Luki 19

Jeju na Jase

1Dɩ Jeju lʋʋn Jeriko a kpãsɛ da‐n jal. 2Dɩ hɩnɛ, lẽle kũu bɩɛl gɩ, a hale dɩ wa‐n wɩɩ Jase, war gbadaraa kɔ̃tɩ̃ a do. 3Dɩ a ƴaalɛ a jɩ ntɛɛkɛ Jeju donɩ, sɩ aa puno na yɩɩ tibil jɔraalaˈ, gɩdonɩ a gburore. 4Dɩ a car jal ƴɛ kʋʋlɔ a jʋʋn thɩrʋra a yɩ Jeju, gɩdonɩ le a teena a kana. 5Dɩ ɔbɔɔkɛ Jeju danɩ paarɩlera, a gbaar hɩɩn ƴũ sa wɩɩ aa: Jase, gbuno kɔrɔ, gɩdonɩ gɩ teenanɛ dɩ ma cɔ afɩ cɔ nĩ. 6Dɩ Jase gbũ kɔrɔ a teguu kpakpaalɛ na daʋ. 7Dɩ ɔbɔɔkɛ tɩbɩla fɛʋ yɩnɩ gelela, wɩ‐n hũhuune ayɩ: A jaal a cɔ sopugodaarɩ cɔ. 8Sɩ Jase ɩɩr jɩɩl Kɔ̃tɩnɩ ƴɛ thɩ̃thɩɩn sa sʋʋraa: Hɩnɛ Kɔ̃tɩn, dakuru ɩ̃ thɩ̃sɔra ma‐n har bɔdara. A mɩ kɔɔ tee tibil thɩ̃ɛ na fɩɩlɛ, ma bire na haa balanã. 9Dɩ Jeju sʋʋraa: Taarɛ lʋʋn cʋɔrɔɔkɛ nĩ, gɩdonɩ Abɩrahamɩ bikuun olela do dakha. 10Gɩdonɩ mɛr tibili Bikuun ɩnɛ wɩrɛɛkɛ bonɩɩ ƴaal pa ɩ̃ taa wɩ.#Mat 18:11

War bɔrɔ sokpaa

(Mat 25:14–30)

11Ɔbɔɔkɛ wɩ kɔɔ hanɩle dɩ wa‐n pɛ Jeju nũu, a so warɛ sokpa bɩɛl wo, gɩdonɩ a wɔrɔnɛ Jerujalɛm dɩ wɩ kɔɔ pɛrɛ haar Thãgba na gbaar fãga dapa dapaara.#Mat 25:14–30 12Dɩ a so warɛ: Nũfe kuun gɩ da‐n jal dɩ kpɩɩra ƴɔɔ fĩi wɩ cʋgʋʋ a do fãgadaar, sɩ a bir a ɩ̃. 13Dɩ a tire ɔɔ thɔ̃darasɔra tɩbɩla yʋɔr a ha wɩ war bɔrɔ bɩɛlbɩɛl sa so war: Na‐n ƴabana phaphapha ma ɩnɛ. 14Sɩ ɔɔ dɩdara n kɔɔ laarʋʋrɛ, dɩ ɔbɔɔkɛ a jalnɩ pɩ, wɩ thʋɔn thɔ̃thɔna wɩ kpaanɛ a sɔ: Sa‐n ƴaal olela a dɔ sar fãgadaaraˈ.

