JOHAN 21

Hnukbang Sarihto Khaeah Amtueng

1Ato pacoengah Jesuh loa a hnukbangnawk khaeah Tiberias Tuili ah vaito amtueng let bae. 2Simon Piter, Thomas (Caphae naa pae o ih), Nathanael (Galili prae Kana vang ih kami), Zebedi capa hnit hoi hnukbang kalah longhnetto loa nawnto ah oh o cu. 3Simon Piter mah kalahnawk khaeah, “Kai loa palok ka haengh han,” tiah a naa.#Luk 5:5

Anihcae mah, “Nang khaeah kangzoh o toengh han,” tiah a naa o. Topongah palong hoiah a caeh o, to-e ato qum puek loa tidoeh naeh o ai. 4Ni tacawt na-ah Jesuh loa tuitaeng ah to angdoet, to-e hnukbangnawk mah Jesuh ni tito panoek o ai. 5Tona-ah Jesuh mah anihcae khaeah, “Thendoengnawk, tita doeh na naeh o ai maw?” tiah a duengh.

Anihcae mah, “Tidoeh ka naeh o ai,” tiah a naa pae o.

6Anihcae khaeah, “Palok to palong bantang bangah haeng oah, na naeh o thoem tih,” tiah a naa. Topongah palok to haengh o moa tangaa zetpui aman pongtoah palok to zae o thaih ai.#Luk 5:6

7Jesuh mah palung ih hnukbang mah Piter khaeah, “Hi loa Angraeng ni!” tiah a naa. Piter mah Angraeng ni tito panoek na-ah laihawnui to kaeng angzaeng moa tui thungah longpung (kahni to angkhring roeh boah pongah). 8Hnukbang kalahnawk loa palong hoiah tuitaeng ah angzoh o moa tangaa ka koi palok to a zaeh o. Tuicing hoitoah hla parai ai, pe cumvaithum roekrak to ni a oh. 9Tuitaeng ah tacawt o na-ah toah hmai kamngaeh pongah tangaa pakhaem kok ih hoi takaw zetta to a hnuk o. 10Tona-ah Jesuh mah anihcae khaeah, “Na naeh o ih tangaa to na sinh oah,” tiah a naa.

11Simon Piter loa palong nuiah a dawh moa tangaa kalen puipui hoiah ka koi palok to tuitaeng ah a zaeh. Tangaa loa sungqum boih ah cumthawn quipangato pacoeng thumto a phak; totih khoekto a pop e palok loa angsik ai. 12Jesuh mah anihcae khaeah, “Angzo oloa caa oah,” tiah a naa. Hnukbangnawk thungah mimah doeh, “Ami nang maw?” tiah dueng o vam ai. Kawmawtiah Angraeng ni, tito panoek o. 13Topongah Jesuh loa a caeh moa anihcae to a paek; tangaa doeh a paek bae.

14A duekhaih hoitoah angthawklet pacoengah Jesuh mah a hnukbangnawk khaeah vaihi amtuenghaih ih hae avaih pathumhaih ih boah ni.

Jesuh hoi Piter

15A cak o pacoengah Jesuh mah Simon Piter khaeah, “Johan capa Simon, hicae mah kai ang palung ih pongdoeh nangmah nang palung kue maw?” tiah a duengh pae.

Anih mah, “Kang palung, Angraeng, kang palung tito na panoek,” tiah a pathim.

Jesuh mah, “Ka tuuca tanawk to khenzawn ah,” tiah a naa. 16A pahnit ah Jesuh mah, “Johan capa Simon, kai hae nang palung maw?” tiah a duengh let bae.

Anih mah, “Kang palung, Angraeng, kang palung tito na panoek,” tiah a pathim.

Jesuh mah, “Ka tuu khenzawn ah,” tiah a naa. 17A pathum ah Jesuh mah, “Johan capa Simon, kai nang palung maw?” tiah a duengh.

Jesuh mah vai thumto ah, nang palung maw, tiah a duengh pae pongah Piter loa paroeai palung a set moa, “Angraeng, nangmah cungriboih na panoek king, kang palung tito na panoek,” tiah a naa.

Jesuh mah anih khaeah, “Ka tuu hae khenzawn ah. 18Loktang ta-ah kang thuih: Na naukta na-ah loa coengcoe ah na oh moa na koeh ih naahmuenh ah doeh na caeh; to-e na mitong na-ah loa na ban to palam ueloa mi kalah longlongto mah na taoeng tih, na caeh koeh ai ih hmuenh ah to na caeh haih tih,” tiah a naa. 19(Hitiah a thuih na-ah hae Piter loa kawbatih duekhaih to maw tongh ueloa kawbatih to maw Sithaw khaeah lensawkhaih to a paek tih, tito amtuengsakhaih ih ni). Topacoengah Jesuh mah, “Ka hnukah baang ah,” tiah a naa.

Jesuh hoi A Hnukbang Kalah

20Piter loa angqoi moa ahnuk bangah Jesuh mah palung ih a hnukbang to a hnuk. Ato kami loa buh a cak o na-ah Jesuh khaeah ka hnai reet ah ka om moa, “Angraeng, amimah maw nang nuiah paipi alae tih?” tiah ka dueng to ni.#Jhn 13:25 21Piter mah ato kami to a hnuk na-ah Jesuh khaeah, “Angraeng, hi kami hae kawbangmaw om tih?” tiah a duengh.

22Jesuh mah anih khaeah, “Kangzoh khoekto ah anih to hinghsak hanah ka koeh nahaeloa nangmah kawmaw na naa tih loa? Nang loa kai hnukah na baang ah,” tiah a naa pae.

23Topongah ahi hnukbang loa dueh mak ai tiah Jesuh ih hnukbangnawk salak thungah lok to amthang. To-e Jesuh mah anih loa dueh mak ai tiah thui ai; a thuih ih loa, “Kangzoh let airoek anih to hinghsak han ka koeh nahaeloa nangmah kawmaw na naa tih loa?” tiah ni loa a thuih.

24Ahi hnukbang loa hi loknawk ka thuikung hoi ka tarikkung ah doeh a oh; moa a thuih ih to ahmaan tito ka panoek o.

Lokboenghaih

25Jesuh mah a sak ih hmuen kalah zetpui a oh vop. Tonawk boih to maeto pacoeng maeto tarik king nahaeloa tarik ih cabunawk to suek hanah longnui prae bum boih mataeng doeh angtawt tih tiah ka dawn.

Currently Selected:

JOHAN 21: AKNT2023

Highlight

Copy