Matej 24
24
O Hram ka ovel peravdo hem o znakija oto bare nevolje
1O Isus iklilo taro Hram, a sar džala ine adathar, ale đi leste lesere učenici te mothoven lese sari šukar ćerdo o Hram. 2A ov phenđa lenđe: “Dikhena li sa adava? Čače vaćerava tumenđe, adalestar naka ačhol ni bar upro bar. Đijekh ka ovel peravdo.”
3Sar o Isus bešela ine ki e Maslinakiri gora, o učenici ale korkore đi leste hem pučle le: “Vaćer amenđe, kad adava ka ovel hem savo ka ovel o znako zako to aviba hem zako kraj e svetosoro?”
4O Isus phenđa lenđe: “Dikhen te na oven hovavde nekastar. 5Adalese so but džene ka aven ano mlo anav vaćerindoj: ‘Me injum o Hrist’ hem buten ka hovaven. 6A kad ka šunen zako mariba hem da vaćeri pe e maribnastar, ma te daran. Adalese so adava valjani te ovel, ali adava pana nane kraj. 7Adalese so ka uštel jekh nacija upri aver nacija hem jekh carstvo upro aver carstvo. Ko but thana ka ovel bokhalipe hem zemljotresija. 8Ali sai adava samo o anglunipe e bijandipnasere mukengoro.
9Tegani o manuša ka den tumen te oven mučime hem ka mudaren tumen. Sa o nacije ka mrzinen tumen zbog mande. 10Tegani but džene ka otperen oti vera, jekh avere ka izdajinen hem ka mrzinen. 11Ka ikljon but hovavne proroci hem buten ka hovaven. 12Adalese so ka ovel baro bezakonje, butengoro mangipe ka šudrol. 13Ali kova ačhola verno đi o kraj, ka ovel spasime. 14A akava Šukar lafi e nebosere carstvostar ka vaćeri pe ki sa i phuv sar svedočanstvo sa e nacijenđe, i tegani ka avel o kraj.
15Ađahar, kad ka dikhen da o ‘gadost savo anela uništenje’, savestar vaćerđa o proroko o Danilo, terđola ko Sveto Hram (ko akava čitini, nek haljol), 16tegani okola kola živinena ani e judejakiri regija nek našen ko gore. 17Ko ka ovel upro čher, ma te huljel te lel nešto taro čher! 18Ko ka ovel ki njiva, ma te irini pe čhere te lel plo fostani! 19Pharo ka ovel e khamnjenđe hem okolenđe kola dena čuči ko adala dive! 20Molinen tumen tumaro našiba te na ovel ko jevend ili ko savato, 21adalese so tegani ka ovel bari nevolja, savi na inele taro anglunipe e svetosoro đi akana, ni nikad palo adava naka ovel. 22I te na skratini ine o Gospod o broj adale divengoro, niko naka spasini pe ine. Ali zbog okola kolen o Devel birinđa, adala dive ka oven skratime.”
O znakija save ka mothoven e Isusesoro aviba
23“Te phenđa tumenđe neko tegani: ‘Ače akatei o Hrist’, ili ‘Eče adari’, ma verujinen. 24Adalese so ka ikljon hovavne hristija hem hovavne proroci hem ka ćeren bare znakija hem čudesija sar, te šaj ine, te hovaven hem e Devlesere birimen. 25Eče, vaćerđum tumenđe angleder o vreme.
26Adalese, te vaćerde tumenđe: ‘Ečei ki pustinja’, ma džan adari; ili ‘Ačei ko garavde sobe’, ma verujinen. 27Adalese so o mothojba mlo, e Manušesere Čhavesoro, ka ovel sar kad i munja čhinela taro istok hem dičhola đi ko zapad. 28Adava ka ovel jasno ađahar sar kad o lešinarija čedena pe adari kaj isi mulo telo.
29A odmah palo nevolje adale divengere,
‘O kham ka kaljol
hem o masek naka sijajini,
o čerenja ka peren taro nebo
hem o zoralipa e nebosere ka oven potresime.’
30Tegani ko nebo ka mothoj pe o znako e Manušesere Čhavesoro. Tegani sa o plemija ki phuv zorale ka roven hem ka dikhen e Čhave e manušesere, sar avela upro oblaci e nebosere ano zoralipe hem ani bari slava. 31Hem ka bičhali ple anđelen e trubencar savei glasna hem on ka čeden lesere birimen taro sa o štar strane e phuvjakere, taro jekh krajo e nebosoro đi ko aver.”
O Isus vaćeri e učenikonenđe te pratinen o znakija savendar vaćerđa lenđe
32“A oti smokva sikljoven akava: Kad lakere granke zrelonena hem ikljona listija upro lende, džanena dai paše o linaj. 33Ađahar hem tumen kad dikhena da ovela sa adava, te džanen dai mlo aviba paše, dai anglo udar. 34Čače vaćerava tumenđe, akaja generacija naka nakhel đikote sa adava na ovela. 35O nebo hem i phuv ka nakhen, ali mle lafija nikad naka nakhen.”
Oven uvek spremna zako e Isusesoro aviba
36“A niko na džanel adava dive hem adava sati kad adava ka ovel. Na džanen ni o anđelja ko nebo ni o Čhavo. Džanel samo o Dad. 37Sar so inele ano vreme kad o Noje živinđa, ađahar ka ovel hem kad me, o Čhavo e manušesoro, ka avav. 38Sar so ano adava vreme, angleder o baro pani, o manuša hana ine hem pijena, lena pe hem dena pe sa đi o dive kad o Noje đerdinđa ki barka, 39a on ništa na džande đikote na alo o baro pani hem na legarđa sarijen – ađahar ka ovel hem kad o Čhavo e manušesoro ka mothoj pe. 40Tegani duj džene ka oven ki njiva. Jekhe ka lel pe, a e dujtone ka ačhaj pe. 41Duj đuvlja ka ćeren buti ano mlin. Jekha ka lel pe, a e dujtona ka ačhaj pe.
42Adalese džangale pazinen, adalese so na džanen ko savo dive ka avel tumaro Gospod. 43Ali akava te džanen: te o čherutno džanel ine ko savo sati prekali rat avela o čor, ka ovel ine džangalo hem naka mukel lese ine te đerdini ko čher te čorel. 44Adalese hem tumen oven spremna, adalese so o Čhavo e manušesoro ka avel tegani kad na nadinena tumen!”
Kad ka avel, o Isus ka nagradini e vernonen, a ka kaznini e bišukare slugen
45“O verno hem o mudro slugai okova kas o gospodari šaj te čhivel upreder ple sluge te del len hajba ko vreme. 46Blago adale slugase kas lesoro gospodari, kad ka avel, ka arakhi sar ćerela ađahar. 47Čače vaćerava tumenđe, upreder sa o barvalipe plo ka čhivel le sar upravniko. 48Ali tei adava sluga bišukar hem vaćeri ana peste: ‘Naka avel pana mlo gospodari’, 49i lela te marel avere slugen, hem te hal hem te pijel e mate manušencar, 50lesoro gospodari ka avel ano okova dive hem okova sati kad naka adžićeri le, 51ka čhinel le ko ekvaš hem ka čhivel le maškaro dujemujengere manuša, kote ka ovel baro rojba hem krciba e dandengoro tari dukh.”
Currently Selected:
Matej 24: RAB
Highlight
Share
Copy
Want to have your highlights saved across all your devices? Sign up or sign in
