لوکا 9
9
حضرت عیسیٰ سی چوگنییسپو کالا زادس۔
1حضرت عیسیٰ مسیح لوبٹوگس چوگنییسپوا بودّا زادتے ردود ژوگسکھانگونّی نانگنے ردود تشانگما پھینگچیس تانگ ناد پھانچوگچیسّی کھیود تانگ وانگچھا سالّا زادس۔ 2یانگ خُدے گیالثیدّی گاموےناتسُول شادچیس تانگ زُومو یونگکھانگون پھانچوگچیسلا تیکانے لامچوگا زادس۔ 3کھونگونلا مولس، ” کھیرانگونّی بیسّی پھیا ڈولچیسّی بیرگا، یا جولا، یا کھارجی یا پینے یا کوسلاگ تھیبا ماکھور۔ 4کھیوجا دوگسا تانگکھانّی تینّا کھانگپے نانّگا دوگ نامتشوگپا تے ڈونگکھیرنے بینگتے میچھا۔ 5کالتیس ڈونگکھیرجیگی نانّگا سوجیگیانگ کھیوجا گاسوس ماچونا، تے ڈونگکھیرنے بینگتے چھا زانے رانگی کانگپے تھالبا ثوگستے کھونگون خُدے چھادپے پھیا بورکھانبو ستون۔“ 6کھونگون کھامیولنے کھامیولّا سکیودتے کارونگسا گاموےناتسُول شادس یانگ زُومو یونگکھانگون پھانچوگا زادس۔
7کالون ہیرودِیس لا حضرت عیسیٰ سی زادکھان تشانگما تشورپا تھاما تھےژومس سونگ چیازیرنا کھاچیگی حضرت یُوؔحنّا ٰ شیکھانگونّی ٹونے سونتیا لانّگا زادتے اینوگ زیرّادپین۔ 8جان کھاچیگی سنگونمے پیغمبر حضرت اِلیاس سنگونتے اینوگ یانگ کھاچیگی سنگونمے پیغمبر گونّی ٹونے چیگ سونتیا لانگستے اینوگ زیرس۔ 9ہیرودِیس زیرس، ”نگے یوحنّانی گو چادچوگستے اینپین۔ تینے ایبو سو اینوگ کابوے سکورلا نگا معجزہ سپیراگون تشورین اینوگ“ یانگ کھوے حضرت عیسیٰ سی تھونگچیسّی سکابجیگ ژالّادپین۔
حضرت عیسیٰ سی می ستونگ ثنا کھارجی سالس۔
10حضرت عیسیٰ مسیح رسُول گُون لوگتے یونگستے کھونگونی چوسکھان تشانگمے سکورلا شادس، یانگ حضرت عیسیٰ سی کھونگون چیگپو ٹھیدتے بیت صیدا زیرکھانّی ڈونگکھیرلا سکیودس۔ 11اِین نانگ میتشوگسلا تیبو گیوسّونگتے کھونگی ستینگرانگنے ڈانگستے سونگ۔ حضرت عیسیٰ سی کھونگونلا گاسوس جْوس تے خُدے گیالثیدّی سکورلا شادّا زادس یانگ کھونگی زُومو یونگستے یودکھانگون پھانچوگا زادس۔
12نییما گورگورلا، لوبٹوگس چوگنییسپو حضرت عیسیٰ سی یودسا یونگستے زیرس، ”نییکھورّی ناسّا تانگ گامیولگونلا سونگتے کھورانگونّی پھیا زان نیوچیس یانگ دوگسا ژالچیسلا میتشوگسپو لامچوگا زادّانگ چیازیرنا نگاتانگون چانگ میدسے ریستونگی نانّگا اینوگ۔“
13حضرت عیسیٰ سی مولس، ”کھیوجے کھونگونلا زاچیس تونگ۔“
کھونگونی لانتانگس، ”نگاجا ای میتشوگسلا گابچیسّی زان نیوا سونگتے مانے، نگاجے لاگا تاگی ثنا تانگ نیا نیس مانے مید“ 14تیرو یودکھانّی بُوژا گُون نی#9:14 تے میتشوگسّی نانّگا بومو تانگ ٹھوگو گُونانگ یودکیاگ۔ اِین نانگ تیگون ماسیا اینوگ ٹانگسکا ستونگ ثنا زامشیگ یودپین۔
حضرت عیسیٰ سی لوبٹوگس گونلا مولس، ”تا تشانگما ہالام ثنابچُو ثنابچُوی سدے چوستے دوگچوگ۔“
