چھاگلاسگون 2
2
تادپاچانگونّیکا ہلژخمہ رُوح پھابس۔
1پینتیکوسّی توسچھینّی جاگّا#2:1 پینتیکوس نی پیساگی ستینگنے جاگ 50 جاگپوا زیرّانوگ۔ کھونگ تشانگما کھانگپاجیگی نانّگا دزومستے یود زانے 2ہونمیدلا نامکھانے لونگراگ ٹاگپوے سکاد تسوگشیگ یونگستے کھونگ تشانگما دزومستے یودکھانّی کھانگپابو گانگ۔ 3تینے کھونگونلا میے میلجاب مانگپو لچےژوگس تھونگ کاگون سوسو بیستے کھونگ ریریکا بابس۔ 4کھونگ تشانگما ہلژخمہ رُوح بوے گانگ یانگ رُوح بوے کھونگونلا کھیود سالچیسپوے، کھونگونی سکاد سوسوے نانّگا سپیرا تانگچیس گوزوگ۔
5تےتوسلا خُدا ایمان چوکھانّی یہُودی پاگون دُنیائی چھوگس تشانگمانے یونگستے، یروشالیمّا زومتے یودپین۔ 6تے سکادگون تشورّاتانگ می مانگپو دزوم، یانگ تشانگما ہالاستے ہانڈانگ سونگ چیازیرنا کھونگ تشانگمے رانگرانگی یولّی سکادّی نانّگا لوبٹوگسگونّی سپیرا تانگین تشور۔
7ماثانٹے ہالاستے کھونگونی چیگ تانگ چیگّا زیرس، ”نیونشیگ، ای سپیرا تانگکھان تشانگما گلِیل پا مانوگا؟ 8تینے کازوگی کھونگونی نگاتانگی سکیکھانی یول سوسوے سکادّی نانّگا سپیرا تانگین تشورّانوگ۔ 9نگاتانگونّی ٹوا پارتھاپا، میدییاپا، ایلام پا، مسوپتامیہ پا، یہُودیہ پا، کپَّدُکیہ پا، پُنطُس پا، آسیہ پا، 10فروگیہ پا، پمفیلیہ پا، مصر پا، کیرینّی نیمو یودکھانّی لیبیاپا، رومپا بیسپا، 11(یہُودی پا تانگ یہُودی پے چھوسلا ایمان کھیونگکھان یہُودی مانکھان گُون) یانگ کریتے پا تانگ ارابیاپا گُون یودتے مانوگا؟ اِین نانگ نگاتانگونلا ای میگونّی نگاتانگ رانگی سکادّی نانّگا خُدے معجزہ چھاگلاس گُون شادین تشورین اینوگ۔“ 12تے تشانگما ہالاستے تھے تشومس سونگتے چیگ تانگ چیگّا، ”ای ناسلوگی دُونبو چی اینوگ؟“ زیرین ٹیس۔
13جان کھاچیگی ٹھیلگود تانگین زیرس، ”اِیگون چھانگ مانگپو تھونگستے راروستے اینوگ۔“
رسُول حضرت پطرؔس سی میتشوگسلا ہاگوچوگّا زادس۔
14تینے حضرت پطرؔس رسُول چوگشیک نیامپو میتشوگسّی لدُونلا سکیودتے سکاد چھینموے نانّگا مولس، یہُودی پا تانگ یروشالیمّا دُوگکھان گُون نگے زیرچیسچانبوا گیالّا چوستے نیونشیگ۔ ای جُونگکھانگون نگے کھیوجا ہاگوچُوگین، 15کھیوجے ای میگون راروستے اینوگ سامکھانبو ٹانگپو مانوگ، ستوسشیگّانگ نگاتوگی چھوتشود رگُوپا مانے چھا میدوگ۔ 16اِین نانگ توس مانگپوے سنگونلا اِیبوے سکورلا پیغمبر یوایلّی مولس،
17خُدے مولس، تھامے توسلا
نگے نگارانگی رُوح می تشانگمیکا لُوگین،
یانگ کھیوجے بُوژا تانگ بومو گُونی لونگستان شادین۔
کھیوجے جونّوگونّی ژالزیگس تھونگین،
