TOKSAKHAIH 1
1
1Palung ih Theofilas:
Ka cabu hmaloe koek thungah Jesuh mah toksak amtong tangsuek hoitoah van ah lak tahang ah oh karoekto#Luk 1:1-4
2a sak ihnawk hoi a patuk ihnawk boiboih to ka tarik boah. Van ah lak tahang ah oh ai nahlanah kawkpatoehnawk hanih ah a qoih ih kaminawk to Cai Pakhra tharahhaih hoiah 3A duek pacoeng ni quipalito thung anihcae khaeah vai paroeai amtueng moa a hing let tito oepvawthaih om aiah lam kalah zetpui hoiah amtuengsak. Anihcae mah angmah to a hnuk o moa anih mah Sithaw Poenghaih kawng to a thuih pae. 4Moa anihcae khaeah a oh nathuemah hi lokpaek hae a paek: “Jerusalem vang hae tacawt o tak hmah, to-e Pa mah amaih ih langrae kang thuih o ih to zing oah.#Luk 24:49 5Johan mah tui hoiah baptisma to a paek, to-e ani zetta thungah Cai Pakhra hoiah baptisma paek ah na om o tih,” tiah a naa.#Mat 3:11; Mrk 1:8; Luk 3:16; Jhn 1:33
Jesuh Van Ah Dawh
(Mrk 16:19-20; Luk 24:50-53)
6Kawkpatoehnawk loa Jesuh hoiah nawnto amkhueng o na-ah anihcae mah, “Angraeng, vaihiah hae maw Israel kaminawk hanah Poenghaih to na paek let han?” tiah a duengh o.
7Jesuh mah anihcae khaeah, “Atue hoi ani loa Pa angmah ih akaatawnhhaih hoiah khaeh ah o moa nangcae mah panoek han angaih ai. 8To-e nangcae nuiah Cai Pakhra ang phak na-ah loa tharahhaih hoiah na koi o ueloa Jerusalem ah, Judea hoi Samari prae boih ah, long taemtuer khoekto ah kai ih saksi ah na om o tih,” tiah a naa pae.#Mat 28:19; Mrk 16:15; Luk 24:47-48 9Hi lok thuih pacoengah a khet o nathuemah van ah lak ah oh, moa tamai mah a vingh khoep moa hnuh o thaih ai boah.
10Anihcae mah ka laem zawh to nilavan bangah khet o li nathuemah, laihaw kanglung kangkhuk kami longhnetto anihcae taengah angdoet pae phrat moa, 11“Galili kaminawk, tipongah maw van bang doeng lamhoi nangdoet o loa? Nangcae khae hoi-ih lak tahang ah kaom Jesuh hae, van bangah ka daw to na hnuk o batih toengah angzo let tih,” tiah a naa pae hoi.
Judas Zuengah Qoihhaih
(Mat 27:3-10)
12Topacoengah kawkpatoehnawk loa Oliv Mae hoitoah Jerusalem ah to amlaem o. Ato maesom loa Jerusalem hoitoah meng hapto thuemtham ni a oh. 13Anihcae loa Vangpui thungah akun o moa angmahcae toemhhaih ih akhaan ah to a dawh o tahang: Piter, Johan, Jaem hoi Andru, Filip hoi Thomas, Bartholomew hoi Mathai, Alfaias capa Jaem, acaeng palung kana Simon, hoi Jaem capa Judas cae ni.#Mat 10:2-4; Mrk 3:16-19; Luk 6:14-16 14Anihcae loa nongpuinawk hoi, Jesuh ih amno Meri hoi angmah ih amnauknawk hoi, abu ta-ah nawnto khophoeh hanah angqum o toepsoep.
15Ani zetta kra pacoengah taangcanawk acu o moa sungqum boih ah cumthawn pumto a oh; Piter loa angthawk moa, 16“Naukzanawk, Jesuh ka naehkungnawk zaehoikung Judas kawng David pakhaa ah Cai Pakhra mah thuihcoek ih Cabu kacai thungah tarik ih to acung han oh. 17Judas loa aicae ih tok thungah apa toeng hanah qoih ah oh pongah aicae ih kami thungah apa toeng,” tiah a naa.
18(Judas loa hmuen kahoih ai a sak ih hoiah a hnuk ih tangka hoiah lawk maeto a qanh, ato hmuenh ah amthaek moa a duek; zok to koih phawt moa takoh tazaenawk doeh tacawt boih.#Mat 27:3-8 19Ato kawng to Jerusalem vang ih kaom kaminawk boih mah a thaih o moa ato lawk to angmahcae lok hoiah ‘Akeldama’ tiah phui o; thuihkoehhaih loa “Athii Lawk,” tihaih ih ni.)
20Piter mah, “Kawmawtiah Saam cabu thungah,
‘Anih ih im to a kokkak ah om na soeloa,
mita mah doeh oh haih hmah na soe,’
tiah tarik ah oh. Topacoengah,
‘Anih ih tokhaih ahmuenh toah mi kalah longlongto mah angkhrum kroek na soe,’
tiah tarik ah oh bae.#Sam 69:25; 109:8
21“Totiah oh moa Jesuh angthawklethaih to panoek haih bomkung saksi ah oh hanah longlongto mah aicae hae angbong hanah angtoeng. 22Anih loa Johan mah baptisma#1:22 Johan mah baptisma kawng a thuih; tiaibaloaJohan mah baptisma a paek. kawng a thuih nahoiah kamtong Jesuh mah van ah ang caehtak ni karoekto, Angraeng Jesuh mah aicae hoiah kholong caeh amkaeh nathung boiboih aicae thungah ka thum toengah om tih,” tiah a ti.#Mat 3:16; Mrk 1:9; 16:19; Luk 3:21; 24:51
23Topongah kami longhnetto: Barabbas tiah kawk o ih Joseph (Justus tiah doeh naa pae o ih) hoi Matthias to tacawt haih o. 24Topacoengah anihcae mah, “Angraeng, nang loa mi boih ih palungthin dawnhaih to na panoek king, ahi longhnetto thungah amito maw na qoih tito amtuengsak ah; 25angmah a tok ih hmuenh ah caeh hanah ka tacawt tak Judas ih ahmuenh ah kawkpatoeh tok ka sah han-iah amnoeksak ah,” tiah khophoeh o. 26Topacoengah ato longhnetto thungah amito maw qoih han tito panoek han-iah qoihcung to a zuh o moa a qoih o ih loa Matthias ni; anih loa kawkpatoeh hahlaitonawk ih abu thungah akun.
Currently Selected:
TOKSAKHAIH 1: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
