ACT 13
13
Barnabase ne Sol basoolu ne Dinyunyi Disuungeme
1Gu dibuundu di Antyose gu Siri, gubile babigitsi ne miloonzi: Barnabase, Simeo wutsitsungu re Wupiinde, Lisyus mwisi Sirene, Manayene mbaatsi yi bungyebe yi Irode Atipase wukumenge gu Galilé, ne Sol. 2Wisi wumoosi, ve saambilenge yawu ne wunumine kugi, ne vane, Dinyunyi Disuungeme diyambile yawu re: «Kungiganu Barnabase ne Sol mu wuvage yisalu gi makeveege yawu mu wuvage.» 3Ve yulu wugwaarile nzale ne wusaambile, basunzile Barnabase ne Pol makake ne bayenze yawu.
Barnabase ne Sol gu Sipre
4Barnabase ne Sol, ve sindugu yawu ne Dinyunyi Disuungeme mu wuvage yisalu gi Nzambi, basunde gu Selesi, bapeke mu dibatu muyende gu Sipre. 5Ve pule yawu gu Salamine, baloonze musamu wu Nzambi mu bandagu tsi masaambulu tsi Basifu. Sa Mark abile muyamunitsi wawu. 6Basabugu niingi yotsu nguu ne gu Pafos. Vane badagise Musifu dine dyandi Bar Sesu, wubile ngaange misoku ne mubigitsi wu wufure. 7Atsagelenge ve mbare Sergyuse Poluse yivuunde gi niingi, dibagele dibile ne buyedi. Yandi re wutsitsise Barnabase ne Sol, mumbare abene wuyulu musamu wu Nzambi. 8Te Elimase ngaange misoku aginzeme ve pwasawu mumbare aseroonde re Sergyuse Poluse asiingi mabigu ma Nzambi. Bisi diloongu di greke batsitsenge Bar Sesu re Elimase. 9Ne vane, Sol wukatsitsu keke re Pol#13.9 Pol bile dine di Sol gu diloongu bisi Rome. , wubasu ne Dinyunyi Disuungeme, amonige Elimase iswiisu, 10ne ayambile yandi re: «Nyanyi yifutsi gi, yikadungimisi batu bootsu, mwaane mukolitsi, yisakaroondi maambu mootsu mamanyi! Diroonde di Fumu diyi disuungeme te yu yigonerekige dyo! Yisakesiisa! 11Ne mapape, yulu: Fumu agukilise yu, yigubile ne pafu ne yisakebelabe yiveele gi nyangu mu ma dikyesi.» Vane ne vane, miisu ma Elimase matsime ne abile keke gu diviseme: apaperenenge keke tselu tsyotsu mu bene mutu wumuyenze. 12Ve labe Yivuunde Sergyuse Poluse dyaambu divyoge, asiinge Nzambi, agibeme mu musamu wu Fumu wuyulu yandi.
Pol ne Barnabase gu Antyose gu tseengi yi Pisidi
13Pol yane bambaatsi baandi bapeke mu dibatu gu Pafos muyende gu Persé gu tseengi yi Panfili. Vane re ve yagene Sa Mark nawu ne agabuge gu Serusalem. 14Baburuge gu Persé mu tsi ne bapule gu Antyose gu tseengi yi Pisidi. Wisi wukaloogu, banyingene gu ndagu disaambulu yi Basifu ne batsagele. 15Ve yulu wumane wurange migaande mi migage ne mi babigitsi, bivuunde bi ndagu disaambulu bayambile Pol ne Barnabase re: «Baane ba tayi, yenu ga dine dibigu di wugwaarise piti, sa yambilyanu.»
16Pol ateleme, asiimbule googu ne ayambile re: «Batu ba Israel ne yenu bamosi badine kyere Nzambi, yulwanu! 17Nzambi yi yitsuku gi Israel, asoole mikoku myetu ne afunise yitsuku gyene ve bile gyo gu bumweenyi gu Isipte, kere vane avatise gyo ne ngudyandi. 18Akyele yawu mu magumi mamane ma bilime gu kumu. 19Ve yulu vane agudise bitsuku tsaambu gu tseengi yi Kanaan ne aveege batseengi bene ga mukwanyi gu yitsuku gyetu. 20Maambu mene matsinge bebele ne kame tsiyine ne magumi maraanu ma bilime. Ve yulu vane, Nzambi aveege bivovi gu bakaage betu nguu ne mu dikyesi di mubigitsi Samyele. 21Kere vane batombe maate, ne Nzambi aveege yawu Sawule, mwaane wu Kise, gu mbubi yi Besamin, wukume mu magumi mamane mabilime. 22Ve burulu Sawule ve dinyaange, Nzambi aveege yawu David ga maate. Ayambile mu yandi re: “Matsedagise David mwaane Isayi: mutu wene akewuyelimine mu ditaase dyami, aguvage mootsu makeroonde me.” 23Gu dibure di David Nzambi asoole mutu wu wuyobule yitsuku gi Israel, nave gane yandi; mutu wene re Sesu. 24Sesu ne gineneruge, Sa aloonzenge musamu wulubuse batu ba Israel mu wukaluse bitsagilitsi byawu ne mu wubatusu. 25Ve mane Sa yisalu gyandi ayambile re: “Yenu dikataasi nde re, mande nyi? Masaandi wu yenu digonevingile. Te yulwanu: Agwitse ve yulwami, te masaandi nisi nguu mu wuburule mataambi mu byoru byandi.”