15تینے کھونگی مولکھان نانگجین کھونگونی میتشانگما دوگچوگس۔ 16حضرت عیسیٰ سی تاگی ثنا تانگ نیا نیسپو چھاگّا نامس یانگ نامکھا زیگستے خُدا شُکر جْوس ، تاگی چاگستے میتشوگسلا گوچیسّی پھیا لوبٹوگس گونلا سالّا زادس۔ 17کھونگ تشانگما ڈانگس ڈانگس زوس یانگ لوبٹوگسگونّی لاگلوسگون لدوسپا پاگتسے چوگنییس گانگ۔
حضرت پطرؔس سی حضرت عیسیٰ سی سو اینکھانبو شادس۔
18جاگشیگ حضرت عیسیٰ مسیح چیگپو دُعا جوا سکیودس کھونگی لوبٹوگسگون کھونگی نیموا یودپین، کھونگی کھونگونلا ٹیا زادس، ”میگونّی نگا سو اینوگ زیردوگ؟“
19کھونگونی لانتانگس، ”کھاچیگی غوتا سالکھان حضرت یُوؔحنّا ٰ، کھاچیگی پیغمبر حضرت اِلیاس، یانگ جانماگونّی پیغمبر شیکھانگونّی ٹونے چیگ چیگ سونگتیا لانگستے اینوگ زیردوگ۔“
20حضرت عیسیٰ سی مولس، ”کھیوجے نگا سو اینوگ زیرّاد۔“
حضرت پطرؔس سی لانتانگس، ”نیرانگ خُدے لدامّا زادکھانّی مسیحا جُوگستے اینوگ۔“
21حضرت عیسیٰ سی کھونگونلا تے سپیراگون سوانگ میشادچیسلا کا سالس۔ 22کھونگی مولس، ”یہُودی پے اُسکیونگون، اِمام کُنی چھونمو گون تانگ شریعتی عالِم گونّی کانے اِبنِ آدم ردوگنگال مانگپو نیونگستے شیگوشیس یانگ جاگ سومپے جاگّا سونتیا لانگین۔“
23تینے کھونگی کھونگ تشانگمالا مولس، ”نگے ستینگرانگنے یونّگا تھادکھانگون، رانگدود پھانگستے جاگدانگ رانگی ردوگنگالّی کیانگشینگ کھورتے نگا ڈانگسگوس۔ 24رانگثوگ سکیوبنیین یودکھانگونّی لدینبے میتشے سکیالاین، اِین نانگ نگے پھیا کھورانگی سروک سکیالکھانگونّی لدینبے میتشیبو سکیوبین۔ 25میجیگّا دُنیا گانگپو تھوبتیانگ رانگی لدینبے میتشے سکیالنا چی پھانتھوگس۔ 26کالتیس سوجیگی نگاتانگ نگے لابجے گواہ تانگچیسلا ٹھیلبا تشورنا، نگا اِبنِ آدم نگارانگی شان تانگ یابّی شان ّی نانّگا ہلژخمہ فرشتاگون نیامپو لوگستے یونگ زانے، نگیانگ کھوا ٹھیلبا تشورین۔ 27نگے کھیوجا لدینبا زیرّاد، ایکا یودکھان کھاچیگی خُدے گیالثید تھونگتے مانے میشی۔“
حضرت عیسیٰ سی زیرّجید سنگونس۔
28تیگون مولتے ہالام جاگ گیادّی ستینگنے حضرت عیسیٰ سی حضرت پطرؔس ، حضرت یُوؔحنّا ٰ تانگ حضرت یعقُوبؔ ٹھیدتے ری جیگیکا دُعا جوالا سکیودس۔ 29دُعا جوین یود زانے کھونگی ژالدونگی نانّگا گیورجا یونگس، یانگ کھونگی نامزا ستامینیانچیس ودچان کارپو گیور۔ 30ہونمیدلا کھونگونی می نیس، حضرت مُوسیٰؔ تانگ حضرت اِلیاس حضرت عیسیٰ سی نیامپو جالتا سالین جال۔ 31کھونگونی شان ّی نانّگا حضرت عیسیٰ سی دُنیانے سکیودچیسّی سکورلا مولّا زادِین تشور، کا بو یروشالیمّی نانّگا کھونگی گیوگسپا ڈوبچوگّا زادِین۔
