Génesis 30
30
1C'alal la yil te Raquel te ma ba ya yayintesbe snich'an te Jacob, hahch sti'ti'o'tantay te swix, hich la yalbe te Jacob: A'bon calatac, teme ma'uque, ya xchamon, la yut.
2Te Jacob ilin ta stojol Raquel, hich la yalbe: ¿Ho'on bal Dioson te ma xcac' x'alajat? la yut.
3La yal te Raquel: Li' ay te jcriada Bilha; wayan soc, ac'a ayinuc yal ta sjol cacan, hich ay calatac ya xc'oht ta scuenta a, xchi.
4La ya'be yic' te scriada; hich te Jacob way soc. 5Hahch yal te Bilha, hich la yayintesbe snich'an te Jacob. 6Ha yu'un la yal te Raquel: Dios la schahpanon, la ya'iybon jc'op, la ya'bonix jquerem-al, xchi. Ha yu'un la ya'be sbihilin Dan.#30.6 Dan: la schahpan, xchi.
7Cha'alaj xan te Bilha te scriada Raquel, schebalix yal yu'un a te Jacob. 8La yal te Raquel: Ta scuenta tulan tsaltamba la jtsal jba soc te jwix, hu'ix cu'un, xchi. La ya'be sbihilin Neftalí.#30.8 Neftalí: la jca'iy tsalaw, xchi.
9C'alal la yil te Lea te quechajemix ta al, la yic' tal te scriada, ha te Zilpa, la ya'be yic' te Jacob. 10Te Zilpa, te scriada Lea, la yayintesbe snich'an te Jacob. 11La yal te Lea: Mero lec bin c'oht ta jcuenta, xchi. Ha yu'un la ya'be sbihilin Gad.#30.11 Gad: lec bin c'oht ta scuenta, xchi.
12Patil te Zilpa, te scriada Lea, la yayintesbe yan snich'an te Jacob. 13La yal te Lea: C'ax bayel yutsil q'uinal ya ca'iy; como te antsetic ya me yalic te bayel cutsilal, xchi. Ha yu'un la ya'be sbihilin Aser.#30.13 Aser: bayel yutsil q'uinal ya ya'iy, xchi.
14Ta yorahil te ya yich' tsobel trigo, te Rubén la sta mandrágoras#30.14 Cuybil yu'unic te ya x'alaj ants yu'un teme ya swe' te mandrágora. ta aquiltic, la yich'be tal te Lea te snane. Te Raquel la yalbe te Lea: Awocoluc, a'bon te mandrágoras te la sta te awale, xchi.
15Pero la sjac' te Lea: ¿Yu'un bal jteb nax sc'oblal yac awa'iy te apojbeyejon te jmamalal, ya bal ac'an yac apojbe ehuc te mandrágoras yu'un te cale? xchi.
Hich la yal te Raquel: Teme yac awa'bon te mandrágoras yu'un te awale ya xhu' ya sjoquinat ta wayel yo'tic ta ahc'abal te Jacob, xchi.
16C'alal suht tal ta a'tel ta tibiltic te Jacob, te Lea baht sta tal, hich la yalbe: Ya me ajoquinon ta wayel yo'tic, yu'un jelbilatix cu'un ta mandrágoras yu'un te cale, xchi. Hich te Jacob la sjoquin ta wayel.
17Dios la stsacbe sc'op te Lea, cha'hahch xan yal, la yayintesbe yo'ebal snich'an te Jacob. 18La yal te Lea: Dios la ya'bonix jmahtan yu'un te la jcac' wayuc soc jcriada te jmamalal, xchi. Ha yu'un Isacar#30.18 Isacar: jteb ma pajaluc ta a'iyel soc: a'beyel smahtan, xchi, soc: majanel ta tojel, xchi. c'oht sbihil yu'un.
19Patil cha'hahch xan yal te Lea, swaquebalix squerem-al yu'un a te Jacob. 20La yal te Lea: C'ax bayel yutsil te jmahtan la ya'bon te Diose. Yo'tic ya xtal sjoquinonix ta nahinel te jmamalal, yu'un la jcayintesbeyix waqueb snich'nab, xchi. Ha yu'un la ya'be sbihilin Zabulón.#30.20 Zabulón: tohytesbeyel sc'oblal, xchi wan.
21Patil ayin yantsil-al te Lea, la ya'be sbihilin Dina.
22Te Dios la sna' te Raquel, la ya'iybe sc'op, la yac' te ya x'alaj. 23Hahch yal, ayin squerem-al, ha yu'un hich la yal: Dios la sloq'uesbon jq'uexlal, xchi. 24La ya'be sbihilin José,#30.24 José: ya yich' a'beyel xan, xchi. yu'un la yal: Ac'a ya'bon yan jquerem-al te Jehová, xchi.
Jacob la schap sc'op soc Labán
25C'alal ayinemix yal a te Raquel, ha te José, te Jacob la yalbe te Labán: Ticonawon bahel ta jlumal, ta jq'uinal. 26A'bon bahel te antsetic cu'un te la jcac' jba ta a'batinel awu'un ta scuentahic, soc te jnich'nab, ac'awon bahel. Como yac ana' te jayeb bintic la jpas ta atojol, xchi.
27La sjac' te Labán: Teme ay yutsil awo'tan cu'un, joquinawon xan; yu'un la jquilix te ha'at ta acuenta te ya'beyejon bendición te Jehová, xchi.
28Soc la yal xan: Halbon ca'iy te jayeb atojol yac ac'ambon, ya ca'bat, xchi.
29Hich la sjac' te Jacob: Ha'at ana'oj bin ut'il cac'oj jba ta a'batinel awu'un soc bin ut'il c'oht cu'un te chambahlametic awu'une. 30Mayuc tsobol awu'un a te c'alal hulon talel, pero bayel p'ohlemiquix; te Jehová la ya'batix bendición ta jcuenta. Ta ora ini ¿bin ora ya x'a'tejon ta scuenta te mach'atic ay cu'un ta jna? xchi.
31¿Bin yac ac'an ya ca'bat? xchi te Labán.
La sjac' te Jacob: Mayuc bin yac awa'bon. Teme yac apasbon te bin ya cal, ya jcanantaybat xan te tuminchijetic awu'une. 32Ya xc'axon yo'tic ta yohlil spisil te chambahlametic awu'un, parte ya jloq'ues spisil te p'uhlomtic, ts'ihtiltic soc spisil te ihc'al alal tuminchijetic, soc te p'uhlomtic soc ts'ihtiltic tentsunetic; ha jtojol ya xc'oht. 33Hich ya xchicnaj ta patil bahel te toj te co'tane. Te c'alal ya xtal awil te jtojol, yac ana' teme yacon ta elec' teme ay tentsun te mayuc spintohil soc mayuc sp'uhlomil, soc teme ay tuminchij te ma ba ihc', xchi.
34Ha yu'un la yal te Labán: Lec ay, hich ac'a c'ohtuc te bin yac awale, xchi.
35Pero te Labán ta yorahil nix a la sloq'ues te p'uhlomtic soc jisaltic yihc'al tat tentsunetic, spisil te p'uhlomtic soc ts'ihtiltic me' tentsunetic, spisil te jteb nax sacal soc spisil te jteb nax yihc'al te tuminchijetic, la ya'be scanantay te snich'nabe. 36La yac' te oxeb c'ahc'al sbehlal yiloj sbahic soc te Jacob. Te Jacob la scanantaybe hilel te jayeb xan tuminchijetic yu'un te Labán.
37Pero te Jacob baht sle tal yaxal c'ab-te' álamo, almendro soc castaño-te', pohch'olpohch' la scho'be spat, scuenta yu'un jisaltic sacal ta ilel c'oht. 38La yac' te cho'bil sc'ab te' ta stojol te chambahlametic ta bateahetic te banti ya xtal yuch'ic ha', yu'un tey ya scuch sbahic a te c'alal ya xtal yuch'ic te ha'e. 39Hich ya xhahch yal te tuminchijetic ta stojol te cho'bil sc'ab te'etique. Hich tohc yalic te jisaltic yihc'al, pintohetic, soc ts'ihtiltic sch'ahlel. 40Te Jacob parte la yac' te alal tuminchijetic, te yantique la ya'be sjoquin te jisaltic yihc'al soc te ihc'al tuminchijetic yu'un Labán. Parte la yac' te tuminchijetic yu'un, ma ba la ya'be scap sba soc te tuminchijetic yu'un Labán. 41Soc te jayeb buelta ya sc'an ya scuch sbahic te tuminchijetic te ay yipic, te Jacob la yac' te sc'ab te'etic ta bateahetic ta stojol te tuminchijetic scuenta yu'un tey ya scuch sbahic a ta stojol te sc'ab te'etique. 42Yan teme ha tal te tuminchijetic te mayuc yipic, ma ba la yac' ta stojolic te sc'ab te'etic. Ha yu'un Labán c'oht te banti mayuc yipic, yu'un Jacob c'oht te banti ay yipique. 43Hich bayel p'ohl sc'ulejal te Jacob, ay tsobol tuminchijetic, criadahetic soc a'batetic, camellohetic soc burrohetic yu'un.
Currently Selected:
Génesis 30: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
