یوہانان 15
15
رگونّی لچانگما تانگ یالگا۔
1حضرت عیسیٰ مسیح مولس، ”نگا نی لدینبے رگونّی لچانگما تانگ نگے یاب تشاسکھانبو این۔ 2ڈاسبو ماچھاگسکھانّی یالگاگون نگے کانے چادتے پھانّگا زادّوگ، یانگ ڈاسبو چھاگسکھانّی یالگاگونلا مانّگا چھاگسشیسّی پھیا گورّا زادّوگ۔ 3نگے کھیوجا شادکھانّی لابجاگونّی کھیوجاگون ژانگما چوتشارتے این۔ 4نگیکا دوگشیگ یانگ نگا کھیوجے نانّگا دوگین۔ یالگا چیگپوا ڈاسبو چھاگس نیانّا مانوگ، تیبو رگونّی لچانگمے نانّگا ناستے لوسگوس۔ تینّا تسوگسلا کالتیس کھیوجا نگیکا مادوگنا کھیوجاگونّانگ ڈاسبو میچھاگس۔
5نگا نی رگونّی لچانگما یانگ کھیوجا نگے یالگاگون این۔ نگیکا ناسکھان یانگ نگا کھونگونی نانّگا ناسکھانگونلا ڈاسبو مانگپو چھاگساین، نگانے بیستے کھیوجاگونلا چانگ چو مینیان۔ 6نگیکا مادوگکھانگون، سکامسکھانّی یالگا تھاگرینّگا پھانگسکھان ژوگس این، تیگون لدوستے میے نانّگا پھانگستے ثاگاین۔ 7کالتیس کھیوجا نگیکا ناستے نگے لابجاگون کھیوجے سیمسّی نانّگا لوسنا، کھیوجے دودپا چوستے چیجیگ تونگ زیرنانگ کھیوجا سالین۔ 8کھیوجا ڈاسبو مانگپو چھاگستے نگے لدینبے لوبٹوگس اینکھانبو ستان زانے نگے یابّا سپال تھوبین۔
9یابّی نگا چامسپا زادّا تسوگسلا نگے کھیوجا چامسپا چواد۔ نگے چامسپے نانّگا ناستے دوگشیگ۔ 10کالتیس کھیوجے نگے کاگونلا کھانیانّا کھیوجاگون نگے چامسپے نانّگا لوسین کازوگ نگے نگارانگی یابّی کاگونلا کھانیانتے کھونگی چامسپے نانّگا لوستے این۔ 11نگے تھادپو کھیوجے نانّگا لوسشیس یانگ کھیوجاگونلا تھادپو گانگپو تھوبچیسّی پھیا نگے ای سپیراگون کھیوجا زیرتے این۔ 12نگے کا نی ایبو این، نگے کھیوجاگونلا چامسپا چوکھان ژوگس کھیوجے چیگ تانگ چیگّا چامسپا چوشیگ۔ 13دزاوگونّی پھیا کھورانگی ثوگپو تانگچیسّی سانگ چھیا یاشاشیگ مید۔ 14نگے کا تانگکھانگون چونا کھیوجا نگے دزاو این۔ 15تانیپھارلا نگے کھیوجا یوگپو میزیر چیازیرنا یوگپوا سپونبوے لاسّی سکورلا گیُوس یونّگا مانوگ۔ اِین نانگ کھیوجاگونلا نگے دزاو زیرّاد چیازیرنا یابنے تشورکھان ژانگما نگے کھیوجا شادتے این۔ 16کھیوجے نگا لدامستے مان، نگے کھیوجاگون لدامستے این۔ نگے کھیوجاگون سونگتے توسگیون لوسشیسّی ڈاسبو سمینچوگچیسلا سکوستے این۔ تینے نگے مینگی نانّگا کھیوجے نگے یابّا چیجیگ ژونانگ سالّا زادِین۔ 17نگے کھیوجا ای کا بو تانّگاد، چیگ تانگ چیگّا چامسپا چوس۔“
دُنیائی می گونّی حضرت عیسیٰ سی لوبٹوگس گونلا ناپھراد چوس۔
18حضرت عیسیٰ مسیح مولس، کالتیس دُنیائی می گونّی کھیوجا ناپھراد چونا، کھونگونی ناپھراد چوکھان ٹانگپو نگا اینکھانبو ایدتو چوشیگ۔ 19کالتیس کھیوجا دُنیائی می اینپینّا، کھونگی کھیوجا کھورانگونّی ٹھوگو تسوگسلا چیسپا چوستے یودڈو۔ اِین نانگ تا کھیوجا دُنیائی می کھاگشیگ مانوگ۔ نگے دُنیائی می ٹونے کھیوجاگون لدامس پاسانگ، کھونگونی کھیوجا ناپھراد چوانوگ۔ 20نگے کھیوجاگونلا ای سپیرا زیرکھانبو ایدتوا بورشیگ، یوگپو سپونبوے سانگ ٹاگا مانوگ کالتیس کھونگونی نگا ناگھسباردو ستانتے اینّا تینے کھونگونی کھیوجانگ ناگھسباردو ستانین۔ کالتیس کھونگونی نگے لابجاگونّیکا لاگلین چوسپینّا تینے کھیوجے لابجاگونّیکانگ لاگلین چوین۔ 21کھیوجا نگے اینچیسپوے کھونگونی کھیوجا تیزوگ چوین، چیازیرنا کھونگونی نگا کالا زادکھانبو شیسّا مانوگ۔ 22کالتیس نگا یونگستے کھونگونلا نگے یابّی لونبو ماشادپینّا کھونگون کھونگرانگونّی دِیگپے پھیا نونگسچان مانڈو۔ اِین نانگ تا کھونگونی کھورانگی دِیگپے پھیا چانگ سکیون چو مینیان۔ 23نگا ناپھراد چوکھانگونّی نگے یابّانگ ناپھراد چوانوگ۔ 24کالتیس نگے کھونگونی ٹوا جان سوینگ ماچوسکھانّی تے معجزہ ستاگس گُون ماچوسپینّا، کھونگون کھونگرانگونّی دِیگپے پھیا نونگسچان مانڈو۔ اِین نانگ کھونگونی تیگون تھونگتیانگ نگاتانگ نگے یاب نییسکوا ناپھراد چوس۔ 25کھونگونی شریعتی نانّگا، ”کھونگونی نگا تونتاگ میدپا ناپھراد چوس“ ڈِیستے یودکھانبو ڈانڈا ڈوبدوگ۔
26اِین نانگ نگے روگس زادکھانبو کھیوجاگونلا کالین ۔ کھونگ نی میگون ٹانگپوے چھوگسلا ٹھیدکھان ہلژخمہ رُوح این۔ کھونگ یاب خُدے چھوگسنے سکیودتے نگے سکورلا گواہ سالین۔ 27کھیوجاگونّیانگ نگے سکورلا گواہ تانگوس، چیازیرنا کھیوجاگون گومانے پھارلا نگا نیامپو یودتے اینوگ۔
Currently Selected:
یوہانان 15: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
