یوہانان 18
18
حضرت عیسیٰ سی زومس۔
1دُعا ژو تشارّاچیگ، حضرت عیسیٰ سی مسیح، کھونگرانگی لوبٹوگسگون نیامپو تے ناسّانے بینگتے کیدرونّی لونگپے چھوگسلا یودکھانّی ذیتونی تشاسّی نانّگا سکیودس۔ 2کھونّگا نگولوگ چوکھانّی یہُوداؔہ تے ناسّابو گیوسیودپین، چیازیرنا حضرت عیسیٰ سی لان مانگپو کھونگرانگی لوبٹوگسگون نیامپو تیرو سکیودّا زادّادپین۔ 3تینے یہُوداؔہ فریسی پاگون تانگ اِمام کُنی چھونمو گونی کالکھانّی رومپے ماگمی سدیجیگ تانگ بیت المقدِس ثونگکھانگون ٹھیدتے تشاسّی نانّگا لیب۔ کھونگونی میتو، لالٹین تانگ تشونچھا کھورتے یودپین۔ 4حضرت عیسیٰ سی کھونگی کا جونگچیس ژانگما گیالّا چوستے کھیینّادپین، تینّابویپھیا کھونگ پھیلوگا سکیودتے کھونگونلا ٹیا زادس، ”کھیوجے سو ژالّاد؟“
5کھونگونی لانتانگس، ”ناصرة پا حضرت عیسیٰ۔“
حضرت عیسیٰ سی کھونگونلا مولس، ”نگا این۔“
(کھونّگا نگولوگ چوکھانّی یہُوداؔہ کھونگون نیامپو یودپین) 6حضرت عیسیٰ، ”نگا این“ مولّاچیگ، کھونگون گیابلوگا سونگ یانگ سیکا گیل۔ 7حضرت عیسیٰ سی یانگ لدابستے مولس، ”کھیوجے سو ژالّاد؟“
کھونگونی زیرس، ”ناصرة پا حضرت عیسیٰ۔“
8حضرت عیسیٰ سی مولس، ”نگے کھیوجا زیرپین ’کھو نگا این‘ کالتیس کھیوجے نگا ژالّادنا نگے لوبٹوگسگون چھاچوگ۔“ 9تیبو نی کھونگی ”نیرانگی نگا سالکھانّی ٹونے چیگّانگ ماستور“ مولکھانبو ڈانڈا ڈوبچیسپو اینپین۔
10شمعُوؔن حضرت پطرؔس سی کھوے لاگا یودکھانّی رایَ پھینگستے اِمامِ اعظمی یوگپوا گیابستے کھوے نامچھوگ یاسپا چادتانگس (تے یوگپوے مینگبو مالکھوس اینپین)۔ 11حضرت عیسیٰ سی حضرت پطرؔس لا حکم سالتے مولس، ”رایبو شوبسّی نانّگا گیونگ۔ چی یابّی نگا سالکھانّی ردوگنگالّی دونسکیوگپو نگے میتھونّگا؟“
حضرت عیسیٰ سی اِمام چھینمویکا کھیرس۔
12تینے رومپے ماگمی، کھونگونی ماگسپون تانگ یہُودی بیت المقدِس ثونگکھانگونّی حضرت عیسیٰ مسیح زومس یانگ کھونگی چھاگ لدامستے 13حنّا یودسا کھیرس، کھو کائفاسی نامے ابا اینپین، یانگ کائفاس تے لوے اِمامِ اعظم اینپین۔ 14(اینّا کائفاسی یہُودی پے اُسکیونگونلا کھادا تانگستے میگونّی تونلا می چیگ شینا گیال زیرتے اینپین)۔
حضرت پطرؔس سی حضرت عیسیٰ سی میشیسزون تانگس۔
