Genesis 9
9
De hagatoo donu hagaheloongoi ange gi a Noah
1Gai de Maadua ne hagamanuuia Noah ma ana dama daane, ga hai ange gi gilaadeu, “Goodou hagadili gi soa haoa ai henua i lalo.#Gen 1.28 2Gai denga manu lodo henua alodahi, ma manu llele alodahi i lo te moana, ma manu dolodolo alodahi i honga de gelegele, aama mamu alodahi i lausedi; mee nei alodahi e gaavadu naa gi goodou gi dagina. 3Gai au e gaavadu hogi gi goodou denga hagadaagangaa manu alodahi e mouli e gaimee ai goodou, bei dagu hai gu gaavadu ai laa hogi gi goodou denga manu ssomo alodahi.
4Aagai goodou e dee gai donu kano iai de mouli, e bei go kano go iai ono dodo.#Lev 7.26-27; 17.10-14; 19.26; Deut 12.16, 23; 15.23 5Au e hagaduasala naa de manu lodo henua ma tangada e daia dahi goodou ga maakau, gai au e dau ange naa ssala gi tangada e daia ga magau dono daina.
6Be goai e daia dahi dangada ga magau,
gai ia e daa naa hogi gi magau;
go hiidinga de Maadua ne hai tangada
ga hagadulagi ange gi ono dagodo.#Gen 1.26; Exo 20.13
7Gai goodou hagadili gi soa ga hhao ai honga henua i lalo ga hai gi soa dangada iai.” #Gen 1.28
8Gai de Maadua ga basa ange gi a Noah ma ana dama daane e nnoho madali ia, ga hai ange, 9“Ailaa nei gai au e hai dagu hagatoo donu hagaheloongoi adu gi goodou ma oodou aamuli e loomai, 10ma denga manu dolodolo alodahi e nnoho madali goodou: go denga manu llele, ma manu haangai, aama manu lodo henua alodahi, go manu alodahi ne ssao mai madali goodou i lo te vaga hale. 11Gai au e hai dagu hagatoo donu hagaheloongoi madali goodou, bolo au e dee ahe ange naa donu e daa gi maakau mee alodahi e mouli i tolona; gai tolona gu dee ahe ange naa donu hogi e oha henua i lalo.”
12Gai de Maadua ga hai ange, “Deenei de hagailonga o de hagatoo donu hagaheloongoi aagu e hai adu gi goodou, ma denga manu alodahi e mouli madali goodou, aama denga atangada alodahi e loomai i muli: 13au gu hagaduu de umada i lodo giliiga, e hagamaanadu ai de hagatoo donu hagaheloongoi i omaau magavaa ma henua i lalo. 14Gai de masavaa naa huu aagu e hai ai gi loage denga giliiga, gai de umada gu gidee i lodo giliiga laa, 15gai au e manadua naa dagu hagatoo donu hagaheloongoi ange gi mee alodahi e mouli; aagai tolona e dee ahe ange naa donu e hai gi llilo mee alodahi e mouli. 16Gai de masavaa naa huu e duu ai de umada i lodo giliiga, ga gidee e au, gai au ga hagamaanadu de hagatoo donu hagaheloongoi dee ngado mai, i omaadeu magavaa ma mee alodahi e mouli i honga de henua.”
17Gai de Maadua ga hai ange gi a Noah, “Deenei de hagailonga o de hagatoo donu hagaheloongoi aagu gu hai i omaadeu magavaa ma mee alodahi e mouli i henua i lalo.”
Noah ma ana dama daane
18Gai denga dama daane a Noah ne ssao mai laa i lo te vaga hale go Shem, ma Ham aama Japheth. Gai a Ham e dahi ana dama daane, dono ingoo go Canaan. 19Aanei denga dama daane dogodolu a Noah, gai go gilaadeu ne hagadili ga soa ga hhao ai henua i lalo alodahi.
20Gai go Noah ne damadaa de hai de veelenga ga doo ai denga grape. 21Gai ia ne unu denga uvaini gu senga, gai ia gu deai ono malo ga dagodo ai i lo tono hale malo. 22Gai a Ham, tamana o Canaan, ne gidee bolo dono damana gu maatala ono malo ma gu too, gai ia ga tala ange gi luoono daina daane i duaahaho. 23Gai a Shem ma Japheth ga kave dahi malo ga daohi ange gi honga olaau eu, gai gilaau ga seesee dua ga hulo ga haoli ange delaau damana, gai olaau mada e huuhuli gee mai i delaau damana, gilaau tee gidee bolo ia e deai ono malo.
24Gai de masavaa o Noah ne alahage ai ga iloo mee a dana dama gauligi ne hai ange gi de ia, 25gai ia ga hagadaba,
“Canaan gu hagamalaia;
ia e hai naa ga se dangada hai hegau maolalo
niio luoono daina daane.”
26Ia ne hagadaba hogi,
“Duuhia Tagi Maolunga, de Maadua o Shem,
gai Canaan gi se dangada hai hegau niio Shem.
27De Maadua gi hagalaumalie ina de vaaenga o Japheth,#9.27 Japheth i muna Hebrew e bei go de hagalaumalie.
gai ia gi noho madali a Shem i lodo ono hale malo,
gai Canaan gi se dangada hai hegau niio Japheth.”
28Gai ne 350 ngadau o Noah ne mouli ai i dua tolona. 29Gai ne 950 ngadau alodahi o Noah ne mouli ai, gai ia ga magau.
Currently Selected:
Genesis 9: DBD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
