لوکا 19
19
حضرت زکریا ٹھالنینکھانّی سکور۔
1حضرت عیسیٰ مسیح یریحُو ڈونگکھیر گیُودتے سکیود زانے، 2تیرو ٹھالنینکھانّی سپونبو حضرت زکریا زیرکھان می چھوگپوجیگ یودپین۔ 3کھوا حضرت عیسیٰ سی جالچیسّی دودپا یودپین، اِین نانگ میتشوگس تانگ کھوے گوبو چھونگون یودچیسپوے حضرت عیسیٰ سی جال مانیان۔ 4کھو سنگونلا بانگتانگستے حضرت عیسیٰ سی ستاچیسلا کھونگ سکیودچیسچانّی لامیکا یودکھانّی سیکامورّی لچانگمیکا دزاگس۔
5حضرت عیسیٰ سی تے ناسّیکا لیبّاچیگ، کیینلا زیگستے کھوا مولس، ”حضرت زکریا، یوگا گیوگسپا بابستے یونگ۔ دیرینگ نگا کھیرانگی کھانگپا ڈانگسا دُوگوس۔“ 6تینے کھو گیوگسپا بابستے، ما تھادپو نیامپو حضرت عیسیٰ سی کھورانگی کھانگپا گاسوس جْوس ۔ 7تیرو یودکھانّی می تشانگمے تیبو تھونگتے باگابوگے شادین زیرس، ”کھونگ می دِیگپاچان نیامپو جوگسا سکیود۔“
8حضرت زکریا لانگستے مسیحا زیرس، ”مسیح لے زیگسّانگ نگا یودکھانّی نور پھیدپو نگے نیالباچانلا تانگین یانگ کالتیس نگے سوجیگّا گوبسکورتے پینے لینتے یودنا، تیبوے جیلداب نگے لوگستے تانگین۔“
9حضرت عیسیٰ سی کھوا مولس، ”دیرینگ ای کھانگپے نانّگا تھارپا لیبتے این چیازیرنا کھوانگ حضرت اِبراہیم اولاد اینوگ۔ 10اِبنِ آدم ستورکھانگون ژالچیس تانگ سکیوبچیسلا یونگستے این۔“
یوگپو رچوی رومس۔
11میگونّی نیانین یود زانے، حضرت عیسیٰ مسیح کھونگونلا رومس شیگ شادّا زادس چیازیرنا کھونگ یروشالیم گیالسے نیموا یودپین۔یانگ میگونّی خُدے گیالثید تینّا زانے سنگونچیس اینوگ سامّادپین۔ 12کھونگی مولس، ”سکو ٹھاقجیگ یول تھاگرینگجیگّا گیالپوے کوسا لینتے لوگستے یونگچیسلا سونگ۔ 13کھو چھے سانگ سنگونلا کھورانگی یوگپو رچُو بودتے، کھونگ ریریا لزاوا سومی لاچھا ڈانڈے پینے تانگستے زیرس، نگا لوگستے یونگیونگ تشوگپا ای پینیبو تشونگچوالا کول۔ 14اِین نانگ تے یولّی می تشانگمے کھوا ناپھراد چوسپا، کھوے ستینگرانگنے می کھاچیگ، ’ای میبو نگاجے گیالپو چوالا نگاجا گُون تھادّا میراگ زیرّالا کالس‘۔“
15”اینّانگ کھو گیالپو گیورتے لوگتے یونگس۔ تینے تشونگ تانگستے تسام کھیے تھوبتوگ ستاچیسلا کھوے پینے تانگسکھانّی یوگپوگون بودس۔ 16یوگپو ٹانگپو یونگستے زیرس، ’سپونبولے، نیرانگی پینے تانگکھانبوے رچولدابپو نگا جور‘۔“
17”سپونبوے کھوا زیرس، ’گیالّا چوس، یوگپو زانگپو، کھیرانگ نیونگونجیگی نانّگا ایمان چان لوسپا، کھیورانّگا نگے گیالسا رچویکا وانگچھا تانّگاد‘۔“
