ACT 19
19
Pol gu Ifese
1Ve bile Apolos gu Korinte, Pol avyoge nzile mikoongu mi museengi wu Asi ne apule gu Ifese. Vane, adagise ma dikabu di balaanditsi, 2atombe yawu re: «Yenu didile Dinyunyi Disuungeme ve siinge yenu Fumwa?» Bayagule yandi re: «Yetu disamayulu nisi re guyi Dinyunyi Disuungeme.» 3Pol atombe yawu re: «Bateme yidile yenu nde yi nyi?» Bayagule re: «Nde bateme yi Sa.» 4Ne vane, Pol ayambile yawu re: «Sa abatisenge nde yawu babasiinge wukalule bitsagilitsi, ne ayambilenge batu mu wubile ne gitu mu mutu wukeruge ve nzimandi, divindugulu re, mu Sesu.» 5Ve yulu mabigu mene, yawu babatusu mu dine di Fumu Sesu. 6Pol asunzile yawu makake mu yulu myuru ne badile Dinyunyi Disuungeme. Ne vane babaande wuyambile maloongu mamosi ne babigenge. 7Yawu babile gootsu digumi ne batu babeyi. 8Kere vane Pol ayende gu ndagu Basifu yi disaambulu; guune, ayambilenge guga wome. Mu migweli mireru, aloonzenge mu dyaambu di Bufumu bu Nzambi, abene masuge mootsu re batu basiingi maloonzenge yandi. 9Te ma dikabu di batu diseroonde wuyulu, dibuse wusiinge ne didetenge ve wusu piti bootsu babalaande nzile Fumu. Pol ayagene nawu ne ayende ne bayikitsi, re wisi wotsu aloonzenge yawu gu dikoole di mutu wulugu re Tiranose. 10Dyo ditsiinge bilime bibeyi mure bootsu babatsagelenge gu museengi wu Asi, Basifu ne babasaandi Basifu, barunguli wuyulu musamu wu Fumu.
Baane ba Seva
11Nzambi aveege Pol dinyaange di wuvage bimwiile bi biviinge. 12Nisi va sunzungu bidwaari konane miswaari mi bembulunu ne nyuru Pol mu babeetsi, yawu babeelugu ne manyunyi mamabi mavate. 13Gubile dikabu di Basifu diyende kane kane, diyelige wupunze manyunyi mabive ne wutubenge dine di Fumu Sesu. Bayambilenge re: «Marume yenu mu dine di Seswene yikaloonzi Pol, vatanu!» 14Babavagenge mane bile re baane ba tsaambu ba Seva, dibagele di Musifu, yivuunde gi baveegitsi ba malagu. 15Te wisi wumoosi, dinyunyi di bive diyagule yawu re: «Mayatsi Sesu, ne mayatsi wuyi Pol. Te yenu nde banyi?» 16Kere mutu wubile ne dinyunyi di bive agaange yawu mumbare avyogilile yawu bootsu myaangu. Atsogise yawu, ne bavate gu ndagu bambaangu, mynyange, ne bapure. 17Bisi Ifese bootsu, Basifu ne babasaandi Basifu, bayulu dyaambu dyene. Kyere Nzambi yidugulu yawu bootsu ne bayambile re: «Dine di Fumu Sesu diyi didinene!» 18Mbili batu babasiinge Fumu, baruge mu wutube mabi mawu muufi gu yulu ve wusu piti. 19Dikabu didinene di batu bababile ne mavaande, babage migaande myawu mi mavaande mu wuyoke ve wusu piti. Ditalu di badole disuumbu migaande myene, bile bebele ne digumi di toseni di bangyengi. 20Nane re natsamugu musamu wu Fumu, ne ngudi yotsu.
