Mateo 14

Zouao Batista zoqqueuicca uima

Maraco 6.14-24; Roca 9.7-9

1Nazapa Zeso canauatori canarizazapa pocca uima torraribaqquirraro. Nazapa zama arobeni Carireauarricca tamine Erodipa Zesocca uima uati uati toquenaui mittazapa 2pocca zozosse tabaqquiza uati tarrari. Erodi attipa: —Arra canauatori canarraripa Zouao Batista zoqqueraha nauatonirrari. Narraro nauatoniherrine canauatori canaui −naui nade tamine Erodi.

3-4Nazama Erodi atti nama naza taide pouarrine Zouao Batista inanazoqque-manaporrari. Narraro uimape arrima narraro: Taidepa tamine Erodi poua imecote Piripicca amonerre Erodia icarriza uima torrarraro. Zouaopa poccadeni uima mittaza Erodiza uati tarrari: —Deocca zossenirrizape timecotecca amonerre tidirrizezape bica terrerani −nanarra narrari Zouao. Narraro uima Erodia mittezape Zouaoza boquerraro. Ponicca maqquiza zosse zosse neza tamine Erodipa pocca zozosse tabaqqui izossebaqquiza Zouao dama iquenazapa toponi cocoro tozimaza coro izimemanarrari. 5Nazapa tamine Erodipa Zouao Batista zoqqueuiuarrine touini naraha madirra noppinedeni cappinarrari. Arrana, madirradeni bazimapa: Zouao Batista attipa parrissa! Pouapa Deo Atti cacomerabote −quenarrari bazima.

6Naraha uada onihiza tamine Erodi poua tossonauicca uada bacco teza errete inanarraro. Erodia bedeni ssene ssene tozezape bazima qqui toquenarrari. Nazapa tamine Erodi ponicca ssenenirri bica tani qqui taza uatizezapa 7zouatoza poua attia: —Rrari rrata, ticca uatinarra ouaza uati tinarri. Nezape tiaza da onanitoui −narrari. —Parrissa! Tia ocamaiza-rrerarraro, ouattissa onanitoui −naui nade tamine Erodi. 8Nezape zouatocca ami attinipe: —Zouao Batista tatitoui uati tinarri −naza narrarossa inanarraro. Attinipe: —Ouaza Zouao Batista tati parato imehiza uittizeza da ticanarro −nani nade zouato attini.

9Nazapa Erodi poua bodi nacassera taraha poua atti taide: —Tia ocamaiza-rrerarraro, ouattissa onanitoui −nanarra napoza poua tessedeni: —Parrissehe uati tarrari −quenauiuarrine touini nazapa: —Rrehe, Zouao matto ca tirrizazapa paratoza poniza da ticanarro −narrari. 10Nazapa pocca zozosse toponi cocorouarri zosse inarrari. Nazapa tamine Erodi attiza Zouao matto ca irrizemanarrari. 11Nazama tati paratoza ettizaza zorro icazimanizapa zouatoza da icanarrari. Nezape zouato poni imeniza da icanarrari. 12Nazapa Zouaocca zozosse tabaqquideni assiretoui rrauirronaza zorro ininemanarrari. Nazapa ppa izemanarrari. Zotodepa: —Narraro uima Zesoza uati inana −quenaza Zesoza uatide rraui torrarrari.

Zeso madirra 5 mil quenarrarideni inarripabaqquirrari

Maraco 6.30-44; Roca 9.10-17; Zouao 6.1-14

13Zesopa —Zouao Batista zoqqueui −quenaui uima mittazapa poua motta madiuiuarrine madirra madide nouerauiuarri darroniza rrauirrarraro ia bazima. Naraha madirra bazimapa —Zeso toccaui −quenaui uima mittemanaza oza onihi onihi narizanicca madirra Zeso pouatoui coriza uapi rraui torrabacossarrari. (Zotoriniuarri rraui uarranirrari). 14Nazapa Zeso darroni uana tocaneza toqquemorarrari. Nanarra madirra pouatoui rraui torrarrarideni bacco toquenapoza domo uaui qqui inabaqquirrari. Nazapa pouadenitoui uati cauanari canazapa comaqquiri narrarideni inanomiriza-baqquirrari.

15Nazapa marri toccaza pocca zozosse tabaqqui iape Zesoza uati inade: —Arrauarripa madirra madide noueraui. Marri toccaui. Madirra zosse tinanibaqquirro, arrauarripa zamatapa mitta quenauiuarrine noueraui. Arra, ozacca zamatapa mittade rraui torranina −inade.

16Naraha Zesopa: —Rraui torraniuiuarrinepa poua! Arraza tiadeni tinarripabaqquimanarro −nade. 17Naraha iape: —Iazapa pao 5, aba pama naparra. Denima icappirani −inade. 18Nazapa Zeso attia: —Paparra! Narrari ouaza teccarronemanarro −narrari.