یانگ کھیوجے رگادپوگونلا نییلام تھونگین۔
18یانگ نگے تینّا توسلا نگے یوگپو
تانگ یوگمو گونّیکانگ نگارانگی رُوح لُوگین،
یانگ تیگونّی لونگستان شادین۔
19نگے نامکھے نانّگا معجزہ لاس تانگ
دُنیائیکا ستاگس گُون ستانین،
تیگون ٹھاق، میے تانگ تُوتپا گُون این۔
20مسیح تے جاگ کھاگچان سپالچانبو جونگی سانگ
سنگونلا نیما مونڈیگ چھین
یانگ لزاوا ٹھاق ژوگس مارپو گیورین۔
21اِین نانگ مسیح کا ایمان کھیونگکھان تشانگما
تھارپا تھوبین#2:21 یوایلّی شوقبُوئ 2۔ 28 نے 32۔
22تا کھیوجا بنی اِسرائیل پا گون نگے سپیرا نیونشیگ۔ کھیوجاگونلا رگیُوس اینوگ خُدے حضرت عیسیٰ سی گیُودتے معجزہ لاس، زادپا تانگ ستاکس گُون زادتے کھونگی حضرت عیسیٰ سی ناصرة پا، کالا زادتے اینکھانبو ستانّا زادس۔ 23خُدے جُونگچیسچانگون کھیینتے کھونگرانگی تھابس نانگجین حضرت عیسیٰ سی کھیوجاگونّی لاگا ستادچوگس یانگ خُدے شریعت کھا مانیانکھانگونّی روگس نیامپو کھیوجاگونّی کھونگ کیانگشینگیکا کیانگچوگستے سادس۔ 24اِین نانگ خُدے کھونگ شیتے ردوگنگالّی نانّگا لوس ماشوگا سونتیا لانّگا زادس، چیاجونا شیچیسّی وانگی کھونگ زومستے مانے بور مینیان۔ 25شوقبُو بوے نانّگا گیالپو داؤد ّی مسیح سکورلا مولدوگ،
”نگا تھونگ، مسیح نگے لدُونلا توسگیون جُوگستے دوگ۔
کھونگ نگا روگس زادّا نگا نیامپو جوگس پاسانگ
نگا چانگ جیگسگوس مید۔
26تینّابویپھیا نگے سیمس تھادپو این،
یانگ نگے لچے نیرانّگا ستودپا پھولّاد۔
ماتشاد جیدے نیامپو نگے زوگسپوانگ ریوا یود،
27چیازیرنا نیرانگی نگے سیمسنیدپو
شیکھانگونّی ٹوا پھانگستے بورّا میزاد،
یا نیرانگ ای ہلژخمہ ژابستوگپابو رُول چوگّا میزاد۔
28نیرانگی نگا سونتے لانگچیسّی لامبو ستانّا زاد،
نیرانگ نگا نیامپو جوگشیسپے، نگا گاموے گانگ۔“ #2:28 زابور شوقبُوئ 16۔ 8 نے 11
29یہُودی پے فونو گون، نگاتانگی اتا اپو گیالپو داؤد شی، جنازہ بو قبرستان سوبس یانگ کھونگی قبرستان بو داگسانگ نگاتانگی ٹوا یودکھانبو نگے تانتان زیر تھوبچیسراگ۔ 30اِین نانگ کھونگ پیغمبر اینپین، یانگ خُدے کھونگ نیامپو وعدہ زادکھان نانگجین کھونگی اولاد نے چیگ کھونگی تخت پیکھہ ستاگّا زادچیسپوانگ گیُوس یودپین۔ 31گیالپو داؤد ّی یونگچیسچانّی توسّی نانّگا جونگچیسگون تھونگتے مسیحا شیکھانگونّی ٹونے سونتیا لانّگا زادچیسپو لونگستان شادتے مولس، ”کھونگ شیکھانگونّی ٹوا پھانگستے بورّا مازادس، یا کھونگی سکوشا رُول ماچوگس۔“
