Marko 3
3
O Isus sasljari ko savato
1Kad o Isus palem đerdinđa ki sinagoga, adari inele jekh manuš kasoro vas inele šuko. 2Adari inele hem okola kola posmatrinena ine e Isuse te dikhen na li ko savato ka sasljari le, sar te šaj tužinen le. 3O Isus phenđa e manušese kas inele šuko vas: “Ušti hem terđov ko maškar!”
4I tegani pučlja len: “So tromal pe te ćerel pe ko savato: šukaripe ili bišukaripe? Te spasini pe o dživdipe ili te mudari pe?” A on trainde.
5I dikhlja len holjame hem ine lese but phare zbog olengere steđime vile. I phenđa e manušese: “Pružin to vas!” Ov ispružinđa plo vas hem lesoro vas ulo sasto. 6Tegani o fariseja iklile hem odmah e manušencar kola podržinena e Irode lelje te dogovorinen pe sar te mudaren e Isuse.
O manuša avena taro but thana te dikhen e Isuse
7O Isus ple učenikonencar cidinđa pe adathar ko e Galilejakoro jezero, a palo leste džele but džene tari regija Galileja hem tari regija Judeja, 8tari diz Jerusalim, tari regija Idumeja, tari aver strana oti len Jordan hem taro e dizjengere e Tiresere hem e Sidonesere pašutne thana. Sa adala manuša ale koro Isus, adalese so šunde so ćerela ine čudesija.
9Tegani o Isus phenđa ple učenikonenđe te pripreminen lese o čamco, sar te na gurini pe o narodo ano leste. 10Adava dive buten sasljarđa, i but namborme manuša gurinena pe ine nakoro leste te dolen pe upro leste sar te šaj oven sasljarde. 11Kad dikhena le ine o manuša kola inele opsednutime e bišukare duhencar, perena ine anglo leste hem vičinena: “Tu injan o Čhavo e Devlesoro!” 12A ov zorale upozorini len ine te na vaćeren averenđe koi ov.
O Isus birini dešuduje apostolen
13Tegani dželo ki gora hem vičinđa okolen kolen ov manglja, hem on ale koro leste. 14Olendar birinđa dešudujen, kolen vičinđa apostolja, te oven oleja, te bičhali len te propovedinen 15hem te ovel len autoritet te ispudinen e demonen. 16A akavai o anava e dešudujengere kolen birinđa:
Simon, kole vičinđa Petar,
17Jakov, e Zevedejesoro čhavo,
hem Jovan, e Jakovesoro phral, kolen vičinđa Voanirges, so značini “Čhave e gromesere”,
18Andreja,
Filip,
Vartolomej,
Matej,
Toma,
Jakov, e Alfejesoro čhavo,
Tadej,
Simon Zilot
19hem Juda Iskariot, kova posle izdajinđa e Isuse.
O Isus kandela pe e Devlesere zoralipnaja, a na e bengesere
20Tegani o Isus đerdinđa ko jekh čher, a palem sa edobor džene čedinde pe da ov hem olesere učenici našti ine ni maro te han. 21Kad e Isusesoro jeri šunđa zako adava, ale palo leste te legaren le, adalese so mislinde da dilindilo.
22A o učitelja e Zakonestar kola ale taro Jerusalim vaćerena ine: “Opsednutimei e Veelzevuleja, e demonengere šerutneja, kasere zoralipnaja ispudini e demonen.”
23O Isus vičinđa len uzala peste hem lelja te vaćeri lenđe ano uporedbe: “Sose bi o Sotoni ispudini e Sotone? 24Tei nesavo carstvo ana peste podelime, adava carstvo našti te ačhol. 25Hem tei nesavo čher ana peste podelime, adava čher naka šaj te ačhol. 26I, te o Sotoni džala korkoro protiv peste hem tei ana peste podelime, ov našti te ačhol, nego alo lesoro kraj. 27Ali niko našti te đerdini ko čher e zorale manušesoro hem te čorel lestar, a angleder adalestar te na phandel le. Tegani ka šaj te čorel sa oto čher. 28Čače vaćerava tumenđe: e manušenđe ka šaj te oven oprostime sa o grehija hem o hule, 29ali ko god hulini upro Sveto Duho nikad naka ovel lese oprostime, nego zako adava greh ka ovel zauvek krivo.”
30Adava phenđa adalese so nesave učitelja e Zakonestar vaćerena ine dai ov opsednutime e bišukare duhoja.
E Isusesiri čačikani porodicai okola so ćerena e Devlesiri volja
31Tegani e Isusesiri daj hem lesere phralja resle adari. Sar terđovena ine avri, bičhalde nekas koro leste te vičini le. 32A uzalo leste bešena ine but džene, i phende lese: “Eče, ti daj hem te phralja terđovena avri hem mangena te dikhen tut.”
33A o Isus pučlja len: “Koi mli daj hem mle phralja?” 34Tegani dikhlja nakoro manuša kola bešena ine ko krugo uzalo leste hem phenđa: “Ače, akalai mli daj hem mle phralja. 35Adalese so, đijekh kova ćerela i volja e Devlesiri, ovi mlo phral, hem mli phen, hem mli daj.”
Currently Selected:
Marko 3: RAB
Highlight
Share
Copy
Want to have your highlights saved across all your devices? Sign up or sign in
