Luke 5

De hagahi a Iesu denga dangada agoago i taamada

(Mat 4.18-22; Mark 1.16-20)

1Dahi laangi gai Iesu ne duu i gaogao de vai go Gennesaret, gai dangada gu hagakabi ia i delaadeu loomai e hagallongo muna a de Maadua,#Mat 13.1-2; Mark 3.9-10; 4.1 2gai ia gu gidee e lua boose i gaogao de vai, gai denga daane haangoda gu iho ma e taa alaadeu galauna. 3Gai ia ga gage ange gi honga dahi luu boose laa, go de boose o Simon, ga dangidangi ange ia gi usu ina de boose gi damaa mmao adu i de henua. Gai Iesu ga noho i honga de boose laa ga agoago mai ai dangada.

4De masavaa ne lava ai ono agoago, gai ia ga hai ange gi Simon, “Usu ina doo boose gi de mommee gelo ma gi dilia denga galauna gi maua ai hanu mamu.”

5Simon ne hai ange gi de ia, “De Ia Aamua, gimaadeu ne haangoda mai huu anaboo gai gimaadeu tee hagalau. Aagai go hiidinga koe gu hai mai gi dilia denga galauna, deenei ai au e tili donu.” #John 21.3

6Gai de masavaa huu alaadeu ne tili ai denga galauna, gai gilaadeu gu maua hanu mamu lagolago, gai alaadeu galauna gu daamada de maoha.#John 21.6 7Gai gilaadeu ga aloalohagi ange olaadeu soa i de boose ange laa gi loomai gi balea ange gilaadeu. Gai gilaadeu ga loomai ga hhao gu hoohonu luu boose laa ngaadahi gu dai aabulu.

8Aagai de masavaa huu a Simon Peter ne gidee ai mee laa, gai ia ga humai ga duuduli i gaogao luu vae o Iesu, ga hai ange, “De Ia Aamua, hano gee mai i ogu daha, au se dangada haisala!” 9Gai Simon ma ono soa gu llele mouli mmao i de lagolago alaadeu mamu ne mau, 10gai James ma John luu dama daane a Zebedee ne llele mouli hogi, gilaau ni daane haangoda madali a Simon.

Aagai Iesu ga hai ange gi Simon, “Aude madagu; dua iainei gai koe gu se daane e haangoda ina dangada.” 11Gai ga lava huu i de solo age delaadeu boose, aagai gilaadeu ga dugu mee hugadoo ga daudali ange i de Iesu.

De hagaieiangi a Iesu dahi daane lebelaa

(Mat 8.1-4; Mark 1.40-45)

12De masavaa o Iesu e noho ai i dahi aduhale, gai dahi daane lebelaa ne humai gi kilaa. Gai ga gidee huu e ia Iesu, gai ia ga duuduli ga ino gi lalo ga dangidangi ange, ga hai ange, “Tagi Maolunga, noo koe e lodo, gai koe e maua donu i de hai au gi gilimalali!”

13Gai Iesu ga haalo dono lima ga poo ange ia, ga hai ange, “Au e lodo, koe gu gilimalali!” De masavaa laa donu huu gai taane lebelaa laa gu ieiangi.

14Aagai Iesu ga hai ange hogi gi de ia, “Aude daalaa ange mee nei gi dahi dangada daudahi, aagai koe hannoo hagaagona ange goe gi tangada haimeedabu, ma de hai ssigidaumaha o tangada gu gilimalali, bei dagodo muna a Moses, e hagadonu ai ⌊doo ieiangi⌋ i olaadeu daha.” #Lev 14.1-32

15Gai ono longo gu dele gi denga mommee mmao, gai dangada soa ga hagabuni mai e hagallongo ana agoago ma de hagaieiangi olaadeu magi. 16Aagai Iesu e dee modu de hano gi de vao ga dalodalo ai.

De hagaieiangi a Iesu taane balagelage

(Mat 9.1-8; Mark 2.1-12)

17Dahi laangi i de masavaa oona e agoago ai, gai hanu Pharisee ma de gau agoago o de hainga ne loomai laa i denga aduhale hugadoo o Galilee ma Judea, aama mai i Jerusalem e nnoho i kilaa. Gai ssauaa o Tagi Maolunga i ono daha laa gu hagaieiangi denga magi. 18Gai tilo, hanu dangada ne saabai mai dahi daane balagelage i honga dono moenga. Gai gilaadeu ne ssala delaadeu hai e hagaulu ai taane laa gi daho Iesu, 19gai tee maua i hiidinga de soa dangada i kilaa, aagai gilaadeu ga kage ga oha tua de hale ga hagasege iho taane laa ma dono moenga gi mada i mua o Iesu.