26Baane ba tayi, yenu dibure di Abaraam ne yenu bamosi badine kyere Nzambi, musamu wuyobulu wuwu wusindugu nde gu manenu. 27Re mu dyo, bisi Serusalem ne bivuunde byawu baseyabe wuyi Sesu, ne baseyulu bandoongi tsi babigitsi tsikarangu bawisi bootsu bakaloogu. Te ve veege yawu Sesu mbele, mabigu ma babigitsi masupugu. 28Nisi nasedile yawu polugulu yiwuveege yandi mbele yi difu, baleende Pilate re abokisi yandi. 29Ve mane yawu wusuupule maambu mootsu mateendu mu yandi, basundise yandi mu kurusu ne basunze yandi gu ngile. 30Te Nzambi afwangule yandi ve ganegare bafuumbi. 31Mu mbili batsufu, Sesu atutugile yawu babakingenge naandi baande gu Galilé nguu ne gu Serusalem; yawu bane re babake bimweenyi byandi ne munyi ve wusu yitsuku gi Israel. 32Yetu bene digonebagile yenu musamu wene wu munyi: wuganile Nzambi mikoku myetu. 33Asupule dyo mu yetu, baane bawu, nufwangule Sesu. Nave teendu dyo mu mugaande wu miimbu gu yibuku gi mubeyi re:
“Yire mwaanami wu dibagele,
ne munyi, mare tayagu.#13.33 Mugaande wu miimbu 2.7.”
34Nzambi ayambile re afwangule yandi ve ganegare babafu mure akere begabugu gubole gu ngile. A yambile re:
“Maguveege yenu myule miminyi ne mi ngyenze miganile me David.#13.34 Isayi 55.3.”
35Re disine dirungule wurange gu mbure yimosi re:
“Yisakesiingise re me musalitsi wagu maboli gu ngile.#13.35 Mugaande wu miimbu 16.10.”
36David, adyanze mu dikyesi dyandi naroonde Nzambi; ve yulu vane afu, averu ve mbare mikoku myandi ne nyurwandi yibole gu ngile. 37Te wufwangulu gu difu ne Nzambi, nyurwandi yisebole gu ngile. 38Baane ba tayi kagu yabanu re: mu Sesu, yenu diloonzu mu dyaambu diwusiingulu kokolu yi mabi. Kokolwene, yiserungule wudile yenu mu mugage wu Muyise. 39Mu yandi, wotsu wukevage gitu aguluunzu. 40Kagu, diraambile, mure maambu mateende babigitsi makererugile yenu:
41“Moniganu, batu bange dileenze,
bilanu digibe ne tsyemuganu!
Mumbare vaki yenu monyu maguvage dyaambu
disaketaase re diyi nungyenze, nisi mutu atsenyigule yenu dyo.”»
42Ve vate Pol ne Barnabase gu ndagu disaambulu, batu baleende yawu mu wugabuge tsonu yi nzime gubeyambile yawu ke maambu ma musamu wene. 43Ve mane yawu yibeengunu, nzoku Basifu ne batu bamosi babasiinge wusaambile Nzambi Basifu balaande Pol ne Barnabase. Yawu bayambilenge nawu, bagwaarisenge yawu mu wukyelenge gitu gyawu ke mu Nzambi.
Pol ne Barnabase bagyelugu tselu yi babasaandi Basifu
44Tsonu yinzime mu wisi wukaloogu, gootsu batu bootsu ba divule babeengunu muyulu musamu wu Fumu. 45Ve labe Basifu pityene, babase ne ngusu; bakate page mu maambu mayambilenge Pol, ne baseenge yandi. 46Vane Pol ne Barnabase bayambile guga wome re: «Musamu wu Nzambi mbe wuloonzu mareege nde yenu. Te yenu digonebuse wo, kagu yenu digonesalugu re, disakedile monyu wu mubu ne mubu mu wutsagele ne Nzambi! Re disine yetu diguyende keke gu mbuge babasaandi Basifu. 47Labanu marumu yetu ne Fumu:
“Matsesoole yu mu wubile ga yiveele gi bitsuku
mure yikeloonzenge nguu ne guduke buloongu re Nzambi akayobuli.”#13.47 Isayi 49.6.»
48Ve yulu babasaandi Basifu mabigu mene, balabe wunyi. Bagitse Fumu mu maambu mandi. Bootsu babasoolu ne Nzambi mu wutsagele mubu naandi, basiinge Sesu. 49Musamu wu Fumu wudugulu museengi wene wotsu. 50Te Basifu basive bagyetu ba bikiti babasaambilenge#13.50 Nzambi Basifu ne bivuunde bi divule. Batumbise dimbunge mu Pol ne Barnabase, ne bapunze yawu mu museengi wawu. 51Babagele babeyi bakuremuse difufundu di mataambi mawu ne bayende gu Ikonyume. 52Nane, balaanditsi ba Sesu gu Antyose babile babase ne yinyunge, ne Dinyunyi Disuungeme.
Currently Selected:
ACT 13: SNQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
