋɔn gardɛ wɩ fʋɔnɛɛ. 33Dɩ Jeju so: Mɩ har kha na nɛrɛ wo gɩ dana bɔɔ gbe, sɩ ɩ̃ jal ʋrɛraakɛ thɔna mɩnɩ. 34Na ƴaal mɛr sɩ na yɩ maˈ, dɩ ka ma hanɩ na puno na pɔaˈ. 35Dɩ Juifisɔ na‐n mɩɩ kha awɩ ha ayɩ: Kana a na jal dɩ sa puno na yɩa ya fɛ? Juifisɔraakɛ bɩ̃bɩlanɛnɩ a ha Gɩrɛkɩsɔɔ thɩ̃thɩɩn a na ba jal a na‐n dɩɩr Gɩrɛkɩsɔ ya? 36Anye dɔ thɩmɩɩrɩkɛɛ kɩr a sonɩ: Na ƴaal mɛr sɩ na yɩ maˈ, dɩ wo, na puno na pɔ ka mɩ hanaˈ.

Yɔ yireekɛ Jeju ʋlfɛnɩ ɩna ˈlaarɛ

37Fɛtɩɩ pɩpɩɩ wiikɛ dɔnɩ wi kɔ̃tɩ̃ɩ, dawiilera Jeju ɩɩr tɩbɩlaa ƴɛ thɩ̃thɩɩn a hulẽ ayɩ, ado yɔlkhaa fʋ tibil, a pɔ ɩnɛrɛra a yɔ.#Lev 23:36 38Ʋrɛɛkɛ pɛ nɩnɩ haar, mɩɩr yɔ yire na celle ɔɔ bɩnɔ ga‐n the mɔ̃kɛ Thãgbaa sɛbɛ sonɩ.#Eje 47:1; Jak 14:8 39Thu Phuukɛ tɩbɩla na pɛrnɩ haar na ˈlɛ, gɛr Jeju mɩɩ; gɩdonɩ Thãgba na kɔɔ ˈlaa Thu Phuu paˈ, gɩdonɩ Jeju na kɔɔ bir jʋʋn ɔɔ Thɩɩ dʋɔ paˈ.

Leereekɛ hanɩ tɩbɩlala Jejuudara

40Ɔbɔɔkɛ tibil ɩkha tibil jɔraale nɩnɩ ga thɩmɩɩsɔɔle pɩ, wɩ sor: Thãgbaa bobonɩlera kuunikɛ do waa gel. 41Dɩ ɩkhasɔ so: Kirisiti gɩ; dɩ ɩkhasɔ n yɩ: Mɔ̃ ga fʋ sɩ dɩ Kirisiti na the Galile? 42Thãgbaa sɛbɛ sor ayɩ: Davɩdɩɩ məllə Kirisiti na the Bɛtɩlɛhɛm dɩɩra, ka Davɩdɩ kɔɔ hanɩ.#2 Sam 7:12; Mis 5:2 43Dɩ gɛr gɩ dɩ tibil jɔɔle kɔɔ lee kha Jejuu sora. 44Dɩ ɩkhasɔ wɛrra kɔɔ ƴaalɛ wɩ fʋʋ, sɩ tibil bɩɛllakɛ na kɔɔ thaaraa nyɔ̃aˈ.

Juifi kɔ̃tɩnasɔ na‐n pɛ Jeju haaraˈ

45Dɩ gardɛsɔ kɛrrɛ bir bonɩ jidaar kɔ̃tɩna na jɔfʋ bʋ dʋdarasɔɔ pa, dɩ wɩ bule wi: Mɔ̃gɩdo dɩ na fʋʋ ɩna ga? 46Dɩ gardɛsɔ birse wi: Tibil bɩɛl na kɔɔ mɩɩ thɩmɩɩr kpɩɩrakɛ kuuni khaakɛ paˈ. 47Dɩ jɔfʋ bʋ dʋdara bir bule wi: Dɩ nɛrɛ dakha, wɩ fɩɩl nɛr wo koe? 48Asɩ kɔ̃tɩ̃sɔ, agɩbo jɔfʋ bʋ dʋdarasɔ bɩɛl ʋkha kɔɔ pɩɛrɛ haar ya? 49Sɩ tibil jɔɔle na jɛnɩ Mʋɩjɩɩ jɔfʋaˈ, wɛr dɔ tɩbɩlaakɛ wɩ sonɩ nʋɔ pɛ. 50Nɩkɔdɛmɩkɛ dɔnɩ bɩɛl jɔfʋ bʋ dʋdarara hale, kɛ kɔɔ jalanɩ mamara a yɩ Jeju, a bule wer:#Jã 3:1–2 51Ado asɩ jɔfʋra gɩ, hʋɛ hale dɩ sa heen tibil sor ɓo, sɩ sɩ pɩɩrɔ sɩ nɩɛ na asɩ nũ gɩrɛ a cʋʋnɩ ya? 52Dɩ wɩ birsee: Fɛrɛ dakha, Galile fɩ the ya? Jɩɛ ˈlo Thãgbaa sɛbɛ a hɩnɛ, fa yɩɛ dɩ ga so kpɩɩrakɛ nayɩ: Thãgbaa bobon bɩɛllakɛ na the Galile dɩɩra ga. [ 53Agɩpɩ wɛr fɛʋ bɩɛlbɩɛl bɩlanɛ a kɔ̃ awɩ cɔnanɔ.

Currently Selected:

Jã 7: LOBIRI

Highlight

Copy