19Nazapa Zeso madirra bazimaza uati tarrari: —Nani mina carri taniza rrassi rrassi tineri narizarri −nade. Nazapa Zeso pao 5 naha inacca, aba pamaha izaba naza memeuarri tocattamacossa naza Deoza uati tarrari: —Rrehe, peperri. Ticca danirri iaza bica taui −narrari. Nazapa Zeso canauatori canarrarirrine pao, aba narrari touapiza icanabobirizazapa pocca zozosse tabaqqui iaza pao da inabaqquirrari. Iana madirra rrassi rrassi teri narrarideniza pao da inabaqquirizarraride. 20Da inabaqquirizaza rripemanazapa accararize-manarrari. Rripemanauissa taraha mota torrarrari. Pao bobi, aba ime mota inaccanirize-manazapa quiqui 12 nehe irririzarraro. 21Naza arra madirra rripemanarraridenipa maqquiderre 5 mil quenarrari. Denima poccadeni amonerre, poccadeni erredenideni naco rripemanarrari.

Zeso passo tetepi ccarronarraricca uima

Maraco 6.45-52; Zouao 6.16-21

22Nazapa canauatori canauicca pao rripemanaui nattipa Zeso pocca zozosse tabaqqui ia coriza rrippeuarri ia zosse tabaqquiporrari: —Rrari, darroniza rraui tirrezeza taide rrippeuarri rraui tirraporri, onarraro −nade. Naraha Zeso pouapa nauiza iboccarrari. Nazapa madirra bazimaza uati tarrari: —Peperri, bazima rraui tirranina −nade. 23Nazapa madirra rraui torraniuiuarrine uati taha rricazapa manaco poua motta ssonouarri denima toqquemorarrari, imehi Deoza uati tauiuarrine. Zeso poua motta naui ssonouarri Deoza uatide torraza cazomerrari. 24Neraha iape coriza nocconi ori ineraha rrorrode itezerrema ccarronezape passo rriba rriba narrarorrine darroni queuenacossarraro. 25Nazapa ssiuarraricosseza Zesopa qquezippaniza passo tetepiza iauarri ccamissarronaza ia bacco tamissabaqquirrari. 26Nazapa Zeso passo tetepi ccarronaui qqui inezape otessedeni tezerre uarro icanirede. Poua noppine icappinezape rroua rroua inade: —Tocorime uitiderra! −inarrarode ia bazima.

27Naraha iaza Zesopa: —Ticappinemana terrerarri, ouape oua! −nade.

28Nazapa Pedoro attia: —Oua Zozossede parrissa tiaqui? Parrissa tirrezape tiauarri passo tetepiza occaniuarrine ouaza uaua tarri, onarraro −narrari.

29Nazapa Pedoroza Zeso uaua narrari: —Rrehe, ticcarronarri −narrari. Naza Pedoropa darroniza uittizaraha totema, passoza toqquezippazapa Zesouarri passo tetepi toccarrari. 30Neraha rrorrode dacorarraro, oppina tani qqui taza Pedoro bodi cappinarrari. Cappinazapa passoza rraro zanarrari. Rraro zanazapa Zesotoui uaua narrari: —Oua! Oua! Oua Zozossede, oua tidimorarri! −narrari Pedoro.

31Naza Zesopa amazati Pedoro zepeza dama mari izanazapa uati tarrari: —Pedoro, ticca rrehenirri parrirenissa terrerarrarorrine rraro tizanarraroparri. Nerrecotoui ouaza: “Rrehe, Zesopa passo tetepiza occaniuarrine oua naparrireui” terrerarraro? −nade Zeso.

32Nazama darroniza uedezanizapa rrorrode totapparraro. 33Nani darroniza rrassi izeraha ia bazima ibodipe: —Zeso deni torraui, iape arrimani iquerrenani −ineza Zeso baccouarri ipitoza rrassi izezape pouaza uati inarraro: —Parrissa, tiape Deo Bedi tirrani −inarrarode, ia bazima.

Zenesareuarri Zesopa comaqquiri narrari inanomiriza-baqquirrari

Maraco 6.53-56

34Zotode coriza rrippeuarri iaqquerrizezape zama onini Zenesareuarri bacco inarraro. 35Nezape rrauirremoreza nauiuarri madimanarrarideni Zeso qqui toquenarrari. Nazapa —Zeso iaza bacco naui −quenaui uima torrarizezape comaqquiri narrarideni pouadeni tesse eheccarrona-baqquimana narraride. 36Nazama bazima Zesotoui dameraqquiri naza pouadeni attidenipa: —Zeso, oua tinanomirri! Ticca etero inidira bara onaniuarrine arriuarri ticcarronarri! −quequenanarrari. Nazapa pocca etero inidi bara quenarrarideni bazimapa tocanomirerizauissa tarrari.

Currently Selected:

Mateo 14: KBNT

Highlight

Copy