32حضرت پطرؔس تانگ کھوے ٹوپاگون نیدلا چھین یودپین، اِین نانگ حضرت عیسیٰ سی شان سنگونّاچیگ کھونگون نییدنے پادتشاد یانگ کھونگونی حضرت عیسیٰ سی شان تانگ کھونگ نیامپو جانگستے یودکھانّی می نیسکو جال۔ 33یانگ حضرت مُوسیٰؔ تانگ حضرت اِلیاس حضرت عیسیٰ سی نا بیتے سکیود زانے حضرت پطرؔس سی حضرت عیسیٰ سی زیرس، ”سپونبولے، نگاجا ایکا یودچیسپو گیالّا سونگ۔ نگاجے جوگسا سوم سیگاین، نیرانگی پھیا چیگ، حضرت مُوسیٰؔ سی پھیا چیگ، یانگ حضرت اِلیاس پھیا چیگ۔“ کھوا چی زیرگوشیسپو ہاماگوپا، کھوے تیبو زیرس۔
34کھوے تیگون زیرکھان زانے ثینجیگ بابستے کھونگون کابس، ثینّی کاباین یود زانے کھونگون ثانٹے جیگس۔ 35تینے ثینّی نانگنے سونگسکادچیگی مولس، ”یبو نگے بُوژانگارانگی لدامکھانبو این، کھوے زیرکھانگونلا نیون۔“
36سونگسکادپوے مول تشارّاچیگ، کھونگونی حضرت عیسیٰ سی چیگپو ماستوگس سوانگ ماجال۔ لوبٹوگسگونّی تھونگکھان تانگ تشورکھانگون تیتوسلا سوانگ ماشادّا سانگستے بورس۔
حضرت عیسیٰ سی بُوژا جیگی نانگنے ردود پھینّگا زادس۔
37ستینگماجاگا کھونگون رینے بابستے سکیودّاچیگ، میتشوگس چھینموجیگ حضرت عیسیٰ سی تھوگّالا یونگس۔ 38میتشوگسّی ٹونے میجیگی کُوچو تانگین زیرس، ”لوبپونلے، جوجو نگے بُوژا پھانچوگا زادّانگ، کھو نگے ٹھوگوا چیگچیگپو این۔ 39ردود پو نگے بوتشے نانّگا جوگساچیگ کھوے کُوچو ثانٹے تانگدوگ یانگ کھو سا گیابستے زوگسپو گانگپو دارین کھانے ووا بینگدوگ۔ توس مانگچھیا ردود پو کھوے نانّگا دُوگستے کھوا ناگس ثانٹے ستاندوگ۔ 40نیرانگی لوبٹوگس گونلا ردود پو پھینگ جوجو زیرتے جُووا پھولپین اِین نانگ کھونگونلا تیبو پھینگ مانیان۔“
41حضرت عیسیٰ سی مولس، ”ایمان میدکھان تانگ نگانپا میرابس، نامتشوگپا نگا کھیوجاگون نیامپو دوگ؟ نامتشوگپا نگے کھیرانگّون نیامپو زودپا بورگوس؟ کھیرانگی بُوژا بُویکا کھیونگ۔“
42بُوژا بُو یونگ زانے ردود پوے کھو سا گیابستے زوگسپوبو دارین لوس۔ اِین نانگ حضرت عیسیٰ سی ردود پوا کھاسکییا زادتے بُوژا بُو پھانچوگا زادس یانگ کھو کھورانگی ابا ستادس۔ 43کھونگ تشانگما خُدے چھاگلاس جیگسپو تھونگتے ہالاس۔
می تشانگمے حضرت عیسیٰ سی زادکھان تشانگما ہالاستے ستین یود زانے، حضرت عیسیٰ سی کھونگرانگی لوبٹوگس گونلا مولس، 44”نگے زیرچیسچانبوا گیالّا چوستے نیون۔ اِبنِ آدم نگولوگ چوستے ڈاو گونّی لاگا ستاداین۔“ 45اِین نانگ کھونگونلا حضرت عیسیٰ سی مولکھانبو ہاماگو چیازیرنا تیگون سانگوے نانّگا بورّا زادتے اینپین، یانگ کھونگونلا تیبوے تونبو ٹیچیسّی ہامپا مایونگس۔
خُدے گیالثیدّی نانّگا ٹاگشوگ۔
