LUKA 20

Akaatawnhhaih Kawng Lokduenghhaih

(Mat 21:23-27; Mrk 11:27-33)

1Nito loa Jesuh mah Tempal thungah patuk moa Tamthang Kahoih to a thuih na-ah qaihma kacoetanawk hoi Tawklok patukkungnawk loa kacoetanawk hoiah nawnto angzoh o moa, 2anih khaeah, “Na thuii ah, hi hmuennawk sak thaih hanah kawbatih akaa maw na tawnh? Amimah maw ahi akaatawnhhaih hae na paek,” tiah a duengh pae o.

3Jesuh mah anihcae khaeah, “Vaihi lok kang duengh o palaem toeng han. Na pathim oah. 4Johan mah baptisma paek thaih ih akaatawnhhaih hae Sithaw khae hoitoah kangzo maw, kami khae hoitoah kangzo maw?” tiah a duengh.

5Anihcae loa longto hoi longto, “Kawbangmaw thuih o han? ‘Sithaw khae hoi-ih,’ tiah ka naa o nahaeloa anih mah, ‘Totibaloa tipongmaw Johan to na taang o ai loa?’ tiah na naa tih. 6To-e ‘Kami khae hoi-ih,’ tiah ka naa o nahaeloa hiah kaom mipui boih mah hlung hoiah na vah o tih, kawmawtiah Johan loa tahma ni tiah a taang o boih,” tiah angmahcae salak thungah angaek o tuek. 7Topongah anihcae mah, “Naabanghoi ih maw a hak tito ka panoek o ai,” tiah a naa pae o.

8Topacoengah Jesuh mah, “Kaimah doeh ami ih akaa hoitoah maw hi hmuen hae ka sak tito kang thui o mak ai toeng,” tiah a naa pae.

Misur Takhaa Toksahkung Patahhaih

(Mat 21:33-46; Mrk 12:1-12)

9Topacoengah Jesuh mah ahi patahhaih hae mipui khaeah a thuih pae: “Vaito loa kami nongpa longto mah misur takhaa maeto a sak moa toksahkungnawk to a hlaisak moa kraa paraiah kholong ah a caehtak.#Isa 5:1 10Misur thaih to pakhrik tue phak na-ah toksahkungnawk khaeah angmah taham to laksak hanah angmah ih misong to patoeh. To-e toksahkungnawk mah misong to a boh o pasat moa ban kokkak ah amlaemsak o. 11Topongah misong kalah to a patoeh; to-e anih to doeh a boh o pasat, azat kaom ah sak o moa ban kokkak ah amlaemsak o let bae. 12Topacoengah a misong pathumhaih ih to a patoeh bae moa anih to doeh ahma to caaksak o moa takhaa poeng bangah vah o sut. 13Topacoengah loa takhaa tawnkung mah to, ‘Timaw ka sak han? Ka palung duek ih ka capa to ka patoeh; anih loa khangza o khaekhaeh tih,’ tiah a tih. 14To-e takhaa hlaikungnawk mah a hnuk o na-ah longto hoi longto, ‘Hi kami hae takhaa tawnkung ih capa ni. Hum o si, a hmuenmae boih loa aicae iah om tih,’ tiah a thuih o. 15Topongah takhaa laep bangah vah o moa hum o.

Jesuh mah, “Totiah oh pongah takhaa tawnkung mah takhaa hlaikungnawk nuiah timaw sah tih? 16Angmah to angzo ueloa ato kaminawk to hum tih, moa takhaa to loa mi kalahnawk to hlaisak tih,” tiah a naa pae.

Mipui mah ato lok to a thaih o na-ah, “Totiah om mak ai roeroe,” tiah a naa o.

17Jesuh loa anihcae to a khet moa, “Toti nahaeloa, Cabu Kacai thungah,

‘Im sahkungnawk mah avanglang ai tiah takhoe o sut ih hlung to,

hlungnawk boih thungah lokpui koek ah a coengh,’ tiah tarik ih to a thuihkoehhaih ih loa timaw?#Sam 118:22

18Ato hlung nuiah ka krah kami boih loa a boengh a tumh ah angkhaek tih; ato hlung mah krakthuih ih kami longlongto loa dip pueng tih,” tiah a naa.

Tamut Paekhaih Kawng Lokduenghhaih

(Mat 22:15-22; Mrk 12:13-17)

19Tawklok patukkungnawk hoi qaihma kacoetanawk Jesuh to naeh roep hanah a thuih o, kawmawtiah ato patahhaih ih loa anihcae a thuihkoehhaih ih ni tito a panoek o; to-e mipui to a zit o. 20Topongah atue kahoih to angang o. Thoemto kami to ta-un paek o moa oep-om parai kami batiah angsak o sak, moa Jesuh to akaatawnkung Rom acozah Ukkung angraeng ih sakthaihaih ban thungah paek thaih hanah lokduenghhaih hoiah a zaehaih ih to naeh hanah patoeh o. 21Ahi lamkawtnawk mah Jesuh khaeah, “Patukkung, na thuih ih hoi na patukhaih ih hae ahmaan tito kang panoek o. Ami doeh pahloehaih na tawn ai moa kaminawk hanah Sithaw koehhaih ih kawng loktang lok to ni loa na patuk tito doeh kang panoek o. 22Na thui ah, Rom Sangpahrang khaeah tamut paek hae aicae ih Tawklok mah paong maw, paong ai?” a duengh pae o.

