Marko 8
8
O Isus parvari štar hiljade manušen
1Ko adava vreme palem čedinđa pe baro narodo. I adalese so na ine len so te han, o Isus vičinđa kora peste ple učenikonen hem phenđa lenđe: 2“Pharo maje akale manušenđe. Trito divei mancar, a nane len so te han. 3Te bičhalđum len čhere bokhalen, ka peren odrumal, a nesave olendar ale odural.”
4A o učenici pučle le: “Kaj ko akava čučo than te arakha dovoljno maro zako sa akala manuša te čaljoven?”
5I o Isus pučlja len: “Kobor mare isi tumen?”
A on phende: “Efta.”
6Tegani naredinđa o narodo te bešel ki phuv, lelja okola efta mare, zahvalinđa e Devlese, phaglja len hem dinđa len ko ple učenici, hem on dinde len e manušenđe. 7A olen inele hem nekobor tikore maćhe. O Isus zahvalinđa hem olenđe, i phenđa e učenikonenđe hem olen te podelinen e manušenđe. 8Sare hale hem čalile, hem efta pherde bare korpe čedinde pe okolestar so ačhilo oto hajba. 9A adari inele đi ko štar hiljade manuša. I o Isus bičhalđa len čhere 10hem odmah đerdinđa ko čamco e učenikonencar, i dželo ko krajo e dalmanutakoro.
O fariseja rodena e Isusestar te dokažini pe
11Tegani ale nesave fariseja hem lelje te raspravinen pe e Isuseja. Iskušinde le ađahar so rodinde lestar znako taro nebo.
12A ov zorale uzdahninđa, i phenđa: “Sose akaja generacija rodela mandar znako? Čače phenava tumenđe: nisavo znako naka del pe laće.”
13Tegani ačhavđa len, palem đerdinđa ko čamco hem nakhino ki aver strana oto jezero.
O uticaj e farisejengoro hem e carosoro e Irodesoro nane šukar
14A o učenici bisterde te legaren pumencar maro, i ano čamco inolen samo jekh maro.
15I sar nakhena ine ki aver strana oto jezero, o Isus upozorinđa len vaćerindoj: “Arakhen tumen taro kvasco e farisejengoro hem taro kvasco e Irodesoro!”
16A on maškara pumende vaćerena ine: “Adava phenđa adalese so nane amen maro!”
17O Isus džanđa sostar vaćerena, i pučlja len: “Sose vaćerena adalestar so nane tumen maro? Pana li na haljovena hem na anena ki godi? Edobor li steđime tumare vile? 18Jaćha isi tumen, a na dikhena? Kana isi tumen, a na šunena? Hem sar na setinena tumen? 19Kad phagljum o pandž mare zako pandž hiljade murša, kobor pherde korpe čedinđen okolestar so ačhilo oto hajba?”
On phende: “Dešuduj.”
20“A kad phagljum o efta mare zako štar hiljade murša, kobor bare korpe čedinđen okolestar so ačhilo oto hajba?”
On phende: “Efta.”
21A ov pučlja len: “I pana li na haljovena?”
O Isus sasljari e korore ani Vitsaida
22I kad resle ki Vitsaida, nesave manuša ande koro Isus jekhe korore manuše, i molinde le te čhivel ple vasta upro leste. 23O Isus dolinđa e korore taro vas hem ikalđa le taro gav, čhungarđa lese ko jaćha hem čhivđa ple vasta upro leste.
I pučlja le: “Dikheja li nešto?”
24A o manuš lelja te dikhel, i phenđa: “Dikhava manušen, ali oni sar kašta save phirena!”
25I o Isus palem čhivđa ple vasta upro lesere jaćha, hem e manušese irinđa pe o dikhiba hem sa šukar dikhlja.
26O Isus bičhalđa le čhere, vaćerindoj: “Ma đerdin ko gav.”
O Petar phenela dai o Isus o Hrist
27I o Isus hem lesere učenici džele ko gava uzali e Filipesiri Cezareja. Odrumal o Isus pučlja len: “So phenena o manuša, ko injum me?”
28On phende lese: “Nesave manuša phenena da tu injan o Jovan o Krstitelj, a avera phenena da tu injan o proroko o Ilija, a nesave avera da tu injan jekh oto avera proroci.”
29Tegani o Isus pučlja len: “A so tumen phenena, ko injum me?”
O Petar phenđa: “Tu injan o Hrist!”
30I o Isus zorale upozorinđa len nikase te na vaćeren adava olestar.
O Isus vaćeri ple meribnastar
31I lelja te sikaj len vaćerindoj: “Me, o Čhavo e manušesoro, valjani but te patinav. O starešine, o šerutne sveštenici hem o učitelja e Zakonestar naka prihvatinen man. Ka ovav mudardo, ali o trito dive ka uštav taro mule.” 32Phravdeste vaćerđa lenđe adalestar, i o Petar cidinđa le ki strana hem lelja te ukorini le.
33A o Isus, irinđa pe, dikhlja ano učenici, i ukorinđa e Petre hem phenđa: “Dža mandar, Sotone! Adalese so na razmislineja devlikane, nego manušikane.”
Sar te ovel pe e Isusesoro učeniko
34Tegani o Isus vičinđa kora peste e narodo zajedno ple učenikonencar, i phenđa lenđe: “Ko mangela te ovel mlo učeniko, mora te ačhaj pe ple dživdipnastar hem te lel plo krsto hem te phirel pala mande. 35Adalese so, ko mangela te spasini plo dživdipe, ka našali le, a ko našali plo dživdipe zbog mande hem zbog o Šukar lafi, ka spasini le. 36I so vredini e manušese hem sa i phuv te ovel olesiri, a našali plo dživdipe? 37I so o manuš šaj te del sar zamena zako plo dživdipe?
38Adalese so, ko angli akaja neverno hem grešno generacija lađala mandar hem mle lafendar, hem me, o Čhavo e manušesoro, ka lađav olestar kad ka avav ani slava mle Dadesiri e svetone anđelencar.”
Currently Selected:
Marko 8: RAB
Highlight
Share
Copy
Want to have your highlights saved across all your devices? Sign up or sign in