18”یوگپو نیسپابو یونگستے زیرس، ’سپونبولے، نیرانگی پینے تانگکھانبوے ثنا لدابپو نگا جور‘۔“
19”سپونبوے کھوا زیرس، ’کھیورانّگا گیالسا ثن٘یکا وانگچھا تانّگاد‘۔“
20”تینے یوگپو سومپا یونگستے زیرس، ’مالِک، نیرانگی پینے نگے لاگپھیسّی نانّگا تومستے واستے بورپین، تا لوگستے نامس۔ 21نگا نیرانّگا جیگس چیازیرنا نیرانگ مالِک سنینگرجے میدکھان، ماتانّگا لینکھان تانگ ماتابکھانّی کانے رنگاکھان اینوگ‘۔“
22”سپونبوے کھوا زیرس، ’یوگپو نگانپا، کھیرانگی زیرکھانگون گیُودتے نگے کھیورانّگا ٹھیمسچاداین۔ نگا سنینگرجے میدکھان یانگ نگا ماتانّگا لینکھان تانگ ماتابکھانّی کانے رنگاکھان اینکھانبو گیوسیودتیانگ، 23کھیرانگی نگے پینیبو مولدزودکھانگی نانّگا چیپھیا ماتانگسپین؟ کالتیس تانگسپینّا، نگا یونگستے پھارنیامپو نگاری پینے لینتے یودڈو‘۔“
24”تینے سپونبوے تیکا لانگستے یودکھانگونلا زیرس، ’کھوے کانے پینیبو لینتے رچولداب جورکھانبوا تونگ‘۔“
25”کھونگونی زیرس، ’مالِک، کھوے لاگا رچولداب مانّگا پینے یودتے اینوگ‘۔“
26”سپونبوے لانتانگس، ’اونا، تانگسکھانبو گیالّا چوستے کولکھانگونلا مانّگا تانگین، اِین نانگ ماکولکھانگونّی کانے نیونگون یودکھانبوانگ کھیرین۔ 27تا نگا گیالپو گیورتے کھونگّونّیکا وانگثول ماتھادکھانّی نگے ڈاو گون نگے لدُونلا کھیونگستے سود‘۔“
حضرت عیسیٰ سی گیالپوے تشولّا گاسوس جْوس ۔
28تیگون مول تشارّاچیگ حضرت عیسیٰ مسیح لوبٹوگسگونّی سنگونسنگونلا یروشالیمّا سکیود۔ 29کھونگ ذیتونی ریکا #19:29 ای ریبویکا ذیتونی لچانگما مانگپو سکیستے یودپا ایبوا ذیتونی ری زیرّادپین۔ یودکھان بیت فگے تانگ بَیت عَنِیّاؔہ ڈونگسیبگونلا لیبکییس یودّاچیگ، حضرت عیسیٰ سی کھونگرانگی لوبٹوگس نیس سنگونلا لامچوگا زادتے، 30مولس، ”ا ڈونگسیبّی نانّگا سونگ، تیرو لیبّاچیگ، سوانگ ماژونکھانّی بونگسارجیگ تاگستے تھونگچین، تیبو ٹولتے یرو کھیونگ۔ 31کالتیس سوجیگی، ’کھیوجے بونگساربو چیپھیا ٹولّاد‘ زیرنا، ’مسیحا گھوسدوم دوگ‘ زیر۔“
32سنگونلا کالکھانّی لوبٹوگسگون سونگتے حضرت عیسیٰ سی مولکھان نانگجین تھونگ۔ 33بونگساربو ٹول زانے تیبوے داگپوگونّی کھونگونلا ٹیس، ”بونگساربو چیپھیا ٹولّاد؟“
34کھونگونی لانتانگس، ”مسیحا گھوسدوم دوگ۔“ 35تینے کھونگونی بونگساربو حضرت عیسیٰ سی یودسا کھیونگستے کھونگرانگونّی کوس تیبوا ستادس یانگ حضرت عیسیٰ سی تیبویکا سکیونس۔
