MATHAI 16
16
Dawnrai Hmuen Sak Han A Nguek O
(Mrk 8:11-13; Luk 12:54-56)
1Farasi hoi Sadusi thoemto loa Jesuh khaeah angzoh o moa, a zaehaih pakrong hanah koeh o pongah Sithaw mah patoeh ih kami ah na oh tito patueng hanah dawnraihaih to sah ah tiah a naa o.#Mat 12:38; Luk 11:16 2To-e Jesuh mah, “Duembang ni akun na-ah van tamai to thimdang nahaeloa kho hoih tih, na ti o. 3Akhawnbang ah loa, ‘Van ih tamai to thimdang moa amnum khrat nahaeloa kho angzo tih,’ na ti o. Van khethaih hoiah kho kahoih han hoi kho kangzo han to na thuih o thaih, to-e vai tahang tue amathaih hae loa na panoek o thaih ai! 4Vai tahang kaminawk loa kami kahoih ai hoi Sithaw tamu ka suem ai kaminawk ah na oh o! Nangcae mah dawnraihaih sak hanah nang pacae o, Ka sah mak ai. Nangcae hanah kang sak pae o hanih dawnraihaih loa Jonah ih dawnraihaih khueh ni a oh,” tiah a naa.#Mat 12:39; Luk 11:29
Totiah angthawk moa anihcae to a caehtak.
Farasi hoi Sadusinawk Ih Tae
(Mrk 8:14-21)
5A hnukbangnawk loa tuili hapbang yaeh ah angkat o na-ah takaw sinh han pahnet o ving. 6Jesuh mah anihcae khaeah, “Farasi kaminawk hoi Sadusinawk ih tae to acoe aha oah,” tiah a naa.#Luk 12:1
7Tona-ah angmahcae longto hoi longto, “Takaw sinh o ai pongah hitiah a thuih kalang mue,” a ti o.
8Jesuh loa anihcae mah thuih ih to panoek na-ah, “Takaw na tawn o ai lok to tipongmaw na thuih o tuek? Na taanghaih tamsi lawnlai! 9Vaihi khoekto doeh na thaihkop o ai vop maw? Kami sangpangato hanah takaw kae pangato ka aeh to na panoek o ai boah maw? Kamhlai to daengkraem nazetto maw pakuem o tito na panoek o vop maw?#Mat 14:17-21 10Topacoengah kami sangpalito hanah takaw kae sarihto ka pacah ih to na pahnet o boah maw? Kamhlai daengkraem nazetto maw na pakuem o to?#Mat 15:34-38 11Nangcae khaeah kang thuih hae buh kawng na ai ni tito tipongmaw na thaihkop o ai? Farasi hoi Sadusinawk ih tae to acoe aha oh,” a naa pae.
12Tona-ah a hnukbangnawk mah, acoe aha oh, tihae takaw pongah patoh ih tae na ai moa Farasi hoi Sadusinawk ih patukhaih ih to ni tiah a thaihkop o.
Piter Mah Jesuh Kawng Taphong
(Mrk 8:27-30; Luk 9:18-21)
13Jesuh loa Sisaria Filip vangpui taenghaek ah caeh o moa to hmuenh ah a hnukbangnawk khaeah, “Minawk mah Kami Capa hae amimaw a ti o?” tiah a duengh.
14Anihcae mah, “Thoemto mah Baptisma paekkung Johan ni a ti o, thoemto mah Elijah ni a ti o. Kalah thoemto mah Jeremiah tiaibaloa tahma longlongto ni,” tiah pathim pae o.#Mat 14:1-2; Mrk 6:14-15; Luk 9:7-8 15Jesuh mah, “Nangcae mah loa, Kai hae amimaw nang naa o?” tiah a duengh. 16Simon Piter mah, “Nang loa kahing Sithaw Capa Messiah ni” a naa pae.#Jhn 6:68-69
17Jesuh mah, “Johan capa Simon, taham kahoih kami ni! Kawmawtiah hi loktang lok hae kami khae hoitoah kangzo na ai ni, van ih kaom Pa mah nang khaeah paek ih ni. 18Topongah nang khaeah kang thuih, Piter: Nang loa lungsong ni, hi lungsong nuiah kaimah ih Khrihca kangkom ka padoet han, ato loa duekhaih mataeng doeh pazawk thaih mak ai. 19Van Poenghaih sawr#16:19 Sawr tihae Cabi tiah doeh thuih o. to nang khaeah kang paek han; long ah na pakaa ih loa van ah doeh pakaa ah om toeng tih, long ah na paong ih loa van ah doeh paong ah om toeng tih.”#Mat 18:18; Jhn 20:23
20Topacoengah Jesuh mah a hnukbangnawk khaeah angmah to Messiah ni tito mita khaeah doeh thuih han aiah lok a paek.
Patang Khanghaih hoi Duekhaih Han Kawng
(Mrk 8:31—9:1; Luk 9:22-27)
21To tue kazit hoiloa Jesuh mah a hnukbangnawk khaeah, “Jerusalem ah ka caeh ueloa kacoetanawk, qaihma kacoetanawk hoi Tawklok patukkungnawk khae hoitoah paroeai patang ka khang tih. Kai hae na hum o tih, to-e ni thumto pacoengah angthawksak let ah om tih,” tiah kamnoek ah a thuih pae. 22Piter mah Jesuh to kalah bangah a caeh haih moa lok hoi apring pae. “Angraeng, Sithaw mah pakaa khoep na soe. Tobatih to na nuiah natuek doeh pha hmah na soe,” tiah a naa pae.
23Jesuh loa angqoi moa Piter khaeah, “Setan, kai khae hoitoah caeh ving ah! Nang loa Ka caehhaih loklam pakhakung ni, kawmawtiah hi na dawnhaihnawk hae Sithaw khae hoi-ih kangzo na ai moa kami khae hoitoah kangzo ni,” tiah a naa pae.
24Topacoengah Jesuh mah a hnukbangnawk khaeah, “Ami doeh kai hnukah angzoh han ka koeh loa angmah hoi angmah to pahnet na soeloa kraws aput lamhoi bang na soe.#Mat 10:38; Luk 14:27 25Kawmawtiah ami doeh a hinghaih pahlong han ka koeh loa sung tih; to-e ami doeh kai hanih pongah a hinghaih lu ka vah loa a hinghaih to hnuh tih.#Mat 10:39; Luk 17:33; Jhn 12:25 26Kami longto mah longprae bum hae hamh qoek cadoeh a hinghaih to sung nahaeloa amraihaih tita doeh om tih maw? A hinghaih hak let hanah qanh thaih ih tidoeh om ai. 27Kawmawtiah Kami Capa loa Ampa ih lensawkhaih hoi angmah ih vanminawk hoiah angzo ngaepacae ueloa mi boih to a toksak ih taring ah kawnvang to paek tih.#Mat 25:31; Sam 62:12; Rom 2:6 28Loktang tang kang thuih o: Kami Capa mah sangpahrang batiah kangzo na hnuh o airoek loa ka dueh han ai kami thoemto hiah hae na oh o,” tiah a naa pae.
Currently Selected:
MATHAI 16: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