15شمعُوؔن حضرت پطرؔس تانگ جان لوبٹوگس چیگ حضرت عیسیٰ سی گیابگیابنے سونگ، جان لوبٹوگسپو اِمامِ اعظمی نگوشیسکھان اینپا کھو حضرت عیسیٰ مسیح نیامپو اِمام چھینموے پھوڈانگی گیانگسکورّی نانّگا یونگچوگس۔ 16اِین نانگ حضرت پطرؔس گیاسگھوے پھیلوگا لوس۔ اِمامِ اعظمی نگوشیسکھانّی لوبٹوگسپو لوگستے یونگس یانگ گھو ثونگمابوا سپیرا تانگستے حضرت پطرؔس نانگکوگا ٹھیدتے کھیرس۔ 17تے گھو ثونگکھانّی بوموبوے حضرت پطرؔس لا ٹیس، ”کھیورانّگانگ کھونگی لوبٹوگس چیگ مانّا؟“
حضرت پطرؔس سی زیرس، ”نگا مان۔“
18ٹانگمو یودچیسپوے، تیرو یودکھانّی یوگپوگون تانگ ثونگکھانگونّی میے تانگستے ژانگما کییرکھورتے میا ثوادپین، کھونگونی ٹوا حضرت پطرؔس یانگ میا ثوادپین۔
اِمام چھینموے حضرت عیسیٰ سی ٹیوا ٹیس۔
19تے زانے اِمامِ اعظمی#18:19 کائفاس تینّا لوے اِمام چھینمو اینتیانگ حنّا لا حضرت ہارُونگانگ اِمام چھینموے مینگبو تھوبّادپین۔ یانگ ایکا اِمام چھینمو کھوا زیرتے اینوگ، حضرت عیسیٰ مسیح کھونگی لوبٹوگس تانگ لابجا گُونی سکورلا ٹیس۔
20حضرت عیسیٰ سی لانسالس، ”نگے وا ماوا می تشانگمے لدُونلا شادپین، نگے یہُودی پا ژانگما دزومسّے مجلِس گُون تانگ بیت المقدِس سی نانّگا توسگیون لابجا تانّگادپین۔ نگے سانگوے نانّگا چیجیگّانگ مازیرپین۔ 21نیرانگی نگا چیا ٹیاد۔ نگے لابجا تشورکھانگونلا ٹیس، نگے زیرکھانگون کھونگونلا تانتان گیوس اینّوگ۔“
22حضرت عیسیٰ سی تیبو مولّاچیگ، بیت المقدِس ثونگکھانگونّی ٹونے حضرت عیسیٰ سی لدُونلا دُوگستے یودکھان چیگی کھونّگا ڈاملچاگس تانگستے زیرس، ”اِمامِ اعظم ا یتسوگسلا لانتانّگانوگّا؟“
23حضرت عیسیٰ سی کھوا مولس، ”کالتیس نگے سوگپوجیگ زیرتے اینّا تیبو ستانتے تونگ۔ اِین نانگ لدینبا زیرتے اینّا تونمیدلا نگا چیا ردونّگاد۔“ 24تینے حنّا ّی چھاگ چینگس چینگسپویکا حضرت عیسیٰ سی اِمامِ اعظم کائفاسیکا کالس۔
حضرت پطرؔس سی یانگسکیار حضرت عیسیٰ سی نُگو میشیسزون تانگس۔
25شمعُوؔن حضرت پطرؔس میا ثواین یود زانے چیگ چیگی کھونّگا ٹیس، ”کھیورانّگانگ کھونگی لوبٹوگسگونّی ٹونے چیگ مانّا؟“
حضرت پطرؔس سی زون تانگستے زیرس، ”نگا مان۔“
26اِمامِ اعظمی یوگپوگونّی ٹونے چیگ حضرت پطرؔس سی رایَ نیامپو نامچھوگ چادکھانّی می بوے نین اینپین، کھوے حضرت پطرؔس لا زیرس، ”نگے کھیرانگ کھو نیامپو تشاسّی نانّگا تھونگتے مانپینّا؟“ 27حضرت پطرؔس سی یانگ لانچیگ میشیسزون تانگس، تینّامالّا چاپوے چاسکاد تانگس۔
حضرت عیسیٰ سی پیلاطُسی لدُونلا ٹھیمسچادس۔
