Zouao 11

Razaro uatiarrari

1Oza capamema narraro onini Betaniaza madirra coma taha madirrari onipa Razaro. Nanizape Maria poni onihi Marta tazarrani madimanarrarode. 2Narraro Maria Razaro caripenepe marrorroza Zeso amori capamehe ssohoho icanariza poni tatini conaniza amori sse sse ihippi narraro. 3Nazapa Razaro coma taza caripenedeni Zesoza uima zosse inarronemanarrarode: —Parra pouaza teti uana tarraropa coma taui −quenade. 4Narraro uima Zeso mittazapa uati tarrari: —Razaro coma tarraripa parra zoqqueriuiuarrine rraraui. Narrarope Deocca deni torrehe auato taniuarrine, Deo Bedicca deni torrehe naqui auato taniuarrine −nade. 5Zesopa Martaza, Mariaza, Razaroza uati uana tarrari. 6-7Naraha Zeso —Razaro coma taui −mittazapa naui poua madiuiza narroccarrari. Uada pamehe tossoniqquimezana Zeso poua uatimadedeni iaza uati tade: —Rrina, Razaro qquide zodeodenicca zama Zodeauarri rrauirrapomana −nade.

8Naraha pouaza uati inade: —Ia Maride, maittazama onihima naza nauiuarricca zodeodeni attidenipa: “Sibaza tia iquenaqquina” quenade. Naniuarri ticcanipomaniuarrinequi? Parri, tizoqquerana! −inade. 9Naraha Zeso attipa: —Nouerani. Uada orrarie marri ssiuerrene 12 horas naha carrirrari. Marri ssiuerrene ssiuarra taza iccarizezape emori doi cane-rrerani, zama ssiuarra tarrarorrine. 10Naraha zomepe zizi tani. Zome iccarizezape emori doi cana tani −nade.

11Nazapa denima uati tapomade: —Itesse Razaro uadaraha uaua oneza nocco torrauitoui −nade. 12Naraha Zesoza uati inade: —Ia Maride, Razaro uadazapa niza tonomiuitoui −inade. 13Zesopa Razaro uatiauicca uimana uati taraha ssamoqquiri inezape: —Razaropa uadarrari −inarrarode. 14Imittanissa terrerezape Zeso iaza uati nimanirraride: —Razaropa uadaui oneraha uada-rraraui, uatiarrari. 15Naraha naniuarri omadi-rrereza uatiazapa peperri, bica tani. Ouatizerraro. Nani tiadeni qqui tiqueneza ouaza parrissa tiquenaniuarrine. Rrari, rridapanana naniuarri rrauirrana −nade. 16Naraha Tome, poua tessedeni pouaza: Papamade quequenanarraria iaza uati tade: —Rrina, ia naqui nani rrauirrana, pouazama irrica nana −nade.

Zesopa nauatonie rrinede camittehe rrinede narrari

17Nezape oza onini Betaniaza bacco inanipomade. Naniza bacco inanizape Zeso uima mittarraride: —Razaro ppa izemanauicca uadape 4 nani −quenade. 18Betaniape oza panani Zerozareza uarrira tarraro, izamassa babacco. 19Nema narraro zodeodenipa Maria Martadenicca ozauarri rrarraui torra narrari, uatinideni inassonabaqquimananiuarrine. 20Marta —Zeso ccarronaui −quenaui uima mittezape qqueneza iaccaniuiuarrine ccarronarraro. Naraha Mariape nani oza bodiza iborraro.

21Marta Zeso bacco inazapa pouaza uati tade: —Oua Maride, rridacca arriza timadizape ouimecote zoqque-rraranarra. 22Naraha nema nehe Deoza uati tinezape ticca uatinarrassa inananitoui nauato onani −nade Marta Zesoza. 23Naraha Zeso attipa: —Timecote nauatoniuitoui −nade. 24Naraha Marta uati tade: —Rrehe, niza zama rriqueza rricaporrarideni bazima assiredenima Deo inauatonibaqquiuitoui. Nauiza Razaro naco nauatoniuitoui. Narraro uimape nauato onaponi −nade Marta.

