Marko 10
10
O Isus sikaj o rom hem i romni te na ačhaven pe
1I o Isus iklilo tari diz Kafarnaum, i dželo ko krajo e Judejakoro hem ki aver strana oti len Jordan. I palem alo koro leste but narodo, a ov lelja te sikaj len, sar so uvek ćerela ine.
2I ale nakoro leste nesave fariseja mangindoj te iskušinen le, i pučle le: “Tromal li o rom te ačhaj pe romnja?”
3A ov pučlja len: “So naredinđa tumenđe o Mojsije?”
4On phende: “O Mojsije muklja e manušese pe romnjaće te del lil oto rastaviba hem te ačhaj la.”
5A o Isus phenđa lenđe: “O Mojsije pisinđa tumenđe adaja naredba adalese so injen šerale. 6Ali, ko anglunipe o Stvoritelj ‘ćerđa murše hem đuvlja’. 7‘Adalese o manuš ka ačhaj pe dade hem pe daja hem ka ovel jekh pe romnjaja, 8hem on duj ka oven jekh telo.’ Ađahar on nane više duj, nego jekh telo. 9Adalese, o manuš te na rastavini okolen so o Devel ćerđa te oven jekh!”
10Kad palem inele ano čher, o učenici pučle le adalestar, 11a o Isus phenđa lenđe: “Đijekh kova ačhaj pe romnja hem lela avera, ćerela preljuba premalo late. 12Hem te i romni ačhaj pe rome hem lela avere, ćerela preljuba.”
O carstvo e Devlesoroi okolenđe kolai ponizna sar o čhavore
13O manuša anena ine anglo Isus pumare čhavoren te čhivel ple vasta upro lende, a o učenici braninde lenđe.
14Kad o Isus dikhlja adava, holjanđa hem phenđa lenđe: “Muken e čhavoren te aven kora mande hem ma braninen lenđe, adalese so esavkenđe pripadini o carstvo e Devlesoro! 15Čače vaćerava tumenđe, ko na primini o carstvo e Devlesoro sar o čhavoro, nikad naka đerdini ano leste.”
16Tegani zagrlinđa e čhavoren, čhivđa ple vasta upro lende hem blagoslovinđa len.
Pharoi e barvalenđe te đerdinen ko carstvo e Devlesoro
17Sar o Isus lela ine te džal ko drom, prastandilo nakoro leste jekh manuš, pelo ko kočija anglo leste hem pučlja le:
“Učitelju šukareja, so valjani te ćerav te dobinav o večno dživdipe?”
18A o Isus phenđa lese: “Sose vičineja man šukareja? Samoi jekh šukar – o Devel. 19O naredbe džane: ‘Ma mudar!’, ‘Ma ćer preljuba!’, ‘Ma čor!’, ‘Ma svedočin hovavne!’, ‘Ma prevarin’, ‘Poštujin te dade hem te daja!’”
20A ov phenđa: “Sa adava ićerava pana taro tikoripe.”
21O Isus dikhlja ano leste hem osetinđa mangipe olese, i phenđa lese: “Pana jekh ačhola tut te ćere: dža hem biknin sa so isi tut, a o pare de e čororenđe i ka ovel tut barvalipe ano nebo. Tegani ava hem phir pala mande.”
22A kad o terno manuš šunđa adava, rastužisalo hem dželo, adalese so na manglja te biknel plo baro barvalipe.
23O Isus dikhlja ano učenici hem phenđa lenđe: “Kobori pharo e barvalenđe te đerdinen ko carstvo e Devlesoro!”
24A o učenici čudinde pe ko adava so phenđa.
A o Isus palem phenđa lenđe: “Mle čhavoralen, kobori pharo te đerdini pe ko carstvo e Devlesoro! 25Po lokhei e kamilaće te nakhel maškaro kan e suvjakoro nego e barvalese te đerdini ko carstvo e Devlesoro.”
26A o učenici po više čudinde pe, i lelje maškara pumende te pučen pe: “Ko onda šaj te ovel spasime?”
27O Isus dikhlja len šukar, i phenđa: “E manušenđe adava nane moguće, ali na hem e Devlese. Adalese soi e Devlese sa moguće.”
28O Petar lelja te vaćeri lese: “Ače, amen sa ačhavđam te dža pala tute.”