28تینے یہُودی پے اُسکیونگونی نگامو زانگزینگنے حضرت عیسیٰ مسیح کائفاسی کانے رومپے کالونّی کھارلا کھیرس۔ کھونگون تشیتو سونگتے پیساگی دونتانگ زامینیان سامتے جیگسپا کھارّی نانگکوگا ماسونگ۔ 29تیبویپھیا پیلاطُس کھونگونی لدُونلا پھیلوگا بینگستے یونگس یانگ زیرس، ”ای میبویکا کھیوجاگونّی چی نیادکالّاد؟“
30کھونگونی زیرس، ”کالتیس کھو ٹھیمسچاگکھانجیگ مانپینّا نگاجے کھو نیرانگی لاگا ستادتے میدڈو۔“
31پیلاطُسی زیرس، ”کھیوجے کھیرتے کھیوجارانگی شریعت نانگجینلا کھویکا شاگس چوسشیگ۔“
یہُودی پے اُسکیونگونی زیرس، ”نگاجا سوجیگّانگ سادچیسّی وانگ مید۔“ 32(حضرت عیسیٰ سی کھونگ کالوگسلا ٹونگّوسین مولکھانبو ڈانڈا ڈوبچیسلا تیگون سونگ)۔
33تینے پیلاطُس کھارّی نانگکوگا سونگ یانگ حضرت عیسیٰ سی بودتے کھیونگچوگستے ٹیس، ”چی کھیرانگ یہُودی پے گیالپو اینّا؟“
34حضرت عیسیٰ سی لانسالس، ”ای ٹیوابو نیرانگ رانگی ٹیستے اینّا یا جانماگونّی نگے سکورلا شادّاراگ؟“
35پیلاطُسی زیرس، ”چی نگا یہُودی پا اینّوگا؟ کھیرانگ رانگی میگون تانگ اِمام کُنی چھونمو گونی کھیرانگ نگے لاگا ستادس۔ کھیرانگی چی چوسپین؟“
36حضرت عیسیٰ سی لانسالس، ”نگے گیالثیدپو نی، ای دُنیائی گیالثیدجیگ مان۔ کالتیس اینپینّا تینے نگے یوگپوگونّی ماگ تانگستے نگا یہُودی پاگونّی لاگا ستادچوگستے میدڈو، اِین نانگ نگے گیالثیدپو نی ای دُنیانے مان۔“
37پیلاطُسی زیرس، ”تینے کھیرانگ گیالپوجیگ اینوگ؟“
حضرت عیسیٰ سی کھوا مولس، ”نیرانگی زیرکھانبو ٹانگپو اینوگ، نگا گیالپو این۔ لدینبا، نگا تیبویپھیا سکیستے این یانگ خُدے لدینبے لامی گواہ تانگچیسّی پھیا ای دُنیائی نانّگا یونگستے این۔ لدینبابوا چامسپا چوکھان تشانگمے نگے زیرکھانگون ٹانگپو اینکھانبو شیسّانوگ۔“
38پیلاطُسی ٹیس، ”ٹانگپو چی اینوگ۔“ تینّابو زیرتے کھو یانگسکیار پھیلوگا یہُودی پا گُون یودسا سونگتے زیرس، ”نگا ای می بوے گیابگالّا چانگ سکیون تھوبّا میدوگ۔ 39اِین نانگ کھیوجے لوگثول نانگجین، نگے پیساگی توسلا کھیوجاگونّی پھیا تسونپاجیگ پھودّاد۔ نگے یہُودی پے گیالپوبو پھودّا؟“ 40کھونگونی کُوچو تانگین زیرس، ”مان کھو ماپھود۔ نگاجے پھیا برابّاپھودّا زاد“ (برابّارومی وانگثولپا نگولوگ چوکھانجیگ اینپین)۔
Currently Selected:
یوہانان 18: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