23Jesuh mah anihcae ih laihahaih to panoek pae moa anihcae khaeah, 24“Maku phoisa to na patuek oah. A nuiah ami ih tungkraang hoi ahmin to maw ka om,” tiah a duengh.

Anihcae mah, “Rom Sangpahrang ih tungkraang hoi ahmin,” tiah pathim pae o.

25Topongah Jesuh mah, “Totibaloa Rom Sangpahrang ih to loa sangpahrang to paek oh; Sithaw ih to loa Sithaw to paek oh,” tiah a naa.

26Anihcae mah mipui hma-ah a zaehaih naeh hanah patoem ih to kawbang hoiah doeh naeh o thaih ai, topongah a vam o duem, a pathimhaih ih lok to a dawnrai o.

Angthawklethaih Kawng Lokduenghhaih

(Mat 22:23-33; Mrk 12:18-27)

27Topacoengah Sadusi kami thoemto, kami hae duekhaih hoitoah angthawklet mak ai tiah ka taangnawk to Jesuh khaeah angzoh o moa,#Tok 23:8 28“Patukkung, Mosi mah hitiah lokpaek ang tarik pae: ‘Kami nongpa longto to a caanawk tawn aiah a zu to dueh tak sut nahaeloa amnauk mah ato zuqawk to angoh haih ueloa a caanawk tawn hoi baloa kadueh ih caanawk ah om tih,’ tiah a tih.#Deut 25:5 29Vaito loa naukamza longsarihto a oh; amza kacoeh koek loa zu a lak moa a ca to tawn aiah a duek ving. 30Tona-ah apahnithaih amnauk mah ato zuqawk to amthawn haih moa ca sah aiah a duek tak bae. 31Moa apathumhaih amnauk to mah amthawn haih toengloeng moa a ca to tawn aiah a duek tak toengtoeng bae. Nauk-amza longsarihto boih mah ato nongpui to angoh o haih boih e caanawk tawn aiah a duek o king. 32Hnukkhuem aloa nongpui to doeh a duek toeng. 33Kami kaduenawk angthawklethaih ih ni aloa ami ih zu ah maw om tih? Longsarihto boih mah angoh o haih king bae,” tiah a duengh o.

34Jesuh mah anihcae khaeah, “Vaihi dung kaminawk loa nongpui hoi nongpa to zuva ah anglak angoh o, 35To-e duekhaih thung hoitoah kang thawklet hankoi nongpuinawk hoi nongpanawk loa kangzo hankoi hinghaih pongah zuva ah om o mak ai boah. 36Anihcae loa vanminawk batiah om o ueloa dueh o thaih mak ai boah. Duekhaih hoitoah angthawk o let boah pongtoah anihcae loa Sithaw ih caanawk ni. 37Kadueh kaminawk loa angthawklet tito Mosi mah kacaipin ah patueng. Thingsabu kangqong kawng thungah to Angraeng loa ‘Abraham ih Sithaw, Isaak ih Sithaw, hoi Jakob ih Sithaw,’ tiah a thuih.#Exo 3:6 38Anih loa kadueh kaminawk ih Sithaw na ai moa ka hing kaminawk ih Sithaw ni, kawmawtiah mi boiboih to angmah khaeah loa kahing kami ngai ni,” tiah a thuih.

39Tawklok patukkung thoemto mah, “Patukkung na lok pathim ih loa hoih parai!” tiah a naa o. 40Kawmawtiah anih to lok duengh hanah misaset o.

Messiah Kawng Lokduenghhaih

(Mat 22:41-46; Mrk 12:35-37)

41Jesuh mah anihcae khaeah, “Messiah loa David ih cadii ah om tih tito kawbangmaw na thuih o thaih? 42Kawmawtiah David angmah khaeh mah Sam cabu thungah,#Sam 110:1

‘Angraeng mah ka angraeng khaeah:

Hiah kai ih bantang bangah anghnu ah,

43Na misanawk to na khok hlimah khok cawhhaih hanah kang suek airoek loa,’ tiah a thuih.

44David mah, ‘Angraeng’ tiah a kawk baloa kawbangmaw Messiah loa David ih catawn ah om thaih tih?” a naa.

Tawklok Patukkungnawk Acoepaekhaih

(Mat 23:1-36; Mrk 12:38-40)

45Mi boiboih mah a lokthuih ih to tahngai o na-ah Jesuh mah a hnukbangnawk khaeah, 46“Tawklok patukkungnawk to acoe oah; anihcae loa laihaw kathuk puipui hoiah amkaeh to a koeh o moa vawnsai hmuenh ah khangzahaih hoiah lok apring to a koeh o; sinakok thungah anghnuthaih pahoeng pae roeh ih to a qoih o moa poi kungah anghnuthaih ahmuenh kahoih koek to a qoih o; 47lumhmai tamtaenawk ih hak hankoi to lak pae o moa imnawk khoekto a lomh pae o, to-e mi hma-ah loa sawk paraiah kho a phoeh o! Anihcae loa danpaekhaih kana aep to hak o tih,” tiah a naa.

Currently Selected:

LUKA 20: AKNT2023

Highlight

Copy