20Gai ga gidee huu e Iesu dagodo olaadeu kai, gai ia ga hai ange gi taane laa, “Taane nei, gu maatala oo haisala.”

21Gai de gau sisi ma denga Pharisee ne hagataba i olaadeu lodo, “Goai taane e basa hagangadi mee ina nei de Maadua? Goai e maua i de tala haisala, e dee go de Maadua donu huu?”

22Gai Iesu gu iloo e ia alaadeu maanadu, gai ia ga ssili ange gi gilaadeu, “Gu aha goodou gu maanadu ai naa bee naa i oodou lodo? 23Dee hee de mee e hai ngaohie: go de hai ange, ‘Gu maatala oo haisala’, aabe go de hai ange, ‘Hidi age seesee hannoo’? 24Aagai mee nei ne hai gi iloo ai e goodou bolo Tama a Tangada e dahi donu ono sauaa e degi ange ai gi haisala i henua i lalo.” Gai ia ga hai ange gi taane balagelage laa, “Au e hai adu gi de goe, hidi age sabaia doo moenga mage hannoo gi doo hale!” 25De masavaa laa donu huu gai taane laa ga hidi age i madamada o dangada, ga saabai dono moenga ga hano ai gi dono hale, gai ia ga tuhi de Maadua. 26Gai dangada alodahi gu llele mouli ga tuhi de Maadua aama de maatagu mmao, ga hagataba, “Gidaadeu gu gidee hanu mee hagalele mouli anailaa nei!”

De hagahi a Iesu Levi

(Mat 9.9-13; Mark 2.13-17)

27Dua mee laa gai Iesu ne hedae ange gi dahi daane, dono ingoo go Levi, ia e noho i de mommee hagabudu taagisese. Gai Iesu ga hai ange gi de ia, “Daudali mai i de au.” 28Gai ia ga dugu mee alodahi gai ia ga daudali ange i Iesu.

29Gai Levi ne hai ange dahi daonga laumalie gi Iesu i dono hale; gai ne soa hogi dangada hagabudu taagisese ma dangada ange laa ne nnoho ga gaimee i teebele madali gilaadeu. 30Gai denga Pharisee ma de gau sisi ga nnanu ga hai ange gi ana dangada agoago, “Gu aha goodou gu gaimee ai naa ma de unu madali dangada e hagabudulia taagisese ma de gau baubau?” #Luke 15.1-2

31Iesu ne hai ange gi gilaadeu, “De gau mmahi e dee ssala tangada hai magi, aagai go gilaadeu e mmagi e saalaa ia. 32Au tee humai e hagahi gilaadeu e heohi, aagai ne humai e hagahi gilaadeu e haisala gi daahuli olaadeu lodo.”

De ssili dagodo o de hagahiigai

(Mat 9.14-17; Mark 2.18-22)

33Gilaadeu nei ne hai ange gi Iesu, “Dangada agoago a John ma dangada agoago a denga Pharisee e hagahiikai ma de dalodalo, aagai au dangada agoago gu gaimee naa ma de unu.”

34Iesu ne hai ange gi gilaadeu, “Goodou e maua i de hagahiikai dangada ne saalaa i taonga hagahai bodu i de masavaa oona e noho ai i olaadeu daha? 35Gai e loomai naa donu laangi e kave gee ai taane gu hagahai bodu i olaadeu daha, gai gilaadeu ga hagahiikai ai naa i laangi laa.”

36Ia ne tala ange hogi gi gilaadeu dahi mee hagasengasenga: “E deai donu se dangada e saea dahi malo hoou e dui ange gi dahi malo duai. Noo ia e hai de mee nei, gai ia gu ssae de malo hoou laa, gai talaa malo laa e dee heloongoi ange gi de malo duai. 37E deai hogi se dangada e hagasahulia ange uvaini hoou gi lodo gili manu duai. Noo gu hai de hegau nei, gai uvaini hoou laa ga oha denga gili manu laa, gai uvaini laa gu maalingi, aagai denga gili manu laa gu maoha. 38Gai dangada e hhao ange uvaini hoou gi lodo gili manu hoou. 39E deai hogi se dangada e unumia uvaini duai e lodo e unu uvaini hoou, i hiidinga ia e hagadaba, ‘Uvaini duai danuaa ange.’ ”

Currently Selected:

Luke 5: DBD

Highlight

Copy