John 4

Iesu ma de hine Samaria

1De masavaa huu a Iesu ne iloo ai bolo denga Pharisee gu langona bolo ia gu soa ange ana dangada agoago ne mau ma de babudaisi i a John, 2(gai tagodo donu, e dee go Iesu ne babudaisi ina dangada, gai go ana dangada agoago,) 3gai ia ga hano gee i Judea ga ahe gi Galilee.

4Gai ia ne hano laa Samaria. 5Gai ia ne hano ga noho i dahi aduhale o Samaria, e hagaingoo ange laa go Sychar, se mommee e baa ange gi de alahenua a Jacob ne gaavange gi dana dama go Joseph.#Gen 33.19; Josh 24.32 6Gai dahi vai geli a Jacob i kilaa, gai Iesu gu dalea i dono seesee mai, gai ia ne noho i gaogao de vai geli laa. Gai gu dai daa tuele#4.6 daa tuele: de Beebaa Greek e hai ange go de ono aoaa. i de masavaa laa.

7Gai gu humai dahi hahine Samaria e asu vai, gai Iesu ga hai ange gi de ia, “Aude haihaia gaamai hanu vai e unu au.” 8(De masavaa nei gai ana dangada agoago gu hulo gi de aduhale e hagao gai ai.)

9Gai de hine Samaria laa ga hai ange gi de ia, “Koe se daane Ssuu, gai au se hine Samaria. Gai gu aha goe gu hai mai ai naa gi gaavadu hanu vai e unu goe?” (De gau Ssuu e dee hagabuni ange gi de gau Samaria.)#Ezra 4.1-5; Neh 4.1-2

10Iesu ne hai ange gi de ia, “Noo koe e iloo de mee ngadi gaavange a de Maadua, gai goai e hai adu nei gi de goe, ‘Au e unu,’ gai koe e maua i de dangidangi ange gi de ia, gai ia e maua i de gaavadu gi de goe vai o de mouli.”

11De hine laa ne hai ange gi de ia, “Tangada aamua, koe e deai donu sau mee e asu ai vai, gai de vai geli nei e gelo. Gai go hee aau e gaamai ai de vai o de mouli naa? 12Koe e maolunga ange naa i demaadeu dubuna go Jacob, de ia ne gaamai gi gimaadeu de vai geli nei, gai ia ma ana dama ma ana manu ne unu ai hogi?”

13Iesu ne hai ange gi de ia, “Dangada alodahi e unumia vai e hieunu ange donu, 14aagai be goai e unumia vai aagu e gaavange gi de ia e dee hieunu ange donu. Gai vai aagu e gaavange gi de ia e hai naa ga se saalingaa vai e sali age laa ga hano gi de mouli e dee ngado mai.”

15De hine laa ne hai ange gi de ia, “Tangada aamua, gaamai gi de au de vai naa gi dee hieunu ai au, aabe gi ahe mai ai au gi kinei e asu vai ai.”

16Ia ne hai ange gi de hine, “Hannoo hagahia doo bodu ma gooluu aahe mai kinei.”

17De hine laa ne hai ange, “Au e deai donu sogu bodu.”

Iesu ne hai ange gi de ia, “E heohi donu dau tala bolo e deai donu soo bodu. 18Gai tagodo donu, koe gu dogolima oo bodu, gai taane oou e noho ai naa iainei e dee se bodu niiou. Se muna abodonu aau gu tala mai naa.”

19Gai de hine laa ga hai ange, “Tangada aamua, au e iloo bolo koe se pelaabisi. 20Omaadeu damana ne daumaha i honga de mounga nei, gai goodou de gau Ssuu e hagataba bolo de mommee donu huu e heohi taadeu daumaha ai go Jerusalem.”

21Iesu ne hai ange gi de ia, “De hine, hagadonusia agu muna, e dahi naa donu masavaa oodou e dee daumaha ange ai gi Tamana i de mounga nei aabe go Jerusalem. 22Goodou de gau Samaria e daumaha ange gi mee oodou e dee tonu ange aagena; aagai gimaadeu e daumaha ange gi mee amaadeu e tonu ange aagena, go hiidinga de hagamouli se mee mai i daho de gau Ssuu. 23Gai e dae mai naa de masavaa, gai go iainei donu de masavaa, olaadeu e daumaha i de muna abodonu e daumaha ange ai gi Tamana i de hagasaalunga ma de muna abodonu, go hiidinga aanei donu gilaadeu a Tamana e ssala gi daumaha ange gi de ia. 24De Maadua se hagasaalunga, gai gilaadeu e daumaha ange gi de ia gi daumaha ange gi de ia i de hagasaalunga aama de mee abodonu.”

25De hine laa ne hai ange gi de ia, “Au e iloo bolo de Messiah (go de ia e hagabinga ange laa go Klisdo) e humai naa. Gai dono masavaa naa huu e humai ai, gai ia ga hagadonu mai mee alodahi gi gidaadeu.”

26Gai Iesu ga hai ange gi de ia, “Go au donu de Klisdo e basa adu nei gi de goe.”

De aahe mai o denga dangada agoago

27De masavaa laa gai gu ahe mai ana dangada agoago i de aduhale, gai gilaadeu gu llele mouli i delaadeu gide ia e basa ange gi dahi hahine. Aagai e deai se gilaadeu ne siilia ange, “Se aha oou e lodo ai?” aabe “Gu aha gu basa ange ai naa goe gi de hine naa?”