Dimbunge didinene gu Ifese
21Ve vyoge maambu mene, Pol akate munyalu wuyende gu Serusalem, te aroonde wuvyoge kinde gu miseengi mi Masedwane ne Akayi. Ayambile re: «Va yulu wuburugu gu Serusalem, bweedi mareyende gaandi ne gu Rome.» 22Asindige babeyi va pwase bayamunitsi baandi gu Masedwane, bile re Timuti ne Eraste, te yabene asaale ma pesu dikyesi gu Asi. 23Mu dikyesi dyene gubile dimbunge didinene, mu dyaambu di nzile Fumu. 24Demetruse mutulitsi akuunzenge ne badole, bandagu tsitsikyeki tsibagunu ndagu yi yinene yi nzambyawu Artemis, ne afutenge badyanzitsi baandi mbili badole. 25Adugise badyanzitsi ne bootsu babakadili monyu mu yisalu gyene. Ayambile yawu re: «Bambaatsi bami, yenu diyatsi re manenu digonedile monyu wumunyi re mu yisalu gigi. 26Te Pol agoneyambile re, banzambi bakuunzu ne batu sa banzambi. Mbili batu sake gu Ifese piinze, te nde ne ba gu museengi wotsu wu Asi bayulu yandi. Yenu ditseyulu bayambile mane mootsu ne yenu ditselabe. 27Sake yisalu gyetu gyo piinze gigukusugu wutsyemugu, te nde ne ndagu malagu yi Artemis yisakebeyulunu. Basakebeyambile re: “Artemis nde nzambi yiyinene!”, nane batu bootsu bakabondimini yandi gu museengi wu Asi ne mu mutambe wotsu.» 28Ve yulu batu mabigu mene, babase ne kabu, babwamugungu: «Nde nzambi yiyinene, Artemis yi Ifese!» 29Dimbunge didugulu divule dyotsu, batu bootsu bakuunge gu mbure yiyinene yikavagu bingane. Badutumune Gayuse ne Aristarke, bootsu babeyi bisi Masedwane bambaatsi ba minyalu ba Pol. 30Pol aroonde wulabene ve wusu piti te bayikitsi basesiingise yandi. 31Ma dikabu di minduumbe migobe mi museengi wu Asi, bile bambaatsi ba Pol. Ne yawu gaandi basindigile yandi batu mu wuveege yandi ndoongyene re: «Yiyayende gu mbure yi yinene yikavagu bingane!» 32Mu dikyesi dyene, gubile mbili divuve ne dimbunge gugare piti. Bane batu babwamugenge mu dibigu di siimbe, bane mu dibigu di bukayi ne nzoku batu baseyabenge nisi disine di dugesene yawu. 33Basifu basindige mutu wulugu re Alekesande gu muloonge mareege ne bane batu banyigule yandi maambu mavyogenge. Ne vane Alekesande asiimbule dikake, abenenge wuyambile ne piti. 34Te veyabe yawu re Alekesande nde Musifu, bootsu babwamugu ne duufi dimoosi, bebele ne magwere mabeyi: «Nde nzambi yiyinene, Artemis yi Ifese!»
35Ve disukusulu, yivuunde gi divule arungule wulelimise piti, ne ayambile re: «Bisi Ifese, batu bootsu bayatsi re divule di Ifese re dikakyeli ndagu yi yivuunde Artemis ne dimanyi dyandi disunde gu yulu. 36Gusaandi mutu wukerungule wugigule. Kagu lelemanu, diyavage maambu mbaangu mbaangu. 37Yenu ditsebage batu babe gunu, te basavage dyaambu dibive mu ndagu nzambi ne gaandi basaseenge nzambyetu. 38Ga Demetruse ne badyanzitsi baandi bagoneroonde wufurigile mutu dyaambu, guyi bivovi, ne guyi batsufu tsikabili ndagu misaambu mwaasi. Kagu bayendi gu bivovi! 39Te ga yenu dine dyaambu dimosi di wutombe, dike labe mane vakebeengunu bivuunde bisoolu mu wukyele divule. 40Ga dibilenge kevave diguveegu mbele mu dimbunge ditsevyoge nemunyi, mumbare gusaandi disine dingyenze dikesupule yetu dibaandu ditseduge piti yiyi.» 41Ve mane wuyambile yivunde gi divule, ayenze piti.
Currently Selected:
ACT 19: SNQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
