ACT 4
4
Pyere ne Sa ve wusu bivuunde
1Pyere ne Sa bayambilenge kike ne piti, ve tsaange baveegitsi ba malagu ne yivuunde gi bakyelitsi ba Ndagu Nzambi ne basadusi. 2Babile ne kabu yobene mumbare kime beyi baloonze piti nuyambile yawu re, ve fwangugu Sesu, kagu ne bafuumbi barungule wufwangugu. 3Bagaange yawu ne banyingise yawu gu tsugu ne dibati dyene mumbare wisi bile wumayide. 4Nane, ve ganegare bootsu babayulu musamu wu bakime, mbili basiinge Nzambi ne dikabu difune, ditalu bile bebele ne toseni yiraanu tsi batu. 5Ne ngwaali yine, bivuunde bi Basifu ne bivuunde bi baveegitsi ba malagu ne bateenditsi ba migage babeengunu gu Serusalem. 6Gu bile Ane, yivuunde gi baveegitsi ba malagu, Kayif, Sa, Alekesande ne mbubi yotsu yi yivuunde gi baveegisi ba malagu. 7Barugise bakime ve wuswawu ne batombe yawu re: «Yenu ditsebeeluse yikate nde mu dinyaange vo nde mu dine di nyi?» 8Ne vane, Pyere wubasu ne Dinyunyi Disuungeme ayambile yawu re: «Bivuunde, 9yetu digonedumu banzidu nemunyi mu dinyi ditsevagile yetu yikate. Digonetombu natsebeelugu mutu wuwu. 10Vane, bweedi yenu diyabi dyo, yenu bootsu, ne yitsuku gyotsu gi Israel: Ga mutu wuwu ayi ve wuswenu ne buvinyi, nde mu dinyaange di dine di Sesu mwisi Nasarete Wusoolu ne Nzambi, wugomine yenu va kurusu, wuraambusu ne Nzambi ve ganegare bafuumbi. 11Seswene re:
“Dikuti divere yenu baruungitsi
re dyo dimakaluge dikuti di time.” #4.11 Mugaande wu Miimbu 118.22
12Wuyobulu wukadilu ke mu yandi, mumbare gu buloongu bwotsu, Nzambi aseveege batu mutu wumosi wukerungule wuyobule manenu.»
13Bivuunde byootsu bibile vane bigibeme mbili, mumbare balabenge re Pyere ne Sa bayambilenge guga wome ne bayabenge re yawu batu banane, baseneenge. Basetsiimbungu gaandi re Pyere ne Sa balaanditsi ba Sesu. 14Te yawu balabe gaandi dibagele dibeeluge, mutele ve mbarawu ne basedile mukalu. 15Bivuunde byootsu bavatise yawu gu yirini gi gukuunza yawu maambu ne basaale ne wuyambile yawu ne yawu. 16Bayambilanenge re: «Dikevage batu babe nde tsenyi? Babatsevage yimwiile gi ga bapage, ne bisi Serusalem bootsu basetsiimbu; ne yetu disakerune. 17Te sabweedi re tsaangu yi dyaambu didi yiyulunu ne mbili batu. Kagu dikali yawu bakere bekoonde wuyambile ne pasi mutu mu dine di Sesu, mbe bagukilusu.»
18Ne vane, bivuunde babetsitse yawu ne bakale yawu re diyabepuke wuyambile vo wuloonze mu dine di Sesu. 19Te Pyere ne Sa bayagule yawu re: «Pasanu mbaanze yenu bene, disuungeme mu ditaase di Nzambi nde wugobise yenu vo nde wugobise yandi? 20Gu yetu kyelu, disakerungule wuruumbe mu maambu maditselabe ne maditseyulu.» 21Bivuunde bibekoonde wulubuse yawu kere banyangumuse yawu. Basedile disuge diwukilise yawu, mumbare batu bootsu bagitsa Nzambi mu mootsu malabene. 22Dibagele dibeelugu mu yimwiile abile ne magumi mamane ma bilime ne batsube.
Disaambulu di babasiinge Nzambi
23Ve nyangumusu yawu, Pyere ne Sa bayende gu dikabu di bambaatsi bawu ne banyigule yawu mootsu mayambile bivuunde bi baveegitsi ba malagu ne bivuunde bi Basifu. 24Ve mane yawu wuyulu musamu wene, bootsu babasiinge Nzambi bapute ngoongi yi wusaambile. Banangule muufi re: «Nzambi Puungu, yire wusuunde yulu ne tsi ne mubu ne byootsu bi muune#4.24 Mugaande wupule gu buvige 20.11; Mugaande wu Miimbu 146.6. 25Mu Dinyunyi Disuungeme, yire wuveege mukoku wetu David musalitsi wagu, mabigu maame:
“Batu ba maloongu bayi ne kabu ne Nzambi, te nde mugi?
Batu bakate bapaangu, te ke tsi nzolu!
26Bamaate ba tsi yi bayulusunu mu mulwaani,
ne bivuunde bigukegane
mukole Fumu Nzambi, ne mukole mutu wusoole yandi.”#4.26 Mugaande wu Miimbu 2.1-2
27Dinde nungyenze, Irode ne Ponse Pilate bagukegene gu divule didi ne batu ba beenyi ne batu ba Israel. Bakole Sesu musalitsi wagu wu reel, wutsesoole yu. 28Vane bavage maambu mootsu mamane swekige yu ne googu wagu ne diroonde dyagu. 29Ne mapape Fumu Nzambi, labe navegoneyambile yawu re digutsogusu, ne yamune basalitsi bagu muloonze musamu wagu guga wome. 30Ritsige ngudyagu mure babeetsi babeelugi, bimwiile ne maambu ma biviinge bilabeni mu dine di Sesu musalitsi wagu wu reel.» 31Ve mane yawu wusaambile, mbure yibile yawu yiregeme. Yawu bootsu babasu ne Dinyunyi Disuungeme ne baloonza musamu wu Nzambi guga wome.
Babasiinge Nzambi bapute manyi mawu
32Dikabu di babasiinge Nzambi dibile dyawu dimoosi ne mu murime ne mu mataase. Mutu nisi wumoosi aseyambilenge re manyi mame nde mami, te ve ganegarawu byootsu bibile ke dipute. 33Bakime bavagenge bumweenyi bu bufwangugulu bu Fumu Sesu ne ngudi yivyogilile, ne Nzambi aveegenge yawu bootsu myule mivyogilile. 34Gusaandi mutu ve ganegarawu wubunungu pasi yivaave. Ne vane, bootsu bababilenge ne banuungi vore bandagu basuumbisenge, kere badole tsidila yawu babagenge 35ne baveega tsyo bakime; bagabila mu mutu mutu nzi yibile yandi ne nzale. 36Nane re navage dibagele dilugu re Susefu, wubile gu yibaandu gi Levi, aburu gu Sipre. Bakime baluge yandi re Barnabase, diyendigile re dibagele dikagwaarisi. 37Asuumbise nuungyandi, abege badole nusunze tsyo ve wusu bakime.
Currently Selected:
ACT 4: SNQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
