Genesis 16
16
Hagar ma Ishmael
1Gai Sarai, de bodu o Abram, tigi haanau ange donu dahi dama gi Abram. Aagai e dahi ono hahine hai hegau mai i Egypt, dono ingoo go Hagar. 2Gai Sarai ga hai ange gi Abram, “Tilo, Tagi Maolunga gu buibui gi dee haanau au. Gai koe hannoo hagahebaa ma dogu hahine hai hegau, maanadu ia e maua naa i de haanau hanu dama maagu.”
Gai Abram ne hagallongo ange gi muna a Sarai. 3Gai Sarai, dono bodu, ne kave Hagar, dono hahine hai hegau mai i Egypt ga gaavange gi dono bodu go Abram, e hai ai dono bodu. Gai mee nei ne hai i dua de noho o Abram i Canaan, i e madaangahulu ngadau. 4Gai Abram ga hagahebaa ma Hagar, gai Hagar gu hai dama. Gai ga iloo huu e Hagar bolo ia gu hai dama, gai ia ga hagangadi mee dono hahine aamua.
5Gai Sarai ga hai ange gi Abram, “Go koe ne hidi ai dogu hagangadi mee ina. Au ne hai dogu hahine hai hegau gi hagahebaa ma goe, gai ga iloo huu e ia bolo ia gu hai dama, gai ia ga hagangadi mee au. Tagi Maolunga gi hagamodu ina be goai de gidaau e heohi.”
6Gai Abram ga hai ange gi Sarai, “Tilo, doo hahine hai hegau e noho donu i lalo doo sauaa. Gai koe haia ange gi de ia be se aha aau e lodo e hai ange gi de ia.” Gai Sarai ga vaivai hai dono hahine hai hegau, gai ia ga savini ga hano gee mai i ono daha.
7Gai tangada de langi o Tagi Maolunga, gu gidee e ia Hagar i gaogao dahi vai i de vao, go de vai e dagodo laa i gaogao de haiava e hano laa gi Shur. 8Gai ia ga hai ange, “Hagar, de hine hai hegau o Sarai, go hee oou ne humai ai naa? Gai go hee oou e hano naa aagena?”
Gai Hagar ga hai ange, “Au ne savini ga hano gee mai i daho dogu hahine aamua go Sarai.”
9Gai tangada de langi o Tagi Maolunga ga hai ange gi de ia, “Ahe gi daho doo hahine aamua, ma gi noho i lalo dana hainga.” 10Gai ia ne hai ange hogi, “Au e hai naa gi soa doo hagadiilinga, gai e dee maua naa donu i de dau i hiidinga de kona delaadeu soa.”
11Gai tangada de langi o Tagi Maolunga ne hai ange hogi,
“Tilo, koe gu hai dama,
koe e haanau naa dahi dama daane,
gai koe ga hagaingoo ange ia go Ishmael,#16.11 Ishmael i muna Hebrew e bei de Maadua gu langona.
go hiidinga Tagi Maolunga gu langona dagodo o doo vaivai haia.
12Gai ia e hai naa ga bei dagodo o dahi donkey lodo henua,
ia e hai baasi ange naa gi dangada alodahi,
gai dangada alodahi e hai baasi ange gi de ia,
ia e noho naa e hagadaumee ange
gi ono daina alodahi.”
13Gai ia ne hagaingoo ange Tagi Maolunga ne basa ange laa gi de ia, “Go koe de Maadua e gidee au,” go hiidinga ia ne hagadaba, “Au gu gidee donu de ia e gidee e dagidiiloo mai au.” 14Deenei ai, de vai laa gu hagaingoo ange go Beer Lahai Roi;#16.14 Beer Lahai Roi i muna Hebrew e bei De vai geli o de ia e mouli laa gai ia e gidee au. gai de vai laa goi dagodo huu i magavaa o Kadesh ma Bered.
15Gai Hagar ga haanau tama daane a Abram, gai Abram ga hagaingoo dana dama daane ange gi Hagar go Ishmael.#Gal 4.22 16Gai Abram gu madavalu ma ono ono ngadau, i de masavaa a Hagar ne haanau ai dana dama go Ishmael.
Currently Selected:
Genesis 16: DBD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