25Naraha manaco Zeso Martaza uati tade: —Ouape nauatonie rrinede orrani. Ouape camittehe rrinede orrani. Ouaza rrehe quenazapa rricaraha orrine camittemanimana-pomauitoui −nade. 26—Ouaza rrehe quenarraridenipa parra rricariui narrarauitoui. Rricaraha nauatonimanazapa madimana-zanapouitoui. Narraro uimaza parrissa taqui? −nade Zeso Martaza. 27Nezape Zesoza uati tade: —Rrehe oua Zozossede, nauato onani tiaza. Tiape Cristo-Mesia, Deo Bedi tirrani, arri namiuarri ticcarronanitoui quequenanapode −nade Marta.

Razaro noccobiriuarri Zeso orrirrari

28Nezape Marta Mariatoui ozauarri toqquezimanizape auatoraniza Mariaza uati tarraro: —Ia Maride bacco narronaui titoui uaua naparra −nani nade. 29Maria uima mittezape totema, qqueneza Zeso qquide ccarronarraro. 30Zesopa ponidenicca ozauarri bacco tarraraccaui. Naui Marta poni bacco inauiza madiccade. 31Zodeodeni Maria poni uatini inassonemananiuarrine ponicca ozaza queriqquimanarraridenipa toccani qqui toquenazapa nattini rrauirronarraride, —Razaro cauauiuarri orride toccarraro nitide −quenaza. 32Naraha Maria Zeso uauiuarri bacco nezape poni pitoniza uitta neza pouaza uati tade: —Ia Zozossede, rridacca arriza timadizape ouimecote zoqque-rraranarra −nade.

33Nazapa Zeso Maria orri orri nani qqui, zodeodeni poniza rrauirronarrarideni orri quenaui qqui tazapa bodi qquezarraride. 34Nazapa Zeso pouadeniza uati tade: —Nerrecouarri tequibezemanatta? −nade. Nazapa: —Rrina, qqui tarro −quenade. 35Nazapa Zeso orride. 36Nazapa zodeodeni: —A, parrissa Razaroza uati uana tarrariraha −quenade. 37Naraha zodeodeni motapa uimahaha canade: —Zesorrinepa nocco rrirrirade nocco ssire nimanide. Rridacca Zeso arraza madizapa Razaro zoqque-rraranarra −quenade.

Razaro nauatonirrari

38Naraha Zeso bodi qquezapomazapa Razaro noccobiriuarri toqquessirrari. Poua noccobiripe ssono bacconiza touarrarode. Noccobirizape siba uacossarraro. 39Naraha Zeso: —Siba cco tirrizemanarri, touabaniuarrine −nade. Naraha arra zoqquerraricca asi Marta attinipe: —A, ia Zozossede, poua zoqqueuicca uada 4 narraro. Battaui −nade. 40Naraha Zeso attipa: —Tiaza uati uati onapode. Timitte-rrerarrarotterane? Parrissa tezape Deocca deni torrehe qqui tinanitoui, ohonanade −nade Zeso.

41Nezape siba cco irrizemanade. Nazapa Zeso memeuarri tocattamacossa naza uati tade: —Abi, ouatti timittezape peperri bica tani, onarraro. 42Uarrirriraza ouatti titimitta nani nauato oneraha arraza madirra madimanarrarideni ouaza: “Parrissa Deocca zosse naronanirri” quenauiuarrine tiaza nema onarraro −nade. 43Nazapa Deoza uati taha rricazapa rrazirema uaua nade: —Razaro tiqquenarri! −nade. 44Nanarra Razaro uatiaraha Zesorrine camittemaniza qquenade. Assire eteroza rrore tamaroua nama naha qquenade. Pano naco eteroza teppe nade. Nazapa Zeso: —Dicca tiquenarro, toccaniuiuarrine! −naza nama inanemanade.