15Dɩ ɔbɔɔkɛ a ˈlɛnɩ fãga pɩ, a kɛr bir ɩ̃. A wer thɔ̃daraakɛra a kɔɔ hanɩ war wɩ pɔ, a jɩ gɩrɛɛkɛ wɛr bɩɛlbɩɛl ˈlɛnɩ dɩɩ do khor. 16Dɩ cacadaar pɔr a sor: Kɔ̃tɩn, afɩ bɔrɔ bɩɛl bire ˈlɛr khor yʋɔr a dɛbɩrɔ wo. 17Dɩ sʋʋraa: Gɩ bɔrɛ, thɔ̃daar bʋɔ ha fɩ. Gɩdonɩ fɩ dor sobɔ cʋʋdaar thɩ̃ gberakɛ, dɔ gobanɛr dɩɩ yʋɔrra. 18Dɩ balanyɔdaar pɔ a so: Kɔ̃tɩn, afɩ bɔrɔ bɩɛlla bire ˈlɛr khor yemɔɩ a dɛbɩrɔ wo. 19Dɩ sʋʋraa: Na fɛrɛ dakha, fa dor gobanɛr dɩɩ yemɔɩra. 20Dɩ bɩɛl pɔ a so: Kɔ̃tɩn, yɛ afɩ bɔrɔ bɩɛlla kẽkẽ ballɔ mer kɔɔ to gɩ. 21Gɩdonɩ afɩdara n kʋ mɛr maar gɩdonɩ fɩ dor nĩkhidaar, dɩ fɩ gba gɩrɛɛkɛ fa kɔɔ thɩɩnnaˈ, dɩ fɩ khana gɩrɛɛkɛ fa kɔɔ diirnəˈ. 22Dɩ sʋʋraa: Fɛr thɔ̃daar puukɛ, afɩ thɩmɩɩra ma gba a na kɩɩlna fɩ. Fɩ kɔɔ jɩnɩ dɩ nĩkhidaar ha mɩ, dɩ ɩ̃ gba gɩrɛɛkɛ ma kɔɔ thɩɩnnaˈ, dɩ ɩ̃ kha gɩrɛɛkɛ ma kɔɔ diirnəˈ. 23Dɩ mɔ̃gɩdo dɩ fa kɔɔ ˈlaa ɩ̃ war kãkɛ ma ˈlɛrɔnɩ khor a mɩ bir ɩ̃a? 24Agɩpɩ a sor wɩrɛraakɛ hanɩle ayɩ: Nɩ taaraa bɔrɔ bɩɛlɩle, a hana ʋrɛ hananɩ bɔrɔ yʋɔr. 25Dɩ wɩ sʋʋraa: Kɔ̃tɩn, mee bɔrɔ yʋɔr a hana. 26Mɩ so narɛ, tibil wo tibilikɛ hananɩ thɩ̃ɛ, wa bire na ˈlaa na dɛbɩraa wo, sɩ tibilikɛ na hananɩ thɩ̃aˈ, wa tiirəərerakɛ phubi gɩrɛɛkɛ a hananɩ.#Mat 13:12; Mar 4:25; Lu 8:18 27Sɩ ado ɩ̃ lãlaardarasɔɔkɛ na kɔɔ ƴaalɛ mɩnɩ ɩ̃ dɔ war fãgadaaraˈ wɛ, nɩ kpa wɩ ɛna a kʋʋrɛ ɩ̃ ƴɛra.

28Dɩ ɔbɔɔkɛ Jeju mɩɩnɩ thale pɩ, a kʋʋl wɛr ƴɩɛ da‐n jal Jerujalɛm.

Mɔ̃ Jeju n lonɩ Jerujalɛm

(Mat 21:1–11; Mar 11:1–11; Jã 12:12–19)