46لوبٹوگسگونّی نانّگا کھورانگونّی ٹونے ٹاگشوگ سو این زیرین زیرزیر گوزوگ۔ 47حضرت عیسیٰ مسیح کھونگونی سامبا کھیینپا کھونگی ٹھوگو چھونگونجیگ کھیونگستے کھونگرانگی لدوا لانگچوگّا زادس۔ 48تینے حضرت عیسیٰ سی کھونگونلا مولس، ”نگے لوبٹوگس اینچیسپوے سوجیگی ای ٹھوگو تسوگسشیگّا گاسوس چونا نگا گاسوس چوستے این یانگ سوجیگی نگا گاسوس چونا نگا کالا زادکھانّی یابّا گاسوس جْوس تے این۔ کھیوجے ٹونے چھونگشوگپو ٹاگشوگ این۔“
49یوحنّانی زیرس، ”مسیح، میجیگی نیرانگی تشان کھورتے ردود پھینّگا نگاجے تھونگ، یانگ نگاجے کھوا تیبو چو میچوگچیسّی سونڈوس چوسپین چیازیرنا کھو نگاتانگی ٹوپا مانپین۔“
50اِین نانگ حضرت عیسیٰ سی مولس، ”کھوا گھاگ ماگھاگ، سوجیگی کھیوجے گیابگال ماچونا کھو کھیوجے چھوگسلا اینوگ۔“
سامریہ پاگونّی حضرت عیسیٰ سی سیوا ماچوس۔
51حضرت عیسیٰ مسیح نامکھا لینچیسّی توس نیمو لیبپا سیمسّی نانّگا تھےژومس مازادّا کھونگ یروشالیم چھوگسلا سکیودّا زادس۔ 52کھونگی لونکھیرکھان کھاگچیگ سنگونلا لامچوگا زادس، چھین یود زانے کھونگون سامریہ یولجونگسّی گامیولجیگّا سونگتے حضرت عیسیٰ سی میگون نیامپو تھوگچیسلا ڈالڈیگ چوس۔ 53اِین نانگ تے گامیولپاگونّی کھونّگا گاسوس ماجوس چیازیرنا کھونگ یروشالیمّا سکیودّا زادچیسپو کھونگونلا گیوسّونگ۔ 54کھونگی لوبٹوگس حضرت یعقُوبؔ تانگ یوحنّانی تیبو تھونّگاچیگ زیرس، ”مسیح، نیییرانگ تھوگستھادنا نگاجے نامکھانے میے بابستے کھونگون میدکھان چوچیسلا کا تانّگا؟“
55اِین نانگ حضرت عیسیٰ سی کھونگ چھوگسلا گیورّا زادتے کھاسکییا زادس۔ 56تینے کھونگون جان گامیولجیگّا سکیودس۔
حضرت عیسیٰ سی ڈانگشیس لامو مان۔
57حضرت عیسیٰ مسیح تانگ کھونگی لوبٹوگسگون لامنے سکیود زانے میجیگی حضرت عیسیٰ سی زیرس، ”نیرانگ کارُو سکیودنانگ نگا نیرانّگا ڈانگستے یونگین۔“
58حضرت عیسیٰ سی لانسالس، ”واتسیا واتشانگس تانگ، نامکھے چا چاتشانگس یودتے اینوگ، اِین نانگ نگا اِبنِ آدم گو بورتے آرام چوچیسی ناسّانگ مید۔“
59حضرت عیسیٰ سی جان میجیگّا مولس، ”نگے ستینگرانگنے ڈونگس“، اِین نانگ کھوے زیرس، ”مسیح لے، سنگونلا نگا کھانگپا سونگتے نگارانگی ابا شیتے سوبچیسّی پھیا ڈالڈیگ چوچیسلا گونگسپا سال۔“
60حضرت عیسیٰ سی کھوا مولس، ”رُوحانی تھوگنے شیکھانگونلا کھورانگونّی شیکھانگون سوبچوگ، اِین نانگ کھیرانگ سونگتے میگونلا خُدے گیالثیدّی سکورلا شود۔“
61یانگ میجیگی زیرس، ”مسیح، نگا نیرانگی ستینگرانگنے ڈانگسین، اِین نانگ سنگونلا نگا نگے نانگتشانگسلا سلام زیرّالا چھاچوگّا زاد۔“
62حضرت عیسیٰ سی کھوا مولس، ”شولّا تھامستے گیابّا ستاکھانگون خُدے گیالثیدّی نانّگا جابشی ژواچیسّی اوسپا مان۔“
Currently Selected:
لوکا 9: LBJNT
Highlight
Share
Copy
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
