Matej 20
20
O Isus vaćeri i priča savi mothoj e Devlesiri darežljivost
1“Adalese so, o carstvo e nebosoroi slično e čherutnese kova rano sabajle iklilo te rodel bućarnen te ćeren buti ano lesoro vinograd. 2Dogovorinđa pe e bućarnencar te del len po jekh denari, so inele plata zako jekh dive, i bičhalđa len pese ko vinograd.
3Kad inele đi sar enja o sati, palem iklilo avri hem dikhlja averen sar terđovena ko trg bizi buti, 4i phenđa lenđe: ‘Džan hem tumen ko mlo vinograd, a me ka platinav tumenđe pravedno.’ 5I on džele.
A ov palem iklilo đi sar ko dešuduj o sati, hem đi sar ko trin o sati, hem ćerđa isto ađahar. 6Kad inele đi sar pandž o sati, palem iklilo hem arakhlja averen sar terđovena hem pučlja len: ‘Sose sa akava dive terđovena akate bizi buti?’
7On phende lese: ‘Adalese so niko na dinđa amen buti.’
A ov phenđa lenđe: ‘Džan hem tumen ko mlo vinograd.’
8Kad peli i rat, o gospodari e vinogradesoro phenđa ple manušese kova inele upreder o bućarne: ‘Vičin e bućarnen hem platin len počindoj oto okola kola ale zadnja, i đi okola kola ale prva.’
9Ađahar ale o bućarne so lelje te ćeren buti ko pandž o sati, hem đijekh olendar priminđa po jekh denari. 10Kad ale okola kola prva lelje te ćeren buti, mislinde da on ka priminen više, ali hem on priminde po jekh denari. 11Kad lelje o pare, lelje te buninen pe protiv o čherutno vaćerindoj: 12‘Akala zadnja ćerde buti samo jekh sati, a tu platinđan len kobor hem amen kola sa akava dive ćerđam phari buti hem thabiljam ko kham!’
13A o čherutno vaćerđa jekhese olendar: ‘Amala, me na hovavđum tut. Tu dogovorinđan tut mancar te ćere buti zako jekh denari. 14Le ti plata hem dža, a me akalese soi zadnjo mangava te dav edobor kobor hem tuće. 15Nane li man pravo mle parencar te ćerav so me mangava? Ili tu injan ljubomorno so me injum šukar premalo lende?’
16Ađahar okola kolai akana zadnja tegani ka oven prva, a okola kolen akate dikhena sar prvonen adari ka oven zadnja.”
O Isus trito puti vaćeri ple meribnastar
17Sar džala ine nakoro Jerusalim, o Isus cidinđa ki strana e dešuduje učenikonen hem odrumal phenđa lenđe: 18“Ače, ukljaja nakoro Jerusalim. Adari man, e Čhave e manušesere, o manuša ka den ko šerutne sveštenici hem ko učitelja e zakonestar, hem on ka osudinen man ko meriba. 19Tegani ka den man ko manuša kola nane Jevreja te maren muj mancar, te šibinen man hem te čhiven man ko krsto. Ali o trito dive ka uštav taro mule.”
Najbaroi okova kova kandela
20Tegani i daj e Zevedejesere čhavengiri, ple čhavencar, ali koro Isus hem peli mujeja đi phuv anglo leste te rodel lestar nešto.
21O Isus pučlja la: “So mangeja?” Oj phenđa: “Vaćer maje da mle soduj čhave ano to carstvo ka bešen jekh tuće oti desno strana, a jekh oti levo.”
22A o Isus phenđa: “Na džanen so rodena. Šaj li te pijen tari čaša savatar me ka pijav?”
On phende: “Šaj.”
23I ov phenđa lenđe: “Čače ka pijen tari mli čaša e patnjaja. Ali nane mlo te vaćerav ko ka bešel maje oti desno ili oti levo strana. Adalai thana okolenđe kolenđe mlo Dad spreminđa len.”
24Kad šunde adava avera deš učenici, holjande upro duj phralja.
25Tegani o Isus vičinđa len kora peste hem phenđa: “Džanen da o vladarija avere nacijengere gospodarinena olencar hem o bare manuša vladinena upro lende. 26Ali ma te ovel ađahar maškar tumende. Nego, ko mangela te ovel baro maškar tumende, nek ovel tumenđe sluga. 27Ko mangela te ovel prvo maškar tumende, nek ovel tumenđe robo. 28Sar so ni o Čhavo e manušesoro na alo te kanden le, nego te kandel, hem te del plo dživdipe sar otkup butenđe.”
O Isus sasljari duje korore manušen
29Sar o Isus hem lesere učenici ikljovena ine tari diz Jerihon, palo leste džele but manuša.
30I dikh, duj korore manuša bešena ine uzalo drom, i kad šunde so o Isus nakhela, vičinde: “Smilujin tut amenđe, Gospode, Čhaveja Davidesereja!”
31But džene vičinde upro lende te trainen, ali on po zorale vičinde: “Smilujin tut amenđe, Gospode, Čhaveja Davidesereja!”
32O Isus terdino, i vičinđa len kora peste hem pučlja: “So mangena te ćerav tumenđe?”
33On phende lese: “Gospode, phrav amare jaćha te dikha.”
34E Isusese pelo žal olenđe, čhivđa ple vasta upro lengere jaćha hem on otojekhvar šaj ine te dikhen, i džele palo Isus.
Currently Selected:
Matej 20: RAB
Highlight
Share
Copy
Want to have your highlights saved across all your devices? Sign up or sign in
