ACT 11
11
Pyere ayambile ne batu babasiinge Sesu gu Serusalem
1Bakime ne baane ba tayi ba bagyetu ne ba babagele bababile gu Sudé bayulu re batu babasaandi Basifu ne yawu bamasiinge mabigu ma Nzambi. 2Ve tsoombuge Pyere gu Serusalem, baane ba tayi ba Basifu baseembe yandi. 3Bayambile yandi re: «Yitse nyingene gu mbuge batu babasegyeru ne yitseyi nawu!» 4Ne vane Pyere anyigule yawu mu mangike mangike navyoge maambu mootsu. Ayambile yawu re: 5«Mabile gu divule di Safa. Ve saambilenge me, malabe yivivulu. Malabe yivaave gisundenge tselu yibile me: yivaave gibagunu tsaande yinene yi tuungu kodu tsyotsu tsiyine, gi sundenge nguu ne gubile me. 6Mamonigenge ne iswiisu ne malabe minoongu minoongu mi banyame: bane ne minyonyi, bane ne bakagele, ne bane ne batsale. 7Ne vane mayulu duufi diyambilenge me re: “Pyere, savagi! Boke banyame tsitsi ne yange tsyo!” 8Te mayagule re: “Eé gusaandi, Fumu! Yiguyi nisi gimoosi gi mugyele vo gi nzoruru gisamenyingene gu mune wami.” 9Duufi dibekoonde wuyulunu mu di mubeyi gu yulu re: “Bi reetse Nzambi yiyamonige byo re biyi nzoruru.” 10Dyo diyulunu nyoongu yireru, kere vane byootsu bigabugu gu yulu. 11Vane ne vane batu bareru batsoombugu gu ndagu yibilenge yetu. Basindugu gu Sesaré gu yitseboonge me. 12Dinyunyi Disuungeme diyambile me re: “Yendenge nawu guga gagene.” Baane ba tayi basamunu batsitse nami, bayende yiloonge nami gu Sesaré re dinyingene gu ndagu Korneye. 13Korneye anyigule yetu maambu maame: “Malabe kime yi yulu gu ndagwami. Yiyambile me re: Sindige batu gu Safa bayitsi ne Simu nge wutsitsu re Pyere. 14Aguyambile yu maambu ma Nzambi makeyobule ne yu ne mbubyagu.” 15Ve baande me wuyambile, Dinyunyi Disuungeme disunde mu yawu nave sunde dyo mu yetu ve dibaandu. 16Mabangule maambu mayambile Fumu re: “Sa abatise ne maambe. Te yenu digubatusu ne Dinyunyi Disuungeme.” 17Nzambi aveege ne yawu nzolwene munoongu wumoosi nave yandi aveege yetu ve disiinge Fumu Sesu Wusoolu ne Nzambi: mande nyi mu wukate bapage ne Nzambi?» 18Ve mane yawu wuyulu maambu mene, basebebile ne mukalu te bakumisenge Nzambi. Bayambilenge re: «Kagu nde nungyenze Nzambi asiinge re babasaandi Basifu bakalusi bitsagilitsi byawu mu wudile monyu wungyenze.»
Dibuundu di Antyose
19Batu bapanzige tselu ne tselu, mumbare batsogusungu ve yulu difu di Ityene. Bane ve ganegarawu bayende nguu ne gu museengi wu Fenisi, gu niingi yi Sipre ne gu divule di Antyose. Te yawu baloonze musamu wu Nzambi ke gu Basifu piinze. 20Nane bane batu ve ganegarawu baburugu gu Sipre ne gu divule di Sirene, bayende gu Antyose guloonze Musamu Wumunyi wu Fumu Sesu keke gu batu babasaandi Basifu. 21Ngudi yi Fumu yibile nawu, re dibaandu dikabu didinene di batu divage gitu ne disiinge Fumu. 22Batu ba dibuundu di Serusalem bayulu dyo, ne vane basindige Barnabase gu Antyose. 23Ve tsoombugu yandi, alabe nave Nzambi aveege mwile gu batu babasiinge Fumu. Alabe wunyi wumbili ne agwaarise yawu mulaande Fumu ne murime wawu wotsu. 24Ne vane Barnabase abile mutu wumunyi, wubasu ne Dinyunyi Disuungeme ne gitu. Nzoku batu batargene ne Fumu.
25Ve yulu vane, Barnabase ayende gubene Sol gu divule di Tarse. 26Ve dagise yandi Sol, abege yandi gu Antyose. Yawu bootsu babeyi bavyose yilime gi fwiimbe gu dibuundu dyene. Baloonze mbili batu. Gu Antyose re gubaande tsitsu dimareege balaanditsi re, bakeriti. 27Mu dikyesi dyene, babigitsi baburugu gu Serusalem mu wuyende gu Antyose. 28Wumoosi ve ganegarawu dine dyandi Agabus, abige mu ngudi Dinyunyi Disuungeme re, ne mapape gu buloongu bwotsu, gugubile nzale yinene. Nzalene yiruge time mu dikyesi dibile Kolode yivuunde gi ginene gi bisi Rome. 29Kere vane balaanditsi badile disuge didi: mutu mutu aguveege nzi yikeroonde yandi mu wuyamune baane ba tayi babakatsageli gu Sudé. 30Nane re navage yawu. Basindige manzolu madile yawu gu bivuunde bi dibuundu di Sudé mu makake ma Barnabase ne Sol.
Currently Selected:
ACT 11: SNQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