29Ɔbɔɔkɛ Jeju n wɔrɔnɩ Bɛtɩfaje na Betanɩ khʋra, gɔ̃gʋ̃ɔɔkɛ hananɩ olɩvɩ thɩra, le a thɔ̃ ɔɔ kpãkpãadara yenyɔ a so war ayɩ: 30Nɩ jala dɩɩraakɛ nɩ pɛnɩ ƴɩɛ. A nɩ pɔ na dã, na yɩrɛ kũkə̃ ɓolʋʋkɛ tibil na jʋʋnnɩ paˈ dɩ wa li. Nɩ thʋba a kpa ɛna. 31A tibil bule ni: Mɔ̃gɩdo dɩ na‐n thʋbɩ ya? Nɩ sʋɔraa ayɛ: Kɔ̃tɩn n ƴaalɛ. 32Dɩ wɩrɛɛkɛ Jeju kɔɔ thɔnɩ jaal a yɩ thɩ̃ɛ dɩɩ ha mɔna a kɔɔ so warnɩ. 33Dɩ mɔ̃ wɩ‐n thʋbɩnɩ kũkə̃ ɓolʋ, ɔɔ hɩ̃hɩ̃sɔ bule wer: Mɔ̃gɩdo dɩ na‐n thʋbɩ kũkə̃ ɓolʋʋkɛ? 34Dɩ wɩ birse: Kɔ̃tɩn n ƴaalɛ. 35Dɩ wɩ pɔnanɛ kũkə̃ ɓolʋ Jejura, a gba awɩ kẽkẽ a dɛ̃ɛ kũkəənə, sa cʋʋ dɩ Jeju jʋʋn. 36Mɔ̃ a‐n jalnɩ, tɩbɩla kɔɔ belle awɩ kẽkẽ kɔ̃tɩ̃sɔ a pɛr hʋɛra. 37Ɔbɔɔkɛ a thenɩ olɩvɩ thɩr gɔ̃gʋɔna a gbũ da‐n dã, daʋ fʋrɛ kpãkpãada jɔjʋɔɔle fɛʋ, dɩ wɩ ma dɩ wa‐n khɩɩ Thãgba na nɔ kheu nɔ kpaa thɩ̃ɛsɔ fɛʋraakɛ wɩ kɔɔ yɩnɩ. 38Dɩ wa‐n so: “Bɔnanɛ n hana fãgadaarraakɛ n ɩnanɩ gɩrɛ na Kɔ̃tɩnɩ i. Ha ɩɩ n hana Thãgbaa dʋɔ na i dʋbɩrɛ thãgbara ƴũ pər.”#Khɩ 118:26 39Ɩkhaa jɔfʋ bʋ dʋdarasɔ tibil jɔɔlee thɩ̃thɩɩn kɔɔ sor Jejura: Dɩɩrdaar, phaanɛ afɩ kpãkpãadara. 40Dɩ birse wi: Mɩ so narɛ a wɩrɛ pɩr nʋɔrakɛ, bokanasɔ na‐n hulene.

41Ɔbɔɔkɛ Jeju n kɔɔ wɔrɔnɩ a ˈlaa na yɩ dɩɩle, a‐n khɩɩrɛ sa so: 42Fɛrɛ Jerujalɛm dakha, adora fɩ jɩrɛ gɩrɛ nĩ wireraakɛ thɩ̃ɛsɔɔkɛ na hana fɩnɩna ha ɩɩ, sɩ hɩnɛ nɛnɛ̃, gɩ ker farɛ gɩrɛ waa. 43Wire na phã farɛ kɛ afɩ lãlaardara na kpenɩ koru a na dii far, sɩ na kpala far a na sɔbɩ fɩ paar fɛʋ kpɩkpɩkpɩ. 44Dɩ wa cɛcɛbɛ fɛr koo na afɩ bɩsãsɔɔkɛ hanɩ afɩ kal ƴɔɔ, dɩ wa sɩ far boka bɩɛl a dɛ̃ɛ bɩɛlla ga, gɩdonɩ fa kɔɔ jɩ bɔɔkɛ Thãgba kher fɩnaˈ.

Mɔ̃ Jeju phʋɔlnɩ Thãgba fʋɔr cɔ kɔ̃tɩ̃ɩ

(Mat 21:12–17; Mar 11:15–19; Jã 2:13–22)

45Dɩ Jeju lõ Thãgba fʋɔr cɔ kɔ̃tɩɩna, a ma a weele wɩrɛ n dolonenɩ thɩ̃ɛ, 46sa so war: Gɩ kherere Thãgbaa sɛbɛra ayɩ: “Mɛr Thãgbaa cɔ na dor ɩ̃ fʋɔr pa,” sɩ dɩ ne wer cʋʋ dɩɩ do yu hɔ̃hʋɔldaraa wɔ̃ pa.#Eja 56:7; Jer 7:11 47Dɩ Jeju n kɔɔ hale da‐n dɩɩr tɩbɩla wire fɛʋ Thãgba fʋɔr cɔ kɔ̃tɩɩna. Dɩ bonɩ jidaar kɔ̃tɩna na jɔfʋ dɩɩrdara na tɩbɩlaa kɔ̃tɩ̃sɔ n kɔɔ ƴaalɛ wɩ kʋʋ.#Lu 21:37 48Sɩ wa jɩ mɔ̃ wa cʋʋnɩ sɩ na fʋʋaˈ, gɩdonɩ tɩbɩla fɛʋ n kɔɔ pɩɛrɛ nũu bɔɔbɔɔbɔɔ.

Currently Selected:

Luki 19: LOBIRI

Highlight

Copy