لوکا 6
6
حضرت عیسیٰ، شابّادّی مسیح۔
1حضرت عیسیٰ مسیح شابّادّی آرام چوچیسی جاگّا جینگ گیُودتے سکیودین یود زانے، کھونگی لوبٹوگسگونّی جینگی سنییما چادتے لاگپیکا سنییستے ساون گُون زوس۔ 2فریسی پا کھاچیگی ٹیس، ”کھیوجاگونّی شابّادّی آرام چوچیسی جاگّا لاس چوستے چیا چھوسٹھیمس چاگّاد؟“
3حضرت عیسیٰ سی کھونگونلا لانسالس، ”حضرت داؤد تانگ کھوے ٹوپاگون ستوگستے یود زانے چی چوس ہلژخمہ شوقبُو بوے نانگنے کھیوجے مانے ماسیلپینّا؟ 4حضرت داؤد خُدے کورّی چھودپا پھولسے ناسّے نانّگا سونگتے ہلژخمہ تاگی کھورتے زوس، تیبو یہُودی پے اِمام مانے زاچھوگّا میدپین، یانگ کھوے، ٹوپاگونلانگ تانگس۔“ 5تینے حضرت عیسیٰ سی کھونگونلا مولس، ”اِبنِ آدم شابّادّی آرام چوچیسی جاگّا چی چو چھوگس یا میچھوگس زیرچیسّی وانگچھا یود۔“
6جان شابّادّی جاگشیگّا حضرت عیسیٰ سی مجلِس لا سکیودتے لابجا سالس، تیرو لاگپا یاسپا کھونگستے کول مانیانکھانّی میجیگ یودپین۔ 7حضرت عیسیٰ سی کھو گیالچوگنا شابّادّی جاگّا لاس چوچیسپوا سکیون کالچیسلا شریعتی عالِم گون تانگ فریسی پاگونّی کھونّگا گیالّا چوستے ستیندوگس۔
8کھونگونی سامبابو کھیینتیانگ لاگپا کھونگسکھانّی میبوا حضرت عیسیٰ سی مولس، ”یونگ یانگ تشانگمے لدُونلا لونگس۔“ تینے کھو یونگستے لانگستے دُوگس۔ 9حضرت عیسیٰ سی کھونگی کھونگونلا مولس، ”نگے کھیوجا ٹیاد، چھوسٹھیمس نانگجین شابّادّی جاگّا لاس زانگپو چو چھوگّانوگّا یا نگانپا، سروک سکیوب چھوگّانوگّا یا میدکھان؟“
10حضرت عیسیٰ سی او گیورین کھونگ ریریا زِیگس، تینے لاگپا کھونگسکھانبوا مولس، ”لاگپا کیونگ“ یانگ کھوے لاگپا کیانگسپا تیبو سینگ گیال۔ 11اِین نانگ کھونگونلا ثو ثانٹے یونگستے حضرت عیسیٰ سی نیامپو چی چوین زیرتے کھورانگونّی نانّگا ٹابس چوچیس گوزوگ۔
حضرت عیسیٰ سی رسُول چوگنییسپو سکوا زادس۔
12جاگشیگ حضرت عیسیٰ مسیح دُعا جوالا ری جیگیکا سکیودس، یانگ تشان گانگپو خُدا دُعا چوس۔ 13نگاتوگ چھاچیگ لوبٹوگسگون بودّا زادس یانگ کھونگونی ٹونے چوگنییس لدامّا زادتے کھونگون رسُول گُونلا سکوا زادس۔ 14رسُول چوگنییسپوے مینگّون،
حضرت شمعُوؔن (حضرت عیسیٰ سی کھوے مینّگا حضرت پطرؔس تاگا زادس)، کھوے نو حضرت اندرؔیاس ، حضرت یعقُوبؔ ، حضرت یُوؔحنّا ٰ، حضرت فِلپُس، حضرت برتلما، 15حضرت متّی، حضرت توما تانگ حلفئی سی بُوژا حضرت یعقُوبؔ ، حضرت شمعُوؔن (کھوا یولدادچان زیرّادپین)، 16#6:16 کھوا حضرت تَدیانگ زیرّادپین حضرت یعقُوبؔ ی بوژاحضرت یہُودہ تانگ یہُوداؔہ اِسکریوت پاکابوے حضرت عیسیٰ مسیح ستینگنے نگولوگ چوس۔
برکت تانگ جیگسنانگ۔