36حضرت عیسیٰ سی سکیود زانے، میگونّی رانگرانگی کوس کھونگ سکیودسے لامیکا تینگس۔ 37کھونگ ذیتونی رینے تُھورلا چھاکھانّی لامی ناسّے نیموا لیبّاچیگ، لوبٹوگونلا ڈانگستے یونگکھان تشانگمے، کھونگی معجزہ گون تھونگ پاسانگ گامو نیامپو خُدا ستودپا پھولچیس گوزوگستے زیرس،
38”مسیح خُدے وانگچھے نانّگا
سکیودکھانّی گیالپو برکت چان۔
نامکھے نانّگا جیدے تانگ نامکھے تھوشوگّا
ژوگسکھانّی خُدا سپال کھیونگین۔“
39تے میتشوگسّی ٹونے فریسی پا کھاچیگی حضرت عیسیٰ سی زیرس، ”لوبپونلے، نیرانگی لوبٹوگس گونلا کھاسکییا زادتے تیزوگ زیرچیسنے گاگّا زادّانگ۔“
40کھونگی لانسالس، ”نگے کھیوجا زیرّاد، کالتیس کھونگون چوبچادنا، ای ردواگونّی کُوچو تانگستے ستودپا پھولین۔“
حضرت عیسیٰ سی یروشالیم پاگونّی پھیا نُگوا زادس۔
41یروشالیم گیالسے نیمو لیبّاچیگ گیالسا زیگستے حضرت عیسیٰ مسیح شومسا زادس 42یانگ کھونگی مولس، ”کالتیس کھیوجا یروشالیم پاگونّی دیرینگ جاگّا جیدے تھوبچیسّی لامبو شیسپینّا، کھیوجا تھوبتے یودڈو اِین نانگ داگسا تیبو کھیوجاگونّی میگنے واستے بورتے اینوگ۔ 43کھیوجاگونّیکا تے جاگپو لیباین نام کھیوجے ڈاو گونّی کھیوجے گیالسا کییر سکورتے سیگپا سیگستے چھوگس تشانگمانے کھیوجیکا حملہ چوین۔ 44گیالسابو ٹھیسّتور چوستے میگون سادتے میدکھان چوین۔ ردوا چیگّانگ چیگیکا ساگستے میلوس چیازیرنا خُدے کھیوجا سکیوبّا یونگکھانّی توسپو کھیوجاگونّی نُگو ماشیس۔“
تشونگپاگون بیت المقدِس سی نانگنے پھینّگا زادس۔
45تینے حضرت عیسیٰ مسیح بیت المقدِس لا سکیودتے قُربانلا پھولچیسّی سیمسچان تسونگکھانگون پھینگچیس گوزوگ زادس۔ 46حضرت عیسیٰ سی کھونگونلا مولس، ”ہلژخمہ شوقبُو بوے نانّگا خُدے مولّا زادتے دوگ، نگے کھانگپا دُعا چوسے کھانگپا زیرین، اِین نانگ کھیوجاگونّی ایبو چاگپاگونّی تشانگس چوستے دوگ۔“ #19:46 حضرت یرمیاہ شوقبُوئ 7۔ 11
47جاگدانگ کھونگی بیت المقدِس سی نانّگا لابجا سالّا زادّادپین۔ اِمام کُنی چھونمو گون، شریعتی عالِم گون تانگ یول میی اُسکیونگونی کھونگ سادچیسّی تھابس ژالچیس گوزوگ۔ 48اِین نانگ کھونگونلا سکابس ماتھوب چیازیرنا حضرت عیسیٰ سی لابجا چھونگونجیگّانگ بُود ماچوگّا نیانچیسلا میتشانگما تھادّادپین۔
Currently Selected:
لوکا 19: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
