Luke 18

Noongu mukwiili ne yivovi gigibi

1Sesu atwile yawu noongu muloonze re bweedi musaambilenge ne yikodi guga nzugu. 2Ayambile yawu re: «Gu divule dimoosi gubile yivovi aseyulungu Nzambi wome ne asegobisenge pasi mutu. 3Gu bile gaandi gu divule dyene mukwiili wu mugyetu wu yendenge makyesi mootsu gulabe yivovi mu yambile yandi re: “Luunze me ve wusu mukolitsi wami.” 4Makyesi ma mbili yivovi asesiingenge wuvage dyaambu ditombenge mukwiili wene. Kere wisi wumoosi yivovi ayambile mu yabene re: “Nungyenze masakalabi Nzambi wome ne wugobisi pasi mutu. 5Te mukwiili wuwu agonegominise me muru makyesi mootsu, kagu maluunzi yandi.”» 6Ve mane Fumu wuyambile nane, akoonde re: «Sa yulwanu nagoneyambile yivovi gigibi gigi! 7Reembuse yivovi gigibi ayambile nane, keke ne Nzambya! Aguluunze batu baandi babagonetsitse yandi ne nyangu ne dibati. Asaketsiinge muyamune yawu. 8Mayambile yenu re aguleenze luunze yawu. Te vekeberuge Mwaane mutu, agudagise gitu mu tsi ya?»

Noongu yi mufwarisi ne muyakitsi lepu

9Sesu abetu noongu yiyi gu batu babataasenge re bayi basuungeme ve wusu Nzambi ne wuvoongulenge bambaatsi: 10«Babagele babeyi bayende gu ndagu Nzambi gusaambile; wumoosi bile mufwarisi, wune muyakitsi lepu. 11Mufwarisi ateleme ne asaambilenge gu murime wandi re: “O Nzambi, magabuse dinyi gu yu mumbare masaandi ne mabi ga batu bamosi bange yibe. Masakavagi butswari, masaandi wubive. Magabuse dinyi gu yu mumbare masaandi nisi ga muyakitsi wu lepu wuwu. 12Makamini kugi tsufu beyi mu tsonu. Makaveegi yu gimoosi mu digumi mu byootsu bikadili me.” 13Muyakitsi lepu ateleme ve tuungu. Aserungule nisi wusiimbule miisu gu yulu, te adiimbe tulu nuvonde kokolu re: “O Nzambi labe me dingyebe, me mutu wumubi.”» 14Sesu abeyambile yawu re: «Nungyenze mutu wuwu agabugu gu ndagwandi wusuungeme, te sa mufwarisi. Noongwene yigwendigile re: wotsu wukemakise manyuru mandi agugulumusu ne wotsu wukegulumuge agumakusu.»

Bufumu bu Nzambi nde bu batu baba ga baane babakyeki

15Wisi wumosi, batu babagile Sesu keke ne baane babakyeki mure akesunzile yawu makake nuveege yawu myule. Ve labe bayikitsi nane, baseembe bakiinde ba baane. 16Te Sesu arume bakiinde mugogule ne baane nuyambile re: «Sisanu baane bayitsi gu me, diyakare yawu mumbare Bufumu bu Nzambi nde bu batu baba ga yawu. 17Mayambile yenu nungyenze: wotsu wusakesiinge Bufumu bu Nzambi ne murime wandi wotsu ga mwaane wu mukyeki, asakerungule wunyingene gu bwo.»