17حضرت عیسیٰ مسیح لوبٹوگسگون نیامپو رینے بابستے ناسّا نیومشیگ پھالچانجیگیکا ژوگس۔ تیکا کھونگی لوبٹوگس مانگپو تانگ یہُودیہ یولجونگس، یروشالیم گیالسا یانگ گیاتشوے تھاما یودکھانّی صُور تانگ صیدا گیالسا گونّے یونگسکھانّی میتشوگس چھینمو دزومتے یودپین۔ 18کھونگون حضرت عیسیٰ سی یودسا کھونگی لابجا نیانچیس یانگ کھونگرانگونّی ناد گیالچوگّالا یونگس، یانگ ردود جُوگستے یودکھانگونّانگ حضرت عیسیٰ سی پھانچوگا زادس۔ 19می تشانگمے حضرت عیسیٰ سی لاگپا تھوگچیسّی سونڈوس چوادپین چیازیرنا کھونگی نانگنے پھانچوگچیسّی ستوبس بینگستے نادپا تشانگما گیالچوگّا زادس۔
20تینے حضرت عیسیٰ سی لوبٹوگس گونلا زیگستے مولس،
”نیالباچان کھیوجا برکت چان این،
چیازیرنا کھیوجا خُدے گیالثید نورسکالّا تھوبین۔
21داگسا ستوگسکھانگون کھیوجا برکت چان این
چیازیرنا کھیوجاگون تشیمشوگّا زادِین۔
داگسا نگوکھانگون کھیوجا برکت چان این
چیازیرنا کھیوجاگون گوداین۔
22اِبنِ آدم ایمان چوچیسپوے
میگونّی ناپھراد چوستے،
ٹھیل چوگستے ٹوا ماثیا نگانپا تھیکھانگون
کھیوجا برکت چان این۔
23تیزوگ چونّگاچیگ تھادپو چوستے چھومس، چیازیرنا نامکھے نانّگا کھیوجا شزدے ٹاگپو یود۔ تینّا ژوگس نگانپا کھونگی اتا اپو گونّیانگ خُدے پیغمبر گون نیامپو چوسپین،
24اِین نانگ کھیوجا چھوگپوگونلا تسامشیگی جیگسپا مییونگ
کھیوجاگونلا سکیدپو تھوب تشارتے این۔
25داگسا ٹودپا ڈانگسکھانگون کھیوجا تسامشیگی جیگسپا مییونگ
کھیوجا ستوگری ثانٹے تھونگین ۔
داگسا گودکھانگون کھیوجا تسامشیگی جیگسپا مییونگ،
کھیوجاگونلا ردوگپو تانگ نگوچیس یونگین۔
26می تشانگمے ستودپا تانگکھان کھیوجا تسامشیگی جیگسپا مییونگ
کھونگونی اتا اپو گونّیانگ زوسمے پیغمبر گونلا
ستودپا تانگستے اینپین۔“
ڈاو گونلا یاشا چوچیس۔
27”اینّانگ نگے کھیوجا نیانکھانگونلا زیرّاد، ڈاو گونلا چامسپا یانگ کھیوجا ناپھراد چوکھانگونلا زانگپو چوس، 28کھیوجا نگان تابسکھانگونلا برکت تونگ یانگ کھیوجا نگانپا چوکھانگونّی پھیا دُعا توب۔ 29کالتیس سوجیگی کھیوجے ڈامبا یاسپا ڈاملچاگس تانگنا، ڈامبا یومانگ ڈاملچاگس لینّالا ستانتونگ۔ کالتیس سوجیگی کھیوجے کوسپو کوگستے کھیرنا کھوا کامیسپوانگ کھیرچیسنے گھاگ ماگھاگ۔ 30تونگ زیرکھان تشانگمالا تونگ، یانگ میوسپْا چوستے کھیوجے نور کھیرکھانبوا لوگستے کھیونگ مازیر۔ 31جانمے کھیوجا چوگوس سامکھان ژوگس کھیوجاگونّیانگ جانماگونلا چوس۔“
32”کالتیس کھیوجا چامسپا چوکھانگونلا کھیوجے چامسپا چونا، کھیوجا چی پھانتھوگس تھوبین۔ دِیگپاچان گُونانگ کھونّگا چامسپا چوکھانگونلا چامسپا چوانوگ۔ 33یانگ کالتیس کھیوجے کھیوجا زانگپو چوکھانگونلا زانگپو چونا کھیوجا چی پھانتھوگس تھوبین۔ می دِیگپاچان گُونانگ تیزوگ چوانوگ۔ 34یانگ کالتیس کھیوجے لوگستے تھوبچیسّی ریوا یودکھانگونلا سکیستے تانگنا، کھیوجا چی پھانتھوگس تھوبین۔ می دِیگپاچان گُونانگ دِیگپاچانگونلا سکیستے گانگپو لوگستے تھوبچیسّی ریوا بورّانوگ۔“
35”اینّانگ کھیوجے ڈاو گونلا چامسپا تانگ زانگپو چوس یانگ لوگستے تھوبچیسّی سامبا ماتانّگا کھونگونلا سکییس۔ تینے کھیوجا شزدے چھینمو تھوبین یانگ کھیوجاگون کھیود چان خُدے ٹھوگوگون گیورین چیازیرنا کھونگی، کاٹین میڈانکھان تانگ مینگانپا تشانگمالا شزدے زیگسانوگ۔ 36کھیوجے نامکھے یاب سنینگرجیچان جُوگسکھان تسوگسلا کھیوجانگ سنینگرجیچان گیور۔“
جانمے سکیون پھینگچیس۔
37”کھیوجے جانما سکیون رجود ماچو تینے کھیوجانگ سکیون رجود میزاد۔ جانما نیالوے نانّگا لیبچیسّی اوسپا دوگ مازیر، تینے کھیوجانگ نیالوے چھادپا میپھوگ۔ مُعافی تونگ تینے کھیوجانگ مُعافی سالّا زادِین۔ 38جانما تونگ، تینے کھیوجانگ سالّا زادِین، تیبو تابچیسّی نودّی نانّگا نانتے سکانگستے لودین خُدے سیمسّانگستے کھیوجے تھوے نانّگا سالین۔ کھیوجے کولکھانّی تشادپو کھیوجاگونّی پھیانگ کولّا زادِین۔“
39کھونگونلا رومس گیُودتے حضرت عیسیٰ سی مولس، ” جارا جیگی جارا لام ستانّیاناینّا؟ نییسکا سادونگی نانّگا میگییلّا؟ 40لوبٹوگس لوبپونّی سانگ ٹاگا مانوگ، اِین نانگ لوبپونّے لوبجونگ تھارکھییل تھوبستے ستینگنے لوبٹوگسگانگ کھو ژوگس گیورین۔
41کھیوجے رانگی میگی نانّگا یودکھانّی ردونگمابوا نانگستاگ چوا میدنا تینے فونو سی میگی نانّگا یودکھانّی ٹماق بوا چیا ستاد؟ 42کھیرانگی فونو ، ’نگے کھیرانگی میگی نانگنے ٹماق بو پھینگین‘ زیرچیسّی ہامپا کازوگی چواد، نام کھیرانگی میگی نانّگا یودکھانّی ردونگمابو کھیورانّگا تھونّگا میدوگ۔ کھیوجا ریاکاری گُون، سنگونلا رانگی میگی ردونگمابو پھینگ، تینے فونو سی میگی نانگنے ٹماق بو پھینّگالا کھیوجا سالپو چوستے تھونگ تھوبین۔“
لچانگما تانگ تیبوے ڈاسبو۔
43”لچانگما زانگپوجیگّا ڈاسبو نگانپا میسمین یانگ لچانگما نگانپاجیگّا ڈاسبو زانگپو میسمین۔ 44لچانگمے ریگسپو تیبوے ڈاسبوی کانے شیسّانوگ۔ تشیرمانگی کانے پھیگی کھازاس یا لچانگتشیرّی کانے رگونّی کھازاس میتو۔ 45می زانگپوے سیمس زانگپوے بانگدزودنے ڈاسبو زانگپو سمینّانوگ، یانگ می نگانپے سیمس نگانپے بانگدزودنے ڈاسبو نگانپا سمینّانوگ۔ سنینگ گنگستے لودکھانبو کھانے بینّگانوگ۔“
ماگلدان سنا نیس۔
46”کھیوجے نگا مسیح لے مسیح لے چیا زیرّاد، نام کھیوجے نگے زیرکھانگون چوا میدوگ؟ 47نگیکا یونگستے نگے سپیراگون نیانتے تیکا لاگلین چوکھانبو کازوگ میجیگ این نگے کھیوجا ستانین۔ 48کھو کونڈو ڈوستے کھانگپا سیگچیسلا ڈاگیکا ماگلدان تانگکھانّی می ژوگس این۔ چھولوگ یونگستے کھانگپا ثانٹے پھوگنانگ جیگ ماجیگ چیازیرنا تیبو ستانپو سیگستے یودپین۔ 49نگے زیرکھانگون تشورتے لاگلین ماچوکھانبو، ماگلدان ماتانّگا کھانگپا سیکا سیگسکھان ژوگس این۔ چھولوگی چھو پھوگّاچیگ کھانگپابو ردیبستے پاد میدکھان چھین۔“
Currently Selected:
لوکا 6: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
