Numbers 23
23
Muna pelaabisi a Balaam i tahi hanonga
1Gai Balaam ga hai ange gi Balak, “Hagatuulia e hidu mommee o ssigidaumaha i kinei, ma de gaamai e hidu kaau daane ma e hidu ssiibi daane.” 2Gai Balak ne hai ga bei muna a Balaam; gai Balak ma Balaam ne hai ssigidaumaha i dahi kaau daane ma e dahi ssiibi daane, i honga denga mommee o ssigidaumaha e hidu laa alodahi.
3Gai Balaam ga hai ange gi Balak, “Humai duu i gaogao dau sigidaumaha dudu, gai au ga hano. Agu made Tagi Maolunga e humai naa ga hedae mai gi de au, gai aahee naa huu ana muna e tala mai gi de au, gai au ga tala adu.” Gai Balaam ne hano gi ulu dahi mounga e deai manu ssomo iai.
4Gai de Maadua ne hedae ange gi Balaam i kilaa, gai Balaam ga hai ange, “Au gu hagadabena e hidu mommee o ssigidaumaha, gai au gu hai ssigidaumaha i e dagidahi kaau ma e dagidahi ssiibi i honga denga mommee o ssigidaumaha e hidu laa.”
5Gai Tagi Maolunga ga tala ange ana muna gi Balaam, ga hai ange, “Ahe gi daho Balak, daalaa ange muna nei gi de ia.”
6Gai Balaam ne ahe gi daho Balak, gai tilo, gilaadeu ma denga dagi o de henua alodahi o Moab, goi tuu donu huu i gaogao dana sigidaumaha dudu. 7Gai Balaam ga basa pelaabisi, ga hai ange,
“Balak ne aalu adu ga gaamai au i Syria,
de hodooligi o Moab ne gaamai au i de mommee iai mounga i baasi dua:
‘Humai balea mai au hagamalaia ina ai Jacob;
humai, hagabaubau ina Israel!’
8Gai dee hee dagu hai e hagamalaia ai dangada a de Maadua tigi hagamalaia laa?
Dee hee dagu hai e hagabaubau ai gilaadeu a Tagi Maolunga e dee hagabaubau?
9Au ne gidee adu gilaadeu i ulu denga mounga,
ma de tilo adu gilaadeu i honga denga duuduu;
gilaadeu se huaadangada e nnoho donu huu i gilaadeu,
gilaadeu e dee dau ange gi denga huaahenua ange laa!
10Goai e maua i de dau gelegele o Jacob,
be go de dau e dahi diba i diba e haa o Israel?
Dugua mai au gi magau bei de gau heohi,
gai dogu hagaodi gi bei de hagaodi olaadeu mouli!”
11Gai Balak ga hai ange gi Balaam, “Se hegau bee hee aau gu hai mai nei gi de au? Au ne gaamai goe gi hagamalaia ina ogu hagadaumee, gai koe tee hagamalaia, aagai ne hagamanuuia gilaadeu!”
12Gai Balaam ga hai ange, “Au e tala donu huu muna a Tagi Maolunga gu tala mai gi de au!”
Muna pelaabisi a Balaam i de lua hanonga
13Gai Balak ga hai ange gi de ia, “Gidaau ga hulo gi dahi mommee gee, gai koe ga tilo ai gilaadeu; koe e gidee naa donu huu hanu gilaadeu, koe e dee maua gi gidee gilaadeu alodahi. Gai koe ga duu ga hagamalaia ai gilaadeu.” 14Gai Balak ga kave Balaam gi de mommee soe go Zophim, i ulu de mounga o Pisgah, ga hagatuu e hidu mommee o ssigidaumaha i kilaa, ma de daa e dagidahi kaau ma e dagidahi ssiibi e hai ai ssigidaumaha i honga denga mommee o ssigidaumaha e hidu laa.
15Gai Balaam ga hai ange gi Balak, “Humai duu i gaogao dau sigidaumaha dudu i kinei, gai au ga hano e hedae ange gi Tagi Maolunga i kilaa.”
16Gai Tagi Maolunga ne hedae ange gi Balaam ga tala ange ana muna, ga hai ange, “Ahe gi daho Balak, gai aanei au muna e tala ange gi de ia.”
17Gai ia ga ahe mai huu ia gi daho Balak, gai tilo, ia goi duu donu huu i gaogao dana sigidaumaha dudu, gai dagi o Moab e tuu madali ia. Gai Balak ga ssili ange gi Balaam, “Aahee muna a Tagi Maolunga gu tala adu gi de goe?”
18Gai Balaam ga basa pelaabisi, ga hagadaba,
“Balak, hidi age, ma gi hagalaangona;
tama daane a Zippor, hagalaangona agu muna:
19de Maadua e dee se dangada, gai ia ga hadu muna ai,
ia e dee bei dagodo o dangada, gai ia ga sui ai dana maanadu.
E aha, ia gu basa, gai ia e dee hai naa gi bei?
E aha, ia gu tala de muna, gai ia e dee hagasula?
20Tilo, ia gu tala mai, au gi hagamanuuia ina;
ia gu hagamanuuia, gai au e dee maua donu i de sui!
21Ia tee gidee bolo Jacob e dahi ono hai ngadaa,
aabe e gidee bolo Israel e duasala.
Tagi Maolunga delaadeu Maadua e noho i olaadeu daha,
gai gilaadeu e tuhi de hodooligi i olaadeu magavaa.
22De Maadua ne hagassao mai gilaadeu i Egypt;
gai ono mahi e bei mahi o de kaau daane aada.
23E deai donu se huuhuaa mee e maua i de hai baasi ange gi Jacob,
e deai donu mee e dee iloo e hai baasi ange ai gi Israel.
Gai e tala naa dagodo o Jacob ma Israel:
‘Diiloo mee hagalele mouli a de Maadua gu hai!’
24Tilo, dahi huaadangada e sula age naa bei dahi laiono hahine,
gilaadeu e hiihidi age naa bei dagodo o de laiono mmahi.
Ia e dee dagodo naa donu gi lalo
ga dae ai gi de odi kano o de manu aana gu daa laa,
ma de unu ono dodo.”
25Gai Balak ga hai ange gi Balaam, “Aude hagamalaia ina donu aabe e hagamanuuia gilaadeu!”
26Gai Balaam ga hai ange gi Balak, “E aha, tee daalaa adu e au, bolo au e hai naa donu gi bei muna alodahi a Tagi Maolunga e tala mai gi de au?”
Muna pelaabisi a Balaam i tolu hanonga
27Gai Balak ga hai ange gi Balaam, “Humai madali au, gai au ga kave goe gi dahi mommee gee; kana adu de Maadua e malangilangi i dau hagamalaia gilaadeu i kilaa.” 28Gai Balak ga kave Balaam gi ulu de mounga go Peor, se mommee e gidee de mommee e deai manu e ssomo ai.
29Gai Balaam ga hai ange gi Balak, “Hagatuulia e hidu mommee o ssigidaumaha i kinei, ga hagadabena e hidu kaau daane, ma e hidu ssiibi daane.” 30Gai Balak ne hai ga bei muna a Balaam ne tala ange, gai ia ne hai ssigidaumaha i e dagidahi kaau ma e dagidahi ssiibi daane, i honga denga mommee o ssigidaumaha e hidu laa.
Currently Selected:
Numbers 23: DBD
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.