Luke 21

Mukwiili mugyetu wu disaandi

1Wisi wumoosi, Sesu abile gu dikaange di Ndagu Nzambi, amonigenge nave sunzenge bikiti badole gu byeve bi manzolu gu Ndagu Nzambi. 2Alabe keke ne mukwiili mugyetu wu disaandi asunze fure beyi tsigane tsoongu yingyenze. 3Sesu ayambile re: «Nungyenze mayambile yenu, mukwiili wu disaandi wuwu atseveege badole wuvyogilile batu bootsu. 4Mumbare bane batseveege ke badole tsisabile yawu ne nzale. Te yandi gugare busaandi bwaandi, atseveege nzi yotsu yitsesaale naandi mu wuyi.»

Sesu alubuse mu dyaambu di Ndagu Nzambi yikepanzu

5Kere vane batu bayambilenge mu dyaambu di Ndagu Nzambi re: «Labanu buvwaandi bu Ndagu Nzambi yiyi na noku yo ne muboti mamanyi, ne biruungu bimosi biveege batu badole gu Nzambi.» 6Te Sesu ayagule yawu re: «Nisi nagonelabe yenu byootsu bibi, wisi ne mweendu byootsu bigupanzige, gusakesaale dimanyi nisi dimoosi ve yulu dine.»

Biliimbe bikelabene bebele ne disukusulu di buloongu

7Batu bene babetombe Sesu re: «Muloonzi, maambu mene magulabene nde dikyesi dinyi? Ake diguyabe dyo nde tsenyi?» 8Sesu ayagule yawu re: «Diraambile, batu bakeredungimise yenu. Nisi nzoku batu baguruge mu dine dyami, baguyambilenge re: “Mare wusoolu ne Nzambi!” ne: “Dikyesi dikeke bebele!” Te diyasiinge makeyambilenge batu bene. 9Vakeyulu yenu bayambile mu dyaambu di mitsiingu ne mu maambu ma dimbuunge, diyayulu wome. Maambu mene bweedi marenenelabene, te sakenenebile disukusulu di buloongu.» 10Kere vane Sesu akoonde re: «Batseengi ne batseengi bagulwaanenge, bafumu bagulwaanenge yawu ne yawu. 11Mutambe wuguregeme mbili. Nzale ne bivuunge bigudugulu mbili miseengi. Gugulabene maambu ma biviinge ne biliimbe bibinene bikeburugu gu yulu. Ne vane batu bagugaangu ne wome wu mbili.

Maambu makerugile bayikitsi ba Sesu

12Maambu mene negiwunenelabene yenu digugaangu, ne digutsogusu. Yenu diguyakusu mu bandagu ba masaambulu mu wusosusu. Digunyingusu gu tsugu, digubagu ve wusu bamaate ne ve wusu bivuunde bi miseengi, mu dine dyami. 13Vane kebile re dikyesi dikeyambile yenu bumweenyi bwami mu maambu mootsu matselabe yenu. 14Yabanu re vekeyenda yenu ve wusu bivovi, diyabile ne kyere mu mikalu mikeyagula yenu mukare manyuru menu. 15Mabene maguveege yenu buyedi ne mabigu masakerungule wugigulu vore wuyagulu ne mutu nisi wumoosi ve ganegare bakolitsi benu. 16Batayi benu ne bangwenu ne baane bangwenu ba babagele ne ba bagyetu ne bakiinde benu ne bambaatsi benu bagugabe yenu, bagubokise bambili ve ganegarenu. 17Yenu digukolu ne batu bootsu mu dyaambu di dine dyami. 18Te gusaandi dinange nisi dimoosi gu myuru myenu dikelage. 19Gwaaranu: nane re nakeyobule yenu myonyu myenu.

Mutsuundu wu Serusalem

20Vekelabe yenu mabaadi ma migole bamatseenge Serusalem, yabanu re, divule disaketsiinge nupanzu. 21Mu dikyesi dyene babakebile gu Sudé barine mu wuyende gu wusweeme gu mikoongu, babakebile gugare Serusalem babuli divule dyene, babakebile gu banuungi bayabegabugu gu divule dyene. 22Nane re nakekilise Nzambi yitsuku gyandi, mu wusupule mootsu mateendu mu mabigu mandi. 23Maguge gu bagyetu babakebile ne mimi ne gu yawu babakenwiisenge mu batsufu tsyene! Nungyenze, Nzambi agutsogise bisi Serusalem, kabwandi yigubile mu yitsuku gyene. 24Bane baguboku ne mayenge, bamosi bagubagwa mu batseengi tsimosi ne wusunzwa mu batsugu. Bakolitsi ba Nzambi bagupanze Serusalem kwanga ne vekevu dikyesi disiingusu yawu ne Nzambi.»

Vekeruge Mwaane mutu

25Sesu abekoonde yambile re: «Maambu ma biviinge magulabene gugare dyumbi, gugare tsuungi ne gugare banyetse. Mu mutambe, batu ba mu batseengi bagulabe wome wu mbili, mu divuve didinene di mingibe mi mubu. 26Batu bagufu ne wome, mutaase maambu makarugi gu mutambe, mumbare Nzambi agutsukimise bungudu bu yulu. 27Ve yulu maambu mene mootsu, bagulabe Mwaane mutu agwiitse gu Gugare yipume, ne mbili bungudu bwaandi ne bunduumbe bwaandi. 28Vekebaande labe yenu maambu mene, sunzanu mirime, gwaaranu mumbare Nzambi asaketsiinge ne wuyobule yenu.»

Bufumu bu Nzambi bukeke bebele

29Kere Sesu atwile bayikitsi baandi noongu yiyi: «Beminanu munzangele ne miri mine myootsu. 30Vekalabi yenu magayi mawu makebaande wubeende, yabanu re mutubu wukeke bebele. 31Munoongu wumoosi, vekelabe yenu maambu mene yabane re Bufumu bu Nzambi bukelabene. 32Mayambile yenu nungyenze batu ba nemunyi wuwu basakenenefu bootsu gugalabe maambu mene. 33Yulu ne tsi biguvyoge, te mabigu mami masakevyoge.

Bweedi mu wuraambile

34Diraambile! Diyavyose dikyesi dyenu ne wuvage mayayi, diyavyose dikyesi dyenu ne wunwange malamu ne wulange, vore ne wubile ne munyoongu mu monyu, mbe yenu disakeyabe wisi wukeruge Mwaane mutu. 35Nakakobi yibere tsundugu gu disiinge, dikebile wisi wene re nane gu batu ba buloongu. 36Yenu diyalaame byolu saambilenganu ne yikodi. Ne vane yenu digudile ngudi yi wugwaarile mu mootsu makeruge. Yenu dikeluunzu ne Mwaane mutu.»

37Bawisi bootsu Sesu aloonzenge ne nyangu gu Ndagu Nzambi. Kere ne tsisige, ayendenge gu wulaame gu mukoongu wu miri mi ba olive. 38Batu bootsu barugenge ne yipali gu Ndagu Nzambi mu yulu naloonzenge Sesu.

Currently Selected:

Luke 21: SNQ

Highlight

Copy