Zeso tozepe torrauiuarrine uima narroremanarrari

Mateo 26.1-5; Maraco 14.1-2; Roca 22.1-2

45Nazapa zodeodeni Mariaza queriqquimanarrari motapa Zesorrine Razaro camittemaniui qqui toquenaza Zesoza parrissa quenade. 46Naraha motadeni Zesoza nacasseraqquiri narraridenina marinarra parizeoza rrehe quenarrarideniuarri rraui torrarrari. Zesorrine Razaro camittemaniuicca uima pouadeniza uati toquenarrari. 47Nanarra parizeodeni, dada toqquimade taminedenipa narraro uima mittemanazapa poccadeni uima cacattemadedeni deni toquerrenarrarideniza uaua quenarrari, pouadeniza queriqquimanauiuarrine. Queriqquimanazapa pouadeniza uati toquenarrari: —Iape nerrecoma inapazerre? Zeso canauatoriri canaui. Pocca deni torrehe auato tani −quenaui nade. 48—Naraha Zeso nama zanapouiuarrine inebozapa bazima pouaza parrissa zanapomanauitoui. Nema nezape icca dada toqquimauarripe rromanodeni botta icanemananitoui. Icca zamacca icca cacauehe inarriquemananitoui −quenaui nade.

49Naraha uima cacattemadedeni orraria onipa Caipa, narrarina narrari uarranoza dada toqquimadedenicca tamine deni torrarrari madirrari. Pouapa bazimaza uati tarrari: —Tiadenipe ssamoqquiri tiquenani! 50Tibodideniza arrirraro uima auato terrerani: Madirra orraria bazima manaconedeni zoqqueuina bica taui, ia icca zamacca bazima naco inarriquemane-rreraniuarrine −naui nade Caipa.

51Naraha narraro uimape Caipa poua mottacca rrerani. Pouapa dada toqquimadedenicca tamine deni torrarrarirrine Deo Corime pouaza uati tarrari. Caipa poua attizape Zeso tauimari iaza auato tarraro. Narraroa arri Zesopa pocca madirra zodeodeni bazima tocassiuauerauiuarrinepa zoqqueuitoui. 52Naraha Zesopa zodeodeni pouadeni motta manaconedeni torrauiuarrine rraraui. Bazima Deocca madirra madirizemanarrarideni manaconedeni naco torrauiuarrine. Nezape Deocca erredeni madirizemanarrarideni irrariqquinissa taniuarrine.

53Nezape narraro uadaza, arra Caipa atti: —Rrehe zoqqueui bica taui −naza uima cacattemadedeni bazima Zeso zoqqueuiuarrinecca uima idimemanapomezape uima narroraniuarrine uimahaha uimahaha cazanaporrari.

54Zeso uima nema nani mittazapa zodeodeni madimanauiuarri auatoniza ccarizade nacassera tarrari. Nazapa Zodeauarri nebo, oza onini Epraim uarri madiuiuarrine toccarraride. Epraimpe zama uamoni ssono carri, siba carri tani uarrira taniza anirrarode. Nanizana ia poua uatimadedeni Zeso tezerre imadirrarode. 55Naniza imadizana zodeodenicca errete imenibote onini Pascoa touarrirarrarode. (Pascoa ettizape: Deo tossoniqquimarrari, inarraro.) Naui Zerozareza madirra zama onihicca, zama onihicca rrauirronana canarrari. Deoza da iquenauiuarrine queriqquini-pomarrari, errete Pascoatoui narroremanapouiuarrine. 56Madirra —Zeso qqui inana −quenazapa Zesotoui qqui narizemanarrari. Deoza dada toqquimaza naco pouadenira uati tocanirere canarrari: —Erreteza Zesopa ccarrona-rrarapazarra? −quenaui nade.

57Naraha parizeodenipa dada toqquimade taminedeni tezerre attideni narroremanaporra narrari: —Zeso qqui tiquenazapa iaza uati tiquenana, naui dama inauiuarrine −quenarrari nade.

Currently Selected:

Zouao 11: KBNT

Highlight

Copy