Génesis 15
15
Abram halbot ta jamal yu'un Dios ya x'a'bot snich'an
1Ta patil te c'ohtix ta pasel ini, tal te sc'op Jehová ta stojol Abram ta scuenta nahalsitil, hich la yal: Ma xiwat, Abram, ho'on jcanantaywanejon awu'un, mero muc' ya xc'oht amahtan,#15.1 O: ho'on muc'ul mahtanilon awu'un xchi sc'oblal.
2La sjac' te Abram: Cajwal Jehová, ¿bin yac awa'bon te bin ut'il mayuc jnich'an? Te mach'a ya yich'bon te bintic ay cu'un, ha te Eliezer te talem ta Damasco, xchi. 3Soc la yal xan te Abram: Ilawil, ma ba awa'beyejon jnich'an, ha yu'un te mach'a ya yich'bon te jbiluque ha te jtuhl a'bat te ayin ta jna, xchi.
4Patil tal sc'op te Jehová ta stojol, hich halbot: Ma ha'uc te ya yich'bat hilel abiluc, ha ya yich'bat hilel abiluc te mero anich'an, xchi. 5Hich la yic' loq'uel ta fuera soc la yalbe: Ilawil te ch'ulchan, ahtaya te eq'uetic teme ya xhu' awu'une, xchi. Soc la yalbe xan: Hich yipal ats'umbal ya xc'oht, xchi.
6Te Abram la sch'uhun te Jehová, ha ac'ot ta cuenta yu'un te toj ay.
7Hich halbot yu'un te Jehová: Ho'on Jehovahon te la jquic'at loq'uel tal ta Ur yu'un te caldeohetic yu'un ya ca'bat aq'uinalin te q'uinal ini, xchi.
8Hich la sjac' te Abram: Cajwal Jehová ¿bin ut'il ya jna' teme ya quich' te q'uinale? xchi.
9Halbot yu'un te Jehová: Ic'bon tal jcoht wacax te oxeb ya'bilal, jcoht yantsilel tentsun te oxeb ya'bilal, jcoht tat tuminchij te oxeb ya'bilal, jcoht xpuliwoc soc jcoht stsuhmut, xchi.
10Hich te Abram la yic' tal spisil, la sjaticlan ta ohlil; te jujujaht jujuchohl la yac', jamal hil ta ohlil. Yan te mutetic ma ba la sjaticlan stuquel. 11Te mutetic te ya sti'ic ti'bal co tal ta sba te milbil chambahlametic, pero te Abram la stijticlan bahel. 12Yac ta mahlel c'ahc'al a c'uhb swayel te Abram, bayel xiw yo'tan yu'un mero ihc' baht te q'uinal ta stojol.
13Hich te Jehová la yalbe te Abram: Na'a me te ya xnahin ats'umbal ta yan q'uinal, ya x'ochic ta mosohil tey a, jbahc' (400) ha'bil ya x'uts'inotic. 14Pero ho'on ya ca'be stoj te nación te ya xmosohinotic yu'une; patil ya xloq'uic tal soc bayel sc'ulejalic. 15Yan te ha'ate lamal awo'tan a yac atsob aba soc te chawinic ame'atat, mamalatix a yac awich' muquel. 16Ta schancajal ats'umbal ya suhtic tal li'i, yu'un ma to sts'acay te smul te amorreohetique, xchi.
17Mahlix c'ahc'al, ihc'ubix q'uinal a, chicnaj tut yawil c'ahc' te yac ta loq'uel sch'ahilel, soc tuxul c'ahc', c'axic ta yohlil te chambahlametic te jaticlambil ta ohlil. 18Ha yorahil a te la schap sc'op soc Abram te Jehová, hich la yal: Ya ca'be ats'umbal te q'uinal ini, ya xhahch ta muc'ul-ha' yu'un Egipto#15.18 Ma ha'uc te muc'ul-ha' Nilo, ha te uc'um yu'un Egipto, ilawil Jos 15.4. c'alal ta muc'ul-ha' Éufrates; 19ha te sq'uinal te ceneohetic, cenezeo, cadmoneo, 20heteo, ferezeo, refaita, 21amorreo, cananeo, gergeseo soc te jebuseohetique, xchi.
Currently Selected:
Génesis 15: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
