Matej 28
28
E Isusesoro uštiba taro mule
1Palo savato, rano sabajle ko prvo dive oto kurko, i Marija Magdalena hem i aver Marija ale te dikhen o grobo.
2Otojekhvar ulo baro zemljotres, adalese so o anđeo e Gospodesoro huljilo taro nebo, alo nakoro grobo, cidinđa o bar hem beštino upro leste. 3A ov sijajinđa sar i munja hem lesere šeja inele parne sar o hiv. 4A o stražarija oti dar lelje te tresinen hem ule sar mule. 5Tegani o anđeo phenđa e đuvljenđe: “Tumen ma daran! Džanav so rodena e Isuse kova inele čhivdo ko krsto.
6Ov nane akate; uštino taro mule, ađahar sar so phenđa tumenđe. Aven hem dikhen o than kaj pašlilo, 7i sigate džan hem vaćeren lesere učenikonenđe: ‘Uštino taro mule hem ače džala angla tumende ki Galileja. Adari ka dikhen le.’ Eče, vaćerđum tumenđe.”
8I on ki sig džele taro grobo hem ani dar, ali hem ani bari radost prastandile te vaćeren adava lesere učenikonenđe. 9Otojekhvar reslja len o Isus hem phenđa lenđe: “Zdravo!” A on ale nakoro leste, dolinde lesere pre hem pele ko kočija anglo leste. 10Tegani o Isus phenđa lenđe: “Ma daran. Džan hem vaćeren mle phraljenđe te džan ki Galileja. Adari ka dikhen man.”
O sveštenici dena pare e stražarenđe te hovaven
11I sar o đuvlja džana ine, nesave e stražarendar džele ki diz hem vaćerde e šerutne sveštenikonenđe sa so ulo.
12On čedinde pe e starešinencar hem dogovorinde pe te den but pare e vojnikonenđe. 13Phende lenđe: “Vaćeren: ‘Sar amen sovaja ine, lesere učenici ale prekali rat hem čorde le.’ 14A te šunđa zako adava o upravniko, amen ka vaćera oleja hem ka pobrinina amen te na oven tumen problemija.” 15I on lelje o pare hem ćerde sar so inele sikavde. I adaja priča vaćerđa pe maškaro Jevreja sa đi akava dive.
O Isus bičhali e apostolen te vaćeren o Šukar lafi
16O dešujekh učenici džele ki Galileja, ki gora ki savi o Isus bičhalđa len te džan. 17I kad dikhle le, pele ko kočija anglo leste. Ali nesave sumnjinde.
18Tegani o Isus alo nakoro lende hem phenđa lenđe: “Dindi maje sa i vlast ko nebo hem ki phuv. 19Adalese džan hem ćeren e manušen oto sa o nacije te oven mle učenici, ađahar so ka krstinen len ano anav e Dadesoro hem e Čhavesoro hem e Svetone Duhosoro 20hem ađahar so ka sikaven len te ićeren sa so naredinđum tumenđe. I ače, me injum tumencar ano sa o dive, đi ko kraj e svetosoro.”
Currently Selected:
Matej 28: RAB
Highlight
Share
Copy
Want to have your highlights saved across all your devices? Sign up or sign in