32”تینّا حضرت عیسیٰ، خُدے سونتیا لانّگا زادس، نگاجا گُونی تیبو گواہ تانّگاد۔ 33کھو نگا خُدے چھاگ یوسپا دوگچیسّی سپال تھوب، یانگ یاب خُدے وعدہ زادکھانّی ہلژخمہ رُوح سالّا زادکھانبو حضرت عیسیٰ سی نگاجا تشانگمالانگ سالّا زادِین اینوگ، یانگ تیبو کھیوجے داگسا تھونگین یانگ تشورین اینوگ۔“ 34-35گیالپو داؤد نامکھا ماکھیرنانگ کھوے مولس،
خُدے نگے مسیحا مولس،
نگے کھیرانگی ڈاو تشانگما،
کھیرانگی کانگپے یوگا بوربور تشوگپا،
کھیرانگ نگے لاگپا یاسپے ٹھیسّیکا دوگ۔
36تینّابویپھیا بنی اِسرائیل پا تشانگمالا تانتان ہاگوگوس۔ تینّا حضرت عیسیٰ سی کا بو کھیوجاگونّی کیانگشینگا کیانگس، خُدے کھونگ کھونگی لدامّا زادکھانّی مسیحا تانگ مسیح نیسکو زادس۔
37حضرت پطرؔس سی سپیراگون تشورّاچیگ کھونگون سنیینّگا دا زوگکھان جوگس سکیومو سونگتے، کھونگونی حضرت پطرؔس تانگ جان رسُول گُونلا جوس، ” فونو گون، نگاجے چی چوگوس؟“
38حضرت پطرؔس سی لانسالس، کھیوجے دِیگپاگونلا مُعافی تھوبچیسّی پھیا رانگرانگی سدیگپیکا گیودپا چوستے حضرت عیسیٰ مسیح مِنتخسی نانّگا غوتا لین۔ تینے کھیوجاگونلا ہلژخمہ رُوح بوے برکت تھوبین۔ 39ای وعدہ بو کھیوجا، کھیوجے اولاد تانگ یہُودی مانکھان گُونی پھیا اینوگ، کاگونلا نگاتانگی خُدے کھونگی می گیورچیسلا بودّا زادس۔ 40تینے حضرت پطرؔس سی لابجا مانگپو سالین سپانگپُھودے سنینگنے جُووا پھولین مولس، ”ای میرابس نگانپا پھوگچیسّی چھادپانے کھیوجارانگون سکیوبشیگ۔“
41کھوے چھوس شادکھانبوا ایمان چوکھانگونّی غوتا لینس، یانگ تے جاگّا مسیح کا ایمان چوکھان ستونگ سوم زودچیگ عبادت خانہے ٹوا تھیا زادس۔
ایمان چانگونّی ڈیل چوچیس۔
42کھونگون رسُول گُونی لابجا لینچیس، ڈیل چوچیس، کھارجی گوستے زاچیس (کابوے نانّگا حضرت عیسیٰ مسیح ایدتو چوین دونتانگ دونچیس) تانگ دُعا جوچیس گُون ما کھاگچان سامستے توسگیون دزومّادپین۔
43رسُول گُونی معجزہ تانگ ستاس مانگپو ستانّا زادچیسپوے می تشانگمے، جیگسّی نانّگا خُدا سیوا زادس۔ 44ایمان چان تشانگما لان مانگپو دزومستے، چیتشانگما چیگ تانگ چیگ نیامپو گوادپین۔ 45یودکھانّی نورگون تسونگستے گھوسدوم یودکھانگونلا گوستے تانّگادپین۔ 46کھونگون جاگدانگ بیت المقدِس سی گیانگسکورّی نانّگا دزومّادپین۔ کھانگپاگونّی نانّگا مسیح ایدتو چوین دونکیر چاگستے گامو تانگ تھادپو نیامپو سنینگ پھیستے تشانگما نیامپو گوستے زین، 47خُدا ستودپا پھولّادپین۔ یانگ کھونگونی می تشانگمے چھوگسّکیور تھوبچیسلا تھادپو چوس۔ حضرت عیسیٰ مسیح تھارپا تھوبکھانگونّی ٹانگسکا جاگپاسانگجاگ پھیل چوگّا زادس۔
Currently Selected:
چھاگلاسگون 2: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