29O Isus phenđa: “Čače vaćerava tumenđe, đijekh kova ačhavđa plo čher, ili e phraljen, ili e phenjen, ili e daja, ili e dade, ili e čhaven, ili o njive zbog maje hem zbog o Šukar lafi, 30akana, ano akava vreme, ka primini šel puti više: čhera, phraljen, phenjen, dajen, čhaven hem njive – uzalo adava ka ovel hem progonime – a ko sveto savo avela, ka primini o večno dživdipe. 31Ali, but okola kolai akana prva tegani ka oven zadnja, a okola kolen akate dikhena sar zadnjonen adari ka oven prva.”
O Isus trito puti vaćeri ple meribnastar
32Kad lelje te džan dromeja nakoro Jerusalim, o Isus džala ine anglo lende. O učenici inele začudime so džala ko Jerusalim, a okolen so džana ine palo lende uklinđa i dar.
Tegani o Isus palem cidinđa ki strana e dešuduje apostolen, i lelja te vaćeri lenđe adalestar so ka ovel oleja: 33“Ače, đerdinaja ko Jerusalim. Adari man, e Čhave e manušesere, o manuša ka den ko šerutne sveštenici hem ko učitelja e Zakonestar, hem on ka osudinen man ko meriba. Tegani ka den man ko manuša kola nane Jevreja 34hem on ka maren muj mancar, ka čhungaren man, ka šibinen man hem ka mudaren man, a me palo trin dive ka uštav taro mule.”
Najbaroi okova kova kandela
35Tegani uzalo Isus ale o Jakov hem o Jovan, e Zevedejesere čhave, hem phende lese: “Učitelju, mangaja te ćere amenđe so god ka roda tutar.”
36A ov pučlja len: “So mangena te ćerav tumenđe?”
37I on phende: “Muk amenđe, kad ka ove ani ti slava, te beša ko počasna thana uzala tute – jekh oti desno strana, a o dujto oti levo.”
38A o Isus phenđa lenđe: “Na džanen so rodena. Šaj li te pijen tari čaša savatar me pijava ili te krstinen tumen krstibnaja saveja me krstinava man?”
39A on phende lese: “Šaj.”
Tegani o Isus phenđa: “Oja, ka patinen ađahar so ka pijen tari mli čaša hem so ka krstinen tumen krstibnaja saveja me krstinava man, 40ali nane mlo te vaćerav ko ka bešel maje oti desno ili oti levo strana. Adalai thana okolenđe kolenđei spremime.”
41Kad šunde adava avera deš apostolja, holjande upro Jakov hem upro Jovan.
42Tegani o Isus vičinđa len kora peste hem phenđa: “Džanen da okola kola pes dikhena sar vladaren avere nacijengere, gospodarinena olencar, hem lengere bare manuša vladinena upro lende. 43Ali, ma te ovel ađahar maškar tumende. Nego, ko mangela te ovel baro maškar tumende, nek ovel tumenđe sluga. 44Ko mangela te ovel prvo maškar tumende, nek ovel sarijenđe robo. 45Adalese so ni o Čhavo e manušesoro na alo te kanden le, nego te kandel hem te del plo dživdipe sar otkup butenđe.”
O Isus sasljari e korore prosjako ano Jerihon
46I ađahar resle ani diz Jerihon. I sar o Isus ple učenikonencar hem bute narodoja ikljola ine taro Jerihon, uzalo drom bešela ine o kororo, o Vartimej (so značini “čhavo e Timejesoro”) hem prosini. 47Kad šunđa so nakhela o Isus o Nazarećanin, vičinđa: “Isuse, čhaveja Davidesereja, smilujin tut maje!”
48But džene vičinde upro lese te traini, ali ov po zorale vičinđa: “Čhaveja Davidesereja, smilujin tut maje!”
49O Isus terdino hem phenđa: “Vičinen le.” I on vičinde e korore vaćerindoj: “Ma dara! Ušti, o Isus vičini tut!”
50A ov frdinđa pestar plo ogrtači, ripinđa ko pre hem alo koro Isus.
51I o Isus pučlja le: “So mangeja te ćerav će?”
A o kororo phenđa: “Učitelju, mangava te dikhav.”
52A o Isus phenđa lese: “Dža. Ti vera sasljarđa tut.”
I o manuš otojekhvar dikhlja hem lelja te džal dromeja palo Isus.
Currently Selected:
Marko 10: RAB
Highlight
Share
Copy
Want to have your highlights saved across all your devices? Sign up or sign in