28De hine laa ne tili dana manu vai, gai ia ga ahe gi de aduhale, ga hai ange gi dangada, 29“Goodou loomai diiloo taane ne daalaa mai nei mee alodahi aagu gu hai. E dee deenei de Klisdo?” 30Gai gu loomai dangada i de aduhale e hulo e hedae ange gi de ia.

31De masavaa laa, gai ana dangada agoago ga hai ange gi de ia, “Tangada agoago, gaimee.”

32Aagai Iesu ne hai ange gi gilaadeu, “E hanu agu gai e gai oodou e dee iloo.”

33Gai denga dangada agoago ga hagadau pasa i olaadeu magavaa ga hagataba, “Gu hanu nei dangada ne gaamai hanu mee ia gi gaina?”

34Iesu ne hai ange gi gilaadeu, “Agu gai go de hai lodo o de ia ne haia nei au gi humai, aama de hagalava ana hegau. 35E aha, goodou e dee hagataba laa, ‘E haa ange malama gai ga dae mai de masavaa o de hagihagi’? Au e hai adu gi goodou, goodou kalo ange diiloo denga veelenga gu lleu donu, gai gu dae donu de masavaa e hagihagi ai. 36De ia e hagihagia gu lava donu i de kave dono hagaoanga, gai gu hagabudu hua ange gi de mouli e dee ngado mai. Gai gi malangilangi ai ngaadahi tangada doo aama tangada hagihagi. 37Deenei ai, ni muna abodonu de muna e hai ange laa, ‘Dahi dangada e doo gai dahi e hagihagi.’ 38Au gu hai goodou gi hulo gi hagihagia mee oodou tee hai hegau ange aagena. Ni dangada gee ne hai hegau kona ange aagena, gai goodou gu hagihagi hua o alaadeu hegau.”

39Gai ne soa dangada Samaria mai i de aduhale laa ne hagadonusia ia i hiidinga de tala hagadonu a de hine laa ono dagodo, “Ia ne tala mai mee alodahi aagu gu hai.” 40Gai ga tae mai huu de gau Samaria gi ono daha, gai gilaadeu ga hagammahi ange ia gi noho i olaadeu daha, gai ia ga noho i e lua laangi. 41Gai gu kii ange de soa dangada ne hagadonusia i hiidinga o ana muna.

42Gai dangada ga hai ange gi de hine laa, “E dee go hiidinga donu huu o au muna amaadeu gu hagadonusia ai, gai go hiidinga gimaadeu gu langona donu ana muna, gai gimaadeu gu iloo donu bolo taane nei go Tangada Hagaola o henua i lalo.”

De hagaieiangi o tama daane a dahi daane aamua

43Dua luu laangi laa gai Iesu ne hano gee mai i kilaa ga hano gi Galilee. 44Go hiidinga Iesu gu tala donu bolo de pelaabisi e dee hagadubulia i dono aduhale donu.#Mat 13.57; Mark 6.4; Luke 4.24 45Gai ga dae huu ia gi Galilee, gai de gau Galilee ga abodonu ange gi de ia, go hiidinga gilaadeu ne gidee mee alodahi aana ne hai i Taonga Hagasili i Jerusalem, go hiidinga gilaadeu ne hulo hogi gi taonga laa.#John 2.23

46Gai Iesu ne ahe ange hogi ga hano gi Cana i Galilee, go de mommee aana ne sui ai denga vai ga ni uvaini. Gai e dahi daane aamua i Capernaum gu magi dana dama daane.#John 2.1-11 47Gai ga langona huu e ia bolo Iesu gu humai i Judea gi Galilee, gai ia ga hano ga dangidangi ange ia gi humai gi hagaieiangi ina dana dama, go hiidinga ia gu baa ange donu gi de magau.

48Iesu ne hai ange gi de ia, “Goodou e dee hagadonusia donu, noo goodou e dee gidee denga hagailonga ma mee hagalele mouli.”

49Taane aamua laa ne hai ange, “Tangada aamua, humai i mua de magau o dagu dama.”

50Iesu ne hai ange gi de ia, “Hannoo, dau dama daane e mouli donu.”

Taane laa ne hagadonusia muna a Iesu ne tala ange gi de ia, gai ia ga ahe gi dono hale. 51Gai i mua dono dae gi dono mommee, gai hanu ono dangada hai hegau gu loomai ga hedae ange gi de ia ga tala ange bolo dana dama gu ieiangi. 52Gai ia ga ssili ange de masavaa oona ne ieiangi ai, gai gilaadeu ne hai ange gi de ia, “De vvela o dono angaanga ne hano gee anaahi i daha tahi i muli de hualaangi.” #4.52 tahi i muli de hualaangi: de beebaa Greek e hai ange go de hidu aoaa.

53Gai dono damana gu iloo bolo go de aoaa donu a Iesu ne hai ange ai gi de ia, “Dau dama daane e mouli donu.” Gai ia ma dangada alodahi i dono hale gu hagadonusia.

54Deenei de lua hagailonga a Iesu ne hai, i dua dono ahe mai i Judea gi Galilee.

Currently Selected:

John 4: DBD

Highlight

Copy