ACT 2
2
Mwiitsu wu Dinyunyi Disuungeme
1Ve pule wisi wu diyayi dikatsitsu re Pentekote, batu babasiinge Sesu babeengunu bootsu mbure moosi. 2Vane ne vane, bayulu nduunze yiruge gu yulu ga nakayitsi mukunge. Divuge dibase ndagu yotsu yibila yawu matsagele. 3Ne vane, balabe malimi matutugenge ga miludi mi mbaawu, malimi mene matategane. Kere dimoosi dimoosi ditareme ve yulu muru mutu mutu. 4Dinyunyi Disuungeme dibase yawu bootsu. Kere vane bayambila maloongu mamosi na yenzwa yawu ne Dinyunyi muyambile.
5Mu dikyesi dyene gubile gu Serusalem Basifu babagobisa Nzambi, baruge gu batseengi bootsu babuloongu. 6Ve yulu Basifu nduunzene, baruge tsoombu ne tsoombu re piti yinene yiduge. Bavure wugibeme mumbare mutu mutu ayulungu mayambila yawu gu diloongu dyandi. 7Bakambulu ne batsapulu, bayambile re: «Batu babagoneyambile babe bootsu ke bisi Galilé? 8Dyove digoneyendigile nde tsenyi ve digoneyulu magoneyambile mutu mutu gu diloongu dyetu? 9Ve ganegaretu bane baburugu gu Partes, ne gu Medes ne gu Elam. Bamosi nde bisi Mesopotami ne Sudé ne Kapados ne Pon ne museengi wu Asi, 10bane bisi Frigi ne Panfili ne Isipte ne museengi wu Sirene gu Libi, bane baruge gu Rome, 11ne gu Krete ne Arabi. Bane baburu Basifu, bamosi basiinge Nzambi Basifu. Te digoneyulu nagoneyambile yawu maambu ma manene ma vage Nzambi gu maloongu metu.» 12Bootsu bavure wugibeme ne batsapulu. Babeyambila yawu ne yawu re: «A didi nde gi?» 13Te bamosi badetenge baane ba Nzambi re: «Bande mu malaangi!»
Mbomu yi Pyere
14Kere vane Pyere ateleme yane digumi ne kime moosi; ayambile pepe gu piti re: «Baane ba tate ne yenu bootsu badigonepake gu Serusalem, kuunzanu wuyulu maambu mami ne kuunzanu wudibule maru muyulu magonevyoge. 15Batu babe basaga mu malaangi na gonetaase yenu mumbare dikike yipali. 16Te vave mabigu mayambile mubigitsi Sowel mamasupugu. Mabigu mene re mame:
17“Nzambi yare: Labanu maambu makitse mu bawisi bamasukise:
Magubase batu bootsu ne Dinyunyi dyami.
Baane benu bababagele ne babagyetu bagubile babigitsi.
Maguyambile ne bivivulu gu munzambu wenu,
ne bandoosi gu binunu byenu.
18Nungyenze, magubase basalitsi bami babagyetu ne bababagele ne Dinyunyi dyami, mu bawisi bene bagubile babigitsi.
19Magulabise maambu ma biviinge gu yulu
ne biliimbe bi bimwiile gu tsi:
Gugubile maluungu ne mbaawu ne bipume bi nzumbili,
20dyumbi digukalugu diviseme ne tsuungi yigubile yibeenge ga maluungu,
wisi wumunene wu bunduumbe bu Fumu neginene ruge.
21Ne vane, wotsu wuketsitse dine di Fumu, aguyobulu.”#2.21 Soel 3.1-5
22Batu ba Israel, yulwanu dimekeyambile yenu: Nzambi aritsige yenu ne veele re Sesu mwisi Nasarete bile mutu wusindige yabene. Mumbare yabene Nzambi re wuveege Sesu dinyaange diwuvage bimwiile ne biliimbe ne maambu ma biviinge ve ganegarenu, na yatsi yenu bene. 23Mutu wene ayakusu mu makake menu. Nzambi amaneyabe dyo re aswekige. Yenu dibokise yandi nugominise yandi ve kurusu ne batu babaseyabenge Nzambi. 24Te Nzambi afwangule yandi, ayobule yandi mu maguge ma difu mumbare difu disebile ne ngudi yi wukyele Sesu. 25Ne vane, David ayambile mu dyaambu di Sesu re:
“Malabenge Fumu batsufu tsyotsu va wuswami,
ayi ve mbarami mure makere berugu.
26Re mu dyo murime wami wugonelabe wunyi,
ne mune wami wugoneyimbe ne yinyunge,
ne nyurwami yobene yigulooge gugare gitu.
27Mumbare, Fumu, yisakesambule me gu buloongu bu babafu,
yisakesiingise re me musalitsi wagu maboli gu ngile.
28Yitseritsige me banzile bamonyu.
Ve mbaragu yigubase me ne yinyunge.”#2.28 Mugaande wu Miimbu 16.8-11
29Baane ba maame, siingisanu me muyambile nenu ne veele mu dyaambu di yibuutu David: afu, averu, ne ngilandi yikike vane nguu ne nemunyi gu mbugetu. 30Te abile mubigitsi ne ayabenge re Nzambi aganile yandi re ndalulandi moosi agukitigile yandi ga maate. 31David ayabenge makitse gu wusu kagu ayambile mu bufwangugulu bu Wusoolu ne Nzambi, ve yambile yandi re: “Asesaambulu gu buloongu bu babafu, ne manyuru mandi masebole gu ngile.”
32Nzambi araambuse gu difu Seswene yigoneyambile me, ne manenu bootsu diyi bimweenyi. 33Amakusu ve mabagele ma Nzambi, aveegu ne Tayandi Dinyunyi Disuungeme digane yandi, di yandi agabile manenu. Mo re magonelabe yenu ne magoneyulu yenu vave. 34Te David asemake yabene gu yulu, te ayambile re:
“Fumu Nzambi ayambile Fumwami re:
tsitsageli ve mabagele mami,
35magusunze bakolitsi bagu gu tsi mataambi magu.” #2.35 Mugaande wu Miimbu 110.1
36Batu bootsu ba Israel bayabi dyo bweedi: Seswene yitsegomine yenu ve kurusu, Nzambi asoole yandi mubile Muyobulitsi ne Fumu!»
37Maambu mayulu bababile vane, malabise yawu page. Batombe Pyere ne bakime bamosi re: «Baane ba maame, divagyanu nde tsenyi?» 38Pyere ayagule yawu re: «Kalulanu bitsagilitsi byenu kere mutu mutu abatusu mu dine di Sesu Wusoolu ne Nzambi, mure mabi menu makesiingulu kokolu. Kere vane yenu dikedile Dinyunyi Disuungeme. 39Re dibaandu Nzambi aveege ndagi gu yenu ne gu baane benu kere ne gu batu babagonepake gu vale, ne bootsu baketsitsu ne Fumu Nzambyetu.»
40Pyere abekoonde yambile yawu mabigu mamosi mukaluse mirime myawu ne mugwaarise yawu, avage re: «Siinganu wuyobulu. Yagenanu ne batu bababi.» 41Mbili batu va ganegarawu basiinge maambu mayambila Pyere ne yawu babatusu. Wisi wene, toseni yireru tsi batu baputegane gu ditalu di babaregile wusiinge Fumu.
Bitsagilitsi bi babaregile wusiinge Fumu
42Ne ikodi, bootsu bayulungu maambu maloonzwa yawu ne bakime, mubile ne yinoongu va ganegare baane ba nguyi, mugabene yilaambu ne musaambile mbure mosi. 43Mutu mutu abile ne kyere, mumbare Nzambi avagisenge ne bakime mbili maambu ma biviinge ne bimwiile. 44Bootsu babasiinge Fumu babile dipute ne bagabenenge byootsu bibila nawu. 45Basuumbisenge bibuge ne bandagu bawu ne manive ne bagabenenge badole tsidila yawu, mutu mutu nzi yiroonde yandi. 46Bawisi bootsu, ne murime wumoosi babeengunungu gu Ndagu Nzambi. Bayangenge bilaambu byawu ke dipute gu bandagu bawu ne yinyunge ne mirime ne veele. 47Bagitsenge Nzambi ne baroondungu ne batu bootsu. Fumu akoondenge wuyobule batu bawisi bootsu ne gaandi dikabu difunenge.
Currently Selected:
ACT 2: SNQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