Dibagele di yikiti

18Ne vane, yivuunde gimoosi gi Musifu atombe Sesu re: «Muloonzi wu munyi, mavagi nde gi mudile monyu wu mubu ne mubu?» 19Sesu ayambile yandi re: «Mugi yigonetsitse me re, wu munyi? Gusaandi mutu wu munyi veengu ke Nzambi ya piinze. 20Yiyatsi birumu bi Nzambi bikaloonzi re: “Yiyavage butswari, yiyaboke mutu, yiyayibe, yiyafurigile mutu dyaambu, gobise tayagu ne ngwagu.”» 21Dibagele ayagule re: «Makagobisi birumu byene byootsu baande ve bungyebe bwami.» 22Ve mane yandi wuyulu mikalu myene, Sesu ayambile yandi re: «Yimebesaale ne dyaambu dimoosi di wuvage: Suumbise byootsu bi nagu, ne gabile badole bakedile yu gu masaandi, ne vane yigudile busine gu yulu. Kere vane ruge, laande me.» 23Te ve mutu wene ayulu mabigu mene, abile ne rungile mumbare abile ne mbili bukiti. 24Sesu nulabe re amenyongeme, ayambile re: «Ke page gu pagese mu nyingene gu mune wu tsoongi. 25Te page yivyogilile gu yikiti munyingene gu Bufumu bu Nzambi!» 26Babayulungu mayambilenge Sesu bakalule re: «Gabile re nane, ake wukeyobulu nde nyi?» 27Sesu ayagule re: «Maambu makaragulu batu wugage, Nzambi asakaragulu wuvage mo.» 28Ne vane Pyere ayambile re: «Nga yimelabe namasiise yetu manyi metu mootsu mu laande yu.» 29Sesu ayagule yawu re: «Mayambile yenu nungyenze, ga mutu asiise ndagwandi ne mugatsyandi, agasiise baane bangwandi ne bakiinde baandi vo baane baandi mu dyaambu di Bufumu bu Nzambi, 30mutu wene agudile bivyogilile mbili gu tsi yiyi ne mu dikyesi dikayitsi, agudile monyu wu mubu ne mubu gu mbuge Nzambi.»

Sesu agoneyambile mu dyaambu di difu ne di bufwangugulu bwandi

31Ve yulu vane, Sesu aboonge digumi ne bayikitsi babeyi ne ayambile yawu re: «Yabanu re dikemake gu Serusalem, mootsu mateende babigitsi mu dyaambu di Mwaane mutu makelabene. 32Aguyakusu mu myogu mi batu bababi. Yawu baguseve yandi, bagusenge yandi ne bagutulile yandi makyengi. 33Bagudiimbe yandi banganzi ne bagumuboke. Kere mu wisi wu mureru agufwangugu.» 34Te bayikitsi basenyigugulu maambu mayambilenge Sesu, divindugulu di maambu mene dibile disweegu. Baseyabe mayambilenge yandi.

Sesu abeeluse nge pafu gu Seriko

35Ve pulenge Sesu ve tsoombu Seriko, vane vebile nge pafu matsagele ve tuungu nzile nurimenge bivaave gu bavyosi. 36Nge pafu ayulu divuve di piti yivyogenge ne atombe batu re: «Digonevyoge di nde gi?» 37Batu bayagule yandi re: «Nde Sesu mwisi Nasarete agonevyoge.» 38Ne vane ayame mundunge: «Sesu, Mwaane David, labe me dingyebe!» 39Babayendenge mawusu baseembe yandi mure akeruumbe te akoondenge ke wuyame pepe re: «Mwaane David, labe me dingyebe!» 40Sesu asikeme ne arume batu mubage yandi ve mbarandi. Ve bile nge pafu ve mbarandi, Sesu atombe yandi re: 41«Yiroonde nde gi? Mavagili yu nde gi?» Nge pafu ayagule yandi re: «Fumu maroonde wulabe ga ve kale!» 42Sesu ayagule yandi re: «Miisu magu mabalugi! Gitu gyagu gimayobule yu!» 43Vane ne vane nge pafu abaande wulabe ga ve kale. Alaandenge Sesu nugitsenge Nzambi re: «Myule gu Nzambi!» Piti yotsu yilabe dyo ne yo gaandi yigitse Nzambi.

Currently Selected:

Luke 18: SNQ

Highlight